“Ehiã be Maɖo Ŋu Ðe Mawu Ŋu”

Wogblẽ lɛta si gbɔna ɖe Yehowa Ðasefowo ƒe Fiaɖuƒe Akpata aɖe me le Edmonton, Alberta, Canada.

“Amedɔdɔ Lɔlɔ̃tɔ:

“Mele agbalẽ sia ŋlɔm tsɔ le akpe dam na amesi wɔ nukunu aɖe le nye agbe me evɔ ɖewohĩ eya ŋutɔ menya o.

“Kwasiɖa aɖewoe nye si va yi la, dzre sesẽ aɖe ɖo mía kple srɔ̃nyeŋutsu dome. Nyemekpɔ ɖe nu le nya siawo me o, be, ‘Eva glom, nyemeka ɖe edzi be mate ŋu akpɔ kuxi sia gbɔ o.’ Kasia ame aɖe nɔ ago dom le agboa nu. Yehowa Ðasefo aɖee nye ma le nye agbo nu, eye sisi abe hã meli o.

“Esi meʋu ʋɔa la, nuwo xɔ susu me nam ale gbegbe be nye susu menɔ nya si gblɔm wònɔ ŋu o. Meɖo ŋku nya siwo nye ‘ɖeviwo’ kple ‘ƒome’ dzi. Ŋutsua ɖe agbalẽ aɖe si woyɔna be Nusi Gbɔ Ƒome ƒe Dzidzɔkpɔkpɔ Tsona ɖe go. Esi mekpɔ tanyaa la, ɖeko mewó avi eye nyemete ŋu lé ɖokuinye o. Efɔ ta dzi, heɖe kuku be yeɖe fu nam, eye wòtsɔ agbalẽa nam hedzo.

“Nukae nye nuwɔnukua? Eyae nye ŋkuɖodzi si nye be ne nyemenya nusi mawɔ le nɔnɔme aɖe me o la, mehiã be matsi dzi o elabena Mawu nyae. Ehiã be maɖo ŋu ɖe Mawu ŋu. Edɔa dɔla gɔ̃ hã. Akpe na mi.”

Nusi Gbɔ Ƒome ƒe Dzidzɔkpɔkpɔ Tsona ƒe agbalẽa ate ŋu aɖe vi na ƒomea me tɔ ɖesiaɖe. Eƒe ta vovovo siwo me nufiame le dometɔ aɖewoe nye “Kpɔ Wò Ƒomea Ta tso Ŋusẽkpɔɖeamedzi Gbegblẽwo Me,” “Na Ŋutifafa Nenɔ Wò Aƒeme,” kple “Àte Ŋu Aɖu Kuxi Siwo Gblẽa Nu le Ƒome Ŋu Dzi.”

Be ɖeka nasu asiwò la, taflatse kpe nudɔgbalẽvi si kpe ɖe eŋu la ɖo eye nàɖoe ɖe adrɛs si dze le edzi alo nàzã adrɛs si sɔ le magazine sia ƒe axa 5 lia. Àxɔ aɖaŋuɖoɖo siwo tututu ate ŋu akpe ɖe ŋuwò le ƒomekuxiwo gbɔ kpɔkpɔ me eye wòana dzidzɔ nanɔ wò ƒomegbenɔnɔ me abe alesi Wɔla la ɖoe be wòanɔ ene.

□ Miɖo agbalẽ si nye Nusi Gbɔ Ƒome ƒe Dzidzɔkpɔkpɔ Tsona ɖem.

□ Taflatse miva wɔ aƒeme Biblia nusɔsrɔ̃ femaxee kplim.