1-2. Kunmabɔsara ye mun lo ye ani mun na an mako b’a la?

TUMA min na cɛɛ dafanin Adama ye jurumu kɛ, sababu min tun dira a ma ka ɲɛnamaya banbali kɛ, a bɔnɛna o la. A tun bena deen minw sɔrɔ, olu fana bɔnɛna o la. Adama ka jurumu tun tɛ se ka yafa a ma sabu a tugura le k’a kɛ. Nka a deenw tun ma koo jugu si kɛ ani olu lo tun ma Adama lasun ka jurumu kɛ (Ɔrɔm. 5:12, 14). Adama tun ka ɲi ka sa a ka jurumu kosɔn. Nka, yala Jehova tun be se ka koo dɔ kɛ walisa Adama deenw ka ɲɛnamaya kɛ fɔɔ abada wa? Ɔnhɔn! Dɔɔni Adama ka jurumu kɔ, Jehova y’a yira dɔɔni dɔɔni cogo min na a tun bena Adama bɔnsɔn miliyɔn caaman kisi ka bɔ jurumu ani saya la (Zɛnɛzi 3:15). Jehova ka wagati latigɛnin na, a tun bena a Dencɛ ci ka bɔ sankolo la a ka na a “nii di ka kɛ mɔgɔ bɛɛ kunmabɔ sara ye.”—Mariki 10:45; Zan 6:51.

² Kunmabɔsara ye mun lo ye? Adama bɔnɛna min na, Yezu ye min di k’o sɔngɔ sara, o lo ye kunmabɔsara ye Gɛrɛkikan sɛbɛninw kɔnɔ (1 Kor. 15:22). Mun na an mako be kunmabɔsara la? An mako b’a la sabu ka kɛɲɛ ni Jehova ka sariya tilennin ye, niin sara ye niin ye (Ɛkis. 21:23, 24). Adama bɔnɛna a niin dafanin na. Walisa ka koow kɛ ka kɛɲɛ ni Ala ka sariya tilennin ye, Yezu y’a niin dafanin di k’a kɛ kunmabɔsara ye (Ɔrɔm. 5:17). O la, minw bɛɛ limaniyanin lo kunmabɔsara koo la, Yezu kɛra “waati bɛɛ Faa” ye olu fɛ.—Ezayi 9:5; Ɔrɔm. 3:23, 24.

3. Ka kɛɲɛ ni Zan 14:31 ani 15:13 ye, mun na Yezu sɔnna k’a niin dafanin saraka?

³ Yezu sɔnna k’a niin saraka sabu a be a sankolola Faa ani anw kanu kosɔbɛ (Zan 14:31; 15:13 kalan). O kanuya kosɔn, Yezu tun cɛsirinin lo ka to kantigiya la fɔɔ ka taga  se saya ma walisa k’a Faa sago dafa. O la, Jehova sago tun ye min ye kabi a daminɛ na adamadenw ni dugukolo koo la, o bena dafa. Yezu tɔɔrɔla yɛrɛ le ka sɔrɔ ka sa! Barokun nin na, an bena a ye fɛɛn min kama Jehova y’a to a tɔɔrɔla ten. An bena Bibulu sɛbɛbaga dɔ ka koo lajɛ dɔɔni fana. A tun be Jehova ni Yezu waleɲuman lɔn kosɔbɛ kunmabɔsara koo la. A laban, an bena a ye cogo min na an be se k’an ka waleɲumanlɔn yira kunmabɔsara koo la, Jehova ni Yezu y’o min di an kosɔn. An bena a ye fana cogo min na an be se ka dɔ fara o waleɲumanlɔn kan.

4. A lakali Yezu sara cogo min na.

⁴ Miiri k’a filɛ koo minw kɛra Yezu ka loon laban na dugukolo kan. A tun be se k’a ɲini mɛlɛkɛ caamanba fɛ u k’a latanga. Nka a m’o kɛ. A y’a to Ɔrɔmukaw ka sɔrɔdasiw y’a minɛ k’a bugɔ, hali u ma hinɛ a la (Mat. 26:52-54; Zan 18:3; 19:1). U y’a bugɔ ni golokami dɔ ye min y’a farisogo faranfaran. O kɔ, u ye lɔgɔ gwiliman dɔ bila a kɔɔ mandiminin kan. Yezu y’a daminɛ k’o lɔgɔ gwiliman kooro ka taga n’a ye a fagayɔrɔ la. Nka dɔɔni o kɔ, sɔrɔdasiw ye cɛɛ dɔ karaba k’o lɔgɔ ta a ye (Mat. 27:32). Yezu senin a fagayɔrɔ la, sɔrɔdasiw y’a bolow n’a seenw gwengwe lɔgɔ kan. A fari gwiliya tora k’a joliw sama. A teriw dusu kasinin lo kosɔbɛ ani a bamuso be kasira. Nka, Yahutuw kuntigiw tora k’a lɔgɔbɔ (Luka 23:32-38; Zan 19:25). Yezu ɲanina lɛri caaman kɔnɔ. Nɛnɛkiri ka gwɛlɛ a ma sabu a dusukun n’a fɔgɔfɔgɔw degunnin lo. A ka nɛnɛkiri laban na, a ye delili dɔ kɛ k’a yira ko a tora kantigiya la. O kɔ, a y’a kuun biri ani a sara (Mariki 15:37; Luka 23:46; Zan 10:17, 18; 19:30). Tiɲɛn na, a ɲanina wagatijan kɔnɔ ka sɔrɔ ka sa ani o kɛra maloyako ye!

5. Mun lo ye Yezu tɔɔrɔ ka tɛmɛ a fagacogo kan?

⁵ U tun bena Yezu faga cogo min na, o lo tun t’a tɔɔrɔla. A fagakun lo tun b’a tɔɔrɔla kosɔbɛ. U ye ngalon tigɛ ka la a kan ko a ye Ala tɔgɔ tiɲɛ, o kɔrɔ, a tɛ bonya la Ala wala a tɔgɔ kan (Mat. 26:64-66). Yezu tun mana miiri o la, o tun b’a tɔɔrɔ kosɔbɛ. O kama, a y’a Faa deli ko n’a be se ka kɛ, a k’ale kisi o maloya ma (Mat. 26:38, 39, 42). Mun na Jehova y’a to a Dencɛ kanulen tɔɔrɔla ani ka sa? An ka kuun saba lajɛ.

6. Mun na Yezu tun ka ɲi ka gwengwe yiri kan?

⁶ A fɔlɔ, Yezu tun ka ɲi ka gwengwe yiri kan walisa ka Yahutuw kisi ka bɔ danga dɔ ma (Gal. 3:10, 13) O danga tun b’u kan sabu u tun ko u bena Ala ka sariya labato, nka u m’o kɛ. Danga wɛrɛ tun b’u kan: U tun ka ɲi ka sa sabu u ye Adama bɔnsɔnw ye (Ɔrɔm. 5:12). Ala tun ye sariya min di Israɛldenw ma, a tun fɔra yen ko ni mɔgɔ ye jurumu dɔ kɛ min ka kan ni fagari ye, o tigi ka kan ka faga. O kɔ, a suu tun be se ka dulon yiri kan * (Deter. 21:22, 23; 27:26). Yezu sɔnna k’a yɛrɛ saraka ani a y’a to u y’a gwengwe yiri kan. Yahutuw bɛɛ tun be se ka nafa sɔrɔ o la, olu minw tun banna a la.

7. Kuun filanan juman lo kama Ala y’a to a Dencɛ tɔɔrɔla?

⁷ An k’a filɛ kuun filanan min kama Ala y’a to a Dencɛ tɔɔrɔla. A tun be fɔrɔmasɔn dira Yezu ma le a ka  kunkanbaara nata kama, o min ye ka kɛ an ka sarakalasebagaw Kuntigiba ye. Yezu y’a lɔn a ka gwɛlɛ cogo min na ka kolo Ala ye kɔrɔbɔlibaw tuma na. A hakili ɲagamina kosɔbɛ, fɔɔ a ye dɛmɛ ɲini Jehova fɛ delili la “ni mankanba ni ɲaji” ye. Siga t’a la, Yezu b’an faamu ani ‘a be se k’an dɛmɛ’ n’an be “kɔrɔbɔli la” sabu a b’a lɔn dusukasiba ye min ye. Yezu be makari ani a b’an “faamu an ka dɛsɛyɔrɔ la.” An be Jehova waleɲuman lɔn kosɔbɛ sabu a y’ale lo sugandi ka kɛ an ka sarakalasebagaw Kuntigiba ye!—Eburuw 2:17, 18; 4:14-16; 5:7-10.

8. Kuun sabanan juman lo kama Ala y’a to Yezu kɔrɔbɔra kosɔbɛ?

⁸ A sabanan, Jehova y’a to Yezu tɔɔrɔla kosɔbɛ walisa ka ɲiningaliba dɔ jaabi: Yala adamadenw be se ka to kantigiya la Ala ye hali ni kɔrɔbɔlibaw b’o kan wa? Sutana ko u tɛ se! A ko adamadenw be Ala bato nata lo kosɔn. Ale fɛ, u be komi u faa Adama, u tɛ Jehova kanu (Zɔbu 1:9-11; 2:4, 5). Jehova tun lanin b’a la ko a Dencɛ Yezu bena to kantigiya la. O lo kama, a y’a to Yezu kɔrɔbɔra fɔɔ ka se a daan ma. Yezu tora kantigiya la ani a y’a yira ko Sutana ye ngalontigɛla lo ye.

9. Ciden Zan ye ɲɛyirali juman lo to an ye?

⁹ Kunmabɔsara koo ye kerecɛn caaman ka limaniya barika bonya. U tora ka waajuli kɛ kɔrɔbɔliw bɛɛ n’a ta ani u ye gwɛlɛya sifaw bɛɛ muɲu u sii bɛɛ la. An ka ciden Zan ka ɲɛyirali lajɛ. A ye waajuli kɛ kantigiya la Krista ani kunmabɔsara koo la. N’a sɔrɔ a y’o kɛ saan 60 ni kɔ kɔnɔ. Hali k’a sɔrɔ bɛrɛ tun m’a jɛn saan kɛmɛ na, Ɔrɔmu faamanw tun b’a jati ko a ye faratiba ye u ma. O kama, u y’a waajibiya ka taga n’a ye Patimɔsi guun kan. A tun ye koo jugu juman lo kɛ? A jalaki kuun tun ye “Ala ka kuma ni Yezu seereya” koo lo ye (Yir. 1:9). Limaniya ani muɲuli koo la, Zan ye ɲɛyirali ɲuman to an ye yɛrɛ le!

10. Zan y’a yira cogo di ko a be Jehova ni Yezu waleɲuman lɔn kunmabɔsara koo la?

¹⁰ Zan ye Bibulu ka kitabu minw sɛbɛ, a y’a yira u kɔnɔ ko a be Yezu kanu kosɔbɛ ani ko a b’a waleɲuman lɔn kunmabɔsara koo la. A kumana siɲɛ 100 ni kɔ kunmabɔsara wala kunmabɔsara nafa koo la. Misali la, Zan y’a sɛbɛ ko: “Ni min nana [hakɛ] kɛ, soronanikɛla b’an fɛ Faa Ala kɔrɔ n’o ye Yezu Krista ye, mɔgɔtilennin lo.” (1 Zan 2:1, 2). Zan ye koo minw sɛbɛ, u b’a yira ka gwɛ ko a kɔrɔtanin lo an ka “seereya kɛ” Yezu koo la (1 Zan 4:14). Siga t’a la, Zan tun be Jehova ni Yezu waleɲuman lɔn kosɔbɛ kunmabɔsara koo la. An fana be se k’a yira cogo di ko an b’u waleɲuman lɔn?

11. Mun lo bena an dɛmɛ ka see sɔrɔ kɔrɔbɔli kan?

¹¹ I jija walisa i kana jurumu kɛ. N’an be Jehova ni Yezu waleɲuman lɔn tiɲɛn na kunmabɔsara koo la, an tɛna a miiri ko: “Ni kɔrɔbɔli be n’ kan, kuun t’a la n’ ka jijalibaw kɛ walisa n’ kana jurumu kɛ. N’ be se ka koo jugu kɛ ani o kɔ, ka yafa deli.” Nka, ni koo jugu dɔ nege b’an na, an bena a fɔ ko: “Ɔn ɔn! Jehova ni Yezu ye koo minw bɛɛ kɛ n’ ye, n’ tɛ sɔn ka o koo ɲɔgɔn kɛ fewu!” Walisa an kana jurumu kɛ, an be se ka fanga deli Jehova fɛ ko: “Kan’a to kɔrɔbɔli ka se an ma, nga an tanga kojugu ma.”—Mat. 6:13.

12. Ladili min be sɔrɔ 1 Zan 3:16-18 kɔnɔ, an be se k’o sira tagama cogo di?

 ¹² A yira ko i b’i balimaw kanu. Mun na n’an b’o kɛ, an b’an ka waleɲumanlɔn yira kunmabɔsara koo la fana? Sabu Yezu m’a niin di an dɔrɔn kosɔn, a y’a di an balimaw fana kosɔn. N’a sɔnna k’o kɛ, o b’a yira ka gwɛ ko u koo ka gwɛlɛ a ma kosɔbɛ (1 Zan 3:16-18 kalan). An b’a yira an balimaw na ko an b’u kanu, n’an b’u minɛ ka ɲɛ (Efɛz. 4:29, 31–5:2). Misali la, an b’u dɛmɛ n’u man kɛnɛ wala ni gwɛlɛyabaw b’u kan, i n’a fɔ ni balawo dɔ cunna u kan. Nka, an ka ɲi ka mun lo kɛ ni an balima dɔ donna an gasi la?

13. Mun na an ka ɲi ka yafa tɔɔw ma?

¹³ Yala i ka teli ka dimi mara i balimaw kɔrɔ wa? (Lev.19:18). N’o lo, ladili nin sira tagama: “N’a sɔrɔla ko dɔ ye koo dɔ kɛ min ma bɛn a tɔɲɔgɔn ma, aw ka yafa ɲɔgɔn ma tuma bɛɛ ka ɲɔgɔn dɛmɛdɛmɛ. Krista yafara aw ma cogo min na, aw fana ka yafa ɲɔgɔn ma ten.” (Kɔlɔs. 3:13). An mana yafa an balima dɔ ma, an b’a yira ko an b’an sankolola Faa waleɲuman lɔn kosɔbɛ kunmabɔsara koo la. An be se ka to ka dɔ fara an ka waleɲumanlɔn kan cogo di kunmabɔsara koo la, o min ye Ala ka nilifɛn ye?

14. An be se ka dɔ fara an ka waleɲumanlɔn kan cogo minw na kunmabɔsara koo la, u dɔ kofɔ.

¹⁴ Jehova fo kunmabɔsara koo la. Balimamuso Joanna be ni saan 83 ye ani a be Ɛndi jamana na. A ko: “Ne fɛ, a kɔrɔtanin lo n’ ka kunmabɔsara kofɔ n’ ka deliliw la loon o loon ani ka Jehova fo o kosɔn.” Miiri fili dɔw la i ye minw kɛ tile kɔnɔ ani Jehova deli a ka yafa i ma. N’i ye jurumuba kɛ, i ka ɲi fana ka dɛmɛ ɲini diinan mɔgɔkɔrɔw fɛ. U bena i lamɛn ani ka basigi Ala ka Kuma kan ka ladiliw di i ma ni kanuya ye. U bena delili kɛ n’i ye ani k’a ɲini Jehova fɛ a ka yafa i ma walisa i ka se ka jɛnɲɔgɔnya ɲuman kɛ n’a ye kokura.—Zaki 5:14-16.

15. Mun na an ka ɲi ka wagati ta ka sɛgɛsɛgɛri kɛ kunmabɔsara koo la ani ka miiri a kan?

¹⁵ Miiri kunmabɔsara kan. Balimamuso Rajamani be ni saan 73 ye. A ko: “Yezu tɔɔrɔla cogo min na, ni n’ y’o kalan, n’ ɲɛji be jigi.” Ala Dencɛ tɔɔrɔla cogo min na, n’ele fana miirila o la, n’a sɔrɔ o  b’i tɔɔrɔ. Nka, n’i tora ka miiri kosɔbɛ kunmabɔsara kan, i ka kanuya barika bena bonya Yezu n’a Faa koo la. Walisa ka miiri kunmabɔsara kan, i be se k’a latigɛ ka sɛgɛsɛgɛri kɛ a koo la koɲuman.

16. N’an be tɔɔw kalan kunmabɔsara koo la, o be se k’an nafa cogo di? (Jaa lajɛ ɲɛɛ fɔlɔ kan.)

¹⁶ Tɔɔw kalan kunmabɔsara koo la. Tuma o tuma n’an ye tɔɔw kalan kunmabɔsara koo la, dɔ be fara an ka waleɲumanlɔn kan a koo la. Gafe ɲumanw ani videwo diimanw b’an fɛ minw b’an dɛmɛ k’a ɲɛfɔ mɔgɔw ye fɛɛn min kama Yezu sara an kosɔn. Misali la, an be se ka baara kɛ ni kitabunin nin kalansen 4nan ye: Kibaro diiman min bɔra Ala yɔrɔ. O kalansen kuun ko: “Yezu Krista ye jɔn lo ye?” An be se fana ka baara kɛ ni gafe nin kalansen 5nan ye: Bibulu b’an kalan mun lo la? O kalansen kuun ko: “Kunmabɔsara: Ala ka nilifɛnw bɛɛ la nafaman.” Saan o saan fana, an be taga Yezu ka saya Hakilijigi lajɛn na ani an b’an jija ka mɔgɔw weele u ka na fara an kan. O cogo la, an be dɔ fara an ka waleɲumanlɔn kan kunmabɔsara koo la. Jehova ko an ka mɔgɔw kalan a Dencɛ koo la. O ye nɛɛmaba ye an fɛ yɛrɛ le!

17. Mun na kunmabɔsara ye Ala ka nilifɛnw bɛɛ la nafaman ye?

¹⁷ Siga t’a la, an ka ɲi ka to ka dɔ fara an ka waleɲumanlɔn kan kunmabɔsara koo la. Dalilu barikamanw b’an fɛ k’o kɛ. Kunmabɔsara sababu la, an be se ka teriya sɔbɛ kɛ ni Jehova ye hali k’a sɔrɔ an dafanin tɛ. Kunmabɔsara sababu la fana, Sutana ka kɛwalew bena tiɲɛ pewu! (1 Zan 3:8). Jehova sagonata ye min ye kabi a daminɛ na dugukolo koo la, o bena dafa kunmabɔsara barika la. Dugukolo kuru bɛɛ bena kɛ alijɛnɛ ye. Minw be Jehova kanu ani u be baara kɛ a ye, olu dɔrɔn lo bena kɛ yen. Tiɲɛn na, kunmabɔsara ye Ala ka nilifɛnw bɛɛ la nafaman ye, a ye min di adamadenw kosɔn. O la, an ka sababuw ɲini loon o loon k’an ka waleɲumanlɔn yira kunmabɔsara koo la!