TSO ƒe 1992 me la, Dɔdzikpɔha la de dɔ asi na hamemetsitsi kpɔnuteƒe aɖewo be woakpe asi ɖe woƒe kɔmiti vovovoawo ŋu le woƒe dɔwo wɔwɔ me. * (Kpɔ etenuŋɔŋlɔa.) Kpeɖeŋutɔ siawo, siwo nye ‘alẽ bubuawo’ me tɔwo la wɔa dɔ vevi aɖewo tsɔ doa alɔ Dɔdzikpɔha la. (Yohanes 10:16) Woawo hã wodea kwasiɖa sia kwasiɖa ƒe kpekpe si kɔmiti si me wole la wɔna. Woƒe dɔ ye nye be woana nyatakaka ɖe sia ɖe si hiã ahado woƒe susuwo ɖa. Dɔdzikpɔha la me tɔwoe tsoa nya me, eye kpeɖeŋutɔawo kpɔa egbɔ be wowɔ ɖe nyametsotsoawo dzi pɛpɛpɛ. Nɔviŋutsu siawo lɔ̃na faa wɔa dɔ ɖe sia ɖe si wode wo si. Wozɔa mɔ kple Dɔdzikpɔha la me tɔwo yia takpekpe tɔxɛwo kple dukɔwo dome takpekpewo. Woɖoa wo ɖa ɣeaɖewoɣi abe dɔwɔƒegã la ƒe amedɔdɔwo ene be woaɖasrã alɔdzedɔwɔƒewo kpɔ.

Nɔviŋutsu aɖe si subɔ abe Dɔdzikpɔha ƒe kpeɖeŋutɔ ene tso ƒe 1992 me la gblɔ be, “Ne mewɔ dɔ si wode asinye nyuie la, ekema Dɔdzikpɔha la ate ŋu alé fɔ ɖe gbɔgbɔmenyawo gbɔ kpɔkpɔ ŋu bliboe.” Nɔviŋutsu bubu si hã na kpekpeɖeŋu ƒe 20 sɔŋ la gblɔ be, “Nyemebui kpɔ be mɔnukpɔkpɔ gã sia gbegbe asu asinye o.”

Dɔdzikpɔha la de dɔ geɖe asi na woƒe kpeɖeŋutɔwo eye wokpɔa ŋudzedze ɖe dɔ sesẽ siwo wɔm nɔviŋutsu nuteƒewɔla siawo le la ŋu. Mina mí katã ‘míayi edzi ade bubu ame siawo ƒomevi ŋu vevie.’—Filipitɔwo 2:29.