Ðe Kuxiawo Gbɔkpɔnu Le Ðɔɖɔɖotaʋlilawo Sia?

ASITSATSA me nufitifitiwɔwɔwo, se madzɔmadzɔwo dede, numadzɔmadzɔwɔwɔ, lãmesẽnyawo gbɔkpɔmɔnu manyomanyowo, agbalẽsrɔ̃ɖoɖo madeŋgɔwo, subɔsubɔhawo ƒe ametafatafa le ganyawo me, kpakple dzɔdzɔmenuwo ŋudɔwɔwɔ ɖokuitɔdiditɔe—nya siawo na dzi ɖe mía dometɔ akpa gãtɔ ƒo. Nya siawo kee dɔa ɖɔɖɔɖotaʋlilawo wotsona ɖe nuwo ɖɔɖɔɖo ŋu.

Ðɔɖɔɖotaʋlilawo le dukɔ ɖesiaɖe kloe me, amesiwo dea dzi ƒo be woaɖɔ nuwo ɖo to dukplɔsewo kple mɔnu ɖɔʋuwo ŋudɔwɔwɔ me. Zi geɖe la, womenyea ʋunyaʋunyawɔlawo alo amesiwo mua dziɖuɖu ƒua anyi o, elabena ɖɔɖɔɖotaʋlila akpa gãtɔ zɔna ɖe se dzi heƒoa asa na ŋutasẽnuwɔna. Ðɔɖɔɖotaʋlila ʋɛ aɖewo nyea dɔ ŋkuta wɔlawo eye wowɔa afɔɖeɖewo hena nanewo ɖɔɖɔɖo. Bubuwo dzea agbagba ƒonɛ ɖe ŋusẽtɔwo nu be woaɖɔ nanewo ɖo.

Ðɔɖɔɖotaʋlilawo dzea agbagba ɖea nu me na dukɔmeviwo be woalé ŋku ɖe alesi wokpɔa nanewo gbɔe ŋu. Menye ɖeko wotsia tre ɖe nuwo ŋu ko o; alesi woatrɔ asi le nuwo ŋu woanyo ɖe edzi ŋuti nukpɔsusuwo nɔa wo si. Be ɖɔɖɔɖotaʋlilawo nana amewo nase nu tso woƒe nukpɔsusuwo ŋu la, woƒoa koko na amewo, lɔa gbɔ, alo toa nyadzɔdzɔgblɔmɔnuwo dzi kakaa woƒe nukpɔsusuwo. Nusiwo tena ɖe ɖɔɖɔɖotaʋlilawo dzi vevie dometɔ aɖee nye be dukɔmeviwo nado toku woƒe nyawo.

Ðɔɖɔɖotaʋlilawo ƒe Ŋutinya Aɖewo

Ðɔɖɔɖo geɖewo yi edzi le ŋutinya me. Biblia gblɔ na mí be anye ƒe 2,000 enye si va yi la, nuƒola aɖe zã nya  siawo tsɔ kafu Felike, si nye Roma-mɔ̃mefia si nɔ Yudea-nutowo dzi ɖum, le dutoƒo be: “Nuwo [le ɖɔɖɔm ɖo] to wò beléle na dukɔ sia me.” (Dɔwɔwɔwo 24:3) Ƒe 500 lɔƒo do ŋgɔ na Felike la, Helatɔwo ƒe sewɔla Solon ʋli hiãtɔwo ƒe nɔnɔmewo ɖɔɖɔɖo ta. The Encyclopædia Britannica ɖe nu me be Solon “he ahedada kolikoli me tsonuwo va nuwuwui” le blema Atene.

Ðɔɖɔɖo geɖewo yi edzi le subɔsubɔhawo ƒe ŋutinya me. Le kpɔɖeŋu me, Martin Luther dze agbagba be yeaɖɔ nuwo ɖo le Roma Katolikohaa me eye eƒe afɔɖeɖewo he Protestant-sɔlemehaa vɛ.

Nusiwo Ðɔɖɔɖotaʋlilawo Dina Be Yewoaɖɔ Ðo

Ðɔɖɔɖotaʋlilawo adze agbagba hã be yewoatrɔ amewo ƒe gbesiagbenuwɔna aɖewo. Ðɔɖɔɖotaʋlila aɖewo doa agbenɔnɔmɔ bubu kura ɖe ŋgɔ. Nenemae wònɔ le Lebensreform (agbenɔnɔmɔ ŋuti ɖɔɖɔɖotaʋliha) si nɔ Germany le ƒe alafa 20 lia ƒe gɔmedzedze me la gome. Mɔ̃ɖaŋudɔwɔnawo ƒe dzidziɖedzi le ameƒomea dome na ame geɖe va se le wo ɖokui me be amewo va lɔ̃ mɔ̃wo ŋudɔwɔwɔ ale gbegbe be womegabua amegbetɔ ƒe wɔƒe nu vevii o. Ðɔɖɔɖotaʋlilawo nɔ ʋiʋlim be yewoatrɔ nɔnɔmea wòagbugbɔ aɖo tsãgbenɔnɔ me. Wodo kamedede, nuwo wɔwɔ le gota, gbetikewo zazã, kple amagbewo ɖuɖu ɖe ŋgɔ.

Ðɔɖɔɖotaʋlila bubuwo kloa nu le numadzɔmadzɔwɔwɔwo dzi heƒonɛ ɖe dziɖuɖuwo nu be woaɖɔ nɔnɔmea ɖo. Tso keke ƒe 1970-awo ƒe gɔmedzedze la, nutome dedienɔnɔ taʋlihawo lɔ gbɔ tsi tre ɖe nufitifitiwɔwɔwo kple nutoame gbegblẽ ŋu vevie. Ƒuƒoƒo siawo dometɔ aɖewo va zu habɔbɔ gãwo le xexeame egbea. Nutome dedienɔnɔ taʋlilawo wɔa nu geɖe wu gbɔlɔlɔ atsɔ atsi tre ɖe nuwɔna siwo gblẽa nu le nutoame ŋu dzaa ko. Wodoa susuwo hã ɖa tso alesi woakpɔ kuxiawo gbɔe ŋu. Woƒe agbagbadzedze wɔe be wotrɔ se siwo ku ɖe aɖinuwo kɔkɔ ɖe atsiaƒu me kple bosowo ɖeɖe, kple bubuawo, ŋu.

Le ƒe 1960-awo me la, Vatikan ƒe Aɖaŋuɖotakpekpe Evelia te ɖɔɖɔɖo aɖe wɔwɔ le Roma Katolikoha la me. Ame bubu aɖewo siwo hã di be yewoanye ɖɔɖɔɖotaʋlilawo le Katoliko hameviwo dome la do le ƒe 1990-awo me. Le kpɔɖeŋu me, wodoe ɖa be woawɔ tɔtrɔ le srɔ̃maɖemaɖe ƒe nyaa ŋu. Ðɔɖɔɖotaʋlila siwo le England Sɔlemeha me ʋli nyɔnuwo ɖoɖo nunɔlawoe ta.

Medzea Amesiame Ŋu O

Nu nyui geɖewo do tso ɖɔɖɔɖo aɖewo me. Le kpɔɖeŋu me, le Biblia me la, míede dzesi ɖɔɖɔɖo deamedzi geɖe siwo dukɔa ŋgɔnɔlawo kple ame bubuwo do ɖe ŋgɔ. Agbagbadzedze mawo he gbɔgbɔmedzidzedzekpɔkpɔ, ɖekawɔwɔ, kple Mawu ƒe ŋudzedzekpɔɖeameŋu vɛ na dukɔa. (Fiawo II, 22:3-20; Kronika II, 33:14-17; Nexemya ta 8 kple 9) Le ŋkeke siawo me la, amewo ƒe gbesiagbenuwɔnawo me blɔɖe veviwo kple gomenɔamesiwo taʋiʋli vevie ɖe vi ŋutɔ le wɔnamanɔŋutɔwo kple amesiwo yome wotina la takpɔkpɔ me.

Ke hã, zi geɖe nusiwo womele mɔ kpɔm na o ye dona tso ɖɔɖɔɖowo me. John W. Gardner, si nye ƒe alafa 20 lia me dziɖuɖumegã aɖe, gblɔ be: “Nya siwo ɖua ta le ŋutinya me dometɔ aɖee nye be zi geɖe la, ɖɔɖɔɖotaʋlilawo mete ŋu kpɔa nusiwo ava do tso tɔtrɔ siwo dim wole la me dzea sii o.” De ŋugble le kpɔɖeŋu aɖewo ŋu kpɔ.

Tso ƒe 1980-awo ƒe gɔmedzedze la, Europa Dukɔwo dze ɖɔɖɔɖo aɖewo wɔwɔ gɔme be woatsɔ akpe ɖe dzogbenyigbawo kple anyigba mawɔnuwo dzi nɔlawo ŋu. Agbledede ŋuti se yeye siwo wowɔ la wɔe be wokpɔ agbledenyigba agblekagã 300,000 le Germany kple Italy be woaɖo ɖi. Togbɔ be susu nyuiwo tae wowɔ tɔtrɔ siawo hã la, afɔku siwo womenɔ mɔ kpɔm na o nɔ eme. Dukɔ Ƒoƒuawo ƒe Nutomededienɔnɔ Gbɔkpɔha gblɔ be: “Togbɔ be wokpɔ dzidzɔ ɖe ɖoɖoa ŋu le gɔmedzedzea me be enye mɔnukpɔkpɔ hena nu gbagbewo kple wo nɔƒewo keke ɖe enu le nuto mawo me hã la, nu madeamedziwo ate ŋu ado tso ‘anyigbaa ɖoɖoɖi’ me—wòana amewo naɖe asi le agbledemɔnu xoxowo ŋu ahatrɔ ɖe atidomɔnu masɔmasɔwo ŋu.”

Ku ɖe agbagbadzedze be woana kpekpeɖeŋu ame dahewo ŋu la, Dukɔwo Dome Agbledenyawo  Gbɔkpɔha la gblɔ be: “Agbagba siwo katã dzem wole be woawɔ ɖɔɖɔɖowo le habɔbɔwo me hena kpekpeɖeŋunana hiãtɔwo he kuxi gãwo vɛ. Zi geɖe la, ŋusẽtɔwoe ɖoa habɔbɔ siawo hekpɔna egbɔ be nusiwo ade woa ŋutɔwo dzie habɔbɔawo wɔ. . . . ‘Ame gãwo’ kpɔa egbɔ be woa ŋutɔwo ƒe viɖee habɔbɔa do ɖe ŋgɔ.”

Kpɔɖeŋu bubue nye nyɔnuwo ƒe habɔbɔwo, siwo trɔ nyɔnuwo ƒe agbenɔnɔ le Ɣetoɖoƒedukɔwo me, to gomenɔamesi siwo ku ɖe akɔdada, sukukɔkɔdede, kple dɔwɔɖui nyuiwo ƒe mɔnukpɔkpɔwo ŋu taʋiʋli na wo me. Gake nyɔnuwo ƒe gomenɔamesi taʋlihawo dzidela aɖewo gɔ̃ hã gblɔ be nyɔnuwo ƒe habɔbɔwo kpɔ kuxi aɖewo gbɔ hegblẽ bubuwo ɖe edzi. Agbalẽŋlɔla Susan Van Scoyoc bia be: “Ðe míena nyɔnuwo ƒe agbenɔnɔ nyo ɖe edzi nyateƒea, alo esi míele mɔ kpɔm be nyɔnuwo nasɔ kple ŋutsuwo le dɔwɔƒewo la, ɖe míena ŋutsuwo maa aƒemedɔwo wɔna kpli woa, ɖe míena nyɔnuwo zu nublanuitɔwo tegbeea?”

Ðɔɖɔɖo Mawɔdɔwo

Wotso ɖɔɖɔɖotaʋlila aɖewo nu be nuwo tɔtrɔ dzaa ta koe woƒonɛ ɖe ŋusẽtɔwo nu be woaɖɔ nuwo ɖo. Esi Frederick Hess, amesi wɔ numekuku tso ɖɔɖɔɖowɔwɔ le sukunyawo me ŋu, nɔ nu ƒom tso nusi wòyɔ be ɖɔɖɔɖo mawɔdɔ ŋu la, egblɔ be: “Kuxi gã siwo va dona tsoa ɖɔɖɔɖo aɖewo me la tsoa ɖɔɖɔɖowɔmɔnua ŋutɔ gbɔ. Le esi teƒe be tɔtrɔ siawo nakpɔ kuxiwo gbɔ la, wova zua nyametsotso gbegblẽ siwo dzia” kuxi siwo gbɔ kpɔm wole la ɖe edzi boŋ. Eyi edzi be: “Esi dziɖuɖu yeye ɖesiaɖe dina be yeatrɔ ɖoɖo xoxowo ta la, ɣesiaɣi le ƒe ʋɛ aɖewo ko megbe la, nusianu gadzea egɔme yeyee.”

Ɣeaɖewoɣi la, ɖɔɖɔɖo siwo ta ʋlim wole la te ŋu trɔna va zua nukpɔsusu bubu si gblẽa nu dodo ɖe ŋgɔ. Lebensreform ɖɔɖɔɖotaʋliha si le Germany to mɔ aɖe si dzi woato atrɔ asi le amegbetɔƒomea ƒe dzidzimewo ŋu be dɔléle boo manɔ wo ŋu o vɛ, eye wòna wotia ŋutsu kple nyɔnu siwo le lãmesẽ blibo me hena srɔ̃ɖeɖe, bena wo viwo nanye dzidzime sẽŋuwo. Ke hã, nugbɔmewɔlawo wɔ nukpɔsusu sia ŋudɔ ɖe mɔ gbegblẽ nu tsɔ do alɔ Sosialist Dziɖuɖua le eƒe agbagbadzedze be woawɔ ameƒomevi siwo de ŋgɔ wu ɖesiaɖe la me.

Dzi ɖena le ɖɔɖɔɖotaʋlila dovevienuwo gɔ̃ hã ƒo ɣeaɖewoɣi le ɖɔɖɔɖoawo me tsonuwo ta. Dukɔ Ƒoƒuawo ƒe Dɔdzikpɔlagã Kofi Annan fa konyi be: “Mesusu be nusi koŋue ɖea dzi le ame ƒo enye be mí katã míenya nusiwo gblẽ kple nusiwo hiã be míawɔ, gake zi geɖe la, míete ŋu wɔnɛ o. Ɣeaɖewoɣi la, wodenɛ asi na dɔdzikpɔlagã kple eƒe dɔwɔlawo be woakpɔ nɔnɔmea gbɔ, gake ga si hiã be woatsɔ akpɔ egbɔe la menɔa anyi o. Ɣeaɖewoɣi ne nu dziŋɔwo le dzɔdzɔm eye míedi be míana xexeame nanya nu tso eŋu la, ame aɖeke medi be yeawɔ afɔɖeɖea o, le nu manyomanyo siwo me wòto va yi ta.”

 Ðɔɖɔɖotaʋlilawo mate ŋu akpɔ mɔ be amesiame alɔ̃ yewoƒe nya o, elabena to amewo ƒe susu hehe ɖe woƒe taɖodzinuwo ŋu me la, wonaa nuwo sesẽna na ame bubuwo. Jürgen Reulecke, si nye egbegbe ŋutinyafialagã kple ɖɔɖɔɖowɔwɔ ŋutinunyala, amesi ƒe nya woyɔ le nyadzɔdzɔgbalẽ si nye Die Zeit me, gblɔ be: “Ðɔɖɔɖotaʋlila nyea ŋù nɔa amewo ƒe ŋutilã me ɣesiaɣi.” Gawu la, togbɔ be ɖɔɖɔɖotaʋlila akpa gãtɔ wɔa se dzi heƒoa asa na ʋunyaʋunyawɔwɔ hã la, wo dometɔ aɖewo megava gbɔa dzi ɖi ne nuwo mele afɔ tsɔm kabakaba o. Ne edzɔ alea la, avuwɔhawo ate ŋu ado tso ɖɔɖɔɖotaʋliha me, amesiwo wɔa nusiwo ŋu se meɖe mɔ ɖo o.

 Ðe ɖɔɖɔɖo gbogbo siwo wɔm wole le xexeame godoo la na amewo va se le wo ɖokui me be agbe dze edzi na yewoa? Edze abe mele alea o ene. Le kpɔɖeŋu me, esi wobia gbe amewo le Germany tso woƒe nukpɔsusuwo ŋu la, eɖe dzesi be le ƒe 35 lɔƒo siwo va yi me la, tɔtrɔ boo aɖeke meva amewo ƒe agbenɔnɔ me le dzidzemekpɔkpɔ gome o. Ke le mawusubɔsubɔ ya gome ɖe? Ðe tɔtrɔ siwo wowɔ le subɔsubɔhawo me he ame geɖewo va wo meea? Ðe hameviwo va le ŋudzedze kpɔm ɖe subɔsubɔhawo ƒe nuwɔna ŋu azɔa? Ao, elabena ame geɖe megava tsɔa ɖeke le mawusubɔsubɔ me le Ɣetoɖoƒedukɔwo me o, eye subɔsubɔha xoxowo ƒe nu megaléa dzi na ame gbogbowo o.

Ðe Yesu Kristo Nye Ðɔɖɔɖotaʋlila?

Ame aɖewo agblɔ be Yesu Kristo nye ɖɔɖɔɖotaʋlila. Nyateƒeea? Biabia sia le vevie na amesiame si di be yeanye Mawu subɔla vavã, elabena esia wɔwɔ bia be wòazɔ Kristo ƒe afɔtoƒe pɛpɛpɛ.—Petro I, 2:21.

Ðikeke aɖeke mele eŋu o be ŋutete nɔ Yesu ŋu be wòaɖɔ nuwo ɖo. Esi wònye ame deblibo ta la, ate ŋu ahe tɔtrɔwo kple ɖoɖo yeyewo vɛ. Ke hã, Kristo meɖe afɔ aɖeke be yeatsɔ aɖe dziɖuɖumegã nufitiwɔlawo alo asitsala maɖianukwarewo ɖa le xexeame o. Togbɔ be eya ŋutɔ nye fɔmaɖila si ŋu wogbɔna ŋutasẽnu madzɔmadzɔwo wɔ ge ɖo hã la, menɔ ŋgɔ na amewo wolɔ gbɔ to ablɔwo dzi tsi tre ɖe numadzɔmadzɔwɔwɔ ŋu o. Ɣeaɖewoɣi la, Yesu “mekpɔ afisi wòatsɔ ta aziɔ ɖo o.” Ke hã, meƒo amewo nu ƒu be woahe amewo ƒe susu ayi aƒemanɔsitɔwo ƒe nuhiahiãwo dzi o. Esi ame aɖewo ɖe woƒe seselelãme gblɔ tso gakuxi aɖewo ŋu la, eɖe nu me be ‘ame dahewo li kpli wo ɖaa.’ Yesu mede akpa aɖeke dzi le xexeame ƒe aʋawɔwɔwo me o.—Mateo 8:20; 20:28; 26:11; Luka 12:13, 14; Yohanes 6:14, 15; 18:36.

Gake menye ɖe kuxiwo abe hiãkame, nufitifitiwɔwɔ, kple madzɔmadzɔnyenye ene metsɔ fu lãme na Kristo o. Le nyateƒe me la, Biblia ɖee fia be nɔnɔme wɔnublanui si me amegbetɔƒomea nɔ la wɔ nublanui nɛ ale gbegbe. (Marko 1:40, 41; 6:33, 34; 8:1, 2; Luka 7:13) Gake nɔnɔmeawo gbɔkpɔnu si wòna la nɔ etɔxɛ. Nusi nɔ susu me na Yesu menye ɖɔɖɔɖowɔwɔ le nanewo me dzaa ko o, ke tɔtrɔ blibo le alesi wokpɔa ameƒomea ƒe nyawo gbɔe me. Dziƒofiaɖuƒe si ameƒomea Wɔla, Yehowa Mawu, ɖo lae ahe tɔtrɔ sia vɛ, eye Yesu Kristoe anye eƒe Fia. Míadzro nya sia me le nyati si kplɔe ɖo me.

[Nya si ɖe dzesi si le axa 6]

“Nya siwo ɖua ta le ŋutinya me dometɔ aɖee nye be zi geɖe la, ɖɔɖɔɖotaʋlilawo mete ŋu kpɔa nusiwo ava do tso tɔtrɔ siwo dim wole la me dzea sii o.”—John W. Gardner

[Nya si ɖe dzesi si le axa 7]

“Mesusu be nusi koŋue ɖea dzi le ame ƒo enye be mí katã míenya nusiwo gblẽ kple nusiwo hiã be míawɔ, gake zi geɖe la, míete ŋu wɔnɛ o.”—Dukɔ Ƒoƒuawo ƒe Dɔdzikpɔlagã, Kofi Annan

[Aɖaka/Nɔnɔmetata siwo le axa 8, 9]

“Mede Nye Agbe Afɔku me Be Makpɔ Nutoame Ta”

Hans nye ƒudzidɔwɔla ƒe 48 sɔŋ eye wònye ʋumefia ƒe 35 kple edzivɔwo. Le eƒe dɔa ƒe nuwuɣi lɔƒo la, enye ʋumefia nɔ meli aɖe si nutome dedienɔnɔ gbɔ kpɔha aɖe zã la me. Eɖe nu me be:

“Meka ɖe edzi vevie be ele be amegbetɔƒomea nade bubu nutoame ŋu ahade asixɔxɔ dzɔdzɔmenuwo ŋu. Eyata esi wona mɔnukpɔkpɔam be manye nutome dedienɔnɔ gbɔ kpɔha aɖe ƒe tɔdziʋumefia la, melɔ̃ enumake. Míaƒe dɔe nye be míaklo nu le nusiwo gblẽa nu nutoame ŋu la dzi. Ne míewɔ nyanyanadɔ aɖe ŋuti ɖoɖo le ƒua dzi ko la, míenaa nyadzɔdzɔŋlɔlawo nyana ale be wòakakae to nyadzɔdzɔgblɔmɔnuwo dzi. Míetsa le ƒu dzi be míadze agbagba ana woadzudzɔ ɖinuwo kɔkɔ ɖe atsiaƒu me. Ɣebubuɣi la, míedze agbagba be míatsi nyo kple nyoviwo wuwu nu.

“Vɔvɔ̃nɔtɔwo mate ŋu awɔ dɔ sia o. Metsɔ nye agbe de afɔku me be makpɔ nutoame ta. Le tsitretsitsi ɖe nutoame gbegblẽ ŋu wɔna aɖe me la, metsi ɖokuinye ɖe meli ƒe seke ŋu hena wòhem yi go ŋui. Ɣebubuɣi la, menɔ akro si wowɔ kple aŋe, si ƒua du sesĩe me henɔ du ƒum le meli gã aɖe ƒe axadzi. Ame aɖe ɖe asi le gudugba gã aɖe ŋu wòge va dze akroa me si na akroa tsyɔ. Mexɔ abi vevie.”

Hans va kpɔe dze sii mlɔeba be togbɔ be susu nyuiwo nɔ habɔbɔa si hã la, ɖeko yenɔ yeƒe agbe dem afɔku me evɔ yeƒe nuwɔna metsi nu gbegblẽ le nutoame ŋu nu o. (Nyagblɔla 1:9) Esi wòdo le nutome dedienɔnɔ taʋlihaa me megbe kpuie la, Yehowa Ðasefowo srɔ̃ Biblia kplii eye wòva zu Ðasefo xɔnyɔnyrɔ. Enye ɣeyiɣiawo katã ƒe subɔla egbea. “Biblia kpe ɖe ŋunye mekpɔe dze sii be nutoame takpɔkpɔ nyuie ŋuti mɔkpɔkpɔ ɖeka kolia si ŋu kakaɖedzi le ava to Mawu ƒe Mesia Fiaɖuƒea dzi.”

[Aɖaka/Nɔnɔmetata si le axa 9]

Eʋli Be Woaɖɔ Nuwo Ðo

Wodzi Sara (menye eŋkɔ ŋutɔŋutɔe o) le ƒe 1960-awo ƒe domedome le Asia. Enɔ eƒe ƒewuiwo me esime womu dziɖuɖu aɖe ƒu anyi kpata le woƒe dukɔa me, eye dziɖuɖu yeye va zia dzi hedo ŋugbe be tɔtrɔwo ava le dunyahehe kple dukɔmeviwo ƒe agbenɔnɔ me. Le gɔmedzedzea me la, eƒe dukɔa me viwo kpɔ dzidzɔ ɖe tɔtrɔa ŋu, gake le ƒe ɖeka ko me la, dziɖuɖu yeyea te amesiwo tsi tre ɖe wo ŋu yometiti, abe alesi ko dziɖuɖu xoxoa wɔ ene. Dzi ɖe le ame geɖe ƒo, eye Sara wɔ ɖeka kple amehawo wotsi tre ɖe dziɖuɖu yeyea ŋu. Eɖe nu me be:

“Míaƒe tsitretsiɖeŋuhaa wɔa kpekpewo hetsia tre ɖe dziɖuɖua ŋu gaglãa. Menɔ mɔdodowo dzi le dugã me nɔ nyanyanagbalẽwo klãm ɖe gliwo ŋu henɔ amekpegbalẽviwo mam esime asrafowo va lém. Wova ɖe asi le ŋunye mlɔeba. Míaƒe ƒuƒoƒoa me tɔ bubuwo ya tɔ meva nɔ nenema o. Wolé xɔ̃nye nyɔnuvi eve hewu wo. Nye agbe ɖo afɔku me, eyata fofonye xlɔ̃ num be madzo le dukɔa me.”

Esi Sara va ɖo Europa la, esrɔ̃ Biblia hexɔ nyɔnyrɔ zu Yehowa Ðasefo. Enye ɣeyiɣiawo katã ƒe subɔla egbea. Esi Sara de ŋugble le nusiwo me wòto va yi ŋu la, egblɔ be:

“Nusi dim menɔ vevie enye dzɔdzɔenyenye kple míaƒe kuxiwo gbɔ kpɔkpɔ. Mekpɔe be taɖodzinu siawo kee nɔ míaƒe dukɔa ƒe dziɖuɖu yeyea si le gɔmedzedzea me, gake wova te nugbɔmewo wɔwɔ ale gbegbe be woŋlɔ taɖodzinuawo be hete dukɔmeviwo tete ɖe to. Mede dzesii hã be nɔnɔme sesẽ siwo me tom míaƒe dukɔa nɔ la gbɔkpɔnu mele tsitretsiɖeŋuha si me menɔ la si o. (Psalmo 146:3, 4) Mekpɔe dze sii azɔ be Mawu ƒe Mesia Fiaɖuƒea koe ate ŋu akpɔ amegbetɔƒomea ƒe kuxiwo katã gbɔ.”

[Nɔnɔmetata si le axa 7]

Berlin Glia Mu le ƒe 1989 me

[Nɔnɔmetata si le axa 8]

Ðe tɔtrɔ siwo wowɔ le subɔsubɔhawo me na ame geɖewo va ge ɖe subɔsubɔhawo mea?

[Nɔnɔmetata Tsoƒe si le axa 5]

Etame le ɖusime: U.S. Information Agency photo

[Nɔnɔmetata Tsoƒe si le axa 7]

Kofi Annan: UN/DPI photo by Evan Schneider (Feb97); nusiwo ƒo xlãe: WHO/OXFAM