Yometila La Kpɔ Keklẽ Gã Aɖe

SAUL do dɔmedzoe ɖe Yesu yomedzelawo ŋu vevie. Alesi woti wo yome xoxo le Yerusalem, kpakple kpe ƒuƒu Stefano meɖi ƒo nɛ o, egale didim be yeakeke tsitretsiɖeŋua ɖe nu. “Saul, si galé ŋɔdzidodo kple hlɔ̃dodo ƒe gbɔgbɔtsixe ɖe ƒo ɖe Aƒetɔ la ƒe nusrɔ̃lawo ŋuti la, yi ɖe nunɔlagã gbɔ, eye wòbia agbalẽwoe bena, yeayi Damasko ɖe ƒuƒoƒeawo me, ne yeakpɔ amesiwo le nenem mɔ sia dzi, ŋutsuwo kple nyɔnuwo la, ne yeabla wo akplɔ va Yerusalem.”—Dɔwɔwɔwo 9:1, 2.

Esi Saul nɔ Damasko mɔa dzi la, anya nɔ ŋugble dem le mɔ nyuitɔ kekeake si dzi wòato awɔ eƒe dɔdasia nyuie la ŋu. Ðikekemanɔmee la, ŋusẽ si nunɔlagã la nae la ana Yudatɔ gbogbo siwo le du ma me ƒe tatɔwo nawɔ ɖeka kplii. Saul abia kpekpeɖeŋu tso wo gbɔ.

Dzi anɔ Saul dzɔm esi wònɔ dua gogom. Mɔzɔzɔ tso Yerusalem yi Damasko—si anye ŋkeke adre alo enyi ƒe azɔlizɔzɔ si ade kilometa 220 la—ate ɖeɖi eŋu ale gbegbe. Kasia le ŋdɔ me lɔƒo la, kekeli si nu sẽ wu ɣe tɔ klẽ ƒo xlã Saul eye wòmu dze anyi. Ese gbe aɖe ƒo nu nɛ le Hebrigbe me bena: “Saul, Saul! Nuka wɔ nèle yonyeme tim? Esẽ na wò be, nada afɔkpo nutɔnu.” Saul bia be: “Wò amekae, Aƒetɔ?” Ŋuɖoɖoa ɖi be: “Nyee nye Yesu, amesi yome tim nèle. Gake la fɔ, eye natsi tre ɖe wò afɔwo dzi, elabena esia ta meɖe ɖokuinye fia wò ɖo, bena maɖo wò nanye dɔla kple ɖaseɖila le nusiwo nèkpɔ kple nusiwo magaɖe afia wò la ŋuti; eye maɖe wò atso dukɔ la kple trɔ̃subɔla, siwo gbɔ mele dɔwòm ɖo la, si me.” Saul bia be: “Nuka mawɔ, Aƒetɔ?” “Tsi tre, ne nayi Damasko; eye afima woagblɔ nusiwo katã woɖo ɖi na wò be nawɔ la, na wò.”—Dɔwɔwɔwo 9:3-6; 22:6-10; 26:13-17.

Amesiwo nɔ mɔa zɔm kple Saul se gbeɖiɖi aɖe,  gake womekpɔ amesi ƒo nua alo se nusi wògblɔ gɔme o. Le alesi keklẽa nu sẽe ta la, esi Saul tso la, megate ŋu kpɔ nu o, wòhiã be woalé eƒe alɔnu. “Ŋkeke etɔ̃ sɔŋ mekpɔ nu kpɔ o, meɖu naneke o, eye meno naneke hã o.”—Dɔwɔwɔwo 9:7-9; 22:11.

Ŋugbledede Ŋkeke Etɔ̃ Sɔŋ

Yuda, amesi nɔ ablɔ si woyɔna be Dzɔdzɔe * la me xɔ Saul wɔ amedzro nɛ. (Dɔwɔwɔwo 9:11) Ablɔ sia—si woyɔna le Arabiagbe me be Darb al-Mustaqim—kpɔtɔ nye mɔ gã le Damasko. Bu nusi anɔ Saul ƒe susu me vam esi wònɔ Yuda ƒeme ŋu kpɔ. Nusi teƒe Saul kpɔ na eƒe ŋku tsi eye dzidzi ƒoe. Fiafia ɣeyiɣi li wòatsɔ ade ŋugble le nusi wòfia la ŋu.

Amesi yometila la bu be enye ame maɖinu lae wòdo goe. Aƒetɔ Yesu Kristo si wohe ɖe ati ŋu—amesi Yudatɔwo ƒe kplɔlawo bu fɔ eye ‘amewo do vloe hegbee’ la—le agbe. Nuka, etsi tre gɔ̃ hã ɖe Mawu ƒe nuɖusi me le “kekeli, si ŋu womate ŋu ate ɖo o la me”! Yesue nye Mesia la. Stefano kple bubuawo tɔ dzɔ. (Yesaya 53:3; Dɔwɔwɔwo 7:55; Timoteo I, 6:16) Saul tɔ medzɔ kura o, elabena amesiwo tututu yome tim Saul nɔ la ƒe akpa dzie Yesu le! Esi Saul ŋutɔ kpɔ eŋuti ɖaseɖiɖia la, aleke wòawɔ ayi edzi ‘anɔ afɔkpo dam nutɔnui’? Nyitsu si dze aglã kura gɔ̃ hã ƒe aƒetɔ te ŋu naa wòtrɔna va toa afisi wòdi be wòato. Eyata ne Saul agbe be yemawɔ ɖe nusi gblɔm Yesu nɔ dzi o la, anɔ nuvevi wɔm eɖokui.

Esi Yesue nye Mesia la ta la, menye amesi Mawu nabu fɔe wònye o. Gake Yehowa ɖe mɔ wòku ŋukpeku eye wònɔ Sea ƒe fɔbubu te: “Mawu ƒo fi de amesi wode kae ɖe ati ŋu la.” (Mose V, 21:23) Fuwɔameti ŋue Yesu ku ɖo. Woƒo fi dee, ke menye le eya ŋutɔ ƒe nuvɔ̃ ta o, elabena nuvɔ̃ aɖeke mele eŋu o, gake le ameƒomea ƒe nuvɔ̃wo ta. Saul ɖe nu me emegbe be: “Ame alesi nu tso se la ƒe dɔwɔwɔwo me la, wole fiƒode la te; elabena woŋlɔ ɖi bena: ‘Woaƒo fi ade amesiame, si menɔ nusianu, si woŋlɔ ɖe anyi le sea ƒe agbalẽ me la dzi, bene wòawɔ edzi o la.’ Ke edze ƒã bena, wometsoa afia na ame aɖeke to se la me le Mawu ŋku me o. . . . Kristo xe fe ɖe mía ta heɖe mí tso se la ƒe fiƒode la me, esi wòva zu fiƒode le mía ta; elabena woŋlɔ ɖi bena: ‘Woƒo fi de amesiame, si wohe ɖe ati ŋu la.’ ”—Galatiatɔwo 3:10-13.

Yesu ƒe vɔsa te ŋu ɖea ame. Esi Yehowa xɔ vɔsa ma la, eklã Se la kple eƒe fiƒode la ɖe ati ŋu le kpɔɖeŋu mɔ nu. Esi Saul va se nya ma gɔme la, ebu fuwɔameti, si nye “nukikli na Yudatɔwo” la ‘Mawu ƒe nunyae.’ (Korintotɔwo I, 1:18-25; Kolosetɔwo 2:14) Eyata ne menye sea ƒe dɔwɔwɔwo mee woato akpɔ xɔxɔ o ke boŋ to Mawu ƒe amenuveve na nuvɔ̃wɔlawo abe Saul ŋutɔ hã ene mee la, ke mɔa le ʋuʋu ɖi na amesiwo le Sea godo hã. Eye Trɔ̃subɔlawo gbɔe Yesu nɔ Saul ɖom ɖo.—Efesotɔwo 3:3-7.

Míate ŋu agblɔ alesi gbegbe Saul se nya siawo gɔmee le eƒe dzimetrɔɣia o. Yesu agaƒo nu nɛ ake, ɖewohĩ aƒo nu nɛ tso dɔ si wòde esi be wòayi trɔ̃subɔlawo gbɔ ŋu wu zi ɖeka. Gakpe ɖe eŋu la, ƒe geɖe va yi hafi Saul dze nusiawo katã ŋɔŋlɔ gɔme le Mawu ƒe gbɔgbɔ ƒe ameʋaʋã te. (Dɔwɔwɔwo 22:17-21; Galatiatɔwo 1:15-18; 2:1, 2) Gake ŋkeke ʋe aɖewoe koe va yi hafi Saul xɔ mɔfiame bubuwo tso eƒe Aƒetɔ yeyea gbɔ.

Anania ƒe Sasrãkpɔ

Esi Yesu ɖe eɖokui fia Saul megbe la, eɖe eɖokui fia Anania hã gblɔ nɛ bena: “[Yi] ablɔ, si woyɔna be dzɔdzɔe la me, eye nabia ame aɖe, si ŋkɔ  nye Saul tso Tarso la ta se le Yuda-ƒe me; elabena kpɔ ɖa, ele gbe dom ɖa, eye wòkpɔ ŋutsu aɖe le ŋutega me, amesi ŋkɔ nye Anania la, gbɔna egbɔ, eye wòle asi dam ɖe edzi, bena wòagakpɔ nu.”—Dɔwɔwɔwo 9:11, 12.

Esi Anania nya Saul ta la, eme kɔ be nya si Yesu gblɔ nɛ la wɔ nuku nɛ. Egblɔ be: “Aƒetɔ, mese le ame geɖewo nu le ŋutsu sia ŋuti, alesi wòwɔ vɔ̃ geɖe ɖe wò ame kɔkɔe, siwo le Yerusalem la ŋu; eye afisia hã ekpɔ ŋusẽ tso nunɔlagãwo gbɔ, be wòabla amesiwo katã yɔa wò ŋkɔ dzi.” Gake Yesu gblɔ na Anania bena: “Heyi, elabena amesia enye dɔwɔnu tiatia nam, be wòatsɔ nye ŋkɔ la ayi ɖe trɔ̃subɔlawo kple fiawo kpakple Israel-viwo ƒe ŋku me.”—Dɔwɔwɔwo 9:13-15.

Esi Anania kpɔ kakaɖedzi la, eyi afisi Yesu fiae la. Esi Anania kpɔ Saul hedo gbe nɛ la, eda asi ɖe edzi. Nuŋlɔɖia gblɔ be: “Eye enumake ewɔ abe nanee ge tso [Saul ƒe] ŋkuwo dzi abe tsrowo ene, eye wògakpɔ nu.” Saul le klalo azɔ aɖo to. Anania ƒe nyawo ɖo kpe nusi gɔme Saul anya se le Yesu ƒe nyawo me la dzi, egblɔ be: “Mía fofowo ƒe Mawu la ɖo wò be, nanya eƒe lɔlɔ̃nu, nakpɔ dzɔdzɔetɔ la, eye nase eƒe numegbe; bena nanye eƒe ɖaseɖila hena amewo katã le nusiwo nèkpɔ kple nusiwo nèse la ŋuti. Eye azɔ, nuka wɔ nèle hehem ɖe megbea? Tsi tre, eye na [woanyrɔ wò ɖe tsi me], eye woaklɔ wò nuvɔ̃wo ɖa, eye nayɔ Aƒetɔ la ƒe ŋkɔa dzi.” Nukae do tso eme? Saul ‘tsi tre, eye wonyrɔe; eye wòɖu nu, eye wòkpɔ ŋusẽ.’—Dɔwɔwɔwo 9:17-19; 22:12-16.

Esi nuteƒewɔla Anania wu eƒe dɔdasia nu vɔ teti ko la, eƒe ŋkɔ bu le nuŋlɔɖia me eye womegagblɔ nya aɖeke le eŋuti na mí o. Gake Saul ƒe nu wɔ nuku na amesiwo katã se eƒe nyawo! Amesi nye yometila tsã, si va Damasko be yeava lé Yesu ƒe nusrɔ̃lawo la, te gbeƒãɖeɖe le ƒuƒoƒewo eye wòle kpe ɖom edzi bena Yesue nye Kristo la.—Dɔwɔwɔwo 9:20-22.

“Trɔ̃subɔlawo ƒe Apostolo”

Nusi teƒe Saul kpɔ le Damasko mɔa dzi zi edzi wòdzudzɔ amewo yome titi. Esi Saul va kpɔ Mesia la dze sii la, ate ŋu ase nukpɔsusu kple nyagblɔɖi geɖe siwo le Hebri Ŋɔŋlɔawo me, siwo ku ɖe Yesu ŋu la gɔme. Esi Saul nya be Yesue ɖe eɖokui fia ye eye eƒe ‘asi su ye dzi’ wòɖo ye “trɔ̃subɔlawo ƒe apostolo” la na eƒe agbenɔnɔ trɔ keŋkeŋ. (Filipitɔwo 3:12; Romatɔwo 11:13) Fifia esi wònye apostolo Paulo la, mɔnukpɔkpɔ kple ŋusẽ su esi, menye esi akpɔ ŋusẽ ɖe eƒe agbenɔƒe mamlɛa dzi le anyigba dzi ko o, ke boŋ akpɔ ŋusẽ ɖe Kristotɔwo ƒe dɔwɔnawo hã dzi.

Ƒe aɖewo megbe esi wonɔ nya ʋlim ku ɖe Paulo ƒe apostolonyenye ŋuti la, eƒo nu tso nusi teƒe wòkpɔ le Damasko mɔa dzi ŋu tsɔ ʋli ŋusẽ si wonɛ la ta. Ebia be: “Ðe nyemenye apostolo oa? . . . Ðe nyemekpɔ Yesu Kristo, mía Aƒetɔ la oa?” Eye esi Saul (Paulo) ƒo nu tso Yesu, si wofɔ ɖe tsitre, si ɖe eɖokui fia amewo ŋu vɔ megbe la, egblɔ be: “Wo katã megbe la eɖe eɖokui fia nye hã abe fu gegee ene.” (Korintotɔwo I, 9:1; 15:8) Enɔ abe esi Saul kpɔ Yesu ƒe dziƒoŋutikɔkɔe le ŋutega me la, ɖe wona mɔnukpɔkpɔe be wogbugbɔ dzii, alo fɔe ɖe tsitre, yi gbɔgbɔmegbenɔnɔ me do ŋgɔ na ɣeyiɣiɖoɖia ene.

Saul xɔ mɔnukpɔkpɔ si wonae la, eye wòʋli sesĩe nɔ agbe ɖe enu. Eŋlɔ bena: “Nye enye suetɔ le apostoloawo dome, amesi medze be, woayɔ be apostolo o, elabena meti Mawu ƒe hame la yome. Ke . . . [Mawu ƒe] amenuveve, si wòtsɔ ve nunye la, menye dzodzro o, elabena medze agbagba geɖe wu [apostolo bubuawo] katã.”—Korintotɔwo I, 15:9, 10.

Ðewohĩ abe Saul ene la, èɖo ŋku edzi be esime nède dzesii be hafi Mawu nakpɔ ŋudzedze ɖe ye ŋu la, ehiã be yeawɔ tɔtrɔ le subɔsubɔnukpɔsusu siwo nɔ ye si xoxoxo la ŋu. Ðikeke mele eme o be èda akpe na Yehowa ŋutɔ be ekpe ɖe ye ŋu yese nyateƒea gɔme. Esi Saul kpɔ kekelia eye wòde dzesi nusi wobia tso esi la, mehe ɖe megbe le ewɔwɔ me o. Eye eyi edzi wɔe kple dzonɔameme kple tameɖoɖo kplikpaa le eƒe agbenɔƒe mamlɛawo me le anyigba dzi. Kpɔɖeŋu nyui ka gbegbee nye si wònye na amesiwo katã di be Yehowa nakpɔ ŋudzedze ɖe yewo ŋu egbea!

[Etenuŋɔŋlɔwo]

[Nɔnɔmetata si le axa 27]

Ablɔ si woyɔna be Dzɔdzɔe la le egbegbe Damascus

[Afi Si Míexɔ Mɔɖeɖe Tso]

Photo by ROLOC Color Slides