NUMEKUKU aɖe si wowɔ le dukɔ enyi me le ƒe 2015 me ɖee fia be, ame siwo wɔa dɔ kwasiɖaa katã gblɔ be menɔa bɔbɔe na yewo be yewoakpɔ vovo ɖe yewoƒe dɔwo kple yewoƒe ƒomewo ŋu o. Nu siwo gbɔ wòtsoe nye ale si woƒe dɔwo dzi ɖe edzi le dɔme alo aƒe me, gazazã ƒe dzidziɖedzi kple dɔwɔwɔ gaƒoƒo geɖe. Le kpɔɖeŋu me, le Amerika la, ame siwo wɔa dɔ kwasiɖaa katã gblɔ be, yewowɔa dɔ gaƒoƒo 47 kwasiɖa sia kwasiɖa. Ame ɖeka le atɔ̃ ɖe sia ɖe me gblɔ be yewowɔa dɔ gaƒoƒo 60 alo wu ema!

Le numekuku bubu aɖe si wowɔ le dukɔ 36 me la, ame ɖeka le ene ɖe sia ɖe me gblɔ be le yewoƒe ɖiɖiɖemeɣiwo gɔ̃ hãa yewotsia dzi! Ne dɔwo sɔ gbɔ ɖe ɖeviwo hã dzi la, ate ŋu agblẽ nu le wo ŋu.

Ne míewɔa dɔ geɖe wu míaƒe ɣeyiɣi ɣeawokatãɣi la, nu ati kɔ na mí eye míava zu ame siwo “ɣeyiɣi mesuna o.” Gake ɖe wòanya wɔ be míawɔ míaƒe ɣeyiɣiwo ŋu dɔ nyuiea? Akpa kae nu siwo míesusuna, míaƒe tiatiawo kple taɖodzinuwo wɔna? Gbãa, na míakpɔ nu ene siwo ta vovo megale ame geɖe ŋu o la ɖa.

“Vifofo aɖe si ŋkɔe nye Gary gblɔ be: “Mewɔa dɔ tso Dzoɖa va se ɖe Kwasiɖa, elabe medina ɣesiaɣi be mana nu nyuiwo vinyewo. Medi be nu siwo mesu asinye le agbe me o la nasu vinyewo ya si.” Togbɔ be susu nyui anɔ dzilawo si hã la, ehiã be woalé ŋku ɖe nu siwo wotsɔ ɖo nɔƒe gbãtɔ la ŋu. Numekuku aɖewo ɖee fia be, ame tsitsi kple ɖevi siwo tsia dzi ɖe ga kple nunɔamesiwo ŋu fũu la mekpɔa dzidzɔ o, agbe tia wo eye wodzea dɔ kabakaba wu ame siwo metsia dzi ɖe kesinɔnuwo ŋu o.

Dzila aɖewo doa agba na wo ɖokuiwo kple wo viwo le esi wodi be etsɔme nanyo na yewo viwo ta. Le agbalẽ si nye Putting Family First ƒe nya nu la, dzila siwo di be nu nyuiwo nasu yewo viwo si la “kple wo viawo siaa kpea fu.”

Boblodolawo dina be míase le mía ɖokui me be ne mímeƒle yewoƒe nu yeyewo o la, ke nu le mía ŋu tom. Agbalẽ si nye The Economist gblɔ be: “Adzɔnu gbogbo siwo li kɔ ɖi la wɔe be amewo susu be vovo megale yewo ŋu o,” elabe amewo “dzea agbagba be yewoatia nu siwo yewoaƒle alo akpɔ le fefewo me alo nu si yewoaɖu” le ɣeyiɣi ʋɛ si le wo si la ko me.

Le ƒe 1930 ƒe gɔmedzedzea, ganyaŋununyala bibi aɖe gblɔ be ale si wole ŋgɔ yim le mɔ̃ɖaŋunuwo me awɔe be dɔwɔlawo nakpɔ vovo geɖe wu. Gake eda ƒu kura! Elabena Elizabeth Kolbert, si wɔa dɔ le New Yorker magazine dɔwɔƒe gblɔ be: “Le esi amewo nakpã kaba le dɔme teƒe la, woyina ɖadia nu yeye siwo hiã wo,” eye esiawo katã gblẽa ɣeyiɣi kple ga.

Dɔwɔla aɖewo wɔa dɔ kutɔkutɔe be yewoƒe nu nadze dɔtɔwo ŋu. Dɔwɔhatiwo hã ate ŋu ana dɔwɔla bubuwo nase le wo ɖokuiwo me be ele be yewoatsi anyi awɔ zãdɔ. Azɔ hã, ganyawo ƒe kemalimali ate ŋu awɔe be amewo nadi be yewoanɔ dɔ dzi atraɖii alo be ɣesiaɣi si woyɔ yewo koa, yewoayi dɔme.

Tsɔ kpe ɖe eŋu la, dzilawo ate ŋu ase le wo ɖokui me be ele be yewo hã yewoanɔ dɔ dzi atraɖii be yewoasɔ kple ƒome bubuwo. Ne womete ŋu sɔ kpli wo o la, woate ŋu ase le wo ɖokui me be “yewole nu tem” yewo viwo.

Tim si le Amerika gblɔ be: “Melɔ̃ nye dɔwɔɖuia ŋutɔ, eye meléa fɔ ɖe dɔ ŋu wɔna kutrikukutɔe ɣesiaɣi. Mesena le ɖokuinye me be ele be amewo nade dzesii be mele dɔ wɔm.”

Abe Tim ene la, ame geɖe tsia dzi ɖe wo ɖokuiwo ŋu si wɔnɛ be dɔ dzi koe wonɔna. Nu kae dona tso eme? Elizabeth Kolbert si ŋu míeƒo nu tsoe va yi gblɔ be: “Fifia vovomanɔameŋue nana bubu nɔa ame ŋu.” Egblɔ yi edzi be: “Ne mèkpɔa vovo o la, ke efia be ènye ame vevi aɖe.”

Biblia de dzi ƒo na mí be míanye veviedolawo eye míawɔ dɔ sesẽ. (Lododowo 13:4) Gake ehiã be míada asɔ. Nyagblɔla 4:6 gblɔ be: “Gbɔɖeme asiʋlo ɖeka nyo wu dɔ sesẽ wɔwɔ kple dagbadagba ɖe yame asiʋlo eve.”

Ne míesrɔ̃ ale si míada asɔ la, ekpena ɖe mía ŋu míenɔa lãmesẽ me eye míaƒe susu wɔa dɔ nyuie. Eya ta ɖe wòanya wɔ be míaɖe míaƒe dɔ alo ɣeyiɣia dzi akpɔtɔa? Ɛ̃. Na míade ŋugble le nu ene aɖewo ŋu kpɔ:

Megblẽ be ame nadi ga aɖe ada ɖi ɖe etsɔme ŋu o. Gake ga home neni tututue hiã? Nu kae afia be ame kpɔ dzidzedze? Fetu si woxena na ame alo ame ƒe nunɔamesiwoe afia be ekpɔ dzidzedzea? Gake ɖiɖiɖeme fũu alo modzakaɖeɖe atraɖii ate ŋu ana míaƒe ɣeyiɣiwo masu mí o.

Tim, si ŋu míeƒo nu tsoe va yi gblɔ be: “Nye kple srɔ̃nye míegbugbɔ ŋku lé ɖe ale si míenɔa agbee ŋu, eye míeɖoe be míaɖe nu siwo míewɔna dzi akpɔtɔ. Míeŋlɔ nu siwo míewɔna fifia kple míaƒe taɖodzinu yeyeawo siaa ɖi. Míeɖo dze tso nu siwo míewɔna tsã la me tsonuwo kple nu siwo míawɔ be míaɖo míaƒe taɖodzinuawo gbɔ ŋu.”

Biblia xlɔ̃ nu mí be míagaɖe mɔ “ŋkuwo ƒe nudzodzro” naɖu mía dzi o. (1 Yohanes 2:15-17) Boblododowo ate ŋu aƒlɔ dzo ɖe nudzodzro siawo te, si ana ame navu ɖe dɔ ŋu anɔ wɔwɔm gaƒoƒo gbogbowo, alo aƒo eɖokui ɖe modzakaɖeɖe vivivo alo esiwo gblẽa ga na ame la me. Màte ŋu aɖe ŋku ɖa le boblododowo katã ŋu ya o. Gake àte ŋu atso wo dzi akpɔtɔ. Azɔ hã, bu nu siwo hiã wò ŋutɔŋutɔ la ko ŋu.

Ŋusẽ si ame siwo nèdea ha kplii ate ŋu akpɔ ɖe dziwò hã nenɔ susu me na wò. Ne kesinɔnuwo yome koe wotina alo wobunɛ be nu siwo le ame sie fiana be nu dze edzi nɛa, ke anyo be nàdi xɔlɔ̃ siwo si taɖodzinu nyuiwo le. Biblia gblɔ be: “Ame si zɔna kple nunyalawo la, adze nunya.”—Lododowo 13:20.

Na wò dɔtɔ nanya nu siwo le vevie na wò kple ɣeyiɣi si nàzã ɖe dɔa ŋu. Megate ɖe dziwò  ne mèle dɔme o. Agbalẽ aɖe (Work to Live) gblɔ be: “Ame siwo dea liƒo dɔ kple aƒemenyawo dome alo yia mɔkeke la dea dzesii be: Ne ame meyi dɔme o la, nuwo matsi akpo dzi o.”

Ganyawo de Gary si ƒe nya míegblɔ va yi dzi, eya ta eɖoe be yeaɖe gaƒoƒo siwo yetsɔ wɔa dɔe la dzi. Egblɔ be: “Medoe ɖe nye ƒomea gbɔ be míanɔ agbe tsɛ. Vivivi la, míeɖe afɔ siwo ana míanɔ agbe tsɛ. Mete ɖe nye dɔtɔ hã ŋu eye megblɔ nɛ be medi be maɖe ŋkeke siwo mewɔa dɔ kwasiɖa sia kwasiɖa dzi, eye wòlɔ̃.”

Ele be srɔ̃ŋutsu kple srɔ̃nyɔnu nakpɔ vovo ɖe wo nɔewo ŋu eye woakpɔ vovo ɖe wo viwo hã ŋu. Eya ta mègasrɔ̃ ƒome siwo nɔa dɔ dzi ɖaa o. Gary gblɔ be: “Di ɣeyiɣi nàɖi ɖe eme eye nàɖe nu siwo mehiã o la dzi akpɔtɔ.”

Ne ƒomea le du la, migana nuwo abe television, asitelefon alo mɔ̃ɖaŋunu bubuwo naklã mia dome o. Ne anya wɔ la, miɖu nu ɖekae zi ɖeka ya teti gbe sia gbe eye miɖo dze le nuɖuɣia. Ne dzilawo wɔ ɖe aɖaŋuɖoɖo bɔbɔe siawo dzi la, wo viwo ƒe dzi dzea eme eye wonyaa agbalẽ le suku.

Fifiaa, bia ɖokuiwò be: ‘Nu ka dim mele le agbe me? Eye nu ka dim mele na nye ƒomea?’ Ne èdi be yeakpɔ dzidzɔ eye nu nadze edzi na ye wu le agbe me la, ekema ɖo taɖodzinu siwo wɔ ɖeka kple aɖaŋu si Biblia ɖo si me nunya le la.