Woɖo Ŋku Yehowa ɖasefo Siwo Wowu Dzi

LE March 7, 2002, dzi la, woɖe nu le ŋkuɖodzinuŋlɔɖikpe aɖe dzi le du si nye Körmend me le ɣetoɖoƒe Hungary. Wowɔe tsɔ ɖo ŋku Yehowa Ðasefo etɔ̃ siwo Nazitɔwo wu le ƒe 1945 me dzi.

Woklã nuŋlɔɖikpe sia ɖe dzotsidɔwɔƒegã si li egbea le Hunyadi Road, afisi wowu wo le le dutoƒo la, ƒe gli ŋu. Woɖo nuŋlɔɖikpea anyi be woatsɔ aɖo ŋku ‘Kristotɔ siwo wowu le esi wogbe aʋayiyi le woƒe dzitsinya ta le March 1945 me dzi. Woawoe nye Antal Hőnisch (ƒe 1911-1945), Bertalan Szabó (ƒe 1921-1945), János Zsondor (ƒe 1923-1945), 2002, siwo nye Yehowa Ðasefowo.’

Esi wòsusɔ ɣleti eve pɛ ko ne Xexemeʋa II nawu enu ye wowu wo. Nukatae wowu Kristotɔ siawo? Hungarytɔwo ƒe nyadzɔdzɔgbalẽ si nye Vas Népe ɖe eme be: “Esi Hitler kpɔ ŋusẽ le Germany megbe la, menye Yudatɔawo ɖeɖekoe wotɔ ŋkui be woati wo yome, awɔ funyafunya wo, ade wo fuwɔamegaxɔwo me ahawu wo ne womeɖe asi le woƒe subɔsubɔdzixɔsewo ŋu o, Yehowa Ðasefowo hã nɔ eme. . . . Le March 1945 me la, ŋɔdzi nɔ Hungary ƒe ɣetoɖoƒe gome ale gbegbe. . . . Ŋɔdzi sia ƒe akpa aɖee nye be woanya Yehowa Ðasefowo le dua me ahawu wo.”

Nuŋlɔɖikpea ŋuti wɔnaa nɔ akpa eve me. Wowɔ akpa gbãtɔ le Batthyány Castle ƒe fefewɔƒea, eye amesiwo ƒo nu na vavalawoe nye Agbalẽnyalagã Szabolcs Szita, si nye Ametsɔtsrɔ̃ Gã la Ŋutinuŋlɔƒe si le Budapest ƒe zimenɔla; László Donáth, si nye Sewɔtakpekpea ƒe Kɔmiti si Kpɔa Amegbetɔ ƒe Gomenɔamesiwo, Ame Ʋɛawo Kple Subɔsubɔhawo ƒe Nyawo Gbɔ me tɔ; kple Kálmán Komjáthy, si nye ameawo wuwu teƒekpɔla si va zu dua ƒe ŋutinyanyala. Ame 500 kple edzivɔ siwo nɔ eteƒe la zɔ to dua me yi wɔnaa ƒe akpa evelia wɔƒe—si nye nuɖeɖe le nuŋlɔɖikpe si Dudzikpɔla József Honfi, si le Körmend, wɔ la dzi.

Le Ján Žondor (János Zsondor) ƒe kaklãlɛta si wògblẽ ɖi me la, ede dzi ƒo na nɔviŋutsu kple nɔvinyɔnu Kristotɔwo be woagaxa nu o. Eŋlɔ bena: “Yohanes ƒe nya siwo le Nyaɖeɖefia 2:10 la gale susu me nam kokoko be: ‘Nànye nuteƒewɔla yiɖase ɖe ku me.’ . . . Migblɔ na amesiwo le aƒeme la be woagaxa nu o, elabena nyateƒea tae mele kukum ɖo ke menye abe nuvɔ̃ɖiwɔla ene o.”

[Captions on page 32]

Bertalan Szabó

Antal Hőnisch

Ján Žondor