Ame sia ame kloe lɔ̃ ɖe edzi be nuwɔna aɖewo sɔ eye ɖewo hã mesɔ o. Le kpɔɖeŋu me, le teƒe geɖewo la, wobua amewuwu, amewo gbɔ dɔdɔ sesẽe, kple ɖeviwo gbɔ dɔdɔ be wonye nuwɔna siwo mesɔ kura o; eye wobua nu si le eteƒe wɔwɔ, dɔmenyonyo, kple veveseseɖeamenu be wonye nuwɔna siwo sɔ. Ke nyametsotso le nyawo abe gbɔdɔdɔ, nyateƒetoto, alo vihehe ene ŋu ya ɖe? Ame geɖe susui be esiawo menye nyui alo vɔ̃ ƒe nya o; nyametsotso ɖe sia ɖe kloe sɔ. Zi geɖe la, amewo nɔa te ɖe ale si wosena le wo ɖokui me alo ale si ame bubuwo sena le wo ɖokuiwo me dzi tsoa nya me. Gake ɖe esia sɔa?

Zi geɖe la, ale si míesena le mía ɖokui me alo míaƒe dzitsinya, si kpena ɖe mía ŋu míenyaa nyui kple vɔ̃, dzie míenɔa te ɖo tsoa nya me. (Romatɔwo 2:​14, 15) Ðevi suewo gɔ̃ hã tea ŋu dea dzesi nu si sɔ kple nu si mesɔ o, eye etena ɖe wo dzi ne wowɔ nu si mesɔ o. Ne ɣeyiɣiawo va le yiyim la, nu siwo míesrɔ̃ tso míaƒe ƒometɔwo, hatiwo, sɔleme, ame siwo dome míele kple míaƒe nufialawo gbɔ la kpɔa ŋusẽ ɖe míaƒe dzitsinya dzi. Esia wɔnɛ be ne míetso nya me la, míaƒe dzitsinya nana míenyana ne míaƒe nyametsotsoa wɔ ɖeka kple nu si míesrɔ̃.

Ale si míebua nyui kple vɔ̃ la ate ŋu aʋã mí be míase veve ɖe ame nu, míakpɔ ŋudzedze ɖe nu ŋu, míawɔ nu si le eteƒe, eye míaƒe dɔme natrɔ ɖe amewo ŋu. Ate ŋu akpe ɖe mía ŋu be mímawɔ nu wòave ame siwo míelɔ̃, alo awɔ nu siwo ana ŋu nakpe mí alo nu siwo ana míabu fɔ mía ɖokui o.

Ðe wòasɔ ɣesiaɣi be míanɔ te ɖe ale si míesena le mía ɖokui me dzi atso nya mea? Ðekakpui aɖe si ŋkɔe nye Garrick tiae be yeanɔ agbea ale si dze ye ŋu. Egblɔ be, “Nye ŋutɔ mate ŋu aɖo dzidzenuwo na ɖokuinye.” Gake eva kpɔe be ne yewɔ nu siwo yesusu be esɔ la, nu nyuiwo medona tsoa eme o. Egblɔ emegbe be yeƒe agbenɔnɔ tsãtɔ yɔ fũu kple “agbe gbegblẽ nɔnɔ, atike vɔ̃ɖi zazã, ahamumu, kple ŋutasesẽ,” eye esia mena yekpɔ dzidzɔ o.

Zi geɖe la, ale si ame bubuwo ase le wo ɖokuiwo me hã tea ŋu kpɔa ŋusẽ ɖe mía dzi ne míele nya me tsom. Esia ate ŋu awɔe be míana woƒe nunya kple nuteƒekpɔkpɔwo naɖe vi na mí. Míaƒe ƒometɔwo, xɔlɔ̃wo, kple ame siwo dome míele la ade bubu mía ŋu ne míewɔ nu si wosusu be esɔ.

Ðe wòasɔ ɣesiaɣi be míanɔ te ɖe ale si ame bubuwo sena le wo ɖokuiwo me dzi atso nya mea? Ðetugbui aɖe si ŋkɔe nye Priscila wɔ nu siwo exɔlɔ̃wo lɔ̃a wɔwɔ eye wòkpɔ gome le gbɔdɔdɔ do ŋgɔ na srɔ̃ɖeɖe me. Togbɔ be ame bubuwo susu be nuwɔna ma sɔ hã la, eya ŋutɔ menɔ dzidzɔ kpɔm o. Egblɔ be: “Nyemekpɔa dzidzɔ ne mewɔ nu si ame sia ame lɔ̃a wɔwɔ o. Esia na mewɔ movinuwo kple nu siwo me afɔku le.”

Ne míele nya me tsom le nyui kple vɔ̃ ŋu la, ale si míesena le mía ɖokui me kple ale si ame bubuwo sena le wo ɖokuiwo me wɔa akpa vevi aɖe. Gake nu siawo ɖeɖe mate ŋu ana míatso nya me nyuie ɣesiaɣi o. Esi míenya nu siwo ado tso míaƒe nyametsotsowo me o ta la, ɣeaɖewoɣia míaƒe nyametsotsowo me tsonuwo tea ŋu gblẽa nu le mía ŋutɔwo alo ame bubuwo ŋu. (Lododowo 14:12) Azɔ hã, kakaɖedzi meli be míawo ŋutɔwo alo ame siwo dome míele la ƒe susuwo nye nyuitɔ eye womava trɔ le etsɔme o. Nya lae nye be, amewo bua agbenɔnɔ aɖewo fifia be wosɔ evɔ wobua wo tsã be womesɔ o; nenema kee wobua nuwɔna aɖewo fifia be wonyo evɔ wobua wo tsã be wogblẽ.

Ðe nane li si akpe ɖe mía ŋu míatso nya me nyuie le nyui kple vɔ̃ ŋua? Ðe agbe nyui nɔnɔ ƒe nudidi aɖe li si dzi míawɔ ɖo egbea eye mave mí ne ƒeawo va le yiyim oa?

Dzidzɔtɔe la, teƒe aɖe li si míakpɔ mɔfiame le nyui kple vɔ̃ ŋu siwo metrɔna o la le; kakaɖedzi le mɔfiame siawo ŋu eye woɖea vi na amewo katã le afi sia afi. Nyati si kplɔ esia ɖo akpe ɖe mía ŋu míanya afi si míakpɔ wo le.