“Mite Va Gbɔnye, . . . Eye Nye La, Mana Dzudzɔ Mi”

Sɔhɛwo Le abe Zãmu si Naa Dzidzeme Ame Ene

ÐIKEKE mele eme o be sɔhɛwo hã nɔ Yesu Kristo yomedzela siwo wògblɔ na be, “Mite va gbɔnye, . . . eye nye la, mana dzudzɔ mi” la dome. (Mateo 11:28) Esi amewo te wo vi suewo tsɔtsɔ vɛ nɛ la, eƒe nusrɔ̃lawo dze agbagba be yewoaxe mɔ na wo. Gake Yesu gblɔ be: “Mina ɖeviwo nava gbɔnye, eye migaxe mɔ na wo o.” Yesu ‘tsɔ ɖeviawo ɖe akɔnu eye wòte wo yayra’ gɔ̃ hã. (Marko 10:14-16) Ðikeke aɖeke mele eŋu o be Yesu bu sɔhɛwo ame xɔasiwoe.

Biblia ƒo nu tso ɖekakpui kple ɖetugbi wɔnuteƒewo, kpakple sɔhɛ kple ɖevi sue, siwo ɖo kpɔɖeŋu nyuiwo le Mawu subɔsubɔ me ŋu. Wogblɔ ‘ɖekakpui’ siwo ana dzidzeme ame abe zãmu ene la ŋu nya ɖi ɖe Psalmowo ƒe agbalẽa me. Eƒo nu tso ‘ɖekakpui’ kple ‘ɖetugbi’ siwo le Yehowa ƒe ŋkɔ kafum la hã ŋu.—Psalmo 110:3; 148:12, 13.

Afisi Sɔhɛwo Kpɔa Dzidzedze Le

Esɔ be woatsɔ sɔhɛwo asɔ kple zãmu, elabena wotsɔa zãmu wɔa nu ƒe agbɔsɔsɔ kple yayra ƒe kpɔɖeŋui. (Mose I, 27:28) Zãmu me fana eye wònaa ame ƒe dzi dzea eme. Le Kristo ƒe anyinɔɣi sia me la, Kristotɔ sɔhɛwo tsɔa didi vevie tsɔa wo ɖokui nana faa le agbɔsɔsɔ gã aɖe me. Abe zãmu si naa dzidzeme ame ene la, ɖekakpui kple ɖetugbi geɖe tsɔa dzidzɔ subɔa Mawu henaa kpekpeɖeŋu wo hati tadeagulawo.—Psalmo 71:17.

Menye ame bubuwo koe Kristotɔ sɔhɛwo nyea dzidzeme na o; woa ŋutɔwo kpɔa dzidzeme le woƒe subɔsubɔdɔa me. Mawu ƒe habɔbɔa nyea afisi woate ŋu akpɔ dzidzedze le. Esi ɖekakpuiwo kple ɖetugbiwo léa agbenyuinɔnɔ me ɖe asi ta la, wonɔa ƒomedodo kplikplikpli me kple Mawu. (Psalmo 119:9) Le hamea me la, wokpɔa gome le dɔwɔna tuameɖowo me eye wodzea xɔlɔ̃ nyuiwo—siwo nye nusiwo naa wonɔa agbe ɖɔʋu si me dzidzeme le.

‘Gbedada Kple Dzidzeme’

Ðe Kristotɔ sɔhɛwo ŋutɔ sena le wo ɖokui me be yewo le abe ‘zãmu’ enea? Se Tania, si nye ɖetugbi veviedola aɖe le hamea me eye wòtsɔa dzidzɔ zãa gaƒoƒo 70 kple edzivɔ ɣleti ɖesiaɖe le subɔsubɔdɔa me, ƒe numenya ɖa. Aleke wòsena le eɖokui me? Egblɔ be: “Nye dzi dzea eme eye dzi dzɔam ŋutɔ. Yehowa kple eƒe anyigba dzi habɔbɔ si mekpɔ la nye ‘gbedada kple dzidzeme’ nam.”—Lododowo 3:8.

Ariel, si nye sɔhɛ bubu si le ɣeyiɣiawo katã ƒe subɔsubɔdɔa wɔm, kpɔa dzidzɔ ɖe gbɔgbɔmenunyiame siwo wòxɔna le hamea me ŋu. Egblɔ be: “Ne meyi  Kristotɔwo ƒe kpekpewo, takpekpe gãwo kple sueawo heɖu nu le Yehowa ƒe gbɔgbɔmekplɔ̃ dzi la, esia naa nye dzi dzea eme ŋutɔ le gbɔgbɔ me. Eye wòkpena ɖe ŋunye mekpɔnɛ dzea sii be hadɔwɔlawo le asinye le xexeame godoo.” Esime wònɔ nu ƒom tso nusi naa wòkpɔa dzidzeme wu ŋu la, egblɔ be: “Enyea dzidzeme ŋutɔ be Yehowa nanye ame xɔlɔ̃, vevietɔ ne mese alo kpɔ ŋusẽ gbegblẽ si nuɖoanyi sia kpɔna ɖe amewo dzi.”—Yakobo 2:23.

Abishai, si xɔ ƒe 20 la, nye ɣeyiɣiawo katã ƒe nyanyuigblɔla kple subɔsubɔdɔwɔla le hamea me. Egblɔ eƒe nuteƒekpɔkpɔwo ale: “Nye dzi dze eme elabena menya alesi makpɔ kuxi gbogbo siwo sɔhɛwo dzea ŋgɔe egbea la gbɔe. Biblia me nyateƒea kpe ɖe ŋunye be nye susu nanɔ nusi wòle be mawɔ be matsɔ luʋɔ blibo asubɔ Yehowae la ŋu.”

Esime Antoine ɖo eƒe ƒewuiwo me teti la, dzi kunɛ kabakaba ŋutɔ. Exlã atsiklã ɖe eƒe sukuhati aɖe kpɔ, eye wòtɔ nuŋlɔti bubu aɖe hã. Antoine menye ame fafa kura o! Gake Biblia me nufiamewo trɔ eƒe agbenɔnɔ. Fifia si wòxɔ ƒe 19 henye subɔsubɔdɔwɔla kple ɣeyiɣiawo katã ƒe subɔla le hamea me la, egblɔ be: “Meda akpe na Yehowa be wòna eŋuti sidzedze su asinye eye wòkpe ɖe ŋunye be makpɔ nusitae wòhiã be maɖu ɖokuinye dzi ahatrɔ nye agbenɔnɔ. Esia wɔe be meƒo asa na kuxi geɖewo.”

Ame bubuwo dea dzesi Kristotɔ sɔhɛwo ƒe agbenɔnɔ si naa dzidzeme amewo la. Matteo nye sɔhɛ Ðasefo le Italy. Eƒe nufiala ɖoe be woado fe sue aɖe na amesiame si agblɔ gbegblẽnya aɖe le woƒe sukuxɔa me la be wòaxe. Le ɣeyiɣi aɖe megbe la, ɖeviawo bia be woaɖe sea ɖa elabena, wogblɔ be, “manya wɔ be yewomagblɔ gbegblẽnyawo o.” Matteo ɖe eme be: “Gake nufiala la gblɔ be anya wɔ, eye wòtsɔ nye, amesi nye Yehowa Ðasefo wɔ kpɔɖeŋui na wo hekafum le klass blibo la ŋkume le nya ɖɔʋu siwo megblɔna ta.”

Le klass sẽto aɖe me le Thailand la, nufiala la yɔ Racha si xɔ ƒe 11 la va klass la ŋgɔ hekafui ɖe eƒe agbenɔnɔ ta eye wògblɔ be: “Nukatae mi katã miasrɔ̃ eƒe kpɔɖeŋua o? Edoa vevie eƒe nusɔsrɔ̃ eye wòbua ame.” Emegbe wògblɔ na sukuviawo be: “Ewɔ nam be ahiã be miazu Yehowa Ðasefowo, abe Racha ene, ale be miaƒe agbenɔnɔ nanyo.”

Enye dzidzɔ be míakpɔ be Kristotɔ sɔhɛ akpe geɖe le Yehowa nyam nyuie ɖe edzi hele eƒe lɔlɔ̃nu wɔm. Sɔhɛ ɖɔʋu siawo wɔa nu nunyatɔe abe ame tsitsiwo ene. Mawu ate ŋu akpe ɖe wo ŋu be woakpɔ dzidzedze le agbe si wole fifia me eye wòana etsɔme nyui aɖe wo le xexe yeye si gbɔna me. (Timoteo I, 4:8) Woto vovo tso fifi nuɖoanyi sia ƒe anyigba si dzi ƒu kplakplakpla le gbɔgbɔ me gome heyɔ fũ kple sɔhɛ siwo mele dzidzedze aɖeke kpɔm o hetɔtɔ la gbɔ kura!