GBE vovovo siwo wodona le xexea me, siwo ade 7,000 fifia ate ŋu awɔe be mɔzɔzɔ, asitsatsa, sukudede kple dziɖuɖudɔwo wɔwɔ nasesẽ. Enɔ alea tso blema ke. Le kpɔɖeŋu me, anɔ ƒe 2,500 aɖewoe nye esi va yi le Persia Fia Ahasweros (ɖewohĩ Xerxes I) ƒe dziɖuɣi la, Persiatɔwo ɖo se aɖewo siwo fia de la ɖe fiaɖuƒe bliboa katã me “tso India va se ɖe Etiopia, siwo le nuto alafa ɖeka blaeve vɔ adreawo me, eye woɖoe ɖe nuto sia nuto le eƒe nuŋɔŋlɔ nu ɖe dukɔ sia dukɔ le eƒe gbegbɔgblɔ me.” *

Egbea la, habɔbɔ geɖewo alo dziɖuɖuwo gɔ̃ hã mate kpɔ be yewoawɔ dɔ sesẽ sia o. Ke hã habɔbɔ aɖe li si te ŋu le dɔ sia wɔm. Yehowa Ðasefowo ɖea magazinewo, nya siwo wolé ɖe mɔ dzi kple videowo kpakple agbalẽ geɖe siwo dome Biblia hã le gɔme ɖe gbegbɔgblɔ siwo wu 750 me. Tokunɔgbe 80 hã le gbegbɔgblɔ siawo dome. Ðasefowo taa Ŋkunɔwo Ƒe Agbalẽ vovovowo hã.

Tsɔ kpe ɖe eŋu la, menye viɖe tae Yehowa Ðasefowo le dɔ sia wɔm ɖo o. Le nyateƒe me la, lɔlɔ̃nu faa dɔwɔlawoe woƒe gbegɔmeɖelawo kple dɔwɔla bubuwo nye. Nu ka tae wole agbagba sia gbegbe dzem be yewoaɖe agbalẽwo gɔme ɖe gbegbɔgblɔ geɖe me, eye alekee wowɔa dɔ siae?