Nu Kae Nye Xɔse?

ALEKE nàɖe xɔse gɔmee? Ame aɖewo gblɔna be enye nane dzi xɔxɔ se eŋumabumabui. Amerikatɔ ŋutinya kple nyadzɔdzɔ ŋlɔla xɔŋkɔ H. L. Mencken gblɔ kpɔ be xɔse nye “nu si mate ŋu adzɔ o la dzi xɔxɔ se susumanɔmetɔe.”

Gake Biblia ya meɖɔ xɔse be enye nuwo dzi xɔxɔ se eŋumabumabu susumanɔmetɔe nenema o. Mawu ƒe Nya la gblɔ be: “Xɔse nye dziɖoɖo ɖe nu siwo wole mɔ kpɔm na la ŋu [kakaɖedzitɔe], nu ŋutɔŋutɔ siwo li togbɔ be womekpɔa wo o la ŋuti ɖeɖe fia si dze kɔtɛ.”—Hebritɔwo 11:1.

Esi wònye be nukpɔsusu vovovo ye le amewo si ku ɖe nu si xɔse nye ŋu ta la, mina míadi ŋuɖoɖo na biabia siwo gbɔna:

• Vovototo kae le ale si Biblia ɖe xɔse gɔme kple ale si amewo bua nu si wònye la dome?

• Nu ka tae wòle vevie be míatu xɔse si ŋu Biblia ƒo nu tso la ɖo?

• Aleke nàwɔ atu xɔse sẽŋu ɖo?

Gomenɔamesigbalẽ Kple Kpeɖodzi Sẽŋu

Le ɣeyiɣi si me woŋlɔ Biblia gbalẽ si nye Hebritɔwo la, Helagbe me nya si gɔme woɖe be ‘dziɖoɖo ɖe nu ŋu kakaɖedzitɔe’ nye nyagbe si zazã bɔ ŋutɔ. Wozãnɛ le asitsatsa ŋuti nuŋlɔɖiwo me zi geɖe wònyea kpeɖodzi be nunɔamesi aɖe ava zu ame tɔ. Esia tae numekugbalẽ aɖe gblɔ be woate ŋu aɖe Hebritɔwo 11:1 gɔme be “Nu siwo wokpɔ mɔ na ƒe gomenɔamesigbalẽ.”

Ne èƒle nane le adzɔha aɖe si dzi wokana ɖo la gbɔ helala be woatsɔe ava aƒe me na ye la, ke xɔse sia ƒomevie nye ema nèɖe fia. Esi nu si nèƒle ŋuti ɖaseɖigbalẽa le asi wò ta la, ena xɔse le asiwò ɖe adzɔha la ŋu. Le gɔmesese aɖe nu la, nuƒeƒle ŋuti ɖaseɖigbalẽa zu gomenɔamesigbalẽ si na kakaɖedzi wò be nu si nèƒle la ava ka asiwò. Ne ɖaseɖigbalẽa bu alo nètsɔe ƒu gbe la, ke wò nutɔnyenye ƒe kpeɖodzia bu. Nenema kee, ame siwo si xɔse le be Mawu awɔ eƒe ŋugbedodowo dzi la kana ɖe edzi be nu siwo yewole mɔ kpɔm na la ava eme godoo. Gake nu siwo ƒe ŋugbe Mawu do la mate ŋu ava eme na ame siwo si xɔse mele o, alo woƒe xɔse me va gbɔdzɔ kura la o.—Yakobo 1:5-8.

Nyagbɔgblɔ evelia si dze le Hebritɔwo 11:1, si gɔme woɖe be “ɖeɖe fia si dze kɔtɛ,” la he susu yi nu si aɖe kpeɖodzi si to vovo na nu si dzena wokpɔna ko afia la dzi. Le kpɔɖeŋu me, edzena abe ɣea ye ƒoa xlã míaƒe anyigba la ene—edona tso ɣedzeƒe heɖea zɔ to dziŋgɔli me heɖoa xɔ le ɣetoɖoƒe. Gake kpeɖodzi siwo ɣletiviŋutinunya kple akɔntabubu ɖe fia la ɖee fia be menye ɣea kple eŋuti ɣletinyigbawoe ƒoa xlã míaƒe anyigba la o. Ne èva nya nu tso esia ŋuti kpeɖodzi ŋu nyuie eye nèka ɖe edzi be enye nyateƒe la, xɔse ava nɔ asiwò be anyigba lae ƒoa xlã ɣea, togbɔ be menye nenemae wòdzena nèkpɔna o hã. Esia mefia be ɖeko nèxɔ edzi se eŋumabumabui o. Ŋutete boŋue su asiwò be nàkpɔ nuwo abe ale si wole ŋutɔŋtɔ ene, ke menye abe ale si wodzenae ene o.

Aleke Gbegbee Xɔse Sẽŋu Le Vevie?

Biblia de dzi ƒo na mí be míatu xɔse sẽŋu si wotu ɖe kpeɖodzi siwo li ke dzi la ɖo, ne esia wɔwɔ bia be míatrɔ míaƒe dzixɔsewo kura gɔ̃ hã. Xɔse sia le vevie ŋutɔ. Apostolo Paulo ŋlɔ be: ‘Ne xɔse mele mía si o la, míate ŋu adze Mawu ŋu o; elabena ele be ame si ke tena va Mawu gbɔ la, naxɔ ase be Mawu li, eye wònye teƒeɖola na ame siwo dinɛ vevie.’—Hebritɔwo 11:6, Biblia Alo Ŋɔŋlɔ Kɔkɔe La-Le Eʋegbe Me.

Kplamatsedonu geɖewo le xɔse sẽŋu tutuɖo me. Gake ne èɖe afɔ ene siwo me míadzro le nyati siwo kplɔe ɖo me la, àte ŋu akpɔ dzidzedze.