Dzidzedzekpɔkpɔ le Nɔnɔme Sesẽwo Gɔ̃ Hã Me

Abe alesi wogblɔe ɖi le Biblia mee ene la, míele “ɣeyiɣi vɔ̃wo” me. (Timoteo II, 3:1) Ƒomekuxi sesẽwo, lãmesẽkuxiwo, kple ganyawo ƒe amemiamia nye nɔnɔme sesẽ siwo ate ŋu ava dziwò la dometɔ aɖewo ko. Awɔ na wò ɣeaɖewoɣi be agba wu ye. Ke hã àte ŋu akpɔ dzidzedze le nɔnɔme sesẽwo gɔ̃ hã me. Bu kpɔɖeŋu sia ŋu kpɔ.

Seƒoƒo aɖe si ƒe amadede le vaolɛt si woyɔna be Teide la miena ɖe Tenerife-tɔdomekpo si ƒe kɔkɔme gogo meta 3,700 dzi le Dziehe Afrika ƒuta gbɔ. Pico de Teide, si nye dzoto si ƒe ŋkɔ wotsɔ na seƒoƒoa, xɔ tɔdomekpo nyigba xɔdzo bliboa dzi. Edze abe ati kple gbewo mewɔna tututu le toa ƒe akpa siwo ɖi abu dzi o ene. Gake vuvɔŋɔli sno babla siwo tea lolo le adame la naa seƒoƒo masekuɖiɖi sia si ƒe amadede le vaolɛt la kpɔa tsi si naa wogagbɔa agbe henyea atsyɔ̃ seƒoƒotsihe nɔa dzotoa tame hẽ. Ẽ, seƒoƒo sia adze nu beli si ŋu ŋusẽ mele o, gake edzea agbagba nɔa agbe hewɔna nyuie le teƒe mawɔnu madeamedzi sia gɔ̃ hã.

Abe Teide seƒoƒo sia ene la, wò hã àte ŋu ado dzi le nɔnɔme sesẽ madeamedziwo me. Biblia kpe ɖe Yehowa Ðasefo geɖe ŋu wodo dzi le ɣeyiɣi sesẽtɔwo kekeake gɔ̃ hã me. Le kpɔɖeŋu me, amesiwo wode Nazi fuwɔamegaxɔwo me le Germany dze agbagba nɔ te sesĩe. Sweden nyadzɔdzɔŋlɔla Bjöm Hallström gblɔ be: “Wowɔ fu wo wu ƒuƒoƒo bubu ɖesiaɖe, gake to woƒe Mawu dzixɔse me la wodo dzi, henɔ te sesĩe wu ame bubu ɖesiaɖe.”

Nɔnɔme ka ke mee nàge ɖo o, Biblia ate ŋu akpe ɖe ŋuwò nàkpɔ dzidzedze le nɔnɔme sesẽwo gɔ̃ hã me. Do afɔ na Yehowa Ðasefo siwo le mia gbɔ, alo nàŋlɔ agbalẽ ɖo ɖe adrɛs si le magazine sia ƒe axa 5 lia hena aƒeme Biblia nusɔsrɔ̃ femaxee.