Dukɔwo Mele Naneke Srɔ̃m Vaseɖe Fifia O

“Ne ɖe amegbetɔwo asrɔ̃ nane atso nusiwo dzɔ va yi me la—nu vevi ka gbegbe enye esi míasrɔ̃! Gake Seselelãme si nu sẽ kple Dunyaheha yome nɔnɔ gbã ŋku na mí, eye sidzedze si su mía si to Nuteƒekpɔkpɔ me la le ko abe tɔdziʋu megbe kaɖi si klẽna ɖe ƒutsotsoewo dzi le eyome ene!”—Samuel Taylor Coleridge.

ÈLƆ̃ ɖe Eŋlisitɔ hakpanyaŋlɔla Samuel Coleridge ƒe nya mawo dzia? Ðe wòate ŋu adzɔ be tameɖoɖo aɖe si le mía ʋãm nagbã ŋku na mí ale gbegbe be míagbugbɔ anɔ vodada wɔnublanui si dzidzime si nɔ anyi va yi wɔ la wɔma?

Atitsogaʋa La

Le kpɔɖeŋu me, bu nusiwo amewo wɔ le Atitsogaʋawo me ŋu kpɔ. Le ƒe 1095 M.Ŋ. me la, Papa Urban II ƒoe ɖe “Kristotɔwo” nu be woaɖaxɔ Anyigba Kɔkɔe la le Moslemtɔwo si. Fiawo, ame ŋkutawo, fia ŋu dzɔlawo, kple ameha siwo katã tso du siwo dzi ɖum Urban II nɔ ɣemaɣi la, wɔ ɖe yɔyɔa dzi. Titinaɣeyiɣiwo me ŋutinyaŋlɔla aɖe gblɔ be “amesiame kloe si nɔa agbe ɖe Kristo ƒe sea nu” la si du yi tameɖoɖoa dzi wɔ ge.

Ŋutinyaŋlɔla Zoé Oldenbourg gblɔ be atitsogaʋawɔlawo dometɔ akpa gãtɔ “xɔe se bliboe be ne yewova zu atitsogaʋawɔla la [yewole] subɔsubɔdɔ wɔm na Mawu Ŋutɔ tẽ.” Eyi edzi gblɔ be, wobua wo ɖokui abe “mawudɔla siwo gblẽa nu woe va le abosam viwo dzi dzem ene.” Agbalẽŋlɔla Brian Moynahan gblɔ be wogaxɔe se be, “amesiwo katã aku la akpɔ xɔsetaku ƒe fiakuku le dziƒo.”

Ðewohĩ atitsogaʋawɔlawo menya be yewoƒe futɔwo hã xɔ nya ma tɔgbe ke dzi se o. Ŋutinyaŋlɔla J. M. Roberts gblɔ le eƒe agbalẽ si nye Shorter History of the World me be Islam srafowo hã ho yi ɖawɔ aʋa kple kakaɖedzi be yewole aʋa wɔm na Mawu eye “amesi aku le aʋagbedzi le woƒe aʋakpekpe kple dzimaxɔsetɔwo me ayi paradiso me” le dziƒo.

Wofia akpa evea siaa be aʋa dzɔdzɔea—si nye esi dzi Mawu da asi ɖo heyra la nye wo tɔ. Subɔsubɔhakplɔlawo kple dunyahedziɖulawo lé dzixɔse sia me ɖe asi eye woƒãe ɖe wo teviwo me. Eye akpa eveawo katã wɔ ŋutasẽnu dziŋɔwo.

Ameka Ƒomeviwoe?

Ameka ƒomeviwoe wɔ nu dziŋɔ siawo? Ame akpa gãtɔ nye ameha—siwo meto vovo boo tso egbetɔwo gbɔ o. Ðikeke mele eme o be wosusu be nu nyui wɔwɔe nɔ yewo ʋãm kple didi vevie be yewoaɖɔ nusi wokpɔ be egblẽ la ɖo le woƒe ŋkekea me. Esi woƒe ŋuʋaʋã nu sẽ ŋutɔ ta la, womenya be ɖeko “dzɔdzɔenyenye” ƒe aʋa si wɔm yewonɔ la he madzɔmadzɔnyenye, vevesese, kple fukpekpe vɛ na ŋutsu, nyɔnu, kple ɖevi akpe alafa nane siwo xaxa ɖe aʋawɔƒeawo la o.

Menye alea koe nɔnɔmea nɔ le ŋutinya katã me oa? Ðe menye kplɔla nyaƒoɖeamenulawoe ƒoe ɖe ame miliɔn nanewo nu enuenu be woawɔ nusi mava susu me na wo gbeɖe o—si nye movidzɔdzɔ kple tagbɔsesẽ ƒe aʋa si wowɔna kple mawusubɔsubɔha  alo dunyahedziɖuɖu siwo tsi tre ɖe wo ŋu oa? Alesi akpa eveawo siaa kpe wo tɔwo be woava wɔ aʋa eye ɖesiaɖe ka ɖe edzi be Mawu le yewo dzi na wokpɔe be yewoƒe dunyahehe alo subɔsubɔha si tsi tre ɖe wo ŋu teteɖeanyi ŋutasesẽtɔe la sɔ. Enye mɔnuɖoɖo si wofɔ si ŋudɔ ŋutasẽdziɖulawo wɔ ƒe alafa geɖe. Moynahan gblɔ be anye mɔnuɖoɖo sia dzie “amesiwo he Ametsɔtsrɔ̃ Gã la kple gbeɖekadolawo tsɔtsrɔ̃ vɛ la zɔ ɖo abe alesi wòdze edzi na atitsogaʋawɔlawo zi gbãtɔ ene.”

Ðewohĩ àgblɔ be ‘gake nunyala siwo li egbea magaɖe mɔ amewo nazã wo le mɔ ma nu o ɖe.’ ‘Ðe míaƒe ŋku meʋu fifia wu oa?’ Aleae wòle be wòanɔ hafi. Gake ɖe wosrɔ̃ nane ŋutɔŋutɔ tso nusi dzɔ va yi la me tututua? Amekae ate ŋu agblɔe anukwaretɔe be wosrɔ̃ nane tso eme ne wobu nusiwo dzɔ le ƒe alafa ɖeka si va yi me ŋu nyuie?

Xexemeʋa Gbãtɔa

Wowɔ nu ɖe mɔnuɖoɖo si Atitsogaʋawɔlawo ɖo ɖi la dzi, kpɔɖeŋu ɖeka enye esi dzɔ le xexemeʋa gbãtɔa wɔɣi. Roberts gblɔ be enye “nu wɔmoyaa siwo dzɔ le ƒe 1914 dometɔ ɖeka be le dukɔ ɖesiaɖe me la ameha gbogbo aɖewo, siwo tso dunyahehabɔbɔ, mawusubɔsubɔ, kple to ɖeka me lɔ̃ faa yi aʋa la kple dzidzɔ.”

Nukatae ameha gbogbowo “lɔ̃ faa yi aʋa la kple dzidzɔ”? Abe alesi amesiwo do ŋgɔ na wo lɔ̃ faa yi aʋae ene la, woawo hã xexemenunya si nɔ anyi le wo ŋɔli la kpɔ ŋusẽ ɖe alesi wonɔa agbee kple nusi dzi woxɔna sena la dzi. Togbɔ be ablɔɖe kple dzɔdzɔenyenye ƒe nukpɔsusuwoe anya ʋã ame aɖewo hã la, ɖikeke mele eme o be ɖokuidodoɖedzi ƒe nukpɔsusu be yewo dedukɔ de ŋgɔ wu ame bubuwo tɔe ʋã ame akpa gãtɔ wobui be edze be yewoƒe dukɔa nanye dziɖula.

Wona ame siawo xɔe se be aʋawɔwɔ nye dzɔdzɔme nuɖoɖo si womate ŋu aƒo asa na o—“dzɔdzɔmenu aɖe si le be wòadzɔ kokoko.” Agbalẽŋlɔla Phil Williams gblɔ be Darwin ƒe nufiafia be dukɔa ƒe nyonyo le dukɔmeviwo ƒe ŋutete me lae he nukpɔsusu si nye be esɔ be woawɔ aʋa atsɔ “aɖe nu gbagbe ƒomevi siwo menyo o la ɖa” vɛ.

Le nyateƒe me la, amesiame susuna be yeƒe tameɖoɖo sɔ. Nukae do tso eme? Agbalẽ kple ŋutinya ŋlɔla Martin Gilbert gblɔ be le Xexemeʋa I me la, “dziɖuɖuwo ƒã ameƒomevinyenye, dulɔlɔ̃, kple asrafonyenye ƒe gbɔgbɔ ɖe amewo me hedo alɔ wo”—eye amewo dze wo yome eŋumabumabui. Ganyaŋununyala John Kenneth Galbraith tsi le Canada ƒe kɔƒe aɖe me le aʋawɔɣia. Egblɔ be amesiwo katã le afisi yele la ƒoa nu tso “movidzɔdzɔ si woɖe fia ku ɖe aʋa la ŋu le Europa” la ŋu. Wogblɔ be: “Nunyalawo . . . meƒo wo ɖokui ɖe aɖaʋadzedze ma tɔgbe me o.” Gake wova wɔe. Eye nukae do tso eme? Canada srafo siwo anɔ 60,000 nɔ asrafo siwo wu miliɔn asieke siwo ku le akpa evea siaa me le nudzɔdzɔ dziŋɔ si wova yɔ be xexemeʋa gbãtɔ me la me.

Womesrɔ̃ Naneke tso Eme O

Le ƒe blave siwo kplɔe ɖo me la, wogava te nɔnɔme ma ɖeɖe fia ake esime Fasitɔwo kple Nazitɔwo va do. Hugh Purcell ŋlɔ be, Fasitɔwo va te wo gbɔ “adegbeƒoƒomɔnuwo si nye dzesiwo kple nyakpakpa gbɔgblɔ be woatsɔ ade zi ameawo me.” Mɔnu ɖeka si koŋ wozãe nye mawusubɔsubɔ kple dunyahehe tsakatsaka wɔdɔɖeamedzi, si  me wodoa gbe ɖa na Mawu hebia eƒe yayra ɖe woƒe asrafoawo dzi.

Ame bubu si “bi ɖe amehawo nu beble me henye nuƒola bibi” enye Adolf Hitler. Dick Geary gblɔ le agbalẽ si nye Hitler and Nazism me be abe dziɖula numevivila kple adegbeƒola bubuawo ene la, Hitler xɔe se be ‘menye nya si na wobua tamee wotsɔ kpɔ ŋusẽ ɖe wo dzi o, ke boŋ alesi wona wose le wo ɖokui mee.’ Purcell gblɔ be ezã zidede amewo me ɖe woƒe futɔwo ŋu ƒe aɖaŋu xoxo sia tsɔ flu ameawoe—abe alesi “wòna Germantɔwo vɔ̃ Yudatɔwo eye woɖe dziku ɖe wo ŋu ene.” Hitler do vlo Yudatɔwo nɔ gbɔgblɔm be, ‘Yudatɔwoe nye Germany dukɔa domegblẽla.’

Nusi dziŋɔ le ɣeyiɣi sia me tɔwo ŋue nye alesi wote ŋu de zi amesiwo ɖi bubume miliɔn geɖewo me bɔbɔe be wowu ame gbogbo aɖewo. Geary bia be: “Aleke wòdzɔe be amesiwo wobuna be wotso dukɔ ʋuŋku me medo dzi dzro o, ke boŋ woƒo wo ɖokui ɖe Nazitɔwo ƒe nu gbegblẽ dziŋɔa me?” Eye menye du si “ʋu ŋku” me tɔwo ɖeɖekoe wonye o, ke boŋ esi me tɔwo wobuna Kristotɔwo hãe! Woble wo de eme elabena wolɔ̃ amewo ƒe xexemenunya wu Yesu Kristo ƒe nufiafia. Eyata dzianukwaretɔ, ŋutsu kple nyɔnu nunyala gbogbowoe woble de ŋutasẽnu dziŋɔ wɔwɔ me tso ɣemaɣi dzi!

Germanytɔ xexemenunyala Georg Hegel gblɔ be: “Nusi nuteƒekpɔkpɔ kple ŋutinya fia enye be dukɔwo kple amewo mesrɔ̃ naneke tso nusi dzɔ va yi me alo wɔ nu nunyatɔe o.” Ate ŋu anɔ eme be ame geɖe mawɔ ɖeka kple Hegel ƒe xexemenunya ma o, gake ame ʋɛ aɖewo koe mawɔ ɖeka kplii o. Nublanuitɔe la, edze abe esesẽna na amewo ŋutɔ be woasrɔ̃ nane tso nusi dzɔ va yi me ene. Gake ɖe wòle be wòanɔ nenema le gowòmea?

Nyateƒee, nu vevi ɖeka si míate ŋu asrɔ̃ enye esia be: Míehiã na nane si ŋu míate ŋu aɖo ŋu ɖo wu amegbetɔwo ƒe xexemenunya ne míedi be míaƒo asa na afɔku siwo dzɔ ɖe dzidzime si nɔ anyi va yi la dzi. Ke ne menye xexemenunyae o ɖe, nukae afia mɔ mí ne míele nusi míawɔ la ŋu bum? Le ƒe akpe ɖeka kple edzivɔ do ŋgɔ na Atitsogaʋa la, Yesu Kristo ƒe nusrɔ̃lawo ɖe nusi Kristotɔwo ƒe mɔnu vavãtɔ—kple nyuitɔ ɖeka kolia—nye la fia. Mina míadzro nusi wowɔ be woƒo asa na amefuflu de ʋukɔkɔɖiʋawo me le woƒe ŋkekea me. Gake ɖe wòate ŋu ava eme be dukɔwo asrɔ̃ esia wɔwɔ ne woaƒo asa na aʋawɔwɔa? Eye nuka kee dukɔwo ɖawɔ o, nukae anye egbɔkpɔnu si Mawu ahe vɛ atsɔ atsi amegbetɔwo ƒe fukpekpewo katã nui?

[Nɔnɔmetata siwo le axa 22]

Ŋutasẽnuwɔwɔ kple fukpekpe enye nusi bɔ le amegbetɔwo ƒe aʋawɔwɔwo me

 [Nɔnɔmetata siwo le axa 23]

Etame: Sitsoƒedilawo le afisi aʋawɔwɔ gblẽ nu le

Aleke wòdzɔe be amesiwo wobuna ame ŋkumekɔkɔe tɔwo ƒo wo ɖokui ɖe ŋutasẽnu dziŋɔ siawo me?

[Afi Si Míexɔ Mɔɖeɖe Tso]

Rwandan refugees: UN PHOTO 186788/J. Isaac; collapse of World Trade Center: AP Photo/Amy Sancetta