O barokun na, an y’a faamu ko koo kɔrɔtaninba dɔ ɲɛsinna adamadenw ni mɛlɛkɛw bɛɛ ma. O ye Jehova tɔgɔba saniyako lo ye. Koo minw ɲɛsinna Jehova tɔgɔ saniyako ma, u dɔ ye a ka Masabaya sɔsɔliko ye. O kɔrɔ yala a b’a ka kuntigiya kɛ cogo fisaman na wa? Sɔsɔliko min lawulila adamadenw ka kantigiya koo la, o ɲɛsinna fana Jehova tɔgɔ saniyako ma.

Mun na an be sinsin a kan sisan ko koo min kɔrɔtanin lo kosɔbɛ, o ye Jehova tɔgɔ ni a saniyako lo ye? An ka kuun saba lajɛ.

A fɔlɔ, Sutana ye Jehova tɔgɔ tiɲɛ Edɛn nankɔtu kɔnɔ. Sutana ye Awa ɲininga cogo min na, a y’a kɛ komi Jehova tɛgɛ labilanin tɛ ani ko a ye cikan minw di Adama ni Awa ma, u bɛnnin tɛ. O kɔ, a ye Jehova sɔsɔ. O la, a tun b’a fɔra le ko Ala ye ngalontigɛla ye. O cogo la, a ye Jehova tɔgɔ tiɲɛ ani a kɛra naafigi ye, o min kɔrɔ ko ngalontigɛla (Zan 8:44). Awa lara Sutana ka ngalonw na minkɛ, a ma mɛnni kɛ Ala fɛ ani a y’a yira o fɛ ko a banna a ka kuntigiya la (Zɛnɛzi 3:1-6). Hali bi, Sutana b’a la ka Ala tɔgɔ tiɲɛ, a kɛtɔ ka ngalonw la a kan. Minw be la o ngalon kumaw na, olu ka teli ka Jehova kaan bila. O la Jehova sagokɛlaw fɛ, ka Jehova tɔgɔ senuman tiɲɛ, o ka jugu ni tilenbaliyakow bɛɛ ye. O lo kama tɔɔrɔ ni juguya ka ca ten duniɲa kɔnɔ.

A filanan, Jehova bena a tɔgɔ saniya ka bɔ ngalon sifaw bɛɛ la ani o bena a ka danfɛnw bɛɛ nafa. O lo kɔrɔtanin lo ka tɛmɛ fɛɛn bɛɛ kan Jehova fɛ. O kama a ko: “Ne bena nɔɔrɔ la [ne tɔgɔba] kan.” (Ezek. 36:23). Ani Yezu y’a yira ka gwɛ fɛɛn min ka ɲi ka kɛ Jehova sagokɛla kantigiw bɛɛ ɲɛnako fɔlɔ ye n’u be delili kɛra. A ko: “I tɔgɔ ka saniya.” (Mat. 6:9, Bible senuma). Bibulu b’a yira tuma o tuma ko a kɔrɔtanin lo nɔɔrɔ ka la Jehova tɔgɔ kan. An ka misali damanin lajɛ. “A’ ye Matigi tɔgɔ nɔɔrɔma tanu.” (1 Til. Kib. 16:29; Zab. 96:8, Bible senuma). “Aw k’a [tɔgɔ] tanu . . . ni dɔnkili ye.” (Zab. 66:2). “Ne bena to ka boɲa la i tɔgɔ kan kudayi.” (Zab. 86:12). Jehova kumakan bɔra sankolo la siɲɛ damanin. U dɔ kɛra Zeruzalɛmu Alabatosoba kɔnɔ, tuma min na Yezu ko: “N Faa, i k’i yɛrɛ tɔgɔ boɲa!” Jehova y’a jaabi ko: “Ne y’a boɲa, ne bena tila k’a boɲa tugu.”—Zan 12:28. a

A sabanan, Jehova sagonata n’a tɔgɔ saniyako tɛ taga ka ɲɔgɔn dan. Miiri k’a filɛ: Kɔrɔbɔli laban min bena kɛ Yezu ka saan waa kelen mara laban na, mun lo bena kɛ o kɔ? Mɛlɛkɛw ni adamadenw bena mun lo miiri Jehova tɔgɔ koo la o wagati la? Walisa k’o ɲiningali jaabi, an k’an hakili jigi koo fila nunu na minw ɲɛsinna o tɔgɔ saniyako ma: adamadenw ka kantigiya ani Jehova ka Masabaya. Yala adamaden kantigiw ka kantigiya bele bena to ka kɔrɔbɔ wa? Ayi. O y’a sɔrɔ, u kɛra mɔgɔ dafaninw ye, u ka kantigiya kɔrɔbɔra bɛrɛbɛrɛ ka ban ani u be ɲɛnamaya banbali kɛra. Yala Jehova ka Masabaya  bena to ka kɛ sɔsɔliko ani farali ye mɛlɛkɛw ni adamadenw cɛman wa? Ayi. O wagati la, mɛlɛkɛw ni adamadenw bɛɛ kaan bɛnnin bena kɛ ani u bena sɔn Jehova ka kuntigiya ma. Yala Jehova tɔgɔ bele bena kɛ fɛɛn kɔrɔtaninba ye a sagokɛlaw fɛ wa?

O wagati la, bɛɛ bena tiɲɛn lɔn Jehova koo la ani a tɔgɔ bena saniya bɛrɛbɛrɛ. Nka o tɔgɔ bele bena kɛ fɛɛn kɔrɔtaninba ye a sagokɛlaw fɛ. Mun na do? Bari u bena a ye ko Jehova be tora ka koo kabakomanw kɛ. Miiri k’a filɛ: Yezu bena kuntigiya bɛɛ di Jehova ma ni majigilenya ye minkɛ, “Ala bena kuntigiya kɛ fɛɛn bɛɛ kunna.” (1 Kor. 15:28). O kɔ, dugukolo kan, adamadenw ninsɔn bena diya ka don Ala “deenw ka yɛrɛsɔrɔ n’u ka boɲa na.” (Ɔrɔm. 8:21). Ani Jehova bena a sagonata dafa bɛrɛbɛrɛ, o min ye ka mɛlɛkɛw ni adamadenw bɛɛ jɛn k’u kɛ denbaya kelen ye min kaan bɛnnin lo.—Efɛz. 1:10.

O koow bena nɔɔ juman lo to o denbayamɔgɔw kan? Siga t’a la, a nege bena kɛ an na kosɔbɛ ka to ka nɔɔrɔ la Jehova tɔgɔ ɲuman kan! Hakili senu barika la, Zaburu sɛbɛbaga Dawuda ko: “Barika, Masa Ala . . . Ne b’i fo tuma bɛɛ, Nɔɔrɔtigi Ala.” (Zab. 72:18, 19). An bena sababu ɲumanw sɔrɔ ka Jehova tando o cogo la fɔɔ abada!

Jehova tɔgɔ be fɛɛn bɛɛ yira a koo la. N’an miirila Jehova tɔgɔ koo la, an hakili be jigi a ka kanuya koo la (1 Zan 4:8). An tɛna ɲinɛ abada ko kanuya lo ye Jehova lasun k’an dan ani ka kunmabɔsara di. Ani an tɛna ɲinɛ abada fana ko Jehova b’a ka kuntigiya kɛ ni tilenninya ani kanuya ye. Ka fara o kan, Jehova bena to k’a ka kanuya yira an na kudayi. An bena an magwɛrɛ an Faa Jehova la ani k’a tɔgɔ ɲumanba tando ni dɔnkiliw ye fɔɔ abada!—Zab. 73:28.