Xexe Si Me Madzɔmadzɔnyenye Bɔ Ðo

ÈLƆ̃ ɖe edzi be xexe madzɔmadzɔ aɖe mee míelea? Ðikeke mele eme o be àlɔ̃ aɖe edzi. Ne woagblɔe tututu la, ŋutete ka kee ɖale mía ŋu loo alo aleke kee míeɖawɔ ɖoɖo ɖe míaƒe agbe ŋui o, kakaɖedzi aɖeke meli kãŋ be míava kpɔ kesinɔnuwo, akpɔ dzidzedze, alo akpɔ nuɖuɖu gɔ̃ hã o. Zi geɖe la, ɖeko wòva nɔna abe alesi nunyala Fia Salomo si nɔ anyi le blema gblɔe ene be: ‘Nuɖuɖukpɔkpɔ mele nunya me o, kesinɔnukpɔkpɔ mele ayedzedze me o, eye ŋudzedzekpɔkpɔ mele nugɔmesese me o.’ Nukatae? Salomo yi edzi be, elabena ‘ɣeyiɣi kple nuɖiɖeame li na amewo katã.’—Nyagblɔla 9:11.

“Ne Ɣeyiɣi Vɔ̃wo Ði Ðe Ame”

Ẽ, “ɣeyiɣi kple nuɖiɖeame,” si zi geɖe la, fiana afɔkuteƒe aɖe ɖoɖo tututu ko kple afɔkua ƒe dzɔdzɔ ɖe ame dzi la, gblẽa ɖoɖo siwo míewɔ nyuie kple mɔkpɔkpɔ dodzidzɔnamewo me zi geɖe. Le Salomo ƒe nya nu la, míenɔa ‘abe tɔmelã siwo ɖɔ ɖe ene kple abe xevi siwo ɖo mɔ̃ me ene, ne ɣeyiɣi vɔ̃wo ɖi ɖe mí.’ (Nyagblɔla 9:12) Le kpɔɖeŋu me, ame miliɔn geɖe dea agble ɖeɖimateameŋutɔe bene yewoakpɔ nuɖuɖu ana yewoƒe ƒomewo ko kasia woanya la, tsimadzamadza kple kuɖiɖi gblẽ woƒe nukuawo eye “ɣeyiɣi vɔ̃wo” ƒe mɔ̃ ɖea wo.

Ame bubuwo dzea agbagba be yewoana kpekpeɖeŋu, ke hã, zi geɖe la, edzena abe kpekpeɖeŋu si xexe bliboa naa amesiwo ɖo “ɣeyiɣi vɔ̃wo” me gɔ̃ hã nyea nusi mesɔna ɖe enu o ene. Le kpɔɖeŋu me, le aʋa si woho ɖe dɔwuame ɖeɖeɖa ŋu nyitsɔ laa me la, kpekpeɖeŋunaha xɔŋkɔ aɖe gblɔ be “ne woma ga si woka ɖe Gulf-ʋa la wɔwɔ ŋu ɖe akpa atɔ̃ la, eƒe akpa ɖeka koe wotsɔ na kpekpeɖeŋu [Afrika] anyigbagã bliboa.” Ðe wòsɔ be dukɔ siwo si alɔme le la nagblẽ ga home si wozã ɖe vevesese kple fukpekpe si dɔwuame he va anyigbagã blibo dzi dziɖeɖekpɔtɔ ŋu la, ƒe teƒe atɔ̃ ɖe aʋawɔwɔ ŋu le dukɔ ɖeka pɛ ko mea? Eye ɖe wòsɔ be le ɣeyiɣi si me ame geɖe kpɔ ŋutilã me dzidzedze la, anyigbadzinɔla 1 le 4 ɖesiaɖe me nagakpɔtɔ anye ame dahe kolikoli alo be dɔléle siwo woate ŋu aƒo asa na hafi nanɔ ɖevi miliɔn geɖe wum ƒe sia ƒea? Gbeɖegbeɖe!

Le nyateƒe me la, menye “ɣeyiɣi kple nuɖiɖeame” koe wɔnɛ be “ɣeyiɣi vɔ̃wo ɖina ɖe  ame” o. Ŋusẽ sẽŋu aɖewo siwo ŋu míate ŋu awɔ naneke kura le o hã kpɔa ŋusẽ ɖe míaƒe agbenɔnɔ dzi hedea asi nusiwo dzɔna ɖe mía dzi me. Alea tututue wòdzɔ le Beslan, Alania, le ƒe 2004 ƒe kele me, esime ame alafa geɖe, siwo dometɔ geɖeawo nye ɖevi sue siwo woxɔ ɖe suku le ŋkeke gbãtɔ dzi la, ku le ŋɔdzidonamelawo kple kpovitɔwo dome ʋa aɖe me. Ele eme baa be nudogoɖenunu koe wònye be ame aɖewo ku eye ame aɖewo tsi agbe le afɔku ma me ya—gake nusi koŋue he “ɣeyiɣi vɔ̃” ma vɛ enye aʋa si amegbetɔwo wɔ.

Alea Koe Wòanɔ Ðaa?

Ne ame aɖewo le nu ƒom tso madzɔmadzɔnyenye ŋu la, wogblɔna be: “Gake ale ko agbe le. Alea koe wònɔ tso gbaɖegbe ke, eye alea koe wòanɔ ɖaa.” Le woƒe nya nu la, ame sesẽwo alo amegãwo ayi edzi anɔ gbɔdzɔgbɔdzɔtɔwo alo wo teviwo tem ɖe anyi ɖaa, eye kesinɔtɔwo anɔ ame dahewo bam ɖaa. Wogblɔna be esia kpakple “ɣeyiɣi kple nuɖiɖeame” ayi edzi anɔ nu gblẽm le mía ŋu zi alesi ameƒomea gakpɔtɔ li ko.

Aleae wòle be wòanɔ nyateƒea? Ðe wòanya wɔ gbaɖegbe be amesiwo zãa woƒe ŋutetewo tagbɔɖaɖɛtɔe kple nunyatɔe la naxɔ fetu si wodze na tso woƒe dɔ sesẽ wɔwɔwo katã mea? Ðe ame aɖe ate ŋu awɔ nane atsɔ ahe tɔtrɔ mavɔ ava xexe madzɔmadzɔ sia mea? Kpɔ nya si nyati si kplɔe ɖo agblɔ tso esia ŋu ɖa.

[Nɔnɔmetata si le axa 3]

MAXIM MARMUR/AFP/Getty Images