Amewo Ƒe Ɣlidodo Be Woaɖɔ Nuwo Ðo

ETSO NYƆ! ŊLƆLA SI LE GERMANY GBƆ

Nyɔnu aɖe si le Germany, si ŋkɔe nye Anna, si xɔ ƒe 80 la gblɔ be: “Ðetugbie meganye fifia la, anye ne meɖo ɖɔɖɔɖotaʋliha anyi!” Robert biae be: “Nukae nàɖɔ ɖo?” Anna ɖo eŋu be: “Nusianu!”

AME geɖe awɔ ɖeka kple Anna. Numekuku aɖe si wowɔ le Germany le ƒe 1990 ƒeawo ƒe domedome ɖee fia be amesiwo wobia gbee la dometɔ 2 le 3 me se le wo ɖokui me be ehiã be ‘woawɔ ɖɔɖɔɖo geɖewo kple tɔtrɔ veviwo.’ Ðewohĩ nɔnɔmea le alea le dukɔ si me nèle me.

Ne dukɔmeviwo le ɣli dom be yewole tɔtrɔ dim la, ɖeko wodoa ŋugbe na wo zi geɖe be yewole nuwo ɖɔ ge ɖo. Ku ɖe agbalẽsrɔ̃nyawo me ɖɔɖɔɖowo ŋu la, agbalẽsɔsrɔ̃ kple dziɖuɖu ŋutinyafialagã ƒe kpeɖeŋutɔ, Frederick Hess, ŋlɔ bena: “Zi geɖe la, gbɔgblɔ na amewo be woaɖɔ nuwo ɖo nye agbagbadzedze be woato ayemɔ nu ana kakaɖedzi nutometɔ magbɔdziɖiwo.” Míexlẽa  adzɔxenyawo, lãmesẽnyawo gbɔkpɔkpɔ, agbledenyawo, kple senyawo me ɖɔɖɔɖowo ŋuti ɖoɖowo le nyadzɔdzɔgbalẽwo me. Míesea nu tso ɖoɖo siwo wowɔ hena agbalẽsrɔ̃nyawo, dukɔmeviwo ƒe dedienɔnɔ, kple tohehe na sedzidalawo ŋuti ɖɔɖɔɖowo ŋu. * Míexlẽa nu tso alesi xɔseha aɖewo me tɔwo le ʋiʋlim be woawɔ ɖɔɖɔɖo le haa ƒe nufiafia mee hã ŋu.

Ðɔɖɔɖo Me Tsonuwo Tsɔtsɔ Sɔ Kple Alesi Nuwo Le

Nukatae amewo le didim be woawɔ tɔtrɔ le nuwo me? Amegbetɔ dzea agbagba ɣesiaɣi be yeatrɔ asi le yeƒe nɔnɔmewo ŋu wòanyo awu. Edze agbagba be yeawɔ ema to akɔdada, gazazã, kple sewɔwɔ, alo amewo dzi zizi me. Esiae nye amegbetɔ ƒe didi vevie be yeatrɔ asi le yeƒe nɔnɔmewo ŋu wòanyo awu le agbe me, yeaɖo etsɔme nyui anyi na ye viwo, alo be yeana dedienɔnɔ, agbenyuinɔnɔ, kple dzɔdzɔenyenye ŋuti nukpɔsusu kɔkɔ nasu dukɔmeviwo si. Zi alesi amewo le ʋiʋlim be yewoasi le ɖekemanyamanya, dɔléle, hiãkame, kple dɔwuame ƒe nugbegblẽ nu ko la, amewo ayi edzi ado ɣli be woaɖɔ nuwo ɖo.

Togbɔ be ame geɖe kpɔa dzidzɔ ɖe ɖɔɖɔɖowo ŋu hã la, susu bubu kurae le ame bubuwo si tso ɖɔɖɔɖotaʋlilawo kple nusiwo wodzea agbagba be yewoaɖɔ ɖo ŋu. Ame aɖewo di be nuwo nanɔ abe alesi ko wole ene. Wobua ɖɔɖɔɖotaʋlilawo be wonye nugbɔmewɔla siwo dina be yewoatrɔ xexeame evɔ woŋlɔ alesi nuwo le yiyimee la be. Handbuch der deutschen Reformbewegungen 1880-1933 (Germany Ðɔɖɔɖotaʋliha ƒe Mɔfiagbalẽ, Ƒe 1880-1933) gblɔ be ɖɔɖɔɖotaʋlilawo nye “amesiwo woɖea ɖeklemii bɔbɔe, dunyahela siwo wotana ɖe nyadzɔdzɔgbalẽwo me alɔmeɖeleameŋutɔe, kple amesiwo wotsɔa megbeŋkɔ vovovowo na.” Fransetɔ fefeŋlɔla Molière gblɔ ɣeaɖeɣi be: “Bometsitsi aɖeke melolo de didi be woatrɔ xexeame wòanyo nu o.”

Nukae nye wò susu? Ðe woate ŋu ato ɖɔɖɔɖowo dzi ana xexeame nanyoa? Alo nusiwo mate ŋu adzɔ o ŋuti drɔ̃e ko kumee ɖɔɖɔɖotaʋlilawo lea? Ke ɖɔɖɔɖo siwo gɔme wodze le ɣeyiɣi siwo va yi me ɖe? Ðe amesiwo do wo ɖa la ɖo woƒe taɖodzinuwo gbɔa? Míadzro nya siawo me le nyati siwo kplɔe ɖo me.

[Etenuŋɔŋlɔ]