FOFONYE kple danye wodo go wo nɔewo le Dukɔwo Dome Biblia Nusrɔ̃viwo ƒe takpekpe si wowɔ le ƒe 1919 me le Cedar Point Ohio, U.S.A. Woɖe wo nɔewo le ƒe ma ke me. Wodzim le ƒe 1922 me, eye wodzi nɔvinyeŋutsu Paul ƒe eve megbe. Wodzi srɔ̃nye Grace le ƒe 1930 me. Wohe srɔ̃nye dzila siwo ŋkɔwoe nye Roy kple Ruth Howell abe Biblia Nusrɔ̃viwo ene, eye tɔgbuia kple mamaa hã nye Biblia Nusrɔ̃viwo henye Nɔviŋutsu Charles Taze Russel xɔlɔ̃wo.

Medo go Grace le ƒe 1947 me, eye míeɖe mía nɔewo le July 16, 1949 dzi. Hafi míaɖe mía nɔewo la, míeɖo dze tso ale si míanɔ agbe le míaƒe srɔ̃ɖeɖea megbe ŋu naneke maɣlamaɣlae. Míetso nya me be míawɔ ɣeyiɣiawo katã ƒe subɔsubɔdɔa eye míadzi vi o. Le October 1, 1950 dzi la, míedze mɔɖeɖedɔa gɔme ɖekae. Emegbe le ƒe 1952 me la, wokpe mí be míawɔ nutome sue dzikpɔkpɔdɔa.

Mí ame evea siaa míese le mía ɖokui me be míehiã kpekpeɖeŋu geɖe hafi míate ŋu awɔ dɔdeasi yeyea. Esime menɔ nu srɔ̃m tso nɔviŋutsu kpɔnuteƒewo gbɔ la, medi be woakpe ɖe Grace hã ŋu. Eya ta mete ɖe Marvin Holien, si nye míaƒe ƒomea xɔlɔ̃ ɣeyiɣi didi aɖe, si si nuteƒekpɔkpɔ geɖe su le mɔzɔzɔdɔa me la ŋu, eye mebiae be: “Grace metsi o eye nuteƒekpɔkpɔ mesu esi o. Àte ŋu afia nɔvi aɖe mí si wòate ŋu awɔ dɔ kplii ɣeyiɣi didime aɖe be wòana heheea?” Eɖo eŋu be: “Ɛ̃. Nɔvinyɔnu Edna Winkle nye mɔɖela bibi si ate ŋu akpe ɖe eŋu geɖe.” Emegbe Grace gblɔ tso Edna ŋu be: “Enana meɖea dzi ɖi le ʋɔtruawo nu. Enya ale si wòaɖo dzeɖonyanutsinyawo nu nyuie, eye wòfia ale si maɖo to aƒemenɔlaa ale be mate ŋu aɖo nyawo ŋu wòasɔ lam. Eya tututue nye ame si mehiã!”

Nye kple Grace míesubɔ le nutome sue eve me le Iowa. Nutome suea lɔ Minnesota kple South Dakota ƒe akpa aɖewo hã ɖe eme. Emegbe woɖo mí ɖe New York Nutome Sue Gbãtɔ, si ƒe akpa aɖee nye Brooklyn kple Queens ƒe nutowo me. Esi  míeva ɖo nutome sue ma me la, ɖeko míese le mía ɖokui me be míenya naneke o. Brooklyn Heights Hamea hã le nutome sue ma me, eye wokpena le Fiaɖuƒe Akpata si le Betel la me, eye Betel ƒomea me tɔ kpɔnuteƒe geɖe le afi ma. Esi meƒo subɔsubɔnuƒo gbãtɔ le hame ma me megbe la, Nɔviŋutsu Nathan Knorr te ɖe ŋunye eye wògblɔ nam be: “Malcolm, èɖo aɖaŋu nyui aɖewo na mí siwo dzi wòle be míawɔ ɖo, eye esɔ ŋutɔ. Mègaŋlɔ be o be, ne mèkpe ɖe mía ŋu to aɖaŋu nyuiwo ɖoɖo na mí me o la, viɖe aɖeke manɔ ŋuwò le habɔbɔa me o. Wòe le dɔ dzi.” Le kpakpã megbe la, megblɔ nya sia na Grace. Eyome míeyi dziƒoxɔ si me míedze le Betel la me. Dzimaɖitsitsi na ɖeɖi te mía ŋu ale gbegbe be míefa avi.

Ɣleti ʋɛ aɖewo megbe la, míexɔ lɛta be míade Gilead Suku ƒe klass 24 lia, si nu woawu le February 1955 me. Hafi míayi sukua la, wona míenya be hehe si míaxɔ la mefia kokoko be woana míazu dutanyanyuigblɔlawo o. Ke boŋ hehe si míaxɔ akpe ɖe mía ŋu be míawɔ mɔzɔzɔdɔa nyuie wu. Míesrɔ̃ nu dodzidzɔname geɖe le sukua, eye wògana míebɔbɔ mía ɖokuiwo hã.

Esi míewu sukua nu la, wode dɔ asi na mí be míawɔ nutome gã dzikpɔkpɔdɔ. Míaƒe nutome gã la lɔ Indiana, Michigan kple Ohio ɖe eme. Le December 1955 me la, ewɔ nuku na mí esi míexɔ lɛta tso Nɔviŋutsu Knorr gbɔ si me wògblɔ le be: “Gblɔ nu si le wò dzi me la nam, eye nàto nyateƒe nam. Ne èdi be yeava Betel anɔ afi sia ɖaa . . . alo ne èdi be yeasubɔ le Betel ɣeyiɣi aɖe eye emegbe woade dɔ asi na ye yeaɖasubɔ le duta la, na manya. Ne nutome gã kple nutome sue dzikpɔkpɔdɔa hãe do dzidzɔ na wò la, madi be manya.” Míeɖo eŋu be ado dzidzɔ na mí be míawɔ dɔ ɖe sia ɖe si wode mía si. Enumake wobia tso mía si be míava Betel!

Le ƒe siwo me míesubɔ le Betel dzidzɔtɔe me la, meyina ɖaƒoa nuƒowo le hamewo kple takpekpe vovovowo me le United States bliboa. Mekpe asi ɖe eŋu wona hehe nɔviŋutsu ɖekakpui geɖe siwo va xɔ agbanɔamedzi gãwo le Yehowa ƒe habɔbɔa me. Mlɔeba la, meva zu Nɔviŋutsu Knorr ƒe agbalẽŋlɔla le dɔwɔƒe si wɔa ɖoɖo ɖe xexea me katã ƒe gbeƒãɖeɖedɔa ŋu.

Mekpɔ dzidzɔ etɔxɛ le ƒe siwo me menɔ subɔsubɔm le Subɔsubɔ Dɔdzikpɔƒea. Mewɔ dɔ kple T. J. (Bud) Sullivan le afi ma. Ekpɔ dɔwɔƒe ma dzi ƒe geɖe va yi. Gake ame bubuwo hã li siwo gbɔ mesrɔ̃ nu geɖe le. Fred Rusk, si wode dɔ asi na be wòana hehem la, nye wo dometɔ ɖeka. Meɖo ŋku  edzi be mebiae gbe ɖeka be, “Fred, nu ka tae nèɖɔa nu geɖewo ɖo le lɛta siwo meŋlɔna dometɔ aɖewo me?” Eko nu, eye wògblɔ be, “Malcolm, ne ègblɔ nya aɖe kple nu la, àte ŋu aɖe eme le mɔ vovovo nu, gake ne èŋlɔ nane la, ele be egɔme nanya se eye vodadawo naganɔ eme o, vevietɔ ne etso mía gbɔ afi sia.” Eyome egblɔ tufafatɔe be, “Lé dzi ɖe ƒo—èle agbagba dzem, eye eteƒe madidi o, nuwo atsɔ afɔ na wò.”

Esi ƒeawo va nɔ yiyim la, wode dɔ vovovowo asi na Grace le Betel; wo dometɔ ɖekae nye xɔmedzadzraɖo, si bia be wòana nuwo nanɔ ɖoɖo nu le xɔdɔmewo me. Dɔa vivia enu ŋutɔ. Va se ɖe egbea la, ne míedo go ame siwo nye ɖekakpuiwo le Betel ɣemaɣi dometɔ aɖewo la, wogblɔna na Grace kple nukoko be, “Èfia ale si maɖo aba lam nyuie ŋutɔ, nyemable wò o, esia do dzidzɔ na danye ŋutɔ.” Dɔwɔwɔ le Magazine kple Agbalẽŋɔŋlɔ dɔwɔƒewo kpakple Kasɛtwɔƒea hã do dzidzɔ na Grace ale gbegbe. Dɔ vovovo siawo wɔwɔ kpe ɖe eŋu wòkpɔe be nu sia nu si míewɔ le Yehowa ƒe habɔbɔa me alo afi sia afi si míesubɔna le la nye mɔnukpɔkpɔ kple yayra na mí. Esena le eɖokui me nenema va se ɖe egbe.

Le ƒe 1975 me lɔƒo la, míeva kpɔe be mía dzila tsitsiwo hiã kpekpeɖeŋu geɖe. Mlɔeba la, eva hiã be míawɔ nyametsotso sesẽ aɖe. Míedi kura be míadzo le Betel ahagblẽ mía hati Yehowa subɔla siwo míeva lɔ̃ vevie la ɖi o. Ke hã meva kpɔe be nye agbanɔamedzi wònye be malé be na mía dzilawo. Le ɣeyiɣi aɖe megbe la, míedzo le Betel, gake míenɔ mɔ kpɔm be ne nɔnɔmeawo trɔ la, míatrɔ agbɔ va.

Be míate ŋu akpɔ míaƒe nuhiahiãwo gbɔ la, mewɔa dɔ na nugblẽfexeha aɖe, eye esia bia be mayi aƒewo me aɖakafu nugblẽfexeɖoɖowo na amewo. Nyemaŋlɔ nya si dɔmemegã ɖeka gblɔ nam esime wònɔ hehe namem la be gbeɖe o; egblɔ be: “Amewo gbɔ yiyi le ɣetrɔwo me ye nana wokpɔa dzidzedze le dɔ sia me. Ɣemaɣie nàkpɔ ameawo le aƒe me. Naneke mele vevie wu be nànɔ amewo gbɔ yim ɣetrɔ sia ɣetrɔ gbe sia gbe o.” Meɖo eŋu nɛ be, “Meka ɖe edzi be ènya nya si gblɔm nèle, eye melɔ̃ ɖe edzi. Gake mawusubɔsubɔ me gbanɔamedziwo hã le asinye si nyemegblẽ ɖi kpɔ o, eye nyemadi gbeɖe be wòadzɔ alea o. Mayi amewo gbɔ le ɣetrɔ aɖewo me ya, gake le Braɖa kple Yawoɖa ɣetrɔwo la, ehiã be made kpekpe vevi aɖewo.” Yehowa yram vavã esi nyemedaa kpekpewo ƒuna le nye dɔwɔɖui ta o.

Míenɔ danye ŋu esime wòku le July 1987 me le ame tsitsiwo dzikpɔƒe. Dɔnɔdzikpɔlagã la te ɖe Grace ŋu gblɔ nɛ be: “Aƒenɔ Allen, yi aƒe me ne nàɖi ɖe eme. Ame sia ame nyae be ènɔ lɔ̃xowò gbɔ ɣesiaɣi hena kpekpeɖeŋui. Wò dzi nedze eme, eye nànyae be èwɔ tɔwò sinua.”

Le December 1987 me la, míegbugbɔ kpe Betel, teƒe si míelɔ̃ vevie la, ƒe dɔbiagbalẽ ɖo. Gake le  ŋkeke ʋɛ aɖewo ko megbe la, wokpɔ dɔkagã me kansa le Grace ŋu. Esi ɖɔktawo wɔ dɔ nɛ vɔ, eye eƒe lãme sẽ la, wogblɔ be eƒe kansa la vɔ nɛ. Gake le ɣeyiɣi ma me la, míexɔ lɛta tso Betel si me wogblɔ na mí le be míayi míaƒe subɔsubɔdɔa dzi le hame si me míele me. Míeɖoe kplikpaa be míawɔ geɖe le Fiaɖuƒedɔa me.

Emegbe la, mekpɔ dɔ bubu le Texas. Míebui be afi ma ƒe yame ƒe dzoxɔxɔ anyo na mí, eye enyo na mí hã vavã. Le ƒe 25 siwo katã míetsɔ nɔ Texas afi sia me la, nɔvi lɔ̃ame siwo va zu mía xɔlɔ̃ veviwo la nɔa mía ŋu ɣesiaɣi.

Le ƒe siwo va yi me la, dɔkagã me kple zegedevi me kansa kpakple no me kansa ɖe fu na Grace. Gake metoa nyatoƒoe le eƒe agbe ŋu gbeɖe o. Eye edea bubu ŋunye abe ƒomea ƒe ta ene hewɔa nu aduadu kplim. Amewo bianɛ zi geɖe be, “Nu vevi ka gbɔe miaƒe srɔ̃ɖeɖea ƒe dzidzedzekpɔkpɔ kple dzidzɔ si mi ame evea miekpɔna la tso?” Eɖoa eŋu be, nu vevi ene gbɔe wòtso: “Míenye xɔlɔ̃ siwo dome tsi metona o. Míeɖoa dze edziedzi gbe sia gbe. Míelɔ̃a mía nɔewo gbɔ nɔnɔ gbe sia gbe. Eye medzɔna gbeɖe be míeyia anyimlɔƒe esi míekpɔtɔ do dziku ɖe mía nɔewo ŋu o.” Enye nyateƒe be míedzea agɔ le mía nɔewo dzi ɣeaɖewoɣi, gake míetsɔna kea mía nɔewo faa eye míeɖea asi le nya ŋu—ɛ̃, eye esia wɔa dɔ.

Míesrɔ̃ nu geɖe le dodokpɔ vovovo siwo me míeto va de asi na fifia me:

1.  Ðo ŋu ɖe Yehowa ŋu ɣesiaɣi eye nàlɔ̃ ɖe nu si ŋu wòɖe mɔ ɖo dzi. Mègaɖo dzi ɖe wò ŋutɔ wò gɔmesese ŋu gbeɖe o.—Lod. 3:5, 6; Yer. 17:7.

2.  Nu ka kee ɖadzɔ o, di mɔfiame le Yehowa ƒe Nya la me. Toɖoɖo Yehowa kple eƒe sewo dzi wɔwɔ le vevie. Evedomesinɔnɔ meli o—àɖo to Mawu loo alo màɖo toe o.—Rom. 6:16; Heb. 4:12.

3.  Nu si le vevie wu le agbe mee nye ŋkɔ nyui wɔwɔ le Yehowa gbɔ. Tsɔ eƒe nuwo ɖo nɔƒe gbãtɔ, ke menye ŋutilãmekesinɔnuwo didi o.—Lod. 28:20; Nyagb. 7:1; Mat. 6:33, 34.

4.  Do gbe ɖa nàbia Yehowa ƒe kpekpeɖeŋu be nàwɔ geɖe le subɔsubɔdɔa me ale si nàte ŋui. Wò susu nenɔ nu si nàte ŋu awɔ ŋu, ke menye nu si màte ŋu awɔ o.—Mat. 22:37; 2 Tim. 4:2.

5.  Nyae be habɔbɔ bubu aɖeke meli wu esia si dzi Yehowa ƒe yayra le eye wòkpɔa ŋudzedze ɖe eŋu o.—Yoh. 6:68.

Mía dometɔ ɖe sia ɖe subɔ Yehowa wu ƒe 75, eye míesubɔe abe atsu kple asi ene ƒe 65 kloe. Míekpɔ dzidzɔ geɖe le Yehowa subɔsubɔ me ɖekae ƒe gbogbo siawo. Míaƒe gbedodoɖae nye be nɔvi ɖe sia ɖe nakpɔ ale si yayra le ŋuɖoɖo ɖe Yehowa ŋu mee.