NUSƆSRƆ̃NYATI 28
HADZIDZI 123 Ðokuibɔbɔ Nuteƒewɔwɔtɔe Ðe Teokrasiɖoɖowo Te
De Dzesi Vovototo Si Le Nyateƒe Kple Alakpa Dome
“Minɔ tsitre sesĩe, eye mitsɔ nyateƒe ƒe alidziblanu la bla miaƒe aliwo dzi.”—EF. 6:14.
TAÐODZINUA
Ale si míana hehe mía ɖokui be míate ŋu ade dzesi vovototo si le nyateƒe si míesrɔ̃ tso Yehowa gbɔ kple alakpa si Satana kple ame siwo tsia tre ɖe mía ŋu dona ɖe ŋgɔ la dome.
1. Aleke nèsena le ɖokuiwò me tso nyateƒea ŋu?
YEHOWA ƒe amewo lɔ̃ nyateƒe siwo le Mawu ƒe Nya la me. Eƒe Nyaa dzie míetu míaƒe xɔse ɖo. (Rom. 10:17) Míeva xɔe se be Yehowa ɖo Kristo hamea anyi wònye “nyateƒe la ƒe sɔti kple nu si lée ɖe te.” (1 Tim. 3:15) Eye edzɔa dzi na mí be míabɔbɔ ɖe ame siwo le ŋgɔ xɔm le mía dome la te. Woɖea Biblia me nyateƒea me na mí eye wonaa mɔfiame siwo akpe ɖe mía ŋu míawɔ Mawu ƒe lɔlɔ̃nu la mí.—Heb. 13:17.
2. Le Yakobo 5:19 ƒe nya nua, nu kae ate ŋu adzɔ ɖe mía dzi ne míesrɔ̃ nyateƒea vɔ megbe?
2 Gake esi míexɔ nyateƒea eye míelɔ̃ ɖe edzi be míawɔ ɖe mɔfiame siwo míexɔ tso Mawu ƒe habɔbɔa gbɔ dzi gɔ̃ hã, ate ŋu adzɔ be míatra mɔ. (Xlẽ Yakobo 5:19.) Naneke meli si adzɔ dzi na Satana wu be wòana míagaka ɖe Biblia alo mɔfiame siwo tso Mawu ƒe habɔbɔa gbɔ dzi o.—Ef. 4:14.
3. Nu ka tae wòle vevie be míalé ɖe nyateƒea ŋu goŋgoŋ? (Efesotɔwo 6:13, 14)
3 Xlẽ Efesotɔwo 6:13, 14. Madidi o, Abosam ato ameflunyawo dzi able dukɔ geɖewo woatsi tre ɖe Yehowa ŋu. (Nyaɖ. 16:13, 14) Míenya hã be Satana adze agbagba geɖe wu be yeable Yehowa ƒe amewo. (Nyaɖ. 12:9) Eya ta ele vevie be míana hehe mía ɖokui ale be míade dzesi vovototo si le nyateƒe kple alakpa dome, eye míaɖo to nyateƒea. (Rom. 6:17; 1 Pet. 1:22) Esia le vevie ŋutɔ ale be míate ŋu atso xaxa gã la!
4. Nu kawo me míadzro le nyati sia me?
4 Le nyati sia mea, míakpɔ nɔnɔme vevi eve siwo akpe ɖe mía ŋu míade dzesi nyateƒe siwo tso Biblia me ahawɔ ɖe mɔfiame siwo tso Mawu ƒe habɔbɔa gbɔ la dzi. Eyome míadzro aɖaŋuɖoɖo etɔ̃ siwo akpe ɖe mía ŋu míayi edzi alé nyateƒea me ɖe asi goŋgoŋ la me.
NƆNƆME SIWO AKPE ÐE MÍA ŊU MÍADE DZESI NYATEƑEA
5. Aleke Yehowa vɔvɔ̃ akpe ɖe mía ŋu míade dzesi nyateƒea?
5 Yehowa vɔvɔ̃. Ne míevɔ̃a Yehowa la, míalɔ̃e ale gbegbe be míadi gbeɖe be míawɔ nu si madze eŋu o. Míedina vevie be míade vovo nyui kple vɔ̃ dome eye míade dzesi vovototo si le nyateƒe kple alakpa dome, ale be míate ŋu adze Yehowa ŋu. (Lod. 2:3-6; Heb. 5:14) Mele be míaɖe mɔ gbeɖe be amegbetɔvɔvɔ̃ nava kpɔ ŋusẽ ɖe míaƒe lɔlɔ̃ na Yehowa dzi o, elabe zi geɖe la, nu si dzea amegbetɔwo ŋu medzea Yehowa ya ŋu o.
6. Aleke amegbetɔvɔvɔ̃ wɔe be Israel ƒe tatɔ ewo trɔ mo na nyateƒea?
6 Ne míevɔ̃a amegbetɔwo wu Mawu la, esia ate ŋu ana be míatra ɖa tso nyateƒea gbɔ. Nu sia tɔgbie dzɔ esi wodɔ tatɔ 12 be woaɖatsa ŋku le anyigba si Yehowa do ŋugbe be yeatsɔ ana Israel-viwo la dzi. Le wo dometɔ ewo gomea, woƒe vɔvɔ̃ na Kanaantɔwo nu sẽ wu lɔlɔ̃ si le wo si na Yehowa. Wogblɔ na wo nɔvi Israel-vi bubuawo be: “Míate ŋu aho ɖe dukɔ la ŋu o, elabena wosesẽ wu mí.” (4 Mose 13:27-31) Ele eme be le amegbetɔwo ƒe nukpɔkpɔ nua, Kanaantɔwo sẽ wu Israel-viwo ya. Gake ne ame aɖe gblɔ be Israel-viwo mate ŋu aɖu woƒe futɔwo dzi o la, ke eɖe Yehowa ya ɖa le nyaa me. Ðe wòle be ŋkutsala ewo mawo natsɔ woƒe susu aɖo nu si Yehowa di be Israel-viwo nawɔ ŋu hafi. Azɔ hã, ɖe wòle be woade ŋugble le nu siwo Yehowa wɔ na wo ɣeyiɣi kpui aɖe koe nye ema va yi ŋu. Anye ne woade dzesii be ŋusẽ si le Kanaantɔwo ŋu meɖi naneke kura o ne wotsɔe sɔ kple Yehowa, Ŋusẽkatãtɔ la tɔ. Gake Yosua kple Kaleb ya mewɔ nu abe ŋkutsala xɔsemanɔsitɔ mawo ene o, ke boŋ wowɔ nu si dze Yehowa ŋu. Wogblɔ na dukɔ la be: “Ne míaƒe nu dze Yehowa ŋu la, ekema akplɔ mí ayi anyigba sia si dzi notsi kple anyitsi le sisim le la dzi godoo ahatsɔe ana mí.”—4 Mose 14:6-9.
7. Nu kae akpe ɖe mía ŋu be míavɔ̃ Yehowa geɖe wu? (Kpɔ nɔnɔmetataa hã.)
7 Nu si akpe ɖe mía ŋu míagavɔ̃ Yehowa geɖe wue nye be míabu nu si dzea eŋu la ŋuti ɣesiaɣi si míedi be míatso nya me le nane ŋu. (Ps. 16:8) Ne èle Biblia me ŋutinyawo xlẽm la, bia ɖokuiwò be, ‘Ne ɖe nyee nɔ nɔnɔme ma me ɖe, anye nu kae mawɔ?’ Le kpɔɖeŋu me, tsɔe be yenɔ amehawo dome esime Israel ƒe tatɔ ewoawo nɔ dziɖeleameƒonya mawo gblɔm. Ðe nàxɔ woƒe nyawo dzi ase eye nàna amegbetɔvɔvɔ̃ naɖu dziwòa, alo ɖe lɔlɔ̃ si le asiwò na Yehowa kple ale si nèdi vevie be yeadze eŋu ana nàɖu amegbetɔvɔvɔ̃ dzia? Israel-viwo ƒe dzidzime blibo ma mete ŋu de dzesii be Yosua kple Kaleb ye nɔ nyateƒea tom o. Le esia ta, Yehowa meɖe mɔ na Israel-vi mawo be woayi Ŋugbedodonyigbaa dzi o.—4 Mose 14:10, 22, 23.
Nenye wòe ɖe, ame ka ƒe nya dzie nàxɔ ase? (Kpɔ memama 7)
8. Nɔnɔme kae wòle be míaku kutri atu ɖo, eye nu ka tae?
8 Ðokuibɔbɔ. Ðokuibɔbɔlawoe Yehowa ɖea nyateƒea fiana. (Mat. 11:25) Esi míebɔbɔ mía ɖokui taa, míelɔ̃ wofia nyateƒea mí. (Dɔw. 8:30, 31) Gake ele be míakpɔ nyuie be míagava zu dadalawo o. Dada ate ŋu ana míasusui be mía ŋutɔwo míaƒe susu le nane ŋu le eteƒe, abe ale si ko Ŋɔŋlɔawo me gɔmeɖosewo kple mɔfiame siwo tso Yehowa ƒe habɔbɔa gbɔ hã le eteƒe ene.
9. Aleke míate ŋu ayi edzi abɔbɔ mía ɖokui?
9 Be míayi edzi abɔbɔ mía ɖokui la, ele be míaɖo ŋku edzi be ɖeko míele nyaŋui ne wotsɔ mí sɔ kple Yehowa ƒe gãnyenye. (Ps. 8:3, 4) Míate ŋu ado gbe ɖa na Yehowa be wòakpe ɖe mía ŋu míabɔbɔ mía ɖokui geɖe wu eye míalɔ̃ faa wòafia nu mí. Yehowa akpe ɖe mía ŋu be míade asixɔxɔ eƒe susu siwo le eƒe Nyaa me kple mɔfiame siwo eƒe habɔbɔa nana ŋu wu mía ŋutɔwo míaƒe susuwo. Ne èle Biblia xlẽma, dze agbagba nàdi nu siwo ɖoa kpe edzi be Yehowa léa fu dada, adegbeƒoƒo kple ɖokuidodoɖedzi eye wòlɔ̃a ɖokuibɔbɔ. Ku kutri vevie nàyi edzi abɔbɔ ɖokuiwò geɖe wu ne mɔnukpɔkpɔ tɔxɛ aɖe su asiwò si na ame geɖe va dze si wò.
ALE SI MÍAKU ÐE NYATEƑEA ŊU GOŊGOŊ
10. Ame kawo dzie Yehowa to fia mɔ eƒe amewo?
10 Yi edzi nàka ɖe mɔfiame siwo tso Yehowa ƒe habɔbɔa gbɔ la dzi. Le blema Israel la, Yehowa to Mose kple Yosua dzi fia mɔ eƒe amewo. (Yos. 1:16, 17) Yehowa Mawu yra Israel-viwo esi wode bubu ŋutsu mawo ŋu be wonye ye teƒenɔlawo. Ƒe alafa geɖe megbe esi woɖo Kristo hamea anyi la, apostolo 12-awoe nɔ mɔ fiam hamea. (Dɔw. 8:14, 15) Emegbea, wotsɔ hamemetsitsi aɖewo siwo nɔ Yerusalem la kpe ɖe wo ŋu. Esi nɔviawo wɔ ɖe mɔfiame siwo tso ŋutsu nuteƒewɔla mawo gbɔ dzia, “hameawo ƒe xɔse nɔ ŋu sẽm ɖe edzi, eye woƒe xexlẽme nɔ dzidzim ɖe edzi gbe sia gbe.” (Dɔw. 16:4, 5) Egbea hã, Yehowa yraa mí ne míewɔ ɖe teokrasimɔfiame siwo tso habɔbɔa gbɔ la dzi. Gake aleke Yehowa ase le eɖokui me ne míegbe be míaɖo to ame siwo wòtia be woaxɔ ŋgɔ o? Míate ŋu aɖo biabia sia ŋu ne míedzro nu si dzɔ esi Israel-viwo yina ɖe Ŋugbedodonyigbaa dzi la me.
11. Nu kae dzɔ ɖe blema Israel-vi siwo tsi tre ɖe Mose ŋu la dzi? (Kpɔ nɔnɔmetataa hã.)
11 Esime Israel-viwo nɔ mɔ dzi yina ɖe ŋugbedodonyigbaa dzia, dukɔa dome ameŋkuta aɖewo ƒo nu tsi tre ɖe Mose kple ɖoƒe si Yehowa nɛ ŋu. Wogblɔ be: “Ha blibo la katã [menye Mose ɖeɖe ko o] le kɔkɔe, eye Yehowa le wo dome.” (4 Mose 16:1-3) Ele eme be “ha blibo la” nɔ kɔkɔe le Yehowa ŋkume ya, gake Yehowae tia Mose be wòaxɔ ŋgɔ le yeƒe amewo dome. (4 Mose 16:28) Eya ta esi aglãdzela mawo ƒo nu tsi tre ɖe Mose ŋu la, Yehowa ŋue wonɔ nu ƒom tsi tre ɖo. Menye nu si Yehowa di ŋue woƒe susu nɔ o, ke boŋ nu si woawo ŋutɔwo di ye, si nye ɖoƒe si kɔ wu kple ŋkɔxɔxɔ. Mawu tsrɔ̃ ame siwo xɔ ŋgɔ le aglãdzedzea me kple ame akpe geɖe siwo de wo dzi la hã. (4 Mose 16:30-35, 41, 49) Míeka ɖe edzi be egbea hã, ame siwo tsia tre ɖe Yehowa ƒe habɔbɔa ƒe ɖoɖowo ŋu la ƒe nu medzea Yehowa ŋu o.
Nenye wòe ɖe, ame ka dzie nàde? (Kpɔ memama 11)
12. Nu ka tae míate ŋu aka ɖe Yehowa ƒe habɔbɔa dzi?
12 Míate ŋu aka ɖe Yehowa ƒe habɔbɔa dzi. Ne eme va kɔ be ehiã be woatrɔ asi le ale si míese Biblia me nyateƒe aɖe gɔme alo le ale si míewɔa subɔsubɔdɔ aɖe ŋua, ame siwo le ŋgɔ xɔm mehena ɖe megbe kura be yewoawɔ tɔtrɔ mawo o. (Lod. 4:18) Nu si koŋ tae wowɔa esia ɖoe nye be wodi be yewoadze Yehowa ŋu. Azɔ hã wowɔa woƒe ŋutete ɖe sia ɖe be yewoatu yewoƒe nyametsotsowo ɖe Mawu ƒe Nyaa dzi, elabe eƒe Nya nue wòle be eƒe amewo katã nanɔ agbe ɖo.
13. Nu kae nye “nya siwo le blibo” la, eye nu kae wòle be míawɔ tso eŋu?
13 “Yi edzi nàlé nya siwo le blibo . . . me ɖe asi.” (2 Tim. 1:13) “Nya siwo le blibo” lae nye Biblia me nya siwo Kristotɔ vavãwo fiana. (Yoh. 17:17) Nufiafia mawo dzie míetu nu siwo katã dzi míexɔ se la ɖo. Yehowa ƒe habɔbɔa fia mí be míalé nufiafia mawo me ɖe asi goŋgoŋ. Zi ale si míele esia wɔm la, Mawu ayra mí.
14. Aleke wòdzɔe be Kristotɔ aɖewo mete ŋu lé “nya siwo le blibo” la me ɖe asi o?
14 Nu kae adzɔ ne míegaléa “nya siwo le blibo” la me ɖe asi o? Bu nu si dzɔ le ƒe alafa gbãtɔ me la ŋu kpɔ. Kristotɔ aɖewo nɔ alakpanyawo kakam be Yehowa ƒe ŋkekea va xoxo. Anɔ eme be lɛta aɖe si amewo susu be apostolo Paulo ye ŋlɔe la mee nya siawo dze le. Kristotɔ siwo nɔ Tesalonika dometɔ aɖewo megbɔ dzi ɖi ku nyaa me o, ta woxɔe se eye wonɔ ekakam gɔ̃ hã. Ne ɖe woɖo ŋku nu siwo Paulo fia wo esime wònɔ wo gbɔ dzi la, anye ne womaflu wo o. (2 Tes. 2:1-5) Paulo xlɔ̃ nu nɔviawo be woagaxɔ nu sia nu si wose la dzi ase o. Paulo medi be woagaflu Tesalonika nɔviawo ake o, eya ta eƒo lɛta evelia si wòŋlɔ na wo la ta be: “Nye, Paulo ƒe gbedoname, si metsɔ nye ŋutɔ nye asi ŋlɔ, si nye dzesi le nye agbalẽ ɖe sia ɖe me, lae nye esi; aleae meŋlɔa nui.”—2 Tes. 3:17.
15. Aleke míate ŋu akpɔ mía ɖokui ta be alakpanya siwo dze abe nyateƒee wonye ene la nagaflu mí o? Wɔ eƒe kpɔɖeŋu. (Kpɔ fotoawo hã.)
15 Nu kae míate ŋu asrɔ̃ tso nya si Paulo gblɔ na Tesalonikatɔwo me? Ne míese nya aɖe si mewɔ ɖeka kple nu siwo míesrɔ̃ tso Biblia me o, alo míese nyatakaka wɔmoya aɖe la, ele be míabu nuwo ŋu nyuie. Le tsã Soviet Union ƒe dziɖuɖua te la, míaƒe futɔwo ŋlɔ lɛta aɖe ɖo ɖe nɔviawo. Wona wòdze abe míaƒe habɔbɔa ƒe dɔwɔƒegã gbɔe wòtso ene. Lɛtaa me nyawo de dzi ƒo na nɔviawo be woaɖo habɔbɔ bubu aɖe si anɔ eɖokui si. Togbɔ be edze abe míaƒe habɔbɔa gbɔe lɛtaa tso ene hã, meflu mía nɔvi wɔnuteƒewo o. Wode dzesii be lɛtaa me nyawo mewɔ ɖeka kple nu siwo yewosrɔ̃ o. Egbea, ame siwo tsi tre ɖe nyateƒea ŋu toa internet kple hahokadodowo dzi dzea agbagba be yewoatɔtɔ mí ahade mama mía dome. Mele be míaɖe mɔ ‘woatɔtɔ míaƒe susu o.’ Be míakpɔ mía ɖokui taa, ele be míabu nuwo ŋu nyuie akpɔe ɖa be ɖe nu siwo míexlẽ alo nya siwo míese la wɔ ɖeka kple nu siwo míenya xoxo hã.—2 Tes. 2:2; 1 Yoh. 4:1.
Mègana alakpanya siwo dzena abe nyateƒee wonye ene la naflu wò o (Kpɔ memama 15) a
16. Le Romatɔwo 16:17, 18 ƒe nya nu la, nu kae wòle be míawɔ ne ame aɖe tsi tre ɖe nyateƒea ŋu?
16 Yi edzi nàwɔ ɖeka kple ame siwo wɔa nuteƒe na Yehowa. Mawu di be míasubɔ ye le ɖekawɔwɔ me. Zi ale si míelé nyateƒea me ɖe asi la, míayi edzi awɔ ɖeka. Ame sia ame si tsia tre ɖe nyateƒea ŋu la dea mama hamea me, eya ta Mawu xlɔ̃ nu mí be ‘míaƒo asa na wo.’ Ne míewɔe alea o la, míava xɔ alakpanyawo dzi ase si awɔe be míagawɔ nuteƒe na Yehowa o.—Xlẽ Romatɔwo 16:17, 18.
17. Ne míede dzesi nyateƒea eye míelé eme ɖe asi goŋgoŋ la, aleke wòaɖe vi na mí?
17 Ne míede dzesi nyateƒea eye míelé eme ɖe asi sesĩe la, mía kple Yehowa dome anɔ kplikplikpli eye míaƒe xɔse me asẽ. (Ef. 4:15, 16) Akpɔ mía ta tso Satana ƒe alakpanufiafiawo kple ameflunyawo me, eye ne xaxa gãa va la, Yehowa akpɔ mía ta be míanɔ dedie. Eya ta yi edzi nàlé nu siwo nye nyateƒe la me ɖe asi goŋgoŋ, ekema “ŋutifafa ƒe Mawu la anɔ anyi kpli [wò].”—Flp. 4:8, 9.
HADZIDZI 122 Minɔ Te Sesĩe, Maʋamaʋãe!
a NU SI LE EDZI YIM LE FOTOA ME: Wɔwɔfia ƒe foto. Ƒe geɖe va yi la, nɔvi siwo nɔ tsã Soviet Union ƒe dziɖuɖua te la xɔ lɛta aɖe si dze abe ɖe wòtso míaƒe habɔbɔa ƒe dɔwɔƒegã ene, evɔ míaƒe futɔwo gbɔe wòtso. Egbea hã, míaƒe futɔwo ate ŋu ato internet dzi akaka alakpanyawo tso Yehowa ƒe habɔbɔa ŋu.
