Amewo va nya Yesu nyuie azɔ tso esime wòxɔ nyɔnyrɔ va de asi na fifia. Yudatɔ akpe geɖe kpɔ eƒe nukunuwo, eye eƒe dɔwɔwɔwo ŋuti nya kaka ɖe nutoa katã me. Azɔ esi Agbadɔŋkekenyuia ɖuɖu ɖo edzi le Yerusalem la, ame geɖe di be yewoakpɔe.

Susu vovovowo le amewo si ku ɖe ame si Yesu nye ŋu. Ame aɖewo gblɔ be: “Ame nyui wònye.” Ame bubuwo gblɔ be: “Menye ame nyui aɖekee o. Ele ameha la flum.” (Yohanes 7:12) Azãɖuɣia ƒe ŋkeke gbãtɔwo me koŋue nyaʋiʋli sia nɔ edzi yim le. Gake dzi menɔ ame aɖeke ƒo be wòaʋli Yesu ta le gaglãgbe o, le esi ame geɖe nɔ vɔvɔ̃m na ale si Yudatɔwo ƒe ŋgɔnɔlawo awɔ nui ta.

Esi azãa dze egɔme ŋkeke aɖewo megbe la, Yesu va gbedoxɔa me. Nufiafia ƒe ŋutete wɔnuku si le esi la wɔ moyaa na ame geɖe. Esi Yesu mede rabiwo ƒe suku o ta la, Yudatɔwo tsi yaa hebia be: “Aleke ame sia wɔ nya Ŋɔŋlɔawo, esi mesrɔ̃ nu le suku aɖeke o?”—Yohanes 7:15.

Yesu ɖe eme be: “Nu si mefiana la menye tɔnye o, ke boŋ ame si dɔm ɖa la tɔe. Ne ame aɖe di be yeawɔ Eƒe lɔlɔ̃nu la, anya nenye be nufiafia la tso Mawu gbɔ loo alo nye ŋutɔe le nu si mesusu la gblɔm.” (Yohanes 7:16, 17) Yesu ƒe nufiafia wɔ ɖeka kple Mawu ƒe Sea, eya ta ele be woakpɔe adze sii kɔtɛ be Mawu ƒe kafukafu dim wòle ke menye eya ŋutɔ tɔ o.

Azɔ Yesu gblɔ be: “Menye Mose ye tsɔ Se la na mi oa? Gake mia dometɔ ɖeka pɛ hã mewɔa Se la dzi o. Nu ka tae miedi be yewoawum?” Anɔ eme be ameha la me tɔ siwo nye amedzrowo la menya be amewo di be yewoawui o. Womese nu si tae ame aɖe adi be yeawu nufiala nyui sia tɔgbi la gɔme o. Eya ta woƒo nya ta be nane anya nɔ fu ɖem na Yesu si tae wògblɔ nya ma ɖo. Wogblɔ be: “Gbɔgbɔ vɔ̃ le mewò. Ame kae di be yeawu wò?”—Yohanes 7:19, 20.

Le nyateƒe me la, ƒe ɖeka kple afã do ŋgɔ esi Yesu da gbe le ŋutsu aɖe ŋu le Sabat dzi la, Yudatɔwo ƒe ŋgɔnɔlawo di be yewoawui. Azɔ Yesu gblɔ nya aɖe si ana woabu tame la tsɔ klo nu le woƒe nuŋumabumabu nyuie la dzi. Eɖo ŋku edzi na wo be le Sea nu la, ele be woatso aʋa na ŋutsuvi le ŋkeke enyia gbe ne edze Sabat dzi gɔ̃ hã. Eyome ebia wo be: “Ne wotsoa aʋa na ame le sabat dzi be woagada Mose ƒe Se la dzi o ɖe, ekema nu ka tae miedo dziku ɖe ŋunye vevie le esi meda gbe le ame aɖe ŋu le sabat dzi? Midzudzɔ ʋɔnudɔdrɔ̃ amewo le ale si wodzena le gotae la nu, ke boŋ midrɔ̃ ʋɔnu dzɔdzɔe.”—Yohanes 7:23, 24.

Yerusalemtɔ siwo nya nu tso nya la ŋu gblɔ be: “Menye ame sia dimee [dumegãwo le] be woawu oa? Ke kpɔ ɖa, ele nu ƒom le dutoƒo, evɔ womele nya aɖeke gblɔm nɛ o. Alo ɖe dumegãwo va dze sii azɔ be ame siae nye Kristo la?” Ke nu ka tae ameawo mexɔe se be Yesu ye nye Kristo la o? Wogblɔ be: “Míenya afi si ame sia tso; gake ne Kristo la va la, ame aɖeke manya afi si wòtso o.”—Yohanes 7:25-27.

Enumake Yesu ɖo eŋu na wo le gbedoxɔa me be: “Ɛ̃, mienyam, eye mienya afi si metso hã. Eye nyemeva le nye ŋutɔ ɖokuinye si o, ke boŋ Ame si dɔm ɖa la li ŋutɔŋutɔ, gake mienyae o. Nye ya menyae, elabena eteƒenɔlae menye, eye eyae dɔm ɖa.” (Yohanes 7:28, 29) Nya ma si Yesu gblɔ eme kɔ la wɔe be wodi be yewoalée, ɖewohĩ be yewoadee gaxɔ me loo alo awui. Gake esia medze edzi o, elabena Yesu ƒe kuɣi meɖo haɖe o.

Ke hã, ame geɖe xɔ Yesu dzi se, eye esɔ nenema hã. Ezɔ tsi dzi, etsi ahom nu, etsɔ abolo  kple tɔmelã ʋɛ aɖewo nyi ame akpewo nukutɔe, eda gbe le dɔnɔwo ŋu, ena bunɔwo zɔ azɔli, eʋu ŋku na ŋkuagbãtɔwo, eda gbe le anyidɔlélawo ŋu, eye wòfɔ ame kukuwo gɔ̃ hã ɖe tsitre. Ɛ̃, esɔ be wobia be: “Ne Kristo la va la, ɖe wòawɔ nukunu gãwo wu esiwo wɔm ŋutsu sia lea?”—Yohanes 7:31.

Esi Farisitɔwo se ameha la le nya siawo gblɔm la, wo kple nunɔlagãwo dɔ atikplɔtɔwo ɖa be woalé Yesu.