Te Ðe Mawu Ŋu

Esime Yehowa Ƒo Nu Tso Eɖokui Ŋu

2 Mose 34:6, 7

ALEKE nàɖɔ Mawu—eƒe amenyenye kple ale si wòwɔa nui? Bu eŋu kpɔ be nàte ŋu abia nya Mawu ŋutɔ tso eɖokui ŋu eye nàsee wòaƒo nu tso eƒe nɔnɔmewo ŋu na wò. Mɔnukpɔkpɔ ma tututue su nyagblɔɖila Mose si. Dzidzɔtɔe la, gbɔgbɔ ʋãe wòŋlɔ nu si dzɔ la ɖi.

Mose ƒo koko na Yehowa le Sinai To la dzi be: “Meɖe kuku, na makpɔ wò ŋutikɔkɔe la!” (2 Mose 33:18) Le ŋkeke si kplɔe ɖo dzi la, mɔnukpɔkpɔ su nyagblɔɖilaa si wòkpɔ Mawu ƒe ŋutikɔkɔe ƒe akpa sue aɖe. * Mose megblɔ nu siwo katã wòkpɔ le ŋutega wɔdɔɖeamedzi ma me la tsitotsito o. Ke boŋ nane si le vevie kura ŋu koŋue wòƒo nu tso, si nye nya siwo Mawu gblɔ. Na míadzro nya siwo Yehowa gblɔ la me, abe ale si wòdze le 2 Mose 34:6, 7 ene.

Nu gbãtɔ si Yehowa ɖe fia tso eɖokui ŋue nye be yenye “nublanuikpɔla kple amenuve Mawu.” (Kpukpui 6) Le agbalẽnyala aɖe ƒe nya nu la, Hebrigbe me nya si gɔme woɖe be “nublanuikpɔla” la ɖe ale si Mawu “ƒe dɔme trɔna ɖe ame ŋu abe ale si vifofo sena le eɖokui me ɖe viawo ŋui ene la fia.” Nya si gɔme woɖe be ‘amenuveve’ la do ƒome kple dɔwɔnya si “he susu yi ale si ame aɖe ƒe dzi aʋãe be wòakpe ɖe ame aɖe si hiã tu ŋu faa la dzi.” Eme kɔ ƒãa be Yehowa di be míanya be yeléa be na yesubɔlawo abe ale si dzilawo léa be na wo viwo ene—le numalɔ̃malɔ̃ le ame gbɔ ƒe lɔlɔ̃ kple ɖetsɔtsɔ le woƒe nuhiahiãwo me vevie me.—Psalmo 103:8, 13.

Yehowa gblɔ yi edzi be yenye ame si “gbɔa dzi blewu.” (Kpukpui 6) Medoa dziku ɖe esubɔla siwo le anyigba dzi la ŋu kabakaba o. Ke boŋ egbɔa dzi ɖi na wo hetsɔa dzidodo kpɔa wo sinu be woava ɖe asi le woƒe mɔ vɔ̃wo ŋu.—2 Petro 3:9.

Mawu yi edzi gblɔ be yenye ame si ƒe “amenuveve [deto] kple [nyateƒe] sɔ gbɔ.” (Kpukpui 6) Amenuveve deto, alo nuteƒewɔwɔ ƒe lɔlɔ̃, nye nɔnɔme vevi aɖe si dzi Yehowa tona naa ƒomedodo si le eya kple eƒe amewo dome la me gasẽna ɖe edzi helia ke. (5 Mose 7:9) Yehowae nye nyateƒe ƒe dzɔtsoƒe hã. Mate ŋu able ame o, eye womate ŋu able eya hã o. Esi wònye “nyateƒe Mawu” ta la, míate ŋu axɔ nya sia nya si wògblɔna, si me eƒe ŋugbedodo siwo ku ɖe etsɔme ŋu hã le, la dzi ase bliboe.—Psalmo 31:5, NW.

Nyateƒenya vevi bubu aɖe si Yehowa di be míanya tso ye ŋue nye be yetsɔa ‘vodada, dzidada, kple nu vɔ̃ kena.’ (Kpukpui 7) Elɔ̃na tsɔa nu vɔ̃ wɔla trɔdzimewo ƒe ‘nu vɔ̃wo kea’ wo. (Psalmo 86:5) Togbɔ be ele nenema hã la, Yehowa medea nu gbegblẽ wɔwɔ dzi o. Egblɔ be ‘yemegbea tohehe o.’ (Kpukpui 7) Mawu kɔkɔetɔ kple dzɔdzɔetɔ la megblẽ ame siwo ɖonɛ koŋ nɔa nu vɔ̃ wɔm la ɖi tomahemahee o. Woaxɔ woƒe nuwɔna vɔ̃awo ŋuti fetu godoo.

Ale si Yehowa ŋutɔ ƒo nu tso eɖokui ŋu la na wòdze ƒãa be edi be míadze si ye ahanya nu tso yeƒe amenyenye kple nuwɔnawo ŋu nyuie. Ðe esia meʋã wò be nàgasrɔ̃ nu geɖe tso eƒe nɔnɔme lédzinamewo ŋu oa?

[Etenuŋɔŋlɔ]