MENYE Biblia mee subɔsubɔhawo ƒe azã xɔŋkɔwo kple ŋkekenyui siwo ame geɖe ɖuna le xexeame ƒe teƒe geɖe egbea la dzɔ tso o. Ekema afikae azã mawo dzɔ tso? Ne àte ŋu aku nu me le agbalẽdzraɖoƒe aɖe la, adzɔ dzi na wò be nàkpɔ nusi numekugbalẽwo gblɔ tso ŋkekenyui siwo woɖuna le afisi nèle ŋu. Bu kpɔɖeŋu ʋɛ aɖewo ŋu kpɔ.

 Easter (Pâques). The Encyclopædia Britannica gblɔ be: “Easter ɖuɖu ŋuti nya aɖeke mele Nubabla Yeyea me o.” Aleke wɔ wova te Easter ɖuɖu? Trɔ̃subɔsubɔ mee wòdzɔ tso. Togbɔ be wogblɔna be Yesu ƒe tsitretsitsi ƒe azãe Easter nye hã la, nusiwo wowɔna le azãa me la menye nusi wòle be Kristotɔwo nawɔ o. Le kpɔɖeŋu me, The Catholic Encyclopedia gblɔ tso “Easter fɔmizi” ƒe nɔnɔmewɔwɔ si wozãna le teƒe geɖe ŋu be: “Trɔ̃subɔsubɔ ƒe dzesie fɔmizi nye eye wobunɛ ɣesiaɣi be enye vidzidzi ƒe kpɔɖeŋu.”

Ƒe Yeye Zãwo. Ŋkeke si woɖuna Ƒe Yeye, kple nusiwo wowɔna le ŋkeke ma dzi la to vovo le dukɔ ɖesiaɖe me. The World Book Encyclopedia gblɔ ku ɖe afisi azã sia dzɔ tso ŋu be: “Roma dziɖula Julius Caesar ɖo January 1 be wòanye Ƒe Yeye Ŋkeke le ƒe 46 D.M.Ŋ. me. Romatɔwo ɖua azã sia na Janus, si nye agbowo, ʋɔtruwo, kple nuwo ƒe gɔmedzedze ƒe mawu. Janus—mawu si to mo eve, ɖeka le ŋgɔ eye evelia le eƒe megbe—ƒe ŋkɔ mee woɖe ɣleti January tso.” Eyata trɔ̃subɔsubɔ kɔnuwo dzie wotu Ƒe Yeye zãwo ɖuɖu ɖo.

Halloween (Toussaint). The Encyclopedia Americana gblɔ be: “Blema Celttɔwo ƒe nunɔla siwo nɔ anyi do ŋgɔ na Kristotɔwo ƒe ɣeyiɣia gbɔe kɔnu siwo do ƒome kple Halloween [Ame Kɔkɔewo ƒe Ŋkeke] la dzɔ tso. Celttɔwo ɖua azã na woƒe mawu vevi eve—ɣemawu kple ame kukuwo ƒe mawu . . . , si ƒe azã dzena November 1 dzi, si nye ɣeyiɣi si Celttɔwo ƒe Ƒe Yeye dzea egɔme. Vivivi la, wova tsɔ ame kukuwo ƒe azãa va de Kristotɔwo ƒe nuwɔnawo me.”

Ŋkekenyui Bubuwo. Míate ŋu adzro azã siwo woɖuna le xexeame la dometɔ ɖesiaɖe me le afisia o. Gake Yehowa mekpɔa ŋudzedze ɖe azã siwo woɖuna be woatsɔ ado amegbetɔwo alo amegbetɔwo ƒe habɔbɔwo ɖe dzi la ŋu o. (Yeremya 17:5-7; Dɔwɔwɔwo 10:25, 26) Nenɔ susu me hã na wò be afisi subɔsubɔzãwo dzɔ tsoe ana Mawu nakpɔ ŋudzedze ɖe wo ŋu loo alo makpɔe ɖe wo ŋu o. (Yesaya 52:11; Nyaɖeɖefia 18:4) Biblia ƒe gɔmeɖose siwo woyɔ le agbalẽ sia ƒe Ta 16 lia me akpe ɖe ŋuwò nànya alesi Mawu bua gomekpɔkpɔ le ŋkekenyui siwo ame geɖe ɖuna le xexeame egbea me.