Amekae Anyi Xexeame?

ÐE AMEGBETƆƑOMEA ava dze nuku ƒomevi vovovowo takpɔkpɔ gɔme ɖe wo tsɔtsrɔ̃ ɖa teƒe gbaɖegbea? Le nugbagbeŋutinunyala John Tuxill ƒe nya nu la, esia abia be “woawɔ tɔtrɔ gã aɖe.” Gake egblɔ kpee be tɔtrɔ sia “mate ŋu ava eme ne womewɔ tɔtrɔ gãwo le amewo ƒe nugɔmesese le nuku ƒomevi vovovowo ƒe viɖe ŋu, woƒe didi be yewoatrɔ mɔnu siwo ŋudɔ wɔm wole fifia, kple lɔlɔ̃ faa be yewoatrɔ ɖe mɔnu yeyewo ŋu la me o.”

Ame geɖe mexɔe se kura be woate ŋu awɔ tɔtrɔ gã siawo o. Eye ame geɖe melɔ̃ ɖe Tuxill ƒe nyawo dzi hã o. Nutomeŋutinunyala aɖewo li siwo bui be amewo mese nu ƒomevi vovovowo ƒe anyinɔnɔ ƒe vevienyenye me tututu o eye be ɖewohĩ yewo hati aɖewo gɔ̃ hã ɖe ami ɖe nyaa akpa. Ke hã esi dzɔdzɔmeŋutinunyalawo gale nya sia hehe dzi la, asɔ be míalé ŋku ɖe eŋutinunyala aɖewo ƒe nuxlɔ̃amenyawo ŋu. Edze abe nusi le fu ɖem na wo menye nu ƒomevi vovovoawo tsɔtsrɔ̃ ɖa dzaa ko o ke ŋukeklẽ kple nuŋumabumabu yi ŋgɔe si tsyɔ nuwo dome gbegblẽ sia dzi ene hãe. De dzesi nya siawo siwo nuŋlɔla vovovowo ŋlɔ.

“Le ƒe alafa ɖeka ko si va yi me la, agbledela miliɔn geɖe siwo le xexeame godoo zãa nuku si ƒomevi woawo ŋutɔ di. . . . Egbea, adzɔha siwo le xexeame to nuku siawo dometɔ geɖe vɛ, trɔ asi le wo ŋu, eye woda ŋkɔ ɖe wo dzi wòzu nunyalagãwo ƒe nunɔamesi. . . . To susu dada ɖe viɖekpɔkpɔ enumake dzi la, nugbagbewo ƒe dzɔdzɔmetɔtrɔɖaŋu dɔwɔƒewo va le domenyiŋusẽ siwo ŋu asixɔxɔ anɔ vevie le etsɔme la tsrɔ̃m ɖa hesusu be yewoke ɖe nu yeye siwo anɔ te ɖe dɔléle yeye alo wo domegblẽnu nu la ŋuti.”—Dzɔdzɔmeŋutinunya ŋuti nuŋlɔla Jeremy Rifkin.

“Nya si wogblɔna le nyadzɔdzɔwo me ɣesiaɣi be wole vevie wu enye nusi woadzra, adzɔnu si ahe viɖe vɛ kple nusi ade xexeame ƒe ganyawo dzi. Ne gakpɔkpɔ kple adzɔha gãwo ƒe viɖewo  va zu nusi kpɔa ŋusẽ ɖe nyadzɔdzɔgblɔlawo dzi la, ke ganyawo ƒe dzixɔse sẽŋu sia va le abe subɔsubɔha ƒe nufiafia si ŋu womete ŋu hea nya le o ene.”—Agbedomenyiŋusẽ ŋuti nunyala David Suzuki.

Le agbalẽŋlɔla Kenny Ausubel ƒe agbalẽ si nye Seeds of Change—The Living Treasure me la, efia asi alakpanuwɔwɔ si le dukɔ deŋgɔwo me si nye be woƒe “dziɖuɖuwo kple adzɔha gãwo faa konyi le xexeame katã ƒe afɔku si gbɔna to amegbetɔƒomea ƒe ‘domenyinu si li’ tsɔtsrɔ̃ ɖa le domenyiŋusẽ tɔtrɔ me ŋu.” Ede dzesii be woawo hã le nu ƒomevi vovovowo ƒe anyinɔnɔ dem afɔku me to agbledemɔnu yeyewo kple nuku ƒomevi ɖeka kafukafu egbea dzi.

Nutomeŋutinunyalawo ƒe dzitsitsi vevie sɔ alo mesɔ o, ɖewohĩ asesẽ na wò be nàka ɖe ɣletinyigba sia ƒe etsɔme dzi. Ɣeyiɣi didi kae wòate  ŋu akpɔtɔ anɔ dedie esime wòdze abe ɖe ameƒomea le ŋukeklẽ ƒe tsu kum ene? Esi ame geɖe tsi dzi ɖe ŋuɖoɖoa kpɔkpɔ ŋu la, wova da mɔkpɔkpɔ ɖe dzɔdzɔmeŋutinunya dzi be eyae ava xɔ na mí.

Dzɔdzɔmeŋutinunya Kple Mɔ̃ɖaŋununya Ate Ŋu Axɔ na Mía?

Dziɖuɖu ƒe Habɔbɔ si le Edinburgh ɖe woƒe dzitsitsi gblɔ nyitsɔ laa be dzɔdzɔmeŋutinunyalawo ƒe nutovɛwo le tsɔtsɔm fifia eye wòle ŋgɔ dem hã ale gbegbe be afɔku li be dzɔdzɔmeŋutinunyalawo mase ŋgɔyiyi si wɔm wole me tsonuwo me tututu o. David Suzuki ŋlɔ be: “Nugɔmesese kakɛ ʋɛ aɖewo koe le dzɔdzɔmeŋutinunya si le xexeame ƒe dzɔdzɔmenuwo ŋu. Míenya nu gobi aɖeke tso Anyigba ƒe nugbagbewo ŋu o, ʋuu keke wòanye alesi wodo ƒome kple wo nɔewo eye wohiã wo nɔewoe nyanya.”

Abe alesi Science magazine ɖe emee ene la, “kakaɖedzi alo ŋuɖoɖeŋu blibo mele GEO [Nugbagbewo ƒe Agbedomenyiŋusẽ Tɔtrɔ] ƒe afɔkuwo alo viɖewo ŋu o. . . . Ŋutete si le mía si be míagblɔ ŋusẽ si nugbagbe ƒomevi yeyewo kple GEO akpɔ ɖe nutoa me dzi pɛpɛpɛ mede ŋgɔ o.”

Míaƒe “ŋgɔyiyi” siawo dometɔ geɖe nye nusi míayɔ be enye yi nuevee vavã. Nu nyui aɖewo dona tsoa wo me, gake wogaɖea amegbetɔ ƒe numanyamanya kple zi geɖe la, woƒe ŋukeklẽ fiana. (Yeremya 10:23) Le kpɔɖeŋu me, togbɔ be nukuwo ƒaƒã le agbɔsɔsɔ me na ame geɖe kpɔ nu ɖu hã la, ewɔe hã be nuku ƒomevi vovovo le tsɔtsrɔ̃m. Ðk. Mae-Wan Ho ŋlɔ be to lãviwutikewo kple agbledemɔnu xɔasi deŋgɔwo ŋudɔwɔwɔ me la, nukuwo ƒaƒã le agbɔsɔsɔ me mlɔeba he viɖe vɛ na “adzɔha mɔ̃ɖaŋudɔwɔla gãwo kple kesinɔtɔ siwo le Dukɔ Madeŋgɔwo me esime ame tsɛwo ya zu fukpelawo.” Nɔnɔme sia le edzi yim esi agbledede si wotu ɖe nugbagbewo ƒe dzɔdzɔmetɔtrɔɖaŋu dzi va zu asitsamɔnu gã si le mía kplɔm yi etsɔme si ƒe nuɖuɖu kpɔkpɔ anɔ te ɖe dzɔdzɔmeŋutinunya dzi geɖe wu.

Gake mele be kuxi siawo nana mɔkpɔkpɔ nabu ɖe mí o. Le nyateƒe me la, ɖeko wole kpe ɖom nya aɖe si le vevie wu dzi. Biblia kpe ɖe mía ŋu míekpɔe be mele be míaɖo ŋu ɖe amegbetɔ madeblibo siwo le agbagba dzem fifia be yewoakpɔ ɣletinyigba sia kple edzinuwo dzi la ŋu o. Fifia la, kpododonuwo kple nuwo dzimakpɔmakpɔ nyuie koe nye amegbetɔwo ƒe nɔnɔme. Eyata Psalmo 146:3 xlɔ̃ nu be: “Migaɖo ŋu ɖe amegãwo, amegbetɔvi, siwo mate ŋu axɔ na ame o la ŋu o.” Gake míate ŋu aka ɖe Mawu ya dzi bliboe. (Lododowo 3:5, 6) Edi eye ŋutetea hã le esi be wòakpe ɖe mía ŋu.—Yesaya 40:25, 26.

Anyigba Dzeani Wɔnu—Ava Kpuie

Hafi nàgbugbɔ aƒe xoxo ƒoɖi aɖe aɖɔ ɖo la, ele be nàɖe gbeɖuɖɔ kple nugbegblẽawo katã ɖa gbã. Nenema ke eteƒe madidi o Yehowa Mawu aɖe ame vɔ̃ɖiwo, hekpe ɖe amesiwo bua míaƒe xexeame, eme nu siwo nye dzɔdzɔmenuwo, kple wo havi amegbetɔwo gɔ̃ hã be wonye nusiwo ŋudɔ yewoawɔ ɖe yewo ŋutɔwo alo yewoƒe adzɔhawo ƒe viɖekpɔkpɔ ta ko la ɖa. (Psalmo 37:10, 11; Nyaɖeɖefia 11:18) Gake Yehowa akpɔ amesiwo lɔ̃nɛ eye wodzea agbagba be yewoawɔ eƒe lɔlɔ̃nu la ta.—Yohanes I, 2:15-17.

Le ema megbe la, anyigba la kple edzi nugbagbe gbogboawo, hekpe ɖe amegbetɔ toɖolawo ŋu, ava nɔ dziɖuɖu si Mawu ahe vɛ te—eyae nye Mesia Fiaɖuƒea. (Daniel 7:13, 14; Mateo 6:10) Eye nu gbogbo kawo gbegbe nye si anyigba la awɔ le dziɖuɖu nyui ma te! Psalmo 72:16 gblɔ be: “Bli ado kpekpekpe le anyigba dzi kple towo tame.” Ẽ, nuɖuɖu maganye nusi ŋu woahe nya le alo nusi ŋu woatsi dzi ɖo o. Ðe eteƒe la, woanye nuɖuɖu nyui gbogbo aɖewo.

Eyata esime nuɖoanyi sia le gegem ɖe nɔnɔme wɔnublanui si nye mɔkpɔkpɔbuɖeame kple kakaɖedzi manɔamesi me geɖe wu la, amesiwo ɖoa ŋu ɖe Yehowa ŋu ate ŋu akpɔ mɔ na etsɔme nyui wɔnuku aɖe le anyigba sia tututu dzi. Mɔkpɔkpɔ siae nye “fiaɖuƒeŋutinya nyui” si ƒe nya Yehowa Ðasefowo le gbɔgblɔm dzidzɔtɔe na amesiwo katã le xexeme si nyo wu hele dedie wu dim. (Mateo 24:14) Le mɔkpɔkpɔ sia si ŋu kakaɖedzi le—kple ɖetsɔleme si le Mawu mía fofo si na eƒe amewo—ta la, fifia gɔ̃ hã míate ŋu “anɔ anyi bɔkɔɔ, eye dzɔgbevɔ̃e ƒe ŋɔdzidoname maɖe dzi le [mía ƒo] o.”—Lododowo 1:33.

[Nɔnɔmetata si le axa 10]

Le Mawu ƒe Fiaɖuƒea ƒe dziɖuɖu te la, nuɖuɖu abɔ eye wòanɔ dedie hã

 [Nɔnɔmetata Tsoƒe si le axa 8]

FAO Photo/K. Dunn

[Nɔnɔmetata Tsoƒe si le axa 9]

Tourism Authority of Thailand