Yesaya 28:1-29
28 Baba na Efrayim-hamulawo ƒe fiakuku* gã* la,+Kple eƒe atsyɔ̃seƒoƒo dzeani si le yɔyrɔm,Si le ta na wainmulawo ƒe bali wɔnu la!
2 Kpɔ ɖa! Kalẽtɔ sesẽ aɖe le Yehowa si.
Abe kpetsi sesẽ si le dzadzam kple ya gblẽnu ene,Abe ahom gblẽnu ƒe tsiɖɔɖɔ si gbagba ɖe anyi ene la,Atsɔe axlã ɖe anyi sesĩe.
3 Woatsɔ afɔ afanya+
Efrayim-hamulawo ƒe fiakuku* gãwo.
4 Eƒe atsyɔ̃seƒoƒo dzeani si le yɔyrɔm,Si le ta na bali wɔnu la,Azu abe gbotsetse gbãtɔ siwo ɖi hafi dzomeŋɔli ɖo,Eye ne ame aɖe kpɔe, eye wòɖo asi me nɛ la, wòɖunɛ kaba ene.
5 Gbe ma gbe la, aʋakɔwo ƒe Yehowa azu atsyɔ̃fiakuku kple seƒoƒotsihe dzeani na eƒe dukɔ la ƒe ame susɔeawo.+
6 Eye wòanye ʋɔnudrɔ̃gbɔgbɔ na ame si le ʋɔnu drɔ̃m, kple ŋusẽtsoƒe na ame siwo nyaa futɔwo ɖa le agbo la nu.+
7 Wain na ame siawo hã tra mɔ;Woƒe aha muame na wole yiyim sagasaga.
Aha muame na nunɔla kple nyagblɔɖila siaa tra mɔ;Wain na wotɔtɔ,Aha muame na wole yiyim sagasaga;Wotra le woƒe ŋutegakpɔkpɔ me,Woƒe nyametsotsowo tro.+
8 Elabena xeɖeɖe nyɔŋu yɔ woƒe kplɔ̃wo dzi fũu,—Teƒe aɖeke meli si xeɖeɖe mele o.
9 Ame kae woafia sidzedzee,Eye ame kae woaɖe gbedeasi la me na?
Ðevi siwo wotso no na,Siwo woɖe le no nuea?
10 Ele ale, “se ɖe se dzi, se ɖe se dzi,Ðoɖo ɖe ɖoɖo dzi, ɖoɖo ɖe ɖoɖo dzi,*+Afii ʋɛ, afi mɛ ʋɛ.”
11 Eya ta atsɔ ame siwo kukɔna* kple gbe bubu dolawo ƒe gbe aƒo nu kple dukɔ sia.+
12 Egblɔ na wo be, “Gbɔɖemeƒe lae nye esi. Mina ame siwo ŋu ɖeɖi te la nagbɔ ɖe eme; gbɔdzɔeƒee nye esi,” ke wogbe esese.+
13 Eya ta Yehowa ƒe nya la ava eme ɖe wo dzi be:
“Se ɖe se dzi, se ɖe se dzi,Ðoɖo ɖe ɖoɖo dzi, ɖoɖo ɖe ɖoɖo dzi,*+Afii ʋɛ, afi mɛ ʋɛ,”
Ale be ne wole zɔzɔm la,Woakli nu adze anyi ɖe megbe,Woaŋe, mɔ̃ aɖe wo, eye asi atu wo.+
14 Eya ta mi adegbeƒolawo,Mi dukɔ sia ƒe dziɖula siwo le Yerusalem, mise Yehowa ƒe nya,
15 Elabena miegblɔ be:
“Míebla nu kple Ku,+Eye mía kple Tsiẽƒe* míele nubabla me.
Ne tsi ɖɔ gbagba hã la,Maɖo mía gbɔ o,Elabena míetsɔ alakpa wɔ míaƒe sitsoƒe,Eye míebe ɖe aʋatsokaka me.”+
16 Eya ta ale Aƒetɔ Dziɖulagã Yehowa gblɔe nye esi:
“Kpɔ ɖa, mele kpe aɖe ɖom anyi ɖe Zion, kpe si wodo kpɔ,+Gɔmeɖoanyi si ŋu kakaɖedzi le la ƒe dzogoedzikpe xɔasie.+
Ame si xɔa edzi sena la, dzika matso eƒo o.+
17 Matsɔ ʋɔnu dzɔdzɔe dɔdrɔ̃ awɔ dzidzeka+Kple dzɔdzɔenyenye awɔ glidzidzenu.*+
Kpetsi akplɔ alakpasitsoƒe la adzoe,Eye tsi aɖɔ aɖe bebeƒe la.
18 Woagblẽ mia kple Ku ƒe nubabla la me,Eye nubabla si le mia kple Tsiẽƒe* dome la manɔ te o.+
Ne tsi ɖɔ gbagba va yi la,Agbã mi gudugudu.
19 Ɣesiaɣi si wòva le yiyim la,Akplɔ mi adzoe,+Elabena ava yi ŋdi sia ŋdi,Le ŋkeke me kple zã me.
Ŋɔdzi ɖeɖe koe ana woase eƒe gbedeasi la gɔme.”*
20 Elabena aba la le kpuie ale gbegbe be afɔdadra meli o,Eye avɔ la le lɛe ale gbegbe be ame mate ŋu axatsa eɖokui ɖe eme o.
21 Elabena Yehowa atso abe ale si wòwɔ le Perazim To dzi ene,Atso abe ale si wònɔ le bali si gogo Gibeon+ me ene,Ne wòawɔ eƒe nu, si nye nu wɔmoyaa la,Eye wòawɔ eƒe dɔ, si nye dɔ si tɔgbi mebɔ o.+
22 Eya ta miganɔ fewu ɖum o,+Ne miaƒe bablawo nagasẽ ɖe edzi goŋgoŋ o,Elabena mese le Aƒetɔ Dziɖulagã, aʋakɔwo ƒe Yehowa nuBe woɖo tsɔtsrɔ̃ ɖe anyigba blibo la katã ŋu.+
23 Miƒu to anyi, eye mise nye gbe;Miɖo to, ne miase nya si gblɔm mele.
24 Ðe agbleŋlɔla nɔa nuŋɔŋlɔ dzi atraɖii hafi ƒãa nua?
Ðe wònɔa anyigba dzobom henɔa edzi dzram ɖo ɖaa?+
25 Ne edzra edzi ɖo vɔ la,Ðe mewua sikɔni eye wòƒãa adrike ɖe edzi oa,Eye ɖe meƒãa lu, ƒo yibɔ kple ƒo ɖe wo nɔƒe,Kple lu dzĩ+ ɖe eƒe boliƒo dzi oa?
26 Elabena Mawu ɖɔa ame ɖo* le mɔ si sɔ nu;Eƒe Mawu fiaa nui.+
27 Elabena menye luƒotasiaɖam wotsɔna ƒoa sikɔni o;+Eye womemlia tasiaɖamfɔ toa adrike dzi o.
Ke boŋ kpoe wotsɔna ƒoa sikɔni,Eye atie wotsɔna ƒoa adrike.
28 Ðe wogbãa nuku si wotsɔna ƒoa aboloe nyanyanya?
Ao, womenɔa eƒoƒo dzi atraɖii o;+Eye ne ehe eƒe tasiaɖamfɔ kple eƒe sɔwo to edzi la,Megbãnɛ nyanyanya o.+
29 Esia hã tso aʋakɔwo ƒe Yehowa gbɔ,Ame si ƒe adaŋudede* wɔ nuku,Eye eƒe nuwɔwɔwo lolo.*+
Etenuŋɔŋlɔ
^ Alo, “ƒe dadafiakuku gã.”
^ Ðewohĩ efia woƒe fiadu Samaria.
^ Alo, “dadafiakuku.”
^ Alo, “dzidzeka ɖe dzidzeka dzi, dzidzeka ɖe dzidzeka dzi.”
^ Egɔmeɖeɖe tẽe, “nuyi si kukɔna.”
^ Alo, “dzidzeka ɖe dzidzeka dzi, dzidzeka ɖe dzidzeka dzi.”
^ Alo, “Sheol,” si nye ameƒomea ƒe yɔdo. Kpɔ Nya Tɔxɛwo Gɔmeɖeƒea.
^ Alo, “tsumikpe.”
^ Alo, “Sheol,” si nye ameƒomea ƒe yɔdo. Kpɔ Nya Tɔxɛwo Gɔmeɖeƒea.
^ Agate ŋu afia, “Ne wose egɔme la ŋɔdzi alé wo.”
^ Alo, “naa hehe; hea to.”
^ Alo, “tameɖoɖo.”
^ Alo, “Eye eƒe nunya lolo.”
