Sikasededea​—Viɖe Le Eŋu

Togbɔ be ame akpa gãtɔ bua Sikasededea be enye agbenyuinɔnɔ ŋuti nu si Yesu fia hã la, eya ŋutɔ gblɔ be: “Nye nufiafia la menye tɔnye o, ke boŋ amesi dɔm ɖa la tɔe.”​—Yohanes 7:16.

NYATEƑEE, Amesi gbɔ Yesu kpɔ eƒe nufiafia, siwo dometɔ ɖeka enye nusi wova yɔ be Sikasedede la tsoe enye amesi dɔ Yesu, si ŋkɔe nye Yehowa Mawu, Wɔla la.

Mawu ɖoe tso gɔmedzedzea me be amegbetɔwo nawɔ nu ɖe wo nɔewo ŋu abe alesi woadi be woawɔe na wo ene. Eɖo ɖetsɔtsɔ le ame bubuwo ƒe nyonyo me ƒe kpɔɖeŋu nyuitɔ ɖi le alesi wòwɔ amegbetɔwoe me: “Mawu wɔ ame ɖe ye ŋutɔ ƒe nɔnɔme, Mawu ƒe nɔnɔme nue wòwɔe ɖo; ŋutsu kple nyɔnu wòwɔ.” (Mose I, 1:27) Esia fia be Mawu tsɔ eya ŋutɔ ƒe nɔnɔme ɖedzesi agbɔsɔsɔ aɖe na amegbetɔwo ale be woate ŋu ase vivi na agbe le ŋutifafa, dzidzɔkpɔkpɔ, kple le ɖekawɔwɔ me—eye woate ŋu anɔ anyi tegbee. Dzitsinya si Mawu na wo mamla nyuie afia mɔ wo woawɔ nu ɖe ame bubuwo  ŋu abe alesi woa ŋutɔwo adi be woawɔe ɖe yewo ŋu ene.

Ðokuitɔdidi Xɔ Ðe Eteƒe

Esi gɔmedzedze wɔnuku siae nɔ amegbetɔwo si ɖe, nukae va dzɔ? Ne míagblɔe kpuiea, ɖokuitɔdidi ye va do mo ɖa. Ame akpa gãtɔ nya nu tso Biblia ƒe nuŋlɔɖi si ku ɖe nusi srɔ̃tɔ eve gbãtɔawo wɔ ŋu, abe alesi wòdze le Mose ƒe Agbalẽ Gbãtɔ ta 3 me ene. Satana, amesi tsi tre ɖe Mawu ƒe dzidzenuwo katã ŋu, ƒoe ɖe Adam kple Xawa nu be wogbe Mawu ƒe dziɖulanyenye ɖokuitɔdiditɔe hetia ɖokuisinɔnɔ kple tiatiawɔwɔ na wo ɖokui. Menye woawo ɖeɖe ko ŋue woƒe ɖokuitɔdidi kple aglãdzedze nuwɔnaa gblẽ nu le o, ke ehe nɔnɔme wɔnublanuiwo va woƒe dzidzimevi siwo katã woava dzi le etsɔme hã dzi. Esia ɖe afɔku si dona tsona aɖabaŋeŋe ƒu nufiafia si wova yɔ be Sikasededea dzi me fia eme kɔ ƒã. Esia ta “to ame ɖeka dzi nuvɔ̃ la va xexeame, eye to nuvɔ̃ me ku la va, eye nenema ku la va to amewo katã dzi yi, esi wo katã wɔ nuvɔ̃ ŋuti.”—Romatɔwo 5:12.

Togbɔ be ameƒome bliboa gbe Yehowa Mawu ƒe lɔlɔ̃mɔwo hã la, megblẽ wo ɖi o. Le kpɔɖeŋu me, Yehowa na eƒe Se Israel-dukɔa be wòafia mɔ wo. Efia wo be woawɔ nu kple amewo abe alesi woawo ŋutɔ adii be amewo nawɔ ɖe yewo ŋui ene. Sea fia alesi wòle be woawɔ nu ɖe kluviwo, tsyɔ̃eviwo, kple ahosiwo ŋu. Eɖe alesi wòle be woakpɔ amedzidzedze, amefifi, kple fififi ŋu nyawo gbɔe me. Dzadzɛnyenye ŋuti sewo ɖe ɖetsɔtsɔ le ame bubuwo ƒe lãmesẽ me fia. Se siwo ku ɖe gbɔdɔdɔnyawo ŋu gɔ̃ hã nɔ anyi. Yehowa ƒo Sea ta esi wògblɔ na wo be: “Nalɔ̃ hawòvi abe ɖokuiwò ene,” si nye nya siwo Yesu va yɔ emegbe. (Mose III, 19:18; Mateo 22:39, 40) Sea ku ɖe alesi wòle be woawɔ nu kple amedzrovi siwo le Israel-viwo dome hã ŋu. Sea gblɔ  be: “Migasẽ ŋuta le amedzrowo ŋu o, elabena mia ŋutɔwo mienya alesi wònɔna na amedzrowo, elabena mienye amedzrowo le Egipte-nyigba dzi kpɔ.” Ne míagblɔe bubui la, ele na Israel-viwo be woaɖe veveseseɖeamenu ƒe nublanuikpɔkpɔ afia wɔnamanɔŋutɔwo.—Mose II, 23:9; Mose III, 19:34; Mose V, 10:19.

Yehowa yra Israel-dukɔa le ɣeyiɣi siwo katã me woyi edzi wɔ ɖe Sea dzi. Eme nyo na dukɔa eye ameawo kpɔ dzidzɔ hekpɔ dzidzeme le Dawid kple Salomo ƒe dziɖuɣiwo me. Ŋutinya me nuŋlɔɖi aɖe gblɔ na mí be: “Yuda kple Israel sɔ gbɔ abe ƒutake ene; woɖua nu, noa nu, eye wokpɔa dzidzɔ. Eye Yuda kple Israel dome amesiame nɔ eƒe weinka kple gboti te bɔkɔɔ.”—Fiawo I, 4:20; 5:5.

Nublanuitɔe la, ŋutifafa kple dedienɔnɔ si me dukɔa nɔ la menɔ anyi didi o. Togbɔ be Mawu ƒe Sea nɔ Israel-viwo si hã la, womewɔ ɖe edzi o; woɖe mɔ ɖokuitɔdidi vu tsyɔ woƒe ɖetsɔtsɔ le ame bubuwo me dzi. Nusia kple xɔsegbegbee he nɔnɔme sesẽwo va wo ame ɖekaɖekawo kple dukɔ bliboa dzi. Mlɔeba, le ƒe 607 D.M.Ŋ. me la, Yehowa ɖe mɔ Babilontɔwo va tsrɔ̃ Yuda-fiaɖuƒea, Yerusalem dugã la, kple gbedoxɔ dzeani si nɔ afima la gɔ̃ hã. Nukatae? “Esi miegbe toɖoɖo nye nyawo la, eyata, kpɔ ɖa, makplɔ anyiehe ƒomeawo katã kple nye dɔla Babel-fia Nebukadnezar vɛ, eye mana woava ƒo ɖe anyigba sia kple edzinɔlawo kple dukɔ sia katã dzi godoo, matsrɔ̃ wo gbidigbidi, eye matsɔ wo awɔ bibi, alɔmeɖenu kple aƒedoe tegbee; Yehowa ye gblɔe!” (Yeremya 25:8, 9) Teƒeɖoɖo kae nye esi wònye na wo le Yehowa ƒe tadedeagu vavãtɔ gbegblẽ ɖi ta!

Kpɔɖeŋu si Wòle Be Míasrɔ

Le go bubu me la, menye ɖeko Yesu Kristo fia Sikasededea ko o, ke eɖo kpɔɖeŋu nyui ɖi le edzi wɔwɔ me hã. Etsɔ ɖe le ame bubuwo ƒe nyonyo me ŋutɔŋutɔ. (Mateo 9:36; 14:14; Luka 5:12, 13) Gbeɖeka, le du si nye Nain gbɔto la, Yesu kpɔ ahosi aɖe si ƒe dzi gbã le amesiwo yina eƒe tenuvi ɖeka ɖi ge la dome. Biblia ƒe nuŋlɔɖia gblɔ be: “Esi Aƒetɔ la kpɔ ahosi la la, eƒe dɔme trɔ ɖe eŋuti.” (Luka 7:11-15) Le Vine’s Expository Dictionary of Old and New Testament Words, ƒe nya nu la, nyagbɔgblɔ “eƒe dɔme trɔ” fia be “woase veve le ememe.” Ese veve si nɔ dzime ɖe nyɔnua ti, eye wòʋãe be wòɖe afɔ tsɔ ɖee le eƒe nuxaxaa me. Dzidzɔ kae enye esi ahosi ma akpɔ esi Yesu fɔ ŋutsuvia “eye wòtsɔe na dada”!

Mlɔeba, le ɖekawɔwɔ me kple Mawu ƒe tameɖoɖo la, Yesu lɔ̃ faa kpe fu hetsɔ eƒe agbe na tafee be ameƒomea nate ŋu akpɔ ablɔɖe tso nuvɔ̃ kple ku ƒe kluvinyenye si me. Esiae nye agbenɔnɔ ɖe Sikasededea nu ƒe kpɔɖeŋu gãtɔ kekeake.—Mateo 20:28; Yohanes 15:13; Hebritɔwo 4:15.

Amesiwo Wɔa Sikasededea Dzi

Ðe ame aɖewo li egbea siwo nɔa agbe ɖe Sikasededea nu nyateƒea? Ẽ, eye menye ne nɔnɔmea de wo dzi ko hafi o. Le kpɔɖeŋu me, le Xexemeʋa II wɔɣi le Nazi Germany la, Yehowa Ðasefowo lé woƒe Mawu dzixɔxɔse kple lɔlɔ̃ na wo haviwo me ɖe asi eye wogbe be yewomada le Sikasededea dzi o. Togbɔ be Dukɔa nɔ fuléle Yudatɔwo katã kple vovototodedeameme ƒe dzi dem ƒo vevie hã la, Ðasefowo yi edzi wɔ ɖe Sikasededea dzi. Le fuwɔamegaxɔwo gɔ̃ hã me la, woyi edzi tsɔ ɖe le eme na wo havi amegbetɔwo, ma woƒe nuɖuɖu kple Yudatɔwo kpakple amesiwo menye Yudatɔwo o, siwo dɔ nɔ wuwum la, togbɔ be nuɖuɖu nɔ vevem hã. Gakpe ɖe eŋu la, togbɔ be Dukɔa de se be woatsɔ tu awu amewo hã la, wogbe abe alesi womedi be ame bubu nawu wo o ene. Aleke woawu amesiwo wòle na wo be woalɔ̃ abe woa ŋutɔwo ɖokui ene? Esi wogbe la, menye ɖeko wokplɔ wo dometɔ geɖe de fuwɔamegaxɔwo me o ke wowu wo hã.—Mateo 5:43-48.

Esi nèle nyati sia xlẽm la, èle vi ɖem tso Sikasedede si dzi wɔm wole la ƒe kpɔɖeŋu  bubu me. Yehowa Ðasefowo va kpɔe be, egbea la, ame geɖe kpea fu mɔkpɔkpɔ kple kpekpeɖeŋu aɖeke manɔmee. Le esia ta Ðasefoawo lɔ̃na faa wɔa dɔ nyuiwo tsɔ kpena ɖe amewo ŋu be woasrɔ̃ nu tso mɔkpɔkpɔ kple mɔfiame nyui siwo le Biblia me la ŋu. Esia nye xexeame katã ƒe nufiafiadɔ si wɔm wole le mɔ si ɖeke mesɔ kplii o la ƒe akpa aɖe. Nukae do tso eme? Abe alesi wogblɔe ɖi le Yesaya 2:2-4 ene la, ‘wofia Yehowa ƒe mɔwo kple eƒe toƒewo dukɔ geɖewo,’ le nyateƒe me la, amesiawo wu miliɔn ade le xexeame godoo. Le kpɔɖeŋunyagbɔgblɔ nu la, wosrɔ̃ alesi “woatsɔ woƒe yiwo atu kodziwoe, eye woatsɔ akplɔwo atu hɛ gobɛwoe.” Ŋutifafa kple dedienɔnɔ su wo si le ɣeyiɣi sesẽ siawo me.

Ke Wò hã Ðe?

Tɔ vie nàde ŋugble le vevesese helĩhelĩ kple fukpekpe siwo aɖabaŋeŋe ƒu Sikasededea dzi he va ameƒomea dzi tso esime wodze aglã, si Satana Abosam nɔ megbe na, le Eden-bɔa me ŋu kpɔ. Yehowa ɖo tame be yeagbugbɔ nɔnɔmea aɖo eƒe nɔnɔ kpuie. Aleke? “Esia ŋuti Mawuvi la ɖe eɖokui fia, bene yeagblẽ Abosam ƒe dɔwɔwɔwo.” (Yohanes I, 3:8) Esia ava eme le Mawu ƒe Fiaɖuƒea, si le nunyala Yesu Kristo, si si ŋutete le la si me, amesi fia Sikasededea henɔ agbe ɖe enu la ƒe dziɖuɖu te.—Psalmo 37:9-11; Daniel 2:44.

Blema Israel-fia Dawid gblɔ be: “Menɔ ɖevime tsã, eye azɔ metsi, ke nyemekpɔ be, wogblẽ ame dzɔdzɔe ɖi, eye viawo ɖo abologbe kpɔ o. Evea ame nu ɣesiaɣi, eye wòdoa nugbana, eye viawo zua yayra” (Psalmo 37:25, 26) Ðe màlɔ ɖe edzi be ame akpa gãtɔ le akpasesẽnu wɔm eye wole nu ham tsɔ wu be ‘woave ame nu eye woado nugbana’ oa? Eme kɔ ƒã be Sikasededea dzi wɔwɔ ate ŋu ana woakpɔ ŋutifafa kple dedienɔnɔ vavãtɔ elabena ana be ame naxɔ yayrawo fifia kple le Mawu ƒe Fiaɖuƒea me le etsɔme. Mawu ƒe Fiaɖuƒea aɖe ɖokuitɔdidi kple vɔ̃ɖinyenye ɖesiaɖe ɖa le anyigba dzi eye wòatsɔ nuɖoanyi yeye si Mawu awɔ aɖo fifi nuɖoanyi gblẽku sia teƒe. Ekema amesiame ase vivi le agbenɔnɔ ɖe Sikasededea nu me.—Psalmo 29:11; Petro II, 3:13.

[Nɔnɔmetata siwo le axa 5]

Menye ɖeko Yesu fia Sikasededea ko o ke eɖo kpɔɖeŋu nyui ɖi le edzi wɔwɔ me hã

[Nɔnɔmetata siwo le axa 7]

Sikasededea dzi wɔwɔ ate ŋu ana woakpɔ ŋutifafa kple dedienɔnɔ vavãtɔ