‘Mi Katã Miaƒe Lɔlɔ̃ Sɔa Gbɔ Ðe Edzi’

DZƆDZƆMEFƆKU geɖe dzɔ le Japan le ƒe 2004 me. Afɔku siawo dometɔ aɖewo nye ahomya sesẽwo, tsiɖɔɖɔwo, kple anyigbaʋuʋuwo. Wogblẽ nu le ame geɖe siwo dome Yehowa Ðasefowo hã le, ŋu vevie. (Nyagblɔla 9:11) Gake afɔku siawo na mɔnukpɔkpɔ Ðasefoawo be woaɖe nɔvilɔlɔ̃ afia.—Petro I, 1:22.

Le kpɔɖeŋu me, le alesi tsi dza sɔgbɔ le July me ta la, tɔsisi aɖe si le Japan titina la ɖɔ gbagba. Tsi ɖe Yehowa Ðasefo siwo wu 20 ƒe aƒe. Tsi xɔ Fiaɖuƒe Akpata aɖe me wòyi dzi meta ɖeka. Enumake Ðasefo siwo le hame siwo te ɖe afima ŋu me va na kpekpeɖeŋu wo. Lɔlɔ̃nu faa dɔwɔla alafa geɖe va ha ba le aƒeawo me hedzra wo me ɖo. Le kwasiɖa eve ko megbe la, wodzra Fiaɖuƒe Akpataa ɖo heɖɔ nuwo ɖo le eme keŋkeŋ.

Le October 23 dzi la, anyigba ʋuʋu le nuto ma ke me, eye esi wodzidzee le Richter ƒe anyigbaʋuʋudzidzemɔ̃ dzi la, eɖo dzidzenu 7 kloe, si fia be egblẽ nu ŋutɔ. Ame 40 bu woƒe agbe, eye amesiwo wu 100,000 ye dzo le woƒe aƒewo me yi teƒe siwo le dedie. Tsi, gas, kple elektrikkaɖi megava nɔ anyi o. Togbɔ be Fiaɖuƒe Akpata si woɖɔ ɖo la te ɖe afisi anyigbaʋuʋua nu sẽ le wu abe kilometa 50 pɛ ko ene hã la, naneke megblẽ le eŋu o. Fiaɖuƒe Akpataa va zu kpekpeɖeŋunaƒe enumake hena ɣeyiɣi kpui aɖe. Kristotɔ dzikpɔlawo do afɔ na wo hati haxɔsetɔwo be wole dedie hã, eye dzi dzɔ wo ŋutɔ be nuvevi mewɔ ame aɖeke o eye wo dometɔ aɖeke hã meku o. Le ŋufɔke ƒe ŋdikanya la, Ðasefo ade aɖewo siwo tsi ɖe va yi le July me, tsɔ wo ɖokui na faa be yewoatsɔ nuɖuɖu kple tsi ayi na amewo le nuto si me anyigbaa ʋuʋu le. Gaƒoƒo ʋɛ aɖewo le anyigbaʋuʋua megbe la, kpekpeɖeŋununanawo sɔ gbe.

Dzikpɔla aɖe gblɔ be: “Amesiwo tsi ɖe va yi la bu kpekpeɖeŋunanadɔ siwo wowɔ tsɔ kpe ɖe amesiwo ŋu anyigbaʋuʋua gblẽ nu le ŋu be, enye mɔnukpɔkpɔ si yewoatsɔ aɖe yewoƒe ŋudzedzekpɔkpɔ afia ɖe kpekpeɖeŋu si wona yewo ŋutɔwo va yi ŋu. Wowɔ dɔ sesĩe tso ŋdikanya vaseɖe zãtiƒe. Eye dzi dzɔ wo ɖe dɔa wɔwɔ ŋu ŋutɔ!”

Tsiɖɔɖɔwo loo alo anyigbaʋuʋuwo mate ŋu agblẽ lɔlɔ̃ si bla Yehowa Ðasefowo le Kristotɔwo ƒe nɔvihabɔbɔa me ɖekae la dome o. Boŋ la, afɔku mawo tɔgbe ƒe dzɔdzɔ nana Kristotɔwo kpɔa apostolo Paulo ƒe nya si wògblɔ na ehati haxɔsetɔwo le Tesalonika teƒe wòvaa eme be: “Mi katã mia dometɔ amesiame ƒe lɔlɔ̃, si mietsɔna lɔ̃a mia nɔewo la, sɔa gbɔ ɖe edzi.”—Tesalonikatɔwo II, 1:3.