Ametakpɔnu si Hiã Amesiame

NUGBLẼFEXEÐOÐO wɔwɔ ɖabɔ le afisi nèle alo meɖali kura o, ametakpɔnu aɖe li si amesiame ate ŋu awɔ eye wòle be wòawɔ hã. Esi “nugblẽfexeɖoɖo” ate ŋu afia “takpɔkpɔ alo dedienɔnɔ ƒe kakaɖedzinamemɔnu” ta la, aleke nàwɔ ate ŋu akpɔ takpɔkpɔ ma ƒomevi?

Àte ŋu akpɔ takpɔkpɔ ma ne èwɔ afɔɖeɖe nyuiwo heɖe afɔku siwo ate ŋu agblẽ nu le ŋuwò la dzi kpɔtɔ. Biblia gblɔ be “azãgbe kple nuɖiɖeame” gblẽa nu le amesiame ŋu. (Nyagblɔla 9:11) Ke hã ne míeɖɔ ŋu ɖo la, alesi wòate ŋu adzɔe be nuvevi nawɔ mí alo nu nabu na mí la dzi aɖe akpɔtɔ.

Bu Etsɔme Ŋu

Nunya vavãtɔ ŋudɔwɔwɔ nye ametakpɔnu. Ðewohĩ anya wɔ be woadzra ga ɖo le ɣeyiɣi siwo me ganyawo de ame dzi vie ɖe nudzɔɖeamedzi—alo hiãɣi ŋu. Le blema la, mawuvɔ̃la Yosef ɖe eɖokui fia be yenye “ame, si dze aɖaŋu, eye tagbɔ li nɛ” esi wòƒo nuɖuɖuwo nu ƒu le ɣeyiɣi si me nuɖuɖu do agbogbo me na Egipte-nyigba dzi nɔlawo katã. Esi dɔ va to le anyigbaa dzi emegbe la, menye Egiptetɔwo ƒe nuhiahiãwo ko gbɔe Yosef ƒe nuwɔnawo kpɔ o ke ekpɔ eya ŋutɔ ƒe ƒometɔwo hã tɔ gbɔ.—Mose I, 41:33-36.

Nudzeamewɔwɔ le nuzazã gome hã ate ŋu anye takpɔkpɔ na mí. Míate ŋu adzra ga ɖo ahaɖe nuteɖeamedziwo dzi akpɔtɔ ne míetiaa mɔ̃ yeye siwo gato, awu xɔasiwo, alo modzakaɖeɖe atraɖii yome o—si nye agbenɔnɔmɔnu si me viɖe sue aɖe le alo ɖeke kura mele na mí le dedienɔnɔ vavãtɔ gome o. Le nyateƒe me abe alesi míegblɔe va yi ene la, zi alesi nunɔamesiwo sɔ gbɔ ɖe ame sii la, zi nenemae alesi wòate ŋu adzɔe be woafii alo nu nabu na ame anɔ bɔbɔe.—Luka 12:15.

Tsi Dzi Ðe Dedienɔnɔ Ŋu

Míate ŋu aɖe agbemefɔku geɖe dzi akpɔtɔ ne míewɔa nu be míanɔ dedie. Lɔrifɔku gbogbo ka gbegbe nye si míate ŋu aƒo asa na ne amesiame kua ʋu le ŋuɖɔɖɔɖo me eye womekui sesĩe akpa o? Gabu amesiwo gbegbe atsi agbe ne ame aɖeke metsɔ ɖeɖiteameŋu ku ʋui  alo mu aha hafi ku ʋu o la ŋu kpɔ. Ʋukuku me fɔku bubu aɖewo hã li siwo nu míate ŋu axe mɔ ɖo.

Le kpɔɖeŋu me, le dukɔ geɖe me la, wode se ɖe kotokumetelefon zazã esi wole ʋu kum la nu. Woƒo nya ta le numekuku aɖe me be telefon sia zazã dzi lɔrifɔkuwo ɖe edzi zi gbɔ zi ene. Ema nye alesi wòle bɔbɔe be afɔku nadzɔ ƒe dzidziɖedzi si sɔ kple afɔku siwo ate ŋu adzɔ ne wono aha wòkpɔ ŋusẽ ɖe ame ƒe ʋu ƒe akpa 0.1 le alafa me dzi, si nye agbɔsɔsɔme si wobu le se nu le dukɔ geɖe me be enye ahamumu si gbɔ eme akpa be woatsɔ aku ʋui.

Zikpuimeka si woabla ɣesiaɣi hã ɖea ʋukulawo kple ʋuɖolawo ƒe ku dzi kpɔtɔna. Gake mègatsɔe be dedienɔnɔtakpɔnu mawo abe zikpuimekawo kple yagolowo alo nugblẽfexeɖoɖo ene ƒe asiwò nɔnɔ na mɔ ye be yeawɔ nu ŋumaɖɔɖotɔe o. Numekuku ɖee fia be nukpɔsusu ma tɔgbe hea afɔku geɖe wu vɛ.

Ne èlɔ̃a nuwɔwɔ be yeanɔ dedie la, enye dedienɔnɔtakpɔmɔnu nyui aɖe le aƒea me kple dɔwɔƒe. Ðe afisi nènɔna kple wò dɔwɔƒe le dzadzɛ eye afɔkunu aɖeke meli oa? Lé ŋku ɖe nɔwòƒe. Ðe nane le ametoƒe aɖe si amewo ate ŋu aklia? Ðe nu ɖaɖɛ aɖewo alo nuzazã xɔdzowo—gamle, gaxɔdzo, nudziɖoga—le teƒe aɖe si ade abi ame ŋu alo ame amea? Ðe mieli kɔ pepa alo nusiwo ate ŋu abi dzo la ɖe teƒe aɖe fũa? Nɔ ŋudzɔ ɖe nusiwo ate ŋu awɔ nuvevi ɖeviwo la koŋ ŋu. Le kpɔɖeŋu me, ɖe ahamuamewo kple nuklɔtike siwo me aɖi le mele asitsɔƒe na ɖevi suewo oa?

Kpɔ Wò Lãmesẽ Ta

Ne èlɔ̃a nuwɔwɔ be yeanɔ lãmesẽ me le mɔ si sɔ nu la, àte ŋu aɖe alesi wòate ŋu adzɔ be dɔléle nadze dziwò dzi akpɔtɔ. Le go sia me la, sidzedze ate ŋu anye dedienɔnɔtakpɔnu ƒomevi aɖe. Nɔ ŋudzɔ ɖe nusiwo ate ŋu agblẽ nu le wò lãmesẽ ŋu la ŋu, eye nàtso ɖe wo gbɔ kpɔkpɔ ŋu kpla ne lãmesẽkuxiwo te fuɖeɖe na wò. Vevietɔ wu la, srɔ̃ alesi nàkpɔ mia kple wò ƒomea ƒe lãmesẽ tae. Ðo ŋku lododo sia dzi be: “Mɔxexe ɖe dɔléle nu nyo wu edada sã.”

Ɣeyiɣi didi aɖe enye sia si Nyɔ! na nyatakaka siwo dea dzi ƒo na amewo be woanɔ agbe ɖe Biblia ƒe gɔmeɖosewo nu ahaƒo asa na nɔnɔme kple agbenɔnɔmɔnu siwo gblẽa nu le lãmesẽ ŋu. Le kpɔɖeŋu me, nyati geɖe siwo me wodzro le Nyɔ! me dometɔ aɖewoe nye dzadzɛnyenye, nu nyui ɖuɖu, alɔ̃dɔdɔ wòasu ame, kple kamedede ɣesiaɣi ƒe vevienyenye kpakple alesi wòhiã be woaɖe nuteɖeamedzi kple agbe me hloloetsotso dzi akpɔtɔe.

Dedienɔnɔtakpɔmɔnu Vevi Aɖe

Le xexe madeblibo sia me la, nugblẽfexeɖoɖo ate ŋu anye kpekpeɖeŋunu nyui aɖe, gake nugblẽfexeɖoɖo aɖeke mate ŋu akpɔ mía ta keŋkeŋ alo aɖo míaƒe nubunamewo teƒe na mí bliboe o. Ke hã amewo li siwo si kakaɖedzi le be womagblẽ yewo ɖi yewoatsi asi eɖanye  nugblẽfexeɖoɖo le afisi wole alo meli o. Nukatae? Elabena ne afɔkuwo dzɔ la, Yesu Kristo yomedzela vavãwo—amesiwo subɔa Fofoa, Yehowa Mawu—wɔa nusi woate ŋui tsɔ ɖea wo nɔewo ƒe xaxawo dzi kpɔtɔnae.—Psalmo 83:19; Yakobo 2:15-17; Yohanes I, 3:16-18.

Gakpe ɖe eŋu la, Yehowa ŋutɔ do ŋugbe be yemagblẽ ye subɔla wɔnuteƒewo ɖi akpɔ gbeɖe o. Biblia me hakpala aɖe ŋlɔ be: ‘Ne fofonye kple danye gblẽm ɖi hã la, Yehowa axɔm.’ (Psalmo 27:10) Esi Yehowa nye Agbedzɔtsoƒe ta la, ate ŋu afɔ amesiwo ku ɖe tsitre, eye Biblia gblɔ be ena ŋusẽ Via, Yesu Kristo, be wòafɔ ame kukuwo ɖe tsitre. (Psalmo 36:10; Yohanes 6:40, 44) Gake Mawu ƒe Nya ɖee fia be menye amesiamee woafɔ ɖe tsitre o. (Yohanes 17:12) Ke aleke míawɔ akpɔ kakaɖedzi be Mawu aɖo ŋku mía dzi le tsitretsitsia me?

Le Yesu ƒe Todzimawunya xɔŋkɔa me la, eƒo nu tso dedienɔnɔtakpɔmɔnu si ŋu kakaɖedzi le wu ɖesiaɖe la ŋu le go sia me. Egblɔ be: “Migadzra nu nyuiwo ɖo na mia ɖokui le anyigba dzi, afisi agbagblaʋui kple nusiwo ɖua nu la, gblẽa nu le, eye fiafitɔwo dzea kpɔ va fia nu le la o; ke boŋ midzra nu nyuiwo ɖo na mia ɖokui le dziƒo, afisi agbagblaʋui kple nusiwo ɖua nu la, megblẽa nu le o, eye fiafitɔ medzea kpɔ va fia nu le o; elabena afisi wò nu nyui le la, afima wò dzi hã lanɔ.”—Mateo 6:19-21.

Zi geɖe amewo bua kɔlili kesinɔnuwo ɖi ŋu hekpɔa mɔ be ana yewoanɔ agbe si me dzidzeme le ne yewova tsi. Gake Yesu ƒo nu tso dedienɔnɔtakpɔmɔnu aɖe si ŋu kakaɖedzi le wu ŋu. Eƒe asixɔxɔ mele gbɔgblɔ me o, eye mado kpo nu gbeɖe o! Eɖe nu me be: “Ke esiae nye agbe mavɔ la bena, woanya wò, Mawu vavã ɖeka la, kple Yesu Kristo, si nèdɔ ɖa la.”—Yohanes 17:3.

Ne míexɔ Mawu kple Via ŋuti sidzedze vavãtɔ eye míewɔ nusiwo míesrɔ̃ ŋudɔ le míaƒe agbenɔnɔ me la, nuŋlɔɖi nyui anɔ mía si le Mawu gbɔ. (Hebritɔwo 6:10) Esi apostolo Petro kple Yohanes siaa tu woƒe dzixɔsewo ɖe woƒe Aƒetɔ, Yesu Kristo, ƒe nufiafiaa dzi ta la, wote gbe ɖe edzi be amegbetɔwo ƒe dziɖuɖuɖoɖo si li egbea nu ayi. Gake Yohanes ɖe nu me be: “Amesi wɔa Mawu ƒe lɔlɔ̃nu la, nɔa anyi yi ɖe mavɔmavɔ me.”—Yohanes I, 2:17; Mateo 24:3, 14; Petro II, 3:7, 13.

Kakaɖedzi le mía si be ne míesubɔ Mawu heku la, afɔ mí ɖe tsitre loo alo ne ɣeyiɣi si me wòahe nuɖoanyi sia va nuwuwu va tso mí ɖo la, alé míaƒe agbe ɖe te míage ɖe eƒe dzɔdzɔenyenye xexe yeyea me. Le nyateƒe me la, Mawu do ŋugbe be ‘yeatutu aɖatsi sia aɖatsi ɖa le míaƒe ŋku me’ eye yeawɔ ‘nuwo katã yeye!’ (Nyaɖeɖefia 21:4, 5) Mawu subɔsubɔ kple kaka ɖe eƒe ŋugbedodowo dzi nye dedienɔnɔtakpɔmɔnu nyuitɔ kekeake nyateƒe. Eye ate ŋu aɖe vi na amesiame.

[Nɔnɔmetata siwo le axa 26, 27]

Nuwɔwɔ be míanɔ dedie ahanɔ lãmesẽ me hã nye dedienɔnɔtakpɔmɔnu

[Nɔnɔmetata si le axa 28]

Nusɔsrɔ̃ tso Mawu ŋu kple eƒe lɔlɔ̃nu wɔwɔe nye dedienɔnɔtakpɔmɔnu nyuitɔ kekeake na míaƒe etsɔme