Fia Nu Viwòwo

Samuel Yi Edzi Nɔ Nu Si Nyo La Wɔm

ÈKPƆ ame bubuwo wonɔ nu gbegblẽ wɔm kpɔa?— * Samuel ya kpɔe kpɔ. Enɔ afi aɖe si màsusui kpɔ be nu mawo tɔgbi ate ŋu adzɔ le o. Afi mae nye Mawu ƒe avɔgbadɔa me, alo afi si wodea ta agu na Mawu le, le Silo dua me. Na míakpɔ ale si wòdzɔe ƒe 3,000 kple edzivɔe nye esia be avɔgbadɔa va zu Samuel ƒe aƒe me la ɖa.

Do ŋgɔ na Samuel dzidzi la, dadaa Xana di vevie be yeadzi vi. Esime Xana yi avɔgbadɔa me gbe ɖeka la, edo gbe ɖa na Mawu tso esia ŋu. Enɔ gbe dom ɖa vevie ale gbegbe be eƒe nuyiwo nɔ ʋaʋãm butubutu. Esia na be nunɔlagã Eli susui be emu aha. Gake esi Eli va nyae be nu xamee wònɔ la, eyrae gblɔ be: ‘Israel ƒe Mawu la awɔ nu si nèbiae la na wò!’—1 Samuel 1:17.

Emegbe la, Xana dzi Samuel, eye dzi dzɔe ale gbegbe be wògblɔ na srɔ̃a Elkana be, ‘Ne metso no na Samuel teti ko la, ekema makplɔe ayi avɔgbadɔa me be wòasubɔ Mawu le afi ma.’ Eye nu ma tututue wòwɔ! Ɣemaɣi la, Samuel anya xɔ ƒe ene alo ƒe atɔ̃ ko.

Eli ku amegã eye viaŋutsu siwo nye Xofni kple Pinehas menɔ ta dem agu na Yehowa nyuie o. Wonɔ agbe gbegblẽ nɔm kple nyɔnu siwo vaa avɔgbadɔa me gɔ̃ hã! Èsusu be nu kae wòle be wo fofo nawɔ hafi?— Ɛ̃, ɖe wòle be wòahe to na wo, eye maɖe mɔ na wo woayi edzi anɔ nu gbegblẽ mawo wɔm o.

Samuel ɖevi la nɔ tsitsim le afi ma, eye anɔ eme godoo be enya nu tso Eli viwo ƒe nu gbegblẽ wɔwɔa ŋu. Ðe Samuel srɔ̃ woƒe nuwɔna gbegblẽwoa?— Ao, eyi edzi nɔ nu si nyo la wɔm abe ale si ko edzilawo fiae be wòawɔ ene. Eya ta esɔ be Yehowa do dziku ɖe Eli ŋu. Mawu dɔ nyagblɔɖila aɖe gɔ̃  hã wòyi Eli gbɔ ɖagblɔ ale si wòahe to na Eli ƒe ƒomea, vevietɔ viaŋutsu vɔ̃ɖiawo, la nɛ.—1 Samuel 2:22-36.

Samuel yi edzi nɔ subɔsubɔm kple Eli le avɔgbadɔa me. Gbe ɖeka le zã aɖe me, esime Samuel nɔ alɔ̃ dɔm la, ese gbe aɖe wònɔ eŋkɔ yɔm. Eya ta Samuel ƒu du yi Eli gbɔ, gake Eli gblɔ nɛ be, yemeyɔe o. Egase gbea ake. Esi Samuel gase gbea zi etɔ̃lia megbe la, Eli gblɔ nɛ be, ne egase gbea ake la, neɖo eŋu be: “Ƒo nu, Yehowa! Wò dɔla kè to ɖi.” Esi Samuel gblɔ nya ma la, Yehowa ƒo nu kplii. Ènya nya si Yehowa gblɔ nɛa?—

Mawu gbugbɔ gblɔ tame si wòɖo be yeahe to na Eli ƒe ƒomea la na Samuel hã. Esi ŋu ke la, Samuel nɔ vɔvɔ̃m be yeagblɔ nya si Yehowa gblɔ la na Eli. Gake Eli ɖe kuku na Samuel be: “Megaɣla naneke ɖem o!” Eya ta Samuel gblɔ nu siwo katã Yehowa gblɔ be yeawɔ la na Eli—abe ale si ko Mawu ƒe nyagblɔɖila la gblɔe na Eli do ŋgɔe ene. Eli ɖo eŋu be: ‘Yehowa newɔ nu si dze eŋu ko!’ Mlɔeba la, wowu Xofni kple Pinehas, eye Eli ŋutɔ hã ku.—1 Samuel 3:1-18.

Le wo katã me la, ‘Samuel nɔ tsitsim, eye Yehowa nɔ kplii.’ Ɣemaɣi la, Samuel anya nɔ eƒe ƒewuiwo me, si nye ɣeyiɣi vevi aɖe le sɔhɛwo ƒe agbe me. Èsusu be enɔ bɔbɔe na Samuel be wòayi edzi anɔ nu si nyo la wɔm esime ame bubuwo ya menɔ ewɔm o gɔ̃ hã?— Togbɔ be menɔ bɔbɔe na Samuel o hã, eyi edzi subɔ Yehowa nuteƒewɔwɔtɔe le eƒe agbe me ŋkekewo katã me.—1 Samuel 3:19-21.

Ke wò ya ɖe? Ànɔ abe Samuel ene, nenye be èle tsitsima? Àyi edzi anɔ nu si nyo la wɔma? Àyi edzi alé Biblia ƒe nufiafiawo kple nu siwo dziwòlawo fia wò la me ɖe asia? Ne èwɔe nenema la, àna be Yehowa kple dziwòlawo siaa nakpɔ dzidzɔ.

[Etenuŋɔŋlɔ]

Nyabiasewo:

○ Aleke wòdzɔe be Samuel va nɔ subɔsubɔm le Yehowa ƒe avɔgbadɔa me?

○ Kuxi kawoe Samuel do go le afi ma?

○ Kpɔɖeŋu nyui kae Samuel ɖo ɖi na sɔhɛwo?