2 Na Mawu Ŋuti Sidzedze Vavãtɔ Nasu Asiwò

‘Esiae nye agbe mavɔ la: be woanɔ wò, Mawu vavã ɖeka la ŋuti sidzedze xɔm.’—Yohanes 17:3.

NU KAE NYE MƆXENUA? Ame aɖewo gblɔna be Mawu aɖeke meli o. Ame bubuwo hã xɔe se be Mawu nye ŋusẽ triakɔ aɖe si menye ame ŋutɔŋutɔ o. Ame siwo xɔe se be ame ŋutɔŋutɔe wònye la hã ƒe nufiafiawo le ame si wònye kple nɔnɔme siwo le esi ŋu la tsia tsitre ɖe wo nɔewo ŋu.

ALEKE NÀWƆ AÐU MƆXENUA DZI? Mɔ siwo dzi nàto ana Mawu ŋuti sidzedze nasu asiwò la dometɔ ɖekae nye ŋkuléle ɖe nu siwo wòwɔ ŋu. Apostolo Paulo gblɔ be: “[Mawu ƒe] nɔnɔme makpɔmakpɔawo dzena gaglãa wokpɔna tso xexea wɔwɔ dzi heyina, elabena wodzena wokpɔna le nu siwo wòwɔ la me, ɛ̃, eƒe ŋusẽ mavɔmavɔ kple Mawunyenye la dzena.” (Romatɔwo 1:20) To ŋkuléle ɖe dzɔdzɔmenu siwo le xexea me ŋu tsitotsito dzi la, àte ŋu asrɔ̃ nu geɖe tso mía Wɔla la ƒe  nunya kple ŋusẽ ŋu.—Psalmo 104:24; Yesaya 40:26.

Gake be Mawu ƒe amenyenye ŋuti sidzedze vavãtɔ nasu mía si la, ehiã be mía dometɔ ɖe sia ɖe naʋu Mawu ƒe Nya, Biblia la, ahadzro eme. Mèganɔ anyi ɖi ahaɖe mɔ ame bubuwo nakpɔ ŋusẽ ɖe ale si nàbu nuwo ŋui dzi o. Ke boŋ wɔ ɖe Biblia ƒe nuxlɔ̃ame sia dzi be: “Midzudzɔ agbenɔnɔ ɖe nuɖoanyi sia ƒe nɔnɔme nu, ke boŋ mina woatrɔ miaƒe nɔnɔme to miaƒe tamesusu wɔwɔ yeyee me, bene miado Mawu ƒe lɔlɔ̃nu nyui dzeameŋu si le blibo la kpɔ na mia ɖokui.” (Romatɔwo 12:2) Le kpɔɖeŋu me, bu nyateƒenya siwo gbɔna, siwo Biblia ɖe fia tso Mawu ŋu la ŋu kpɔ.

Ŋkɔ le Mawu si. Mawu ƒe ŋkɔ ŋutɔŋutɔ dze le Biblia me zi gbɔ zi akpe geɖe. Mawu ƒe ŋkɔa dze le Biblia gɔmeɖeɖe geɖe me le Psalmo 83:19, afi si xlẽ be: “Ne woadze sii be, ŋkɔwòe nye Yehowa, eye wò ɖeɖe koe ɖo kpo ɖe anyigba blibo la dzi!”

Seselelãme le Yehowa Mawu si, si dzi amegbetɔwo ƒe nuwɔnawo kpɔa ŋusẽ ɖo. Esi Yehowa na ablɔɖe Israel viwo tso Egiptetɔwo ƒe kluvinyenye me megbe la, wova gbe wɔwɔ ɖe eƒe aɖaŋuɖoɖowo dzi ɣeaɖewoɣi. Woƒe aglãdzenuwɔnawo ‘do dziku nɛ.’ Woƒe nuwɔnawo “[do vevesese] na Israel ƒe Kɔkɔetɔ la.”—Psalmo 78:40, 41.

Yehowa tsɔ ɖe le eme na mía dometɔ ɖe sia ɖe. Yesu gblɔ na eƒe nusrɔ̃lawo be: “Ðe womedzraa atsutsrɔe eve xɔa gaku ɖeka, si ƒe home le sue oa? Ke hã, wo dometɔ ɖeka pɛ hã mage adze anyigba le mia Fofo ƒe manyamanya me o. Ke woxlẽ miaƒe taɖawo katã kura gɔ̃ hã. Eya ta migavɔ̃ o: Miexɔ asi sãsãsã wu atsutsrɔe geɖewo.”—Mateo 10:29-31.

Mawu mekpɔa ŋudzedze ɖe ameƒomevi alo dukɔ aɖewo ŋu wu bubuwo o. Apostolo Paulo gblɔ na Helatɔwo le Atene bena Mawu “[wɔ] amewo ƒe dukɔ sia dukɔ tso ame ɖeka me, be woanɔ anyigba blibo la dzi.” Egblɔ hã be Mawu “mele adzɔge tso mía dometɔ aɖeke gbɔ . . . o.” (Dɔwɔwɔwo 17:26, 27) Apostolo Petro gblɔ be: “Mawu mekpɔa ame ŋkume o, ke boŋ le dukɔ sia dukɔ me la, ame si vɔ̃nɛ, eye wòwɔa nu dzɔdzɔe la, eyae dzea eŋu.”—Dɔwɔwɔwo 10:34, 35.

VIÐE KAE ADO TSO EME? “Dzo le [ame aɖewo] me ɖe Mawu ŋu; gake menye le sidzedze vavãtɔ nu o.” (Romatɔwo 10:2) Ne ènya nu si tututu Biblia fia tso Mawu ŋu la, àte ŋu aƒo asa na ameflunyawo eye ana nàte “ɖe Mawu ŋu.”—Yakobo 4:8.

Kpɔ agbalẽ si nye Nuka Tututue Nye Biblia ƒe Nufiafia? * ƒe ta 1 si nye “Ameka Tututue Mawu Nye?,” hena numeɖeɖe bubuwo.

[Etenuŋɔŋlɔ]

[Nɔnɔmetata si le axa 6]

Mɔ siwo dzi nàto ana Mawu ŋuti sidzedze nasu asiwò la dometɔ ɖekae nye ŋkuléle ɖe nu siwo wòwɔ ŋu