Etsi Gake Metsi Akogo O

AME geɖewo va zua wɔnamanɔŋutɔwo kple akogotsilawo ne wotsi. Gake menɔ alea le Fernand Rivarol, si xɔ ƒe 95 hafi ku le Geneva, Switzerland, ya gome o. Srɔ̃a ƒe ku kple vianyɔnu ƒe srɔ̃ɖeɖe kple atsuƒe yiyi wɔe be eya ɖeka va tsi aƒea me. Togbɔ be aƒea me koe wònɔna ɣeawokatãɣi kloe hã la, metsi akogo o. Zi geɖe la, enɔa anyi ɖe kplɔ si le eƒe akpata me la ŋu heƒoa ka na amewo eye wòɖoa dze kpli wo tso Biblia.

Fernand va tsi akogo ŋutɔŋutɔ ɣeaɖeɣi le eƒe agbeme. Le mɔ ka nu? Esi Fernand kple srɔ̃a va zu Yehowa Ðasefowo le 1939 teti koe Xexemeʋa II dzɔ le Europa. Nyametsotso si Fernand nɔ te ɖe Biblia dzi wɔ la na wòɖoe kplikpaa be yemawɔ nuvevi ame aɖeke o. Le susu sia ta la, eƒe dɔwɔɖuia ge le esi eye wodee gaxɔ me le ɣeyiɣi vovovo, siwo katã ƒe ƒuƒoƒoe nye ƒe atɔ̃ kple afã, me. Gaxɔmenɔnɔa klã woa kple srɔ̃a kpakple vianyɔnu sue la dome.

Fernand gblɔ tso nusiwo dzɔ ɖe edzi va yi ŋu be: “Ewɔ na ame geɖewo be meɖe asi le dɔ nyui si wɔm menɔ la ŋu hekplɔ nye ƒomea de fukpekpe me. Amewo lé fum hewɔ nu ɖe ŋunye abe hlɔ̃dola ene. Ke hã, ne mele ƒe mawo siwo me mekpe fu le ŋu bum la, meɖoa ŋku alesi Yehowa kpe ɖe ŋunye la dzi vevie. Ƒe geɖee nye sia va yi ya, gake nye ŋuɖoɖo ɖe Yehowa ŋu me gakpɔtɔ sẽ, abe alesi wònɔ ɣemaɣi ene.”

Kakaɖedzi siae ʋã Fernand be wòagblɔ Ŋɔŋlɔawo me mɔkpɔkpɔ si le esi la na amewo le telefon dzi. Ne ame aɖe ɖe ɖetsɔleme fia heɖo to nyuie la, eɖoa Biblia-srɔ̃gbalẽ ɖe amea. Emegbe la, egaƒoa ka na amea bene yeanya be agbalẽa me nyawo do dzidzɔ nɛ hã. Ɣeaɖewoɣi la, ame aɖewo ŋlɔa lɛta tsɔ daa akpe nɛ, si doa dzidzɔ nɛ ŋutɔ.

Ðewohĩ ame aɖe ate ɖe ŋuwò le miaƒe nutoa me si adi be yeaɖo dze siwo tɔgbe Fernand ɖo kple amewo la kpli wò. Ðe manyo be nàɖo to nya siwo wòagblɔ na wò bene nànya nusiwo dzi wòxɔ se oa? Edzɔa dzi na Yehowa Ðasefowo ɣeawokatãɣi be yewoagblɔ yewoƒe dzixɔsewo na amewo.