1. Yayra kawoe ate ŋu asu amegbetɔwo si le tafe la ta?

YESU Kristo ƒe tafevɔsaa wɔe be yayra geɖewo ate ŋu asu amegbetɔwo si. Tafea ʋu mɔnukpɔkpɔ ɖi na Adam ƒe dzidzimevi siwo katã lɔ̃ dzɔdzɔenyenye la be woava zu Mawu ƒe ƒomea me tɔwo mlɔeba. Tafea ʋu mɔnukpɔkpɔ ɖi na mí hã be míava nɔ agbe le dzidzɔ me tegbee. Ke hã, menye yayra siwo amegbetɔ toɖolawo akpɔ le etsɔme la koe nye viɖe siwo tafea he vɛ o. Ale si Yesu lɔ̃ faa lé Yehowa ƒe dzidzenu dzɔdzɔeawo me ɖe asi va se ɖe ku me la kpɔ nya vevi aɖe si ka ame siwo le dziƒo kple anyigba dzi hã gbɔ.—Heb. 1:8, 9.

2. (a) Nya vevi siwo ka dziƒo kple anyigba dzi tɔwo katã kawo ŋue Yesu ƒo nu tsoe le eƒe kpɔɖeŋugbedodoɖaa me? (Kpɔ nɔnɔmetata si le nyati sia ƒe gɔmedzedze.) (b) Nu kawo mee míadzro le nyati sia me?

² Ƒe eve aɖewo do ŋgɔ hafi Yesu natsɔ eƒe agbe ana wòanye tafe ɖe mía ta la, efia eƒe nusrɔ̃lawo be woado gbe ɖa be: “Mía Fofo si le dziƒowo, wò ŋkɔ ŋuti nakɔ. Wò Fiaɖuƒe nava. Wò lɔlɔ̃nu nava eme le anyigba dzi abe ale si wòle le dziƒo ene.” (Mat. 6:9, 10) Be míade asixɔxɔ tafea ŋu geɖe wu la, na míadzro  ale si wòana woakɔ Mawu ƒe ŋkɔ ŋuti, ale si wòdo ƒome kple Mawu Fiaɖuƒea ƒe dziɖuɖu kple ale si wòana Mawu ƒe tameɖoɖo nava eme la me.

3. Nu kae gɔmesese si le Yehowa ƒe ŋkɔa ŋu lɔ ɖe eme, eye aleke Satana gblẽ ŋkɔ kɔkɔe ma ŋu?

³ Mawu ƒe ŋkɔa ŋuti kɔkɔ ye nye nu gbãtɔ si ŋu Yesu ƒo nu tsoe le eƒe kpɔɖeŋugbedodoɖaa me. Gɔmesese si le Yehowa ƒe ŋkɔa ŋu la ku ɖe nu siwo katã eƒe gãnyenye, ŋutikɔkɔe kple kɔkɔenyenye lɔ ɖe eme ŋu. Le Yesu ƒe gbedodoɖa bubu me la, eyɔ Yehowa be “Fofo kɔkɔe.” (Yoh. 17:11) Esi wònye be Yehowa le kɔkɔe ta la, se kple mɔfiame siwo katã tso eyama gbɔ la le kɔkɔe. Togbɔ be ele alea hã la, Satana tɔ gbe gome si le Mawu si be wòana mɔfiame amegbetɔwo la ayetɔe le Eden-bɔa me. Esi Satana ka aʋatso ɖe Yehowa si la, egblẽ Mawu ƒe ŋkɔ kɔkɔe la ŋu.—1 Mose 3:1-5.

4. Akpa kae Yesu wɔ le Mawu ƒe ŋkɔa ŋuti kɔkɔ me?

⁴ Gake Yesu ya lɔ̃ Yehowa ƒe ŋkɔa vevie. (Yoh. 17:25, 26) Yesu wɔ akpa vevi aɖe le Mawu ƒe ŋkɔa ŋuti kɔkɔ me. (Xlẽ Psalmo 40:8-10.) Esi Yesu wɔ nuteƒe na Mawu bliboe esime wònɔ anyigba dzi la, eto esia me ɖee fia be se siwo katã Yehowa de la le eteƒe eye míawo ŋutɔwo míaƒe nyonyo tae wòde se mawo ɖo. Esi Satana na Yesu se veve helĩhelĩ yi ɖe ku me gɔ̃ hã la, Yesu wɔ nuteƒe na Fofoa si le dziƒo la bliboe. Esi Yesu wɔ nuteƒe alea ta la, eɖee fia be amegbetɔ deblibo ate ŋu awɔ Mawu ƒe se dzɔdzɔeawo dzi pɛpɛpɛ.

5. Akpa kae míate ŋu awɔ le Mawu ƒe ŋkɔa ŋuti kɔkɔ me?

⁵ Aleke míate ŋu aɖee afia be míelɔ̃ Yehowa ƒe ŋkɔa? Míaƒe agbenɔnɔe aɖee afia. Yehowa di tso mía si be míanɔ kɔkɔe. (Xlẽ 1 Petro 1:15, 16.) Esia fia be Yehowa ɖeɖe koe wòle be míasubɔ eye míaɖo toe tso dzi blibo me. Ne wole mía yome tim gɔ̃ hã la, míewɔa míaƒe ŋutete katã be míanɔ agbe ɖe Mawu ƒe se kple mɔfiame dzɔdzɔeawo nu. Ne míewɔa nu si le eteƒe la, míenana míaƒe kekeli klẽna eye enyea ŋutikɔkɔe na Yehowa ƒe ŋkɔa. (Mat. 5:14-16) Esi míenye dukɔ kɔkɔe ta la, míetoa míaƒe agbenɔnɔ dzi ɖenɛ fiana be Yehowa ƒe sewo nyo eye Satana ƒe nutsotsowo nye alakpa. Esi míede blibo o ta la, mí katã míedaa vo, eya ta ne edzɔ alea la, míetrɔa dzi me eye míeɖea asi le nuwɔna siwo doa vlo Yehowa ƒe ŋkɔa ŋu.—Ps. 79:9.

6. Togbɔ be míenye ame madeblibowo hã la, nu ka tae Yehowa ate ŋu abu mí abe ame dzɔdzɔewo ene?

⁶ Kristo ƒe vɔsa la wɔe be Yehowa tsɔa ame siwo xɔ tafea dzi se la ƒe nu vɔ̃wo kea wo. Exɔa ame siwo ɖe adzɔgbe nɛ la be woanye ye subɔlawo. Yehowa bua Kristotɔ amesiaminawo ame dzɔdzɔewo kpakple viawoe, eye wòbua ‘alẽ bubuawo’ abe ame dzɔdzɔe siwo nye xɔlɔ̃awo ene. (Yoh. 10:16; Rom. 5:1, 2; Yak. 2:21-25) Eya ta, fifia gɔ̃ hã la, tafe la wɔe be tenɔnɔ dzɔdzɔe su mía si le mía Fofo la ŋkume, eye wòwɔe hã be míekpɔa gome le eƒe ŋkɔa ŋuti kɔkɔ me.

7. Yayra kawoe tafe la wɔe be míate ŋu akpɔ le Fiaɖuƒea ƒe dziɖuɖu te?

⁷ Nu evelia si dzi Yesu he susu yi le eƒe kpɔɖeŋugbedodoɖaa mee nye: “Wò Fiaɖuƒe nava.” Kadodo kae le tafe la kple Mawu Fiaɖuƒea dome? Tafe lae wɔe be wote ŋu ƒo ame 144,000 siwo anye fiawo kple nunɔlawo akpe ɖe Kristo ŋu le dziƒo la nu ƒu. (Nyaɖ. 5:9, 10; 14:1) Yesu kple  eƒe hatidziɖulawo, siwo ƒo ƒu nye Mawu Fiaɖuƒea, awɔ tafe la ŋu dɔ na amegbetɔ toɖolawo le ƒe akpe ɖeka la me. Woatrɔ anyigbaa wòazu paradiso, eye woakpe ɖe amegbetɔ wɔnuteƒewo katã ŋu ʋɛʋɛʋɛ woade blibo, ale be ɖekawɔwɔ blibo nava nɔ Mawu ƒe ƒomea ƒe akpa si le dziƒo kple akpa si le anyigba dzi la dome. (Nyaɖ. 5:13; 20:6) Yesu agbã ta na da la, eye wòaɖe nu gbegblẽ siwo Satana ƒe aglãdzedzea he vɛ la dometɔ ɖe sia ɖe ɖa.—1 Mose 3:15.

8. (a) Aleke Yesu kpe ɖe eƒe nusrɔ̃lawo ŋu wokpɔ ale si gbegbe Mawu Fiaɖuƒea le vevie? (b) Aleke míeɖenɛ fiana egbea be míede Fiaɖuƒea dzi?

⁸ Esi Yesu nɔ anyigba dzi la, ekpe ɖe eƒe nusrɔ̃lawo ŋu wokpɔ ale si gbegbe Mawu Fiaɖuƒea le vevie la dze sii. Le Yesu ƒe nyɔnyrɔxɔxɔ vɔ megbe teti la, eɖe gbeƒã “Mawu Fiaɖuƒe ŋuti nya nyui la” yi didiƒe ke. (Luka 4:43) Le Yesu ƒe nya mamlɛtɔ siwo wògblɔ na eƒe nusrɔ̃lawo hafi yi dziƒo me la, ede se na wo be woaɖi ɖase tso ye ŋu “va se ɖe anyigba ƒe seƒe ke.” (Dɔw. 1:6-8) Fiaɖuƒegbeƒãɖeɖedɔa awɔe be mɔnukpɔkpɔ nasu anyigbadzinɔlawo katã si woasrɔ̃ nu tso tafe la ŋu, ale be woanye Mawu Fiaɖuƒea teviwo. Egbea, míeɖenɛ fiana be míele Fiaɖuƒea ƒe akpa dzi ne míekpea asi ɖe Kristo nɔvi siwo le anyigba dzi la ŋu be woawɔ dɔ si wode asi na wo be woaɖe gbeƒã Fiaɖuƒe ŋuti nya nyuia le anyigba bliboa dzi.—Mat. 24:14; 25:40.

9. Nu ka tae míate ŋu aka ɖe edzi be Yehowa ana tame si wòɖo ɖe amegbetɔwo ŋu la nava eme?

⁹ Nu kae Yesu wɔnɛ esi wògagblɔ le eƒe kpɔɖeŋugbedodoɖaa me be: “Wò lɔlɔ̃nu nava eme”? Yehowae nye Wɔla la. Ne egblɔ be nane nava eme la, ɖeko wòle abe ɖe wòva eme xoxo ene. (Yes. 55:11) Maɖe mɔ Satana ƒe aglãdzedzea nawɔe be tame si yeɖo ɖe amegbetɔwo ŋu la nado kpo emevava o. Tso gɔmedzedzea ke la, Yehowa ƒe didie nye be anyigba dzi nayɔ kple Adam kple Xawa ƒe dzidzimevi deblibowo. (1 Mose 1:28) Ne ɖe Adam kple Xawa ku vi madzimadzii la, anye ne tame si Mawu ɖo be anyigba dzi nayɔ kple woƒe dzidzimeviwo la mava eme o. Eya ta, esi Adam kple Xawa wɔ nu vɔ̃ megbe la, Yehowa ɖe mɔ na wo be woadzi viwo. Mawu to tafea dzi na mɔnukpɔkpɔ ame siwo katã xɔ tafea dzi se la be woade blibo eye woanɔ agbe tegbee. Yehowa lɔ̃ amegbetɔwo, eye eƒe didie nye be amegbetɔ toɖolawo nase vivi le agbe me abe ale si yeɖoe ene.

10. Aleke tafea aɖe vi na ame siwo ku?

¹⁰ Ke ame miliɔn gbogbo siwo ku evɔ mɔnukpɔkpɔ mesu wo si wonya Yehowa hesubɔe o hã ɖe? Tafe la wɔe be woate ŋu afɔ ame siwo ku la ɖe tsitre. Mía Fofo lɔ̃ame si le dziƒo la afɔ wo ɖe tsitre ahana mɔnukpɔkpɔ wo be woasrɔ̃ nu tso eƒe tameɖoɖo ŋu ale be woakpɔ agbe mavɔ. (Dɔw. 24:15) Yehowa di be amegbetɔwo nanɔ agbe, ke menye be woaku o. Esi Yehowa nye Agbedzɔƒe ta la, anye ame siwo katã woafɔ ɖe tsitre la Fofo. (Ps. 36:9) Eya ta, aleke gbegbe wòsɔe nye esi be Yesu fia mí be míado gbe ɖa agblɔ be: “Mía Fofo si le dziƒowo”! (Mat. 6:9) Yehowa na ŋusẽ Yesu be wòawɔ akpa vevi aɖe le ame siwo ku la fɔfɔ me. (Yoh. 6:40, 44) Yesu si nye “tsitretsitsi la kple agbe la” afɔ ame siwo ku la ɖe tsitre le Paradisoa me.—Yoh. 11:25.

11. Nu kae nye Mawu ƒe lɔlɔ̃nu na “ameha gã” la?

¹¹ Menye ame ʋɛ aɖewo koe Yehowa ƒe  dɔmenyonyo la aɖe vi na o, elabe Yesu gblɔ be: “Ame sia ame si wɔa Mawu ƒe lɔlɔ̃nu la, eyae nye nɔvinyeŋutsu kple nɔvinyenyɔnu kpakple danye.” (Marko 3:35) Mawu ƒe lɔlɔ̃nue nye be “ameha gã” aɖe si xexlẽme meli na o, siwo tso dukɔ sia dukɔ, to sia to kple gbegbɔgblɔ sia gbegbɔgblɔ me nava nye ye subɔlawo. Ame siwo xɔ Kristo ƒe tafevɔsaa dzi se hewɔa Mawu ƒe lɔlɔ̃nu la ado ɣli agblɔ be: “Míaƒe xɔname tso mía Mawu, ame si bɔbɔ nɔ fiazikpui la dzi kple Alẽvi la gbɔ.”—Nyaɖ. 7:9, 10.

12. Aleke tame si Yehowa ɖo ɖe amegbetɔ toɖolawo ŋu la dze ƒãa le kpɔɖeŋugbedodoɖaa me?

¹² Tame si Yehowa ɖo ɖe amegbetɔ toɖolawo ŋu la dze ƒãa le nu siwo Yesu fia mí le kpɔɖeŋugbedodoɖaa me be míabia la me. Le ɖekawɔwɔ me kple gbedodoɖa ma la, míedi be míawɔ nu sia nu si míate ŋui akɔ Yehowa ƒe ŋkɔa ŋu ahade bubu eŋu. (Yes. 8:13) Yesu ƒe ŋkɔa gɔmee nye “Yehowa Nye Xɔname,” eye ɖeɖe si míakpɔ to tafea dzi la anye bubu kple kafukafu na Yehowa ƒe ŋkɔa. Woato Mawu Fiaɖuƒea dzi awɔ tafe la ƒe viɖewo ŋu dɔ na amegbetɔ toɖolawo. Vavãe, kpɔɖeŋugbedodoɖaa ka ɖe edzi na mí be naneke mate ŋu awɔe be Mawu ƒe lɔlɔ̃nu nado kpo emevava o.—Ps. 135:6; Yes. 46:9, 10.

13. Nu kae míaƒe nyɔnyrɔxɔxɔ ɖena fiana?

¹³ Mɔ vevi aɖe si dzi míato aɖee afia be míekpɔ ŋudzedze ɖe tafea ŋue nye be míana ale si míexɔ tafea dzi se la naʋã mí míaɖe adzɔgbe na Yehowa ahaxɔ nyɔnyrɔ. Míaƒe nyɔnyrɔxɔxɔ ɖenɛ fiana be “Yehowa tɔe míenye.” (Rom. 14:8) Ne míexɔ nyɔnyrɔ la, enye kukuɖeɖe na  Mawu be wòana dzitsinya nyui nanɔ mía si. (1 Pet. 3:21) Yehowa lɔ̃na ɖe míaƒe biabiaa dzi hekɔa mía ŋu to Kristo ƒe vɔsaa ƒe ʋu si klɔa nu vɔ̃wo ɖa la dzi. Míeka ɖe edzi bliboe be ana nu siwo katã ƒe ŋugbe wòdo be yeana mí la nasu mía si.—Rom. 8:32.

14. Nu ka tae wode se na mí be míalɔ̃ mía haviwo?

¹⁴ Mɔ bubu ka dzie míegaɖenɛ fiana le be míekpɔ ŋudzedze ɖe tafe la ŋu? Esi wònye be lɔlɔ̃e ʋãa Yehowa wòwɔa nu sia nu ta la, eƒe lɔlɔ̃nue nye be lɔlɔ̃ nanye ye subɔlawo katã ƒe nɔnɔme vevitɔ. (1 Yoh. 4:8-11) Ne míelɔ̃a mía havi la, míeɖenɛ fiana be míedi be míanye ‘mía Fofo si le dziƒowo la ƒe viwo.’ (Mat. 5:43-48) Sedede gãtɔ kple gbãtɔe nye be míalɔ̃ Yehowa, eye esi kplɔe ɖoe nye be míalɔ̃ mía havi. (Mat. 22:37-40) Mɔ vevi aɖe si dzi míetona wɔa havilɔlɔ̃ ƒe sededea dzie nye gbeƒãɖeɖe Mawu Fiaɖuƒe ŋuti nya nyuia. Ne míelɔ̃a mía havi amegbetɔwo la, míeɖea Mawu ƒe ŋutikɔkɔe fiana. Le nyateƒe me la, ne míewɔa sedede si nye be míalɔ̃ amewo, vevietɔ mía nɔvi Kristotɔwo dzi la, lɔlɔ̃ na Mawu ‘dea blibo le mía me.’—1 Yoh. 4:12, 20.

15. (a) Aleke Yehowa le mía yram egbea? (b) Yayra kawoe míakpɔ le etsɔme?

¹⁵ Mɔnukpɔkpɔa le ʋuʋu ɖi be ne míexɔ tafea dzi se la, Yehowa atsɔ míaƒe nu vɔ̃wo ake mí keŋkeŋ. Mawu ƒe Nya la ka ɖe edzi na mí be ate ŋu ‘atutu míaƒe nu vɔ̃wo ɖa.’ (Xlẽ Dɔwɔwɔwo 3:19-21.) Abe ale si míedzro eme va yi enea, le tafea ta la, Yehowa xɔ esubɔla siwo wotsɔ gbɔgbɔ si ami na la wozu viawo. (Rom. 8:15-17) Ele ‘alẽ bubuawo’ me tɔwo hã kpem be woava nye yeƒe ƒomea ƒe akpa si le anyigba dzi la me tɔwo. Ne wova de blibo vɔ la, woato dodokpɔ mamlɛa me. Ne wowɔ nuteƒe na Yehowa le dodokpɔ ma me la, ekema axɔ woawo hã woazu viawo. (Rom. 8:20, 21; Nyaɖ. 20:7-9) Lɔlɔ̃ si le Yehowa si na viawo la nu metsina gbeɖe o. Tafea ƒe viɖewo anɔ anyi tegbee. (Heb. 9:12) Asixɔxɔ si le nunana sia ŋu la nu mayi gbeɖe o. Ame alo ŋusẽtɔ aɖeke mate ŋu axɔe le mía si o.

16. Aleke tafea ana míakpɔ ablɔɖe vavã?

¹⁶ Naneke meli si Abosam ate ŋu awɔ atsɔ axe mɔ na ame siwo katã trɔ dzi me vavã la be woagava nye Yehowa ƒe ƒomea me tɔwo o. Yesu va anyigba dzi va ku “zi ɖeka ɖe ɣeyiɣiawo katã nu.” Eya ta mahiã be woagaxe tafe la ake o. (Heb. 9:24-26) Adam he ku vɛ na mí, gake Yesu ƒe tafea he agbe mavɔ vɛ na mí. Kristo ƒe tafevɔsaa wɔe be míeganye kluviwo na xexe sia si le Satana ƒe ŋusẽ te la o, eye míevo tso vɔvɔ̃ na ku si me.—Heb. 2:14, 15.

17. Vi kae Yehowa ƒe lɔlɔ̃ aɖe na wò?

¹⁷ Kakaɖedzi blibo le Mawu ƒe ŋugbedodowo ŋu. Ale si ko eƒe se siwo fiaa mɔ nuwɔwɔwo la li tegbee la, nenema kee Yehowa hã magblẽ mí ɖi gbeɖe o. Yehowa metrɔna o. (Mal. 3:6) Menye agbe koe Yehowa na mí o. Ke elɔ̃ mí hã. “Míeva nya ale si gbegbe Mawu lɔ̃ míi, eye míexɔ esia dzi se hã. Mawu nye lɔlɔ̃.” (1 Yoh. 4:16) Woatrɔ anyigba bliboa wòazu paradiso nyui aɖe, eye ame sia ame si anɔ anyigba dzi la aɖe Mawu ƒe lɔlɔ̃ afia. Mina míawɔ ɖeka kple Mawu ƒe dɔla wɔnuteƒe siwo le dziƒo ahakɔ gbe dzi adzi ha be: “Mía Mawu la tɔ nanye kafukafu, ŋutikɔkɔe, nunya, akpedada, bubu, ŋusẽ kple ŋutete tso mavɔ me yi mavɔ me. Amen.”—Nyaɖ. 7:12.