Alesi Mawu Bua Ame Kukuwoe

AME vevi aɖe ƒe ku doa nuxaxa na ame vavã. Alesi ame sena le eɖokui me be yetsi yame, tsi akogo, kple be nu bu na ye la wua gbɔgblɔ. Kudzɔɖeamedzi ate ŋu ana ame nase le eɖokui me be wɔna megale ye ŋu o, elabena aleke kee kesinɔnu, ŋusẽ, alo bubu ɖale ame ŋu o, ame aɖeke mele anyigba dzi si ate ŋu agbɔ agbe ame kuku o.

Gake mía Wɔla bua nyawo ŋu le mɔ bubu nu. Esi wòte ŋu ka anyi tsɔ me amegbetɔ gbãtɔ ta la, ate ŋu agbugbɔ amesi ku la hã awɔ ake. Le susu sia ta, Mawu ate ŋu abu amesiwo ku la abe ɖee wole agbe ene. Yesu gblɔ le subɔla nuteƒewɔla siwo nɔ anyi le blema ŋu be: ‘Wo katã wole agbe le Mawu ƒe nukpɔsusu nu.’—Luka 20:38.

Esime Yesu nɔ anyigba dzi la, wona ŋusẽe be wòafɔ ame kukuwo ɖe tsitre. (Yohanes 5:21) Le esia ta, eya hã bua amesiwo wɔa nuteƒe yiɖase ɖe ku me la abe alesi Fofoa bua woe ene. Le kpɔɖeŋu me, esi Yesu xɔlɔ̃ Lazaro ku la, egblɔ na eƒe nusrɔ̃lawo be: “Meyina, bena maɖanyɔe atso alɔ̃ me.” (Yohanes 11:11) Le amegbetɔwo ƒe nukpɔsusu nu la, Lazaro ku, gake le Yehowa kple Yesu ya gome la, Lazaro nɔ alɔ̃ dɔm.

Le Yesu ƒe Fiaɖuƒedziɖuɖua te la, ‘woafɔ ame dzɔdzɔewo kple ame madzɔmadzɔwo siaa ɖe tsitre.’ (Dɔwɔwɔwo 24:15) Le ɣeyiɣi aɖe megbe la, amesiwo wofɔ ɖe tsitre la axɔ nufiame tso Mawu gbɔ eye mɔnukpɔkpɔ asu wo si be woanɔ agbe mavɔ le anyigba dzi.—Yohanes 5:28, 29.

Ẽ, ame vevi aɖe ƒe ku ate ŋu ahe nuxaxa kple konyifafa geɖe, si ate ŋu anɔ anyi ƒe geɖe vɛ. Ke hã, ame kukuwo bubu abe alesi Mawu bua woe ene ate ŋu afa akɔ na mí geɖe eye wòana mɔkpɔkpɔ nasu mía si.—Korintotɔwo II, 1:3, 4.