Woɖe Daniel Ƒe Agbalẽa Me!

TAKPEKPEA valawo di vevie be axa 320-gbalẽ si nye Ðo To Daniel ƒe Nyagblɔɖi La!, si woɖe ɖe go yeyee la ƒe ɖe naka yewo si. Aleke wokpɔ agbalẽae? Se nya siwo wo dometɔ aɖewo gblɔ ɖa.

“Esesẽna nam be mase vivi na blema ŋutinyawo sɔsrɔ̃, abe alesi wònɔna na sɔhɛ akpa gãtɔ ene. Eyata esi mexɔ agbalẽ yeye si nye Ðo To Daniel ƒe Nyagblɔɖi La! ɖeka na ɖokuinye la, meʋãm boo be maxlẽe o, gake metee kpɔ. Magblɔ be, nye nɔnɔme trɔ kura! Agbalẽ sia nye nyuitɔ kekeake siwo ŋu meke ɖo kpɔ la dometɔ ɖeka. Eléa ame dana ɖi vavã! Megawɔ nam abe ŋutinya si dzɔ ƒe akpe geɖe enye si va yi ene la xlẽm mele o. Esiae nye zi gbãtɔ si metsɔ ɖokuinye ɖo Daniel teƒe kpɔ. Le nyateƒe me la, mete ŋu kpɔ alesi wòanɔ la le susu me ne woakplɔ ame adzoe le eƒe ƒometɔwo gbɔ, ayi ɖe dutanyigba aɖe dzi, eye woado eƒe nuteƒewɔwɔ akpɔ enuenu. Meda akpe geɖe na mi ɖe agbalẽ sia ta.”—Anya.

“Nusi kpe ɖe ŋunye wue nye nya si wona wòdze ƒã be Yehowa kpɔ ŋusẽ blibo ɖe nya siwo ka eƒe amewo la dzi. Edze kɔte le Daniel ƒe ŋutegawo kple drɔ̃ewo kpakple ame bubu siwo tɔ gɔme wòɖe me be Mawu maɖe mɔ gbeɖe be nuwo nadzɔ ato vovo na alesi wòɖoe o. Esia gado ŋusẽ alesi gbegbe míekpɔa mɔ na xexeme yeye si wòahe vɛ si woɖɔ le nyagblɔɖi me le Biblia me.”—Chester.

“Alesi miena Daniel dze ame ŋutɔŋutɔe la dze ŋunye ŋutɔ. Alesi mieƒo nu tso eƒe dzimaɖitsitsiwo kple nya siwo te ɖe edzi ŋu la na megadze sii ɖe edzi. Meva se nusita eƒe nu nyo Yehowa ŋu nenema gbegbe la gɔme nyuie azɔ. Metsi dzi ɖe eɖokui ŋu le eƒe dodokpɔwo kple yometitiawo katã me o. Yehowa kple Eƒe ŋkɔ nyui la ŋue wòtsi dzi ɖo wu. Meda akpe na mi ɖe alesi miena nya siawo dze kɔte ta.”—Joy.

“Nusiae míenɔ mɔ kpɔm na! Womeɖe alesi gbegbe Daniel ƒe agbalẽa ka mía dometɔ ɖesiaɖe fia alea kpɔ o. Esi mexlẽ agbalẽ yeyea ƒe akpa gbogbo aɖe vɔ le gbesigbe mexɔe ƒe fiẽ me la, ɖeko wòle nam be matɔ te ada akpe na Yehowa le gbedodoɖa me.”—Mark.

“Nusi míekpɔ mɔ na o ye nye dɔ si wòwɔ ɖe mía viwo dzi. Ðeka xɔ ƒe atɔ̃ eye evelia xɔ ƒe etɔ̃. . . . Togbɔ be Daniel, Xananya, Misael, kple Azarya ƒe ŋutinyawo nye ŋutinya siwo doa dzidzɔ na wo wu le Nye Agbalẽ Si Nye Biblia-Ŋutinyawo me hã la, alesi wogblɔ nyaawo le Daniel ƒe Nyagblɔɖi gbalẽa me la wɔ dɔ ɖe wo dzi ale gbegbe be míekpɔ mɔ nɛ nenema o. Togbɔ be wometsi o hã la, edze abe wode ɖekakpui nudzɔdzɔewɔla siawo dzi ene. Kpɔɖeŋuɖola nyui kawo gbegbee nye si wonye na mía viwo! Dɔwɔnu nyui ka gbegbee nye si miena mí! Akpe na mi, akpe na mi kakaaka!”—Bethel.

“Ðeko wòwɔ nam abe ɖe menɔ Hebri-ɖekakpui mawo gbɔ le woƒe xɔse ƒe dodokpɔawo me ene; eye ema de dzi ƒo nam be malé ŋku ɖe nye ŋutɔ nye xɔse ŋu. Numedzodzroɖaka si woɖo tanya na be “Nukawo Gɔmee Nèva Se?” wɔe be ta la me nyawo ɖoa dzi gbɔ. Akpe na mi ake ɖe agbalẽ nyui bubu sia ta.”—Lydia.