Na Mia Kple Yehowa Dome Nanɔ Kplikplikpli

NUSRƆ̃LA Yakobo ŋlɔ bena: “Mite ɖe Mawu ŋu, eye wòate ɖe mia ŋu.” (Yakobo 4:8) Eye hakpala Dawid dzi ha bena: “Yehowa bɔa ha kple amesiwo vɔ̃nɛ.” (Psalmo 25:14) Edze ƒã be Yehowa Mawu di be ƒomedodo kplikplikpli nanɔ mía kple ye dome. Ke hã menye amesiame si nye Mawu subɔla eye wòwɔa eƒe sewo dzi lae senɛ le eɖokui me be ye kpakplii dome le kplikplikpli o.

Ke wò ya ɖe? Ðe ƒomedodo kplikplikpli le mia kple Mawu domea? Ðikeke mele eme o be àdi be yeate ɖe eŋu kplikplikpli awu. Aleke míawɔ be mía kple Mawu dome nanɔ kplikplikpli? Nukae esia wɔwɔ afia na mí? Biblia ƒe agbalẽ si nye Lododowo ƒe ta etɔ̃lia ɖo eŋu na mí.

Ðe Amenuveve Kple Nyateƒetɔnyenye Fia

Blema Israel Fia Salomo dze Lododowo ƒe agbalẽa ƒe ta etɔ̃lia ŋɔŋlɔ gɔme kple nya siawo be: “Vinye, megaŋlɔ nye nufiame be o, eye wò dzi nedzra nye sededewo ɖo; elabena woahe agbenɔnɔ didi, ƒe nyuiwo kple ŋutifafa vɛ na wò kpaŋkpaŋ.” (Lododowo 3:1, 2) Esi Mawu ƒe gbɔgbɔe ʋã Salomo hafi wòŋlɔ nyaawo ta la, vifofo ƒe nuxlɔ̃ame sia tso Yehowa Mawu ŋutɔŋutɔ gbɔ, eye míawoe wòxlɔ̃ nui. Woxlɔ̃ nu mí le afisia be míawɔ ɖe Mawu ƒe ŋkuɖodzinyawo—eƒe sewo, alo nufiafia, kple eƒe sedede—siwo woŋlɔ ɖe Biblia me la dzi. Ne míewɔe la, “woahe agbenɔnɔ didi, ƒe nyuiwo kple ŋutifafa vɛ” na mí. Ẽ, fifia gɔ̃ hã la, míate ŋu anɔ ŋutifafa me eye míaƒo asa na nuwɔna siwo ana míaku kukpo si dzɔna ɖe nuvɔ̃wɔlawo dzi. Gakpe ɖe eŋu la, míate ŋu akpɔ mɔ na agbe mavɔ nɔnɔ le ŋutifafa xexe yeyea me.—Lododowo 1:24-31; 2:21, 22.

Salomo gblɔ yi edzi be: “Amenuveve kple nyateƒe megate ɖa le ŋuwò o; tsɔ wo de kɔ, ŋlɔ wo ɖe wò dzi ƒe kpe dzi; ekema amenuveve kple gɔmesese nyui asu asiwò le Mawu kple amegbetɔwo ŋku me.”—Lododowo 3:3, 4.

Wogaɖea nya si wozã “amenuveve” na le gbegbɔgblɔ si me woɖee tsoe gbã me be “nuteƒewɔwɔ ƒe lɔlɔ̃,” si fia anukwareɖiɖi, kukuɖeameŋu, kple nuteƒewɔwɔ. Ðe míeɖoe kplikpaa be nuka kee ɖale dzɔdzɔm o, míaku ɖe Yehowa ŋu kplikplikplia? Ðe míeɖea amenuveve fiana le mía kple haxɔsetɔwo dome ƒomedodowo mea? Ðe míedzea agbagba be mía kple wo dome nanɔ kplikplikpli ɣesiaɣia? Le míaƒe gbesiagbenuwɔwɔ kpli wo me la, ɖe míenaa ‘amenuveve nɔa míaƒe aɖe dzi’ le nɔnɔme sesẽwo gɔ̃ hã mea?—Lododowo 31:26.

Esi Yehowa yɔ fũ kple amenuveve ta la, ‘elɔ̃a tsɔtsɔke.’ (Psalmo 86:5) Ne míetrɔ le míaƒe tsã nuvɔ̃wo me eye míele mɔ dzɔdzɔewo ɖem na míaƒe afɔwo fifia la, wona kakaɖedzi mí be “gbɔɖemeɣi” atso Yehowa gbɔ ava na mí. (Dɔwɔwɔwo 3:19) Ðe mele be míasrɔ̃ mía Mawu le amewo ƒe vodadawo tsɔtsɔ ke wo me oa?—Mateo 6:14, 15.

Yehowa nye ‘Mawu nyateƒetɔ’ eye edi ‘nyateƒetoto’ tso amesiwo di be yewo kplii dome  nanɔ kplikplikpli gbɔ. (Psalmo 31:6) Ðe míakpɔ mɔ vavã be Yehowa anye mía Xɔlɔ̃ ne míenɔa agbe eve—ne míele mía hati Kristotɔwo dome la míaƒe nuwɔna le vovo, eye ne womele mía kpɔm o la, míewɔa nu bubu kura—abe ‘ame maɖianukware’ siwo ɣlaa amesi ƒomevi wonye la enea? (Psalmo 26:4) Aleke gbegbe ema anye movidzɔdzɔe nye si esi “woklo nu le nuwo katã dzi, eye wotsi ƒeƒle” le Yehowa ƒe “ŋku me”!—Hebritɔwo 4:13.

Ele be míabu amenuveve kple nyateƒetoto be wonye kɔga xɔasi si wòle be ‘míatsɔ ade kɔ,’ elabena woakpe ɖe mía ŋu be ‘Mawu kple amegbetɔwo nave mía nu.’ Mehiã be míaɖe nɔnɔme siawo afia le gotagome ko evɔ o, ke ele hã be míaŋlɔ wo ɖe ‘míaƒe dzi ƒe kpe dzi,’ míana woanye míaƒe nɔnɔme ƒe akpa vevi aɖe.

Tu Ŋuɖoɖo Ðe Yehowa Ŋu Bliboe Ðo

Fia nunyala la yi edzi be: “Ðo ŋu ɖe Yehowa ŋu tso dzi blibo me, ke megaɖo dzi ɖe wò gɔmesese ŋu o. Lé ŋku ɖe eŋu le wò mɔwo katã dzi, ekema ata mɔ na wò.”—Lododowo 3:5, 6.

Yehowa ŋue wòle be míaɖo ŋu ɖo bliboe nyateƒe. Esi wònye Wɔla ta la, enye “ŋusẽ geɖe” Dzɔtsoƒe eye eƒe ‘alɔka me sẽ.’ (Yesaya 40:26, 29) Ete ŋu wɔa nusiwo katã wòɖo tame be yeawɔ. Nusitae nye be eƒe ŋkɔ gɔmee nye “Enana Wòvaa Eme,” eye enaa míekana ɖe ŋutete si le esi be wòana nusiwo ƒe ŋugbe wòdo nava eme la dzi! Esi “Mawu mate ŋu aka aʋatso o” ta la, eyae nye nyateƒetoto ƒe kpɔɖeŋu nyuitɔ kekeake. (Hebritɔwo 6:18) Eƒe nɔnɔme si ƒo ɖesiaɖe tae nye lɔlɔ̃. (Yohanes I, 4:8) Enye “dzɔdzɔetɔ le eƒe mɔwo katã me, kple amenuvetɔ le eƒe nuwɔwɔwo katã me.” (Psalmo145:17) Ne míate ŋu aɖo ŋu ɖe Mawu ŋu o ɖe, ke ameka ŋue míaɖo ŋu ɖo? Gake be míatu ŋuɖoɖo ɖe eŋu ɖo la, ele be ‘míaɖɔe kpɔ, ne míakpɔe be Yehowa ƒe dɔme nyo’ to nusiwo míesrɔ̃ le Biblia me tsɔtsɔ wɔ dɔe le míaƒe agbenɔnɔ me, kple to ŋugbledede le nu nyui siwo míekpɔ tso eme ŋu me.—Psalmo 34:9.

Aleke ‘míalé ŋku ɖe Yehowa ŋu le míaƒe mɔwo katã dzii’? Hakpala si gbɔgbɔ ʋã la gblɔ be: “Mabu tame le wò nuwɔwɔwo katã ŋu, eye made ŋugble le wò dɔwɔwɔwo ŋu.” (Psalmo 77:13) Esi míekpɔa Mawu o ta la, ŋugbledede le eƒe nukunuwɔwɔwo kple alesi wòwɔ nu kple eƒe amewo ŋu le vevie bene ƒomedodo kplikplikpli nanɔ mía kplii dome.

Gbedodoɖa hã nye mɔ vevi aɖe si dzi míato alé ŋku ɖe Yehowa ŋu. Fia Dawid yi edzi yɔ Yehowa “gbawotsyogbe.” (Psalmo 86:3) Dawid do gbe ɖa edziedzi le zã me esi wònye sisila le gbedadaƒo. (Psalmo 63:7, 8) Apostolo Paulo xlɔ̃ nu be: ‘Minɔ gbedodoɖa dzi le ɣeawokatãɣi me.’ (Efesotɔwo 6:18) Zi nenie míedoa gbe ɖa? Ðe dzeɖoɖo tso dzi me kple Mawu vivia mía nua? Ne míedze ŋgɔ nɔnɔme sesẽwo la, ɖe míeɖea kuku nɛ be wòakpe ɖe mía ŋua? Ðe míedoa gbe ɖa biaa eƒe mɔfiame hafi wɔa nyametsotso veviwoa? Ne míedoa gbe ɖa na Yehowa tso dzi me la, enaa míetena ɖe eŋu kplikplikpli. Eye kakaɖedzi le mía si be aɖo to míaƒe gbedodoɖa eye ‘wòata mɔ na mí.’

Aleke gbegbe wònye movidzɔdzɔe nye si be ‘míaɖo dzi ɖe mía ŋutɔ míaƒe gɔmesese’ alo xexeame ƒe ame ŋkutawo ŋu, evɔ wònye míate ŋu aɖo dzi ɖe Yehowa ŋu bliboe hafi! Salomo gblɔ be: “Meganye nunyala le ɖokuiwò ŋku me o.” Ke boŋ eɖo aɖaŋu be: “Vɔ̃ Yehowa, eye natsri vɔ̃; ekema esia ada gbe le wò ƒodo ŋu, eye wòana wò ƒuwo me nafa miaa.” (Lododowo 3:7, 8) Ele be vɔvɔ̃ nyuitɔ be míagadze agɔ le Yehowa dzi o naɖu míaƒe nuwɔnawo, susu, kple seselelãmewo dzi. Esisi ɖa alea xea mɔ na mí be míawɔ nuvɔ̃ o eye edaa gbe le mía ŋu le gbɔgbɔ me hetua mí ɖo.

Tsɔ Wò Nu Nyuitɔwo Kekeake na Yehowa

Mɔ bubu ka nue míate ŋu ate ɖe Mawu ŋu le? Fia la xlɔ̃ nu be: “Tsɔ wò kesinɔnuwo kple wò agblemenuwo katã ƒe gbãtɔwo de bubu Yehowa  ŋu.” (Lododowo 3:9) Bubudede Yehowa ŋu fia be woadoe ɖe dzi eye woakafui le dutoƒo to gomekpɔkpɔ kple asikpekpe ɖe gbeƒãɖeɖe eƒe ŋkɔa le gaglãgbe ŋu me. Kesinɔnu siwo míatsɔ ade bubu Yehowa ŋue nye míaƒe ɣeyiɣi, míaƒe ŋutete, míaƒe ŋusẽ, kple míaƒe ŋutilãmenunɔamesiwo. Ele be nusiawo nanye míaƒe nu gbãtɔwo—míaƒe nu nyuitɔwo kekeake. Ðe mele be alesi míezãa nunɔamesi siwo le mía si naɖee afia be míeɖoe kplikpaa be ‘míadi mawufiaɖuƒe la kple Mawu ƒe dzɔdzɔenyenye gbãgbiagbã’ oa?—Mateo 6:33.

Womagbe míaƒe kesinɔnu siwo míetsɔ dea bubu Yehowa ŋu teƒe ɖoɖo na mí o. Salomo na kakaɖedzi mí be: “Ekema nu ayɔ wò ava taŋtaŋ, eye wein agbagba ɖe wò ahafiãƒe.” (Lododowo 3:10) Togbɔ be gbɔgbɔ me dzidzedzekpɔkpɔ mewɔa ame kesinɔtɔe le ŋutilã me o hã la, míaƒe ŋutilãmenuwo zazã faa atsɔ ade bubu Yehowa ŋu hea yayra geɖe vɛ. Le Yesu gome la, Mawu ƒe lɔlɔ̃nuwɔwɔ nye “nuɖuɖu” si léa ame ɖe te. (Yohanes 4:34) Nenema ke gomekpɔkpɔ le gbeƒãɖeɖe kple nusrɔ̃lawɔwɔ dɔ si dea bubu Yehowa ŋu me la tua mí ɖoe. Ne míedo vevie nu le dɔ sia wɔwɔ me la, míaƒe gbɔgbɔmenudzraɖoƒewo ayɔ agbagba. Míaƒe dzidzɔ—si wein tsi tre ɖi na—ayɔ agbagba.

Azɔ hã ɖe míekpɔa Yehowa sinu eye míedoa gbe ɖa bianɛ be wòana gbesiagbenuɖuɖu si asu mía nu la mí oa? (Mateo 6:11) Le nyateƒe me la, nusianu si le mía si la tso míaƒe Dziƒofofo lɔlɔ̃tɔ la gbɔ. Zi alesi míezã míaƒe kesinɔnuwo tsɔ kafu Yehowae la, zi nenemae wòayi dzi ayra míi.—Korintotɔwo I, 4:7.

Xɔ Yehowa ƒe Amehehe

Esi Israel fia nya amehehe ƒe vevienyenye hena ƒomedodo kplikplikpli me nɔnɔ kple Yehowa ta la, exlɔ̃ nu mí be: “Vinye, megagbe Yehowa ƒe amehehe o, eƒe mokaname megaɖu dzi na wò o! Elabena amesi Yehowa lɔ̃na la, eya wòhea to na abe vi, si gbɔ fofoa melɔ̃a nu le o ene.”—Lododowo 3:11, 12.

Gake manɔ bɔbɔe na mí be míaxɔ amehehe o. Apostolo Paulo ŋlɔ bena: “Ke le fifi ɣeyiɣi me la míebua tohehe katã dzidzɔe o, ke veve boŋ; gake emegbe la etsɔa dzɔdzɔenyenye ƒe ŋutifafakutsetse na amesiwo wòmã la.”  (Hebritɔwo 12:11) Mokaname kple amehehe nye hehenana ƒe akpa vevi siwo tea mí ɖe Mawu ŋu kplikplikpli. Ðɔɖɔɖo si tso Yehowa gbɔ—míeɖaxɔe tso mía dzilawo gbɔ o, to Kristo-hamea dzi loo, alo ŋugbledede le Ŋɔŋlɔawo ŋu le ɖokuisi nusɔsrɔ̃ wɔɣi mee míexɔe le o—nye eƒe lɔlɔ̃ na mí ɖeɖe fia. Míanye nunyalawo ne míexɔe.

Lé Nunya Kple Gɔmesese Me Ðe Asi Goŋgoŋ

Emegbe Salomo te gbe ɖe akpa vevi si nunya kple gɔmesese wɔna le ƒomedodo kplikplikpli si anɔ mía kple Mawu dome dzi. Egblɔ be: “Woayra amesi tu nunya kple amesi ƒe asi su gɔmesese dzi. Elabena eƒeƒle nyo wu klosalo ƒeƒle, eye eƒe viɖe ƒo sika ta. . . . Agbeti wònye na amesiwo lée ɖe asi, eye woayra amesi vàe goŋgoŋ la.” —Lododowo 3:13-18.

Esi fia la nɔ ŋku ɖom alesi nunya kple gɔmesese dze le Yehowa ƒe nuwɔwɔ klitsuwo me dzi na mí la, egblɔ be: “Nunyae Yehowa ŋutɔ tsɔ ɖo anyigba gɔme anyii, eye gɔmesese wòtsɔ li ke dziƒoe. . . . Vinye, megana wòate ɖa le ŋkuwò me o; lé nya vavã kple tamebubu me ɖe asi sesĩe; ekema woanye agbe na wò kple atsyɔ̃ɖonu na wò kɔ.”—Lododowo 3:19-22.

Nunya kple gɔmesese nye mawumenɔnɔmewo. Menye ɖeko míatu wo ɖo ko evɔ o, ke ele be míalé wo me ɖe asi sesĩe hã be míagagbɔdzɔ le Ŋɔŋlɔawo sɔsrɔ̃ kutrikukutɔe me o eye míatsɔ nusiwo míesrɔ̃na awɔ dɔe. Salomo yi edzi be: “Ekema àlé wò mɔ atsɔ dedie, eye wò afɔ makli naneke o.” Egblɔ kpee be: “Ne èmlɔ anyi la, màɖi vo o, ke boŋ alɔ̃ avivi na wò.”—Lododowo 3:23, 24.

Ẽ, míate ŋu azɔ le dedienɔnɔ me eye míamlɔ anyi le dziɖeɖi me ahanɔ ŋkeke si dzi ‘tsɔtsrɔ̃ kpata’ si gbɔna Satana ƒe xexe vɔ̃ɖi la dzi abe fiafitɔ ene la lalam. (Tesalonikatɔwo I, 5:2, 3; Yohanes I, 5:19) Le xaxa gã si tu aƒe me gɔ̃ hã la, dzideƒo sia ate ŋu anɔ mía si be: “Ne ŋɔdzi ƒo ɖi kpoyi, eye gbegblẽ va ame vɔ̃ɖiwo dzi la, dzika matso ƒowò o. Elabena Yehowa ye nye wò ŋuɖoɖeŋutɔ, eye wòakpɔ wò afɔ dzi tso mɔ̃ me.”—Lododowo 3:25, 26; Mateo 24:21.

Wɔ Nu Nyui

Salomo xlɔ̃ nu be: “Megate nu nyui hiãtɔ, nenye be ŋutete le ŋuwò na ewɔwɔ o.” (Lododowo 3:27) Nyuiwɔwɔ na ame bubuwo lɔ míaƒe nunɔamesiwo zazã ɖe wo ŋu dɔmenyotɔe ɖe eme, eye esia wɔwɔ ƒe mɔnu vovovo li. Gake ɖe kpekpe ɖe ame bubuwo ŋu be ƒomedodo kplikplikpli nanɔ woa kple Mawu vavã la dome menye nu nyuitɔ kekeake míate ŋu awɔ na wo le “nuwuɣi” sia me oa? (Daniel 12:4) Ekema ŋkeke siawo mee wòle be míatsɔ dzo ɖe Fiaɖuƒegbeƒãɖeɖe kple nusrɔ̃lawɔwɔ dɔa ŋu.—Mateo 28:19, 20.

Azɔ hã fia nunyala la yɔ nuwɔna aɖewo siwo wòle be míatsri, esi wògblɔ be: “Ne ele asiwò la, megagblɔ na hawòvi be: ‘Heyi, ne nagava, etsɔ hã mana wò’ o! Megabu vɔ̃ ɖe hawòvi ŋu, esime wòɖe dzi ɖi le gbɔwò o. Megawɔ dzre kple ame aɖeke yakatsyɔ, ne mewɔ vɔ̃ aɖeke wò o. Megaʋã ŋu sesẽnuɖula o, eye eƒe mɔ aɖeke megadze ŋuwò o.”—Lododowo 3:28-31.

Esi Salomo nɔ susu si ta wòɖo aɖaŋua ta ƒom la, egblɔ be: “Elabena godzela enye ŋunyɔ na Yehowa, ke tsi metoa eya kple dzime dzɔdzɔe tɔ domee o. Yehowa ƒe fiƒode le ame vɔ̃ɖi la ƒe me, ke eyraa ame dzɔdzɔe la nɔƒe. Eɖua fewu le fewuɖulawo ŋu, ke evea ame bɔbɔɖeanyiwo ya nu. Bubu anye nunyalawo ƒe gome, ke ŋukpe alé bometsilawo.”—Lododowo 3:32-35.

Ne ƒomedodo kplikplikpli anɔ mía kple Yehowa dome la, mele be míaɖo tame vɔ̃ gblẽnuwo o. (Lododowo 6:16-19) Ne míewɔ nusi nyo le Mawu ŋkume ko hafi míaƒe nu adze eŋu eye wòayra mí. Ne amewo kpɔ be Mawu ƒe nunya dzena le míaƒe nuwɔna me la, woade bubu mía ŋu ale gbegbe. Eyata mina míagbe xexe vɔ̃ɖi sẽŋuta sia ƒe mɔ vɔ̃ɖiwo. Nyateƒee, mina míati nudzɔdzɔe wɔwɔ yome eye míana ƒomedodo kplikplikpli nanɔ mía kple Yehowa dome!

[Nɔnɔmetata si le axa 25]

‘Tsɔ wò nu xɔasiwo de bubu Yehowa ŋu’