1 Korintotɔwo 7:1-40
7 Ke le nya siwo miebia le agbalẽ si mieŋlɔ ɖo ɖem me ŋu la, enyo na ŋutsu be wòagade asi nyɔnu ŋu o;
2 ke le gbɔdɔdɔ manɔsenu* ƒe bɔbɔ ta la, srɔ̃ nenɔ ŋutsu sia ŋutsu si,+ eye srɔ̃ nenɔ nyɔnu sia nyɔnu si.+
3 Srɔ̃ŋutsu netsɔ nu si srɔ̃a dze na la nɛ, eye srɔ̃nyɔnu hã newɔ nenema ke na srɔ̃a.+
4 Srɔ̃nyɔnu mekpɔ ŋusẽ ɖe eya ŋutɔ ƒe ŋutilã dzi o, ke srɔ̃a ya kpɔ ŋusẽ ɖe edzi; nenema kee srɔ̃ŋutsu hã mekpɔ ŋusẽ ɖe eya ŋutɔ ƒe ŋutilã dzi o, ke srɔ̃a ya kpɔ ŋusẽ ɖe edzi.
5 Migate mia ɖokui mia nɔewo o, negbe ɖe mi ame evea mielɔ̃ ɖe edzi va se ɖe ɣeyiɣi aɖe ko, ne miakpɔ ɣeyiɣi ɖe gbedodoɖa ŋu, eye miagava wɔ ɖeka ake, ale be le ɖokuidzimaɖumaɖu ta, Satana naganɔ mia tem kpɔ o.
6 Gake mele esia gblɔm na mi abe mɔnana ene, ke menye abe sedede ene o.
7 Ke ɖe madi be amewo katã nanɔ abe ale si mele ene hafi. Gake ame sia ame kple nunana+ si wòxɔ tso Mawu gbɔ, ame aɖe xɔe le mɔ si nu, ame bubu hã xɔe le mɔ kemɛ nu.
8 Ke mele egblɔm na ame siwo meɖe srɔ̃ o kple ahosiwo be, enyo na wo be woanɔ abe ale si ko nye hã mele ene.+
9 Gake ne womate ŋu aɖu wo ɖokuiwo dzi o la, ekema woaɖe srɔ̃, elabena enyo be woaɖe srɔ̃ wu be fieŋufieŋu nanɔ fu ɖem na ame.+
10 Mele mɔfiame sia nam srɔ̃tɔwo, gake menye nyee o, ke boŋ Aƒetɔ lae, be srɔ̃nyɔnu nagaklã ɖa tso srɔ̃a gbɔ o.+
11 Ke ne eklã ɖa tso egbɔ la, nenɔ anyi srɔ̃maɖemaɖee, alo negawɔ ɖeka kple srɔ̃a; eye srɔ̃ŋutsu hã nagagblẽ srɔ̃a ɖi o.+
12 Ke mele egblɔm na ame mamlɛawo, ɛ̃, nyee le egblɔm, menye Aƒetɔ lae o be:+ Ne nɔvi aɖe srɔ̃nyɔnu nye dzimaxɔsetɔ, eye nyɔnua lɔ̃ be yewoanɔ anyi ɖekae la, ŋutsua megadzo le egbɔ o;
13 eye ne nyɔnu aɖe srɔ̃ nye dzimaxɔsetɔ, eye ŋutsua lɔ̃ be yewoanɔ anyi ɖekae la, nyɔnua megadzo le srɔ̃a gbɔ o.
14 Elabena srɔ̃ŋutsu dzimaxɔsetɔ la ŋuti kɔ le srɔ̃a ta, eye srɔ̃nyɔnu dzimaxɔsetɔ la hã ŋuti kɔ le nɔviŋutsua ta; ne menye nenemae o la, anye ne mia viwo nye ame makɔmakɔwo, ke azɔ wole kɔkɔe.
15 Ke ne dzimaxɔsetɔ la tiae be yeadzo* la, nedzo faa; se mebla nɔviŋutsu alo nɔvinyɔnu le nya siawo me o, ke boŋ Mawu yɔ mi be mianɔ ŋutifafa me.+
16 Ke srɔ̃nyɔnu, aleke nàwɔ anya ne wòe axɔ srɔ̃wò ɖe agbe?+ Alo srɔ̃ŋutsu, aleke nàwɔ anya ne wòe axɔ srɔ̃wò ɖe agbe?
17 Ke hã, le gome si Yehowa* na ame sia ame nu la, ame sia ame nezɔ nenema abe ale si Mawu yɔe ene.+ Eye mɔfiame siae mena le hameawo katã me.
18 Ðe ame aɖe nye aʋatsotsotɔ esi woyɔea?+ Megatrɔ eɖokui aʋamatsomatsotɔe o. Ðe ame aɖe nye aʋamatsomatsotɔ esi woyɔea? Megatso aʋa o.+
19 Aʋatsotso mefia naneke o, eye aʋamatsomatso hã mefia naneke o;+ nu si le vevie nye Mawu ƒe sewo dzi wɔwɔ boŋ.+
20 Nɔnɔme ka mee woɖayɔ ame aɖe le o, nenɔ eme nenema.+
21 Ðe nènye kluvi esime woyɔ wòa? Megaɖe fu na wò o;+ gake ne àte ŋu axɔ ablɔɖe la, wɔ mɔnukpɔkpɔ ma ŋu dɔ.
22 Elabena ame sia ame si le Aƒetɔ la me, si nye kluvi esime woyɔe la zu Aƒetɔ la ƒe ablɔɖeme;+ nenema kee ame si nye ablɔɖeme esime woyɔe la zu Kristo ƒe kluvi.
23 Ho gã aɖee wotsɔ ƒle mi;+ midzudzɔ amewo ƒe kluviwo zuzu.
24 Nɔviwo, nɔnɔme ka mee woɖayɔ ame aɖe le o, nenɔ nɔnɔme ma me le Mawu ŋkume.
25 Ke le ɖekakpui kple ɖetugbui siwo meɖe srɔ̃ o gome la, nyemexɔ sedede aɖeke tso Aƒetɔ la gbɔ na wo o, gake mele nye susu dom ɖa,+ abe ame si Aƒetɔ la kpɔ nublanui na be manye nuteƒewɔla ene.
26 Eya ta mesusu be, anyo be ame nanɔ anyi abe ale si wòle ene le ale si nɔnɔmeawo le fifia ta.
27 Ðe wobla wò ɖe nyɔnu ŋua? Dzudzɔ mɔnudidi be yeaɖe ta le eme.+ Ðe wotu wò le nyɔnu ŋua? Dzudzɔ srɔ̃didi.
28 Ke ne èɖe srɔ̃ hã la, mèwɔ nu vɔ̃ o. Eye ne ɖekakpui si menya nyɔnu o alo ɖetugbui leaƒe ɖe srɔ̃ la, mewɔ nu vɔ̃ o. Gake ame siwo ɖe srɔ̃ la akpɔ xaxa le ŋutilã me. Fafam ko mele na mi.
29 Azɔ hã, nɔviwo, mele esia gblɔm be, ɣeyiɣi vi aɖe koe susɔ.+ Tso fifia dzi yina la, ame siwo si srɔ̃ le la nanɔ abe ɖe ɖeke mele wo si o ene,
30 eye ame siwo le avi fam nanɔ abe ame siwo mele avi fam o ene, eye ame siwo le dzidzɔ kpɔm la nanɔ abe ame siwo mele dzidzɔ kpɔm o ene, eye ame siwo le nu ƒlem la nanɔ abe ame siwo si nu mele o ene,
31 eye ame siwo wɔa xexea ŋuti dɔ la nanɔ abe ame siwo mele eŋuti dɔ wɔm bliboe o ene; elabena xexe sia ƒe nɔnɔme le tɔtrɔm.
32 Ɛ̃, medi be miavo tso dzimaɖitsitsi me. Ŋutsu si meɖe srɔ̃ o la tsia dzi ɖe Aƒetɔ la ƒe nuwo ŋu, ale si wòawɔ adze Aƒetɔ la ŋu.
33 Ke ŋutsu si ɖe srɔ̃ la tsia dzi ɖe xexea me nuwo ŋu,+ ale si wòawɔ adze srɔ̃a ŋu,
34 eye wòle evedomesi. Eye nyɔnu si meɖe srɔ̃ o alo ɖetugbui leaƒe tsia dzi ɖe Aƒetɔ la ƒe nuwo ŋu,+ ale be wòanɔ kɔkɔe le eƒe ŋutilã kple eƒe gbɔgbɔ me. Ke nyɔnu si ɖe srɔ̃ la tsia dzi ɖe xexea me nuwo ŋu, ale si wòawɔ adze srɔ̃a ŋu.
35 Ke miawo ŋutɔwo miaƒe nyonyo tae mele esia gblɔm ɖo, menye be mana miaxaxa o, ke boŋ be mana miawɔ nu si dze, eye miatsɔ mia ɖokui ana ahasubɔ Aƒetɔ la ɣesiaɣi susuhenuwo manɔmee.
36 Ke ne ame aɖe susu be yemele nu wɔm ɖe yeƒe ɖekakpuinyenye alo ɖetugbuinyenye ŋu nyuie o, eye wòto sɔhɛnyenye me do la, ekema nu si wòawɔe nye esi: newɔ nu si dim wòle; mewɔ nu vɔ̃ o. Neɖe srɔ̃ faa.+
37 Ke ne ame aɖe ɖoe kplikpaa le eƒe dzi me, eye naneke mezi edzi o, ke boŋ wòkpɔ ŋusẽ ɖe eya ŋutɔ ƒe lɔlɔ̃nu dzi, eye wòɖoe le eya ŋutɔ ƒe dzi me be yeanɔ anyi srɔ̃maɖemaɖee la, awɔe nyuie.+
38 Eye ame si ɖe srɔ̃* hã wɔe nyuie, ke ame si meɖe srɔ̃ o la awɔe nyuie wu.+
39 Ŋkeke ale si srɔ̃ŋutsu le agbe ko la, se bla srɔ̃nyɔnua.+ Ke ne ŋutsua dɔ alɔ̃ le ku me la, ekema nyɔnua vo aɖe ame si wòlɔ̃, negbe le Aƒetɔ la me ko.+
40 Ke le nye susu nu la, ne enɔ anyi nenema la, akpɔ dzidzɔ wu; eye meka ɖe edzi be Mawu ƒe gbɔgbɔ le nye hã dzinye.
Etenuŋɔŋlɔ
^ Helagbe, pornia. Kpɔ Nya Tɔxɛwo Gɔmeɖeƒea.
^ Alo, “yeaklã ɖa.”
^ Kpɔ Megbenyawo A5.
^ Alo, “ame si tsɔ eƒe ɖakakpuinyenye alo ɖetugbuinyenye na le srɔ̃ɖeɖe me.”
