1. Nu nyui kae lɔlɔ̃ ʋã Yehowa wòna amegbetɔƒomea?

YEHOWA, “Mawu gbagbe si nɔa anyi ɖaa” la, kpɔ eƒe nya si naa agbe la ta na amegbetɔƒomea. Eƒe nya anɔ anyi ɖaa, elabena Biblia gblɔ be: ‘Yehowa ƒe nya nɔa anyi tegbee.’ (1 Pet. 1:23-25) Aleke gbegbe míedaa akpee nye esi be lɔlɔ̃ ʋã Yehowa wòna woŋlɔ nyatakaka vevi siawo ɖe Biblia me eye wòkpɔ eta na mí!

2. Nu kae Mawu di be míanya tso ye ŋu?

² Yehowa di be mí katã míanya yeƒe ŋkɔ, eya ta ena woŋlɔe ɖe eƒe Nya la me. Teƒe gbãtɔ si “Yehowa Mawu” dze le le Biblia mee nye afi si woƒo nu tso “dziƒo kple anyigba ƒe dzɔdzɔmenyawo” ŋu le. (1 Mose 2:4) Nukutɔe la, Mawu ŋlɔ eƒe ŋkɔa zi gbɔ zi geɖe ɖe Se Ewo siwo wòŋlɔ ɖe kpe eve dzi la me. Le kpɔɖeŋu me, se gbãtɔa dze egɔme ale: “Nyee nye Yehowa, wò Mawu.” (2 Mose 20:1-17) Togbɔ be Satana dze agbagba geɖe be yeatsrɔ̃ Biblia ale be míaganya Mawu kple Eƒe ŋkɔa o hã la, Aƒetɔ Dziɖulagã Yehowa meɖe mɔ esia dzɔ o.—Ps. 73:28.

3. Togbɔ be susu gbegblẽwo le amewo si le Mawu ŋu hã la, nu kae Mawu na míenya?

³ Yehowa kpɔ nyateƒea hã ta na mí le eƒe Nya la me. Togbɔ be susu gbegblẽwo le amewo si ku ɖe Mawu ŋu le xexea me godoo hã la, míedaa akpe na Mawu ŋutɔ be ena gbɔgbɔmekekelia mí eye míenya nyateƒe la! (Mixlẽ Psalmo 43:3, 4.) Esime amegbetɔƒomea ƒe akpa gãtɔ le zɔzɔm le viviti me la, míawo ya míele zɔzɔm le gbɔgbɔmekekeli si Mawu na mí la me.—1 Yoh. 1:6, 7.

4, 5. Mɔnukpɔkpɔ tɔxɛ kae su mía si le ƒe 1931 me?

⁴ Esi míenye Kristotɔwo ta la, domenyinu tɔxɛ aɖe, si nye gbɔgbɔmedomenyinu, le mía si. Nyagɔmeɖegbalẽ aɖe gblɔ be dukɔ aɖe ƒe domenyinu nye nɔnɔme nyuiwo, dekɔnuwo, alo ale si wonɔa agbee le dukɔa me tso dzidzime yi dzidzime. Míaƒe gbɔgbɔmedomenyinua ƒe akpa aɖee nye yayra si wònye na mí be Mawu ƒe Nya la ŋuti sidzedze vavãtɔ kple nyateƒe si ku ɖe Mawu  kple eƒe tameɖoɖowo ŋu ƒe gɔmesese deto su mía si. Mɔnukpɔkpɔ tɔxɛ aɖe hã kpe ɖe eŋu.

⁵ Mɔnukpɔkpɔ tɔxɛ ma va zu míaƒe gbɔgbɔmedomenyinua ƒe akpa aɖe le takpekpe gã si wowɔ le Columbus, Ohio, U.S.A., le ƒe 1931 me la me. Yevugbe me ŋɔŋlɔdzesi siwo nye “JW” dze le ɖoɖowɔɖigbalẽvia dzi. Nɔvinyɔnu aɖe gblɔ be: “Nɔviwo nɔ susu vovovo dom ɖa ku ɖe nu si ŋɔŋlɔdzesi mawo le tsitre ɖi na ŋu.” Tsã la, woyɔa mí be Biblia Nusrɔ̃viwo, gake le Kwasiɖagbe, July 26, 1931 dzi la, míeto nyameʋuʋu aɖe dzi da asi ɖe edzi be woayɔ mí be Yehowa Ðasefowo (si nye Jehovah’s Witnesses le Eŋlisigbe me). Dzidzɔ manyagblɔ aɖee wònye na mí be míeda asi ɖe ŋkɔ ma si tso Ŋɔŋlɔawo me la dzi. (Mixlẽ Yesaya 43:12.) Nɔviŋutsu aɖe gblɔ be: “Nyemaŋlɔ dzidzɔɣli kple akpesisi gã si ɖi le kpekpewɔƒea la be gbeɖe o.” Subɔsubɔha siwo le xexea me la dometɔ aɖeke medi be woayɔ ŋkɔ ma ɖe ye ŋu o, gake Mawu yra mí le mɔ sia nu be eɖe mɔ míetsɔ ŋkɔ tɔxɛ ma ƒe 80 kple edzivɔe nye esia. Mɔnukpɔkpɔ tɔxɛ ka gbegbee nye esi be míenye Yehowa ƒe Ðasefowo!

6. Nyatakaka siwo de pɛpɛpɛ kawoe nye míaƒe gbɔgbɔmedomenyinua ƒe akpa aɖewo?

⁶ Míaƒe gbɔgbɔmedomenyinua ƒe akpa bubu hãe nye Mawu subɔla siwo nɔ anyi le blema la ŋuti nyatakaka vevi siwo de pɛpɛpɛ. Le kpɔɖeŋu me, bu Abraham, Isak kple Yakob ŋu kpɔ. Anɔ eme godoo be blemafofo siawo kple woƒe ƒomewo ɖo dze tso ale si woawɔ be Yehowa nakpɔ ŋudzedze ɖe wo ŋui la ŋu. Eya ta mewɔ nuku o be Yosef gbe be yemakpɔ gome le gbɔdɔdɔ manɔsenu me o, ale be ‘yeagada vo ɖe Mawu ŋuti o.’ (1 Mose 39:7-9) Le ƒe alafa gbãtɔa me la, Kristotɔwo hã ɖoa dze tso Mawu ŋu kple wo nɔewo. Le kpɔɖeŋu me, apostolo Paulo gblɔ nu si Yesu fiae ku ɖe Aƒetɔ ƒe Fiẽnuɖuɖu la ŋu na Kristo hamea. (1 Kor. 11:2, 23) Egbea la, nyatakaka siwo míehiã be míate ŋu ade ta agu na Mawu ‘le gbɔgbɔ kple nyateƒe me’ la le eƒe Nya si woŋlɔ ɖi la me. (Mixlẽ Yohanes 4:23, 24.) Biblia nye gbɔgbɔmekekelitsoƒe na amegbetɔwo katã, gake mí Yehowa subɔlawo míedea asixɔxɔ tɔxɛ eŋu.

7. Ŋugbedodo lédziname kae nye míaƒe gbɔgbɔmedomenyinua ƒe akpa aɖe?

⁷ Míaƒe gbɔgbɔmedomenyinua ƒe akpa bubu aɖewoe nye míaƒe ŋutinya siwo woɖe ɖe go nyitsɔ laa, siwo ɖee fia be ‘Yehowa li kpli mí.’ (Ps. 118:7) Esia na míesena le mía ɖokui me be míele dedie, ne wole mía yome tim gɔ̃ hã. Míaƒe gbɔgbɔmedomenyinu si le dzidzim ɖe edzi ɖaa la ƒe akpa si léa dzi na amee nye ŋugbedodo sia: “Lãnu sia lãnu, si wotu ɖe ŋuwò la, madze edzi o, eye àbu fɔ aɖe, siwo katã tso ɖe ŋuwò le ʋɔnu. Esia nye Yehowa ƒe dɔlawo ƒe domenyinu, eye woƒe dzɔdzɔenyenye tso gbɔnye, Yehowa ye gblɔe!” (Yes. 54:17) Satana ƒe aʋawɔnuwo dometɔ aɖeke mate ŋu agblẽ nu le mía ŋu tegbee o.

8. Nu kawo mee míadzro le nyati sia kple esi kplɔe ɖo me?

 ⁸ Satana dze agbagba be yeatsrɔ̃ Biblia la, yeaxe mɔ na amewo woaganya Yehowa ƒe ŋkɔa o, eye yeaɣla nyateƒea ɖe wo. Gake Yehowa na wòdo kpo nu le go sia go me. Le nyati sia kple esi kplɔe ɖo me la, (1) míakpɔ ale si Mawu kpɔ eƒe Nya la ta; (2) míakpɔ ale si Yehowa kpɔ egbɔ be yeƒe ŋkɔa gakpɔtɔ li; eye (3) míakpɔ nu si mía Fofo si le dziƒo la wɔ be míenya nyateƒea egbea.

9-11. Aleke Yehowa kpɔ Biblia la tae?

⁹ Amewo dze agbagba geɖe be yewoatsrɔ̃ Biblia la, gake Yehowa kpɔ eƒe Nya la ta. Numekugbalẽ si nye Enciclopedia Cattolica gblɔ be: “Le ƒe 1229 me la, Toulouse Ƒe Adaŋudeha la de se be mele be [Biblia] nanɔ ame tsɛwo si [le wo degbewo me] o, le esi wotsi tre ɖe Albitɔwo kple Waldotɔwo ŋu vevie ta . . . Wogade se ma tɔgbi le takpekpe aɖe si wowɔ le ƒe 1234 me le Tarragona, Spain, si James I nɔ zi me na la me. . . . Roma Sɔlemehawo Ƒe Ƒuƒoƒo aɖe de nu nyaa me zi gbãtɔ le ƒe 1559 me, esi Paul IV gblɔ le eƒe Index la me be se meɖe mɔ be woata Biblia ɖe gbe siwo ame akpa gãtɔ dona me loo alo wòanɔ amewo si ne womexɔ mɔɖeɖe tso Dɔwɔƒegã Kɔkɔe la gbɔ hafi o.”

¹⁰ Togbɔ be woto mɔ vovovowo dzi be woatsrɔ̃ Biblia hã la, Yehowa kpɔ eta. Anɔ abe ƒe 1382 me ene la, John Wycliffe kple eƒe hadɔwɔlawo ɖe Biblia gbãtɔ si gɔme woɖe ɖe Eŋlisigbe me la ɖe go. Biblia gɔmeɖela bubue nye William Tyndale, si wowu le ƒe 1536 me. Woka nya be esi woblae ɖe ati ŋu la, edo ɣli be, “Aƒetɔ, ʋu England fia la ƒe ŋkuwo.” Tete womia ve nɛ wòku eye wotɔ dzoe.

¹¹ Togbɔ be wotsi tsitre ɖe Biblia ŋu vevie hã la, egakpɔtɔ li. Le kpɔɖeŋu me, le ƒe 1535 me la, woɖe Biblia si gɔme Miles Coverdale ɖe ɖe Eŋlisigbe me la ɖe go. Coverdale zã Tyndale ƒe gɔmeɖeɖea ƒe “Nubabla Yeyea” kple “Nubabla Xoxoa” ƒe akpa siwo nye Mose Ƒe Agbalẽ Gbãtɔ va se ɖe Kronika ƒe agbalẽawo le Biblia si wòɖe ɖe go la me. Eɖe Ŋɔŋlɔawo ƒe akpa mamlɛawo gɔme tso Latingbe kpakple Martin Luther ƒe Biblia si le Germanygbe me la me. Egbea la, amewo kafua Biblia gɔmeɖeɖe si nye Xexe Yeye Gɔmeɖeɖe si le gbe geɖewo me la ɖe ale si emenyawo me kɔ, wode pɛpɛpɛ, eye wònye dɔwɔnu nyui aɖe le míaƒe subɔsubɔdɔa me la ta. Enye dzidzɔ na mí be gbɔgbɔ vɔ̃wo alo amegbetɔ aɖeke mete ŋu tsrɔ̃ Yehowa ƒe Nya la ɖa o.

12. Aleke Xexe Yeye Gɔmeɖeɖe Biblia kpe ɖe amewo ŋu wonya Mawu ƒe ŋkɔa?

¹² Yehowa Mawu kpɔ egbɔ be womeɖe eƒe ŋkɔ la ɖa le Biblia ɖe sia ɖe me o. Esime wonɔ Xexe Yeye Gɔmeɖeɖe Biblia, yevugbe me tɔ, gɔme ɖem la, nɔviawo kpɔ egbɔ  be yewozã Mawu ƒe ŋkɔ, Yehowa, le afi sia afi si wòdze le le ŋɔŋlɔ gbãtɔawo me. Eƒe ŋkɔa dze zi 6,973 sɔŋ le Hebri Ŋɔŋlɔawo me eye wòdze zi 237 le Kristotɔwo Ƒe Hela Ŋɔŋlɔawo me. Va se ɖe fifia la, wota Xexe Yeye Gɔmeɖeɖe Biblia bliboa alo eƒe akpa aɖe ɖe gbegbɔgblɔ siwo wu 116 sɔŋ me. Eye eƒe agbɔsɔsɔ si wota la wu 178,545,862.

13. Nu ka tae woate ŋu agblɔ be wonya Mawu ƒe ŋkɔa tso keke esime wowɔ amegbetɔ ke?

¹³ Wonya Mawu ƒe ŋkɔa tso keke esime wowɔ amegbetɔ ke. Adam kple Xawa nya ŋkɔ sia, eye wonya ale si tututu woyɔnɛ. Le Tsiɖɔɖɔa megbe, esime Xam mede bubu fofoa ŋu o la, Noa gblɔ be: “Woakafu Yehowa, Sem ƒe Mawu; eye Kanaan [Xam ƒe vi] anye kluvi [nɛ]!” (1 Mose 4:1; 9:26) Mawu ŋutɔ gblɔ be: “Nyee nye Yehowa, ŋkɔnyee, nyematsɔ nye bubu na ame tutɔ kple nye kafukafu na legbawo o.” Mawu gagblɔ hã be: “Nyee nye Yehowa, ɖeke megali o; mawu aɖeke mekpe ɖe ŋunye o.” (Yes. 42:8; 45:5) Yehowa kpɔ egbɔ be yeƒe ŋkɔa kpɔtɔ li eye wòna amewo nyae le anyigba la katã dzi. Mɔnukpɔkpɔ gã kae nye esi wònye na mí be míele Yehowa ƒe ŋkɔa zãm eye míenye eƒe Ðasefowo! Ðeko wòle abe ɖe míedo ɣli gblɔ be, “Míado aflaga ɖe dzi le mía Mawu ƒe ŋkɔ me” ene.—Ps. 20:6.

14. To vovo na Biblia me la, teƒe bubu kawoe Mawu ƒe ŋkɔa gadze le?

¹⁴ Menye Biblia me koe Mawu ƒe ŋkɔ dze le o. Le kpɔɖeŋu me, edze le Moabitɔwo Ƒe Kpe, si wofɔ le Dhiban (Dibon), si gbɔ didi tso Ƒu Kukua gbɔ le ɣedzeƒe gome kilometa 21, la dzi. Woŋlɔ ŋutinya aɖe ɖe kpea dzi, si me woyɔ Israel Fia Omri ŋkɔ le, eye woŋlɔ nya si Moab Fia Mesa gblɔ ku ɖe nu si tae wòdze aglã ɖe Israel ŋu la ɖe edzi. (1 Fia. 16:28; 2 Fia. 1:1; 3:4, 5) Gake asixɔxɔ tɔxɛ aɖe le Moabitɔwo Ƒe Kpea ŋu, elabena wozã Hebrigbe me ŋɔŋlɔdzesi ene siwo nye YHWH tsɔ ŋlɔ Mawu ƒe ŋkɔa ɖe edzi. Hebrigbe me ŋɔŋlɔdzesi eneawo gadze le Laxis Lɛtawo, siwo woŋlɔ ɖe anyinuwo dzi, siwo wofɔ le Israel la me zi gbɔ zi geɖe.

15. Nu kae nye Septuagint la, eye aleke wòdzɔe be wova ɖee ɖe go?

¹⁵ Biblia gɔmeɖela gbãtɔwo wɔ akpa aɖe le Mawu ƒe ŋkɔa ta kpɔkpɔ me. Esi woɖe aboyo Yudatɔwo yi Babilon tso ƒe 607 D.M.Ŋ. va se ɖe ƒe 537 D.M.Ŋ. me megbe la, menye wo katãe gbugbɔ yi Yuda kple Israel o. Kaka ƒe alafa etɔ̃lia D.M.Ŋ. naɖo la, Yudatɔ gbogbo aɖewo ʋu yi ɖanɔ Alexandria, si le Egipte, eye wohiã Hebri Ŋɔŋlɔawo ƒe gɔmeɖeɖe le Helagbe, si nye gbe si wodona le dukɔ geɖe me ɣemaɣi la me. Wowu gɔmeɖeɖe sia nu le ƒe alafa evelia D.M.Ŋ. me, eye wona ŋkɔe be Septuagint. Mawu ƒe ŋkɔ Yehowa dze le eƒe kɔpi aɖewo me le Hebri ŋɔŋlɔdzesiwo me.

16. Gblɔ ale si wozã Mawu ƒe ŋkɔa le agbalẽ aɖe si woɖe ɖe go le ƒe 1640 me la ƒe kpɔɖeŋu.

¹⁶ Mawu ƒe ŋkɔa dze le Psalmowo ƒe agbalẽa ƒe gɔmeɖeɖe gbãtɔ si woɖe ɖe go le dukɔ siwo dzi Eŋlisiawo ɖu le Amerika nyigba dzi me la me. Woɖe egɔme tso Hebrigbe me yi ɖe Eŋlisigbe me. Wona ŋkɔe be Bay Psalm Book (Bay Psalmo Gbalẽ) eye wota eƒe gbãtɔa le ƒe 1640 me. Wozã Mawu ƒe ŋkɔ le teƒe aɖewo abe Psalmo 1:1, 2 ene, afi si gblɔ be “ame si woyra” mezɔna le ame vɔ̃ɖiwo ƒe aɖaŋuɖoɖo nu o, “ke boŋ ekpɔa dzidzɔ le Yehowa ƒe se la ŋu.” Àkpɔ nyatakaka bubuwo ku ɖe Mawu ƒe ŋkɔa ŋu le agbalẽ gbadza si nye The Divine Name That Will Endure Forever (Le nom divin qui demeure à jamais) me.

17, 18. (a) Aleke nàɖe “nyateƒe” gɔmee? (b) Nu kawoe nye “nya nyui la ƒe nyateƒe la” ƒe akpa aɖewo?

¹⁷ Míesubɔa “Yehowa, nyateƒe ƒe Mawu la” kple dzidzɔ. (Ps. 31:5, Agbenya La) Nyagɔmeɖegbalẽ aɖe ɖe “nyateƒe” gɔme be: Nyateƒe si ku ɖe nane ŋuti la nye nya siwo  katã ku ɖe eŋu, siwo le eteƒe, ke menye nususugblɔ alo nyakpakpa o. Le Hebrigbe si me woŋlɔ Biblia ɖo me la, nya si gɔme woɖe be “nyateƒe” la kuna ɖe nu si le eteƒe, nu si ŋu kakaɖedzi le, nu si li ɖaa, alo nu si nye nu ŋutɔŋutɔ ŋu. Helagbe me nya si gɔme woɖe be “nyateƒe” la fiaa nu si do ƒome kple nyateƒenya alo nu si sɔ kple nu si le eteƒe.

¹⁸ Yehowa kpɔ egbɔ be míenya nyateƒea egbea, eye wòna nyateƒea ŋuti sidzedze le dzidzim ɖe edzi ɖaa. (2 Yoh. 1, 2) Nyateƒea ƒe gɔmesese si su mía si la me le kɔkɔm ɖe edzi, elabena “ame dzɔdzɔe ƒe toƒe le abe agudzedze ƒe kekeli, si nɔa kɔkɔm ɖe edzi, va se ɖe esime ŋu kena keŋ ene”! (Lod. 4:18) Ɛ̃, míelɔ̃ ɖe nya si Yesu gblɔ na Mawu le gbedodoɖa me be, “Wò nya la nye nyateƒe” la dzi bliboe. (Yoh. 17:17) “Nya nyui la ƒe nyateƒe la,” si nye nyateƒenya siwo katã dzi Kristotɔwo xɔ se la, le Mawu ƒe Nya si woŋlɔ ɖi la me. (Gal. 2:14) Eƒe akpa aɖewoe nye nyateƒenya siwo ku ɖe Yehowa ƒe ŋkɔ, eƒe dziɖulanyenye, Yesu ƒe tafevɔsa la, tsitretsitsi la kple Fiaɖuƒea ŋu. Azɔ mina míadzro ale si Mawu kpɔ nyateƒea ta, togbɔ be Satana dze agbagba be yeatsyɔ nu edzi hã, la me.

19, 20. Ame kae nye Nimrod, eye nu kae amegbetɔwo dze agbagba be yewoawɔ le eƒe ŋkekea me?

¹⁹ Le Tsiɖɔɖɔa megbe la, nya aɖe nɔ amewo nu wonɔ gbɔgblɔm be: “Abe Nimrod, adela kalẽtɔ si tsi tsitre ɖe Yehowa ŋu ene.” (1 Mose 10:9) Esi Nimrod tsi tre ɖe Yehowa Mawu ŋu ta la, efia be Satana subɔm wònɔ eye ewɔ nu abe ame siwo tsi tsitre ɖe Yesu ŋu ene; Yesu gblɔ na wo be: “Miawo la mietso mia fofo si nye Abosam me, eye mia fofo la ƒe nudzodzrowo miedina be miawɔ. . . . Ame ma . . . meli ke ɖe nyateƒe la me o.”—Yoh. 8:44.

²⁰ Nuto siwo dzi Nimrod ɖu lae nye Babel kple du siwo nɔ Tigris kple Frat tɔsisiawo dome. (1 Mose 10:10) Anɔ eme be eƒe kpɔkplɔ tee wodze Babel dua tsotso gɔme hete eƒe mɔ́ kɔkɔ la tutu le ƒe 2269 D.M.Ŋ. me lɔƒo. Yehowa medi be amegbetɔwo nanɔ teƒe ɖeka o, gake Babel dua tsolawo ya gblɔ be: “Mina míatso du, eye míatu mɔ́ kɔkɔ aɖe, si tame natɔ dziƒo, ne míaƒe ŋkɔ nanyɔ, bena míagakaka ɖe anyigba blibo la katã dzi o!” Womete ŋu wu mɔ́ la tutu nu o, elabena Mawu “tɔtɔ amegbetɔwo katã ƒe gbe” eye ame siwo ɖoe be yewoatu mɔ́ kɔkɔ la kaka ɖe anyigba la dzi. (1 Mose 11:1-4, 8, 9) Ne wòanye be ɖe Satana ɖoe be yeato mɔ sia dzi ato subɔsubɔ aɖe vɛ be ame sia ame nanɔ ye subɔm la, ekema eƒe tameɖoɖoa do kpo nu. Le amegbetɔwo ƒe ŋutinya katã me la, amewo de ta agu na Yehowa eye eƒe tadedeagua le ta kekem ɖe edzi tso ŋkeke yi ŋkeke.

21, 22. (a) Nu ka tae alakpasubɔsubɔ mete ŋu gblẽ tadedeagu vavãtɔ me kpɔ gbeɖe o? (b) Nu ka mee míadzro le nyati si kplɔe ɖo me?

²¹ Alakpasubɔsubɔ mete ŋu gblẽ tadedeagu vavãtɔ me kpɔ gbeɖe o. Nu ka tae? Elabena míaƒe Nufiala Gãtɔ kpɔ egbɔ be eƒe Nya si woŋlɔ ɖi la kpɔtɔ li, ekpɔ eƒe ŋkɔa ta, eye wòkpɔ egbɔ be míenya nyateƒe la. (Yes. 30:20, 21) Mawu subɔsubɔ le nyateƒemɔ la nu nana míekpɔa dzidzɔ, gake esia wɔwɔ bia be míanɔ ŋudzɔ le gbɔgbɔ me, míaɖo ŋu ɖe Yehowa ŋu bliboe eye míaɖe mɔ eƒe gbɔgbɔ kɔkɔea nafia mɔ mí.

²² Le nyati si kplɔe ɖo me la, míadzro ale si alakpadzixɔse aɖewo dze egɔme hekaka la me. Míakpɔe be alakpanufiafia mawo mewɔ ɖeka kple Ŋɔŋlɔawo ƒe nufiafia o. Gakpe ɖe eŋu la, míakpɔ ale si Yehowa, nyateƒea Takpɔla si ɖeke mesɔ kplii o la, tsɔ nyateƒenufiafia siwo doa dzidzɔ na mí, siwo hã nye míaƒe gbɔgbɔmedomenyinua ƒe akpa aɖe la yra míi.