1-2. An be se ka tugu Yezu sennɔ kɔ cogo di? Misali dɔ fɔ.

MIIRI k’a filɛ ko ele ni mɔgɔ dɔw be tagamana kongokolon dɔ kɔnɔ, yɔrɔ min na farati be yen. Mɔgɔ dɔ b’aw ɲɛminɛna min b’o yɔrɔ lɔn koɲuman. A tagamatɔ, a sennɔ be to cɛncɛn kɔnɔ. Wagati dɔ nana se, aw t’o tigi yera tugun. Nka, aw sirannin tɛ. Walisa aw kana tunu, a dan ye aw ka tugu aw ɲɛminɛbaga sennɔ kɔ koɲuman.

² An ye kerecɛn sɔbɛw ye minkɛ, a be komi an be tagamana kongokolon dɔ lo kɔnɔ, yɔrɔ min na farati be yen. O kongokolon ye duniɲa juguman nin lo ye. An dusu ka di sabu Jehova ye ɲɛminɛbaga dɔ di an ma min ɲɔgɔn tɛ yen. O ɲɛminɛbaga ye a Dencɛ Yezu Krista lo ye an be se ka tugu min sennɔ kɔ. Bibulu sɛgɛsɛgɛrikɛla dɔ y’a ɲɛfɔ ko 1 Piyɛri 2:21 kɔnɔ, Piyɛri ye Yezu suma ni ɲɛminɛbaga ye. An kumana ɲɛminɛbaga min koo la, ale sennɔ tora cɛncɛn kɔnɔ. O cogo kelen na, Yezu fana sennɔ tora an be se ka tugu min kɔ. An ka ɲiningali saba nunu jaabi: Ka tugu Yezu sennɔ kɔ, o kɔrɔ ko di? Mun na an ka ɲi k’o kɛ? An be se k’o kɛ cogo di?

3. Ka tugu mɔgɔ sennɔ kɔ, o kɔrɔ ko di?

³ Ka tugu mɔgɔ sennɔ kɔ, o kɔrɔ ko di? N’u ko mɔgɔ sennɔ, o ɲɛsinna a tigi ka ɲɛnamaya kɛcogo lo ma (Zɛnɛzi 6:9; Talenw 4:26). Mɔgɔ ka ɲɛyirali be se ka suma ni a sennɔ ye a be min to a kɔ a tagamatɔ. O la, ka tugu mɔgɔ sennɔ kɔ, o kɔrɔ ko k’a tigi ladegi.

4. Ka tugu Yezu sennɔ kɔ, o kɔrɔ ko di?

 ⁴ Kuma kuntaga surun na, ka tugu Yezu sennɔ kɔ, o kɔrɔ ko k’a ladegi. A ye ɲɛyirali min to a kɛtɔ ka tɔɔrɔw muɲu, ciden Piyɛri kaan b’o lo ma barokun ka vɛrise jɔnjɔn na. Nka, an be se ka Yezu ladegi koo caaman wɛrɛw la (1 Piyɛri 2:18-25). Tiɲɛn na, Yezu ye koo o koo fɔ ani a ye koo o koo kɛ, an be se k’a ladegi o la.

5. Komi Yezu dafanin lo, yala mɔgɔ dafabaliw be se k’a ladegi tiɲɛn na wa? A ɲɛfɔ.

⁵ Yala mɔgɔ dafabaliw be se ka Yezu ladegi tiɲɛn na wa? Ɔnhɔn. A to i hakili la ko Piyɛri b’an jija an ka “tugu [Yezu] sennɔ kɔ” koɲuman. A m’a fɔ ko an k’o kɛ cogo dafanin na. Hali n’an dafanin tɛ, an k’an seko bɛɛ kɛ ka tugu Yezu sennɔ kɔ koɲuman. O la, an bena a “tagamacogo ladege” i ko ciden Zan y’a fɔ cogo min na.—1 Zan 2:6.

6-7. Mun na an be se k’a fɔ ko n’an be tugu Yezu sennɔ kɔ, o b’a to an b’an magwɛrɛ Jehova la kosɔbɛ?

⁶ N’an be tugu Yezu sennɔ kɔ, an b’an magwɛrɛ Jehova la kosɔbɛ. Mun na an b’o fɔ? A fɔlɔ, Yezu ka ɲɛnamaya kɛcogo fɛ, a ye ɲɛyirali ɲuman to an ye min b’a yira an be se k’an koo diya Ala ye cogo min na (Zan 8:29). O la, n’an be tugu Yezu sennɔ kɔ, o b’a to an b’an koo diya Jehova ye. An be se ka la a la ko minw b’u jijara kosɔbɛ ka kɛ an sankolola Faa teriw ye, a b’a magwɛrɛ olu la.—Zaki 4:8.

⁷ A filanan, Yezu ye a Faa ladegi cogo dafanin na. O kama, a ko: “Ni mɔgɔ min ɲaa lara ne kan, o tigi ye n Faa fana ye.” (Zan 14:9). Bibulu b’a fɔ ko Yezu makarila kunatɔcɛ dɔ la, a hinɛna muso dɔ la min ka bana tun ka jugu ani a makarila banbagatɔ  dɔ somɔgɔw la. Yezu be ni jogo minw ye ani a tun be tɔɔw minɛ cogo min na, n’an b’a ladegi o la, an be Jehova lo ladegira (Mariki 1:40, 41; 5:25-34; Zan 11:33-35). N’an tora ka Jehova ladegi, an bena an magwɛrɛ a la kosɔbɛ.

8. A ɲɛfɔ fɛɛn min kama n’an be tugu Yezu sennɔ kɔ, o b’an dɛmɛ ka se “diɲɛ kɔrɔ.”

⁸ N’an be tugu Yezu sennɔ kɔ, duniɲa juguman nin tɛna se k’an bali ka Jehova sago kɛ an ɲɛnako fɔlɔ ye. Yezu ka suu laban na dugukolo kan, a ko: “Ne ye see sɔrɔ diɲɛ kan.” (Zan 16:33). A tun b’a fɔra le ko ale m’a to duniɲa mɔgɔw ka miiriyaw, u ka laɲinitaw ani u ka kokɛcogow ka nɔɔ to ale kan. Yezu tun nana dugukolo kan kuun min kama, a ma ɲinɛ o kɔ abada! O kuun tun ye ka Jehova tɔgɔ lafasa. Anw do? Bi, koo caaman be se k’a to an tɛ Jehova sago kɛ an ɲɛnako fɔlɔ ye. Nka i ko Yezu, n’an be Jehova sago kɛ an ɲɛnako fɔlɔ ye, an bena se “diɲɛ kɔrɔ.”—1 Zan 5:5.

9. An ka ɲi ka mun lo kɛ walisa ka to ɲɛnamaya banbali sira kan?

⁹ N’an be tugu Yezu sennɔ kɔ, an bena ɲɛnamaya banbali sɔrɔ. Loon dɔ, kanbele nafolotigi dɔ ye Yezu ɲininga ale ka ɲi ka min kɛ walisa ka ɲɛnamaya banbali sɔrɔ. Yezu y’a jaabi ko: “Na tugu ne kɔ.” (Mat. 19:16-21). Yahutu dɔw tun lanin t’a la ko Yezu lo ye Krista ye. A y’a fɔ olu ye ko: “N ka sagaw . . . be tugu n kɔ. Ne fana be nii banbali di u ma.” (Zan 10:24-29). Nikodɛmu tun ye Yahutuw ka kititigɛla dɔ ye ani Yezu ka kalanw tun ka di a ye. Yezu y’a fɔ a ye ko ni ‘mɔgɔ min y’a jigi la ale kan,’ o tigi bena “nii banbali sɔrɔ.” (Zan 3:16). An b’a yira ko an limaniyanin lo Yezu la, n’an b’a ka kalanw sira tagama ani k’a ladegi. O la, an bena to ɲɛnamaya banbali sira kan.—Mat. 7:14.

10. An ka ɲi ka mun lo kɛ walisa ka Yezu lɔn koɲuman? (Zan 17:3).

¹⁰ Walisa ka tugu Yezu sennɔ kɔ koɲuman, an ka ɲi k’a lɔn fɔlɔ (Zan 17:3 kalan). Mɔgɔ tɛ se ka Yezu ka koow bɛɛ lɔn. An ka ɲi k’a ɲini k’a lɔn kosɔbɛ. O kɔrɔ, k’a ɲini k’a jogow, a miiricogo ani k’a ka koow jaticogo lɔn. An be tiɲɛn sira kan a mɛɛnna wo, a ma mɛɛn wo, an ka ɲi k’an jija ka to k’a ɲini ka Jehova n’a Dencɛ lɔn.

11. Mun lo be sɔrɔ Matiyo, Mariki, Luka ani Zan ka Evanzili kɔnɔ?

¹¹ Jehova b’an kanu minkɛ, a y’a kɛ u ye Evanzili naani sɛbɛ Bibulu kɔnɔ. U b’an dɛmɛ k’a Dencɛ lɔn. Yezu ka ɲɛnamaya ani a ka cidenya baara koo lo lakalila Evanziliw kɔnɔ. U b’a yira an na Yezu ye min fɔ, a ye min kɛ ani a dusukunnakow tun ye min ye. O Evanzili naani b’an dɛmɛ an k’an “hakili to” Yezu ka ɲɛyirali la  (Eburuw 12:3). An be se k’a fɔ ko Yezu sennɔ minw tora, olu be sɔrɔ o Evanziliw lo kɔnɔ. N’an be Evanziliw lajɛ, u b’an dɛmɛ ka Yezu lɔn ka ɲɛ. O la, an bena se ka tugu a sennɔ kɔ koɲuman.

12. An be se ka nafa sɔrɔ bɛrɛbɛrɛ Evanziliw la cogo di?

¹² Walisa ka nafa sɔrɔ bɛrɛbɛrɛ Evanziliw la, an man ɲi k’u kalan dɔrɔn. An ka ɲi ka wagati ta k’u sɛgɛsɛgɛ koɲuman ani ka miiri u kan kosɔbɛ (Zozuwe 1:8 lajɛ). An ka cogo fila lajɛ minw be se k’an dɛmɛ ka miiri Evanziliw kan ani an ye min kalan, k’o sira tagama.

13. Walisa a ka kɛ komi Evanzili ka maanaw be kɛra i ɲɛɛ na, i be se ka mun lo kɛ?

¹³ A fɔlɔ, a kɛ komi Evanzili ka maanaw be kɛra i ɲɛɛ na. Min be kɛra, a kɛ komi i ɲɛɛ b’o la ani i tulo b’o la. Mɔgɔ minw kofɔra, a ɲini ka kɛ n’u dusukunnataw ye. Walisa k’o kɛ, sɛgɛsɛgɛri dɔw kɛ an ka gafew kɔnɔ. A lajɛ koo minw kɛra ka kɔn o maana ɲɛ ani a kɔ. Mɔgɔw ani yɔrɔ minw kofɔra, kunnafoniw lajɛ u koo la. I be maana min kalanna, o kalan Evanzili wɛrɛ kɔnɔ ani u suma ni ɲɔgɔn ye. Tuma dɔw la, Evanzili sɛbɛbaga dɔ be kunnafoni jɔnjɔn dɔ di, k’a sɔrɔ dɔ wɛrɛ tɛ kuma o koo la.

14-15. An ye min kalan Evanzili kɔnɔ, an be se k’o sira tagama cogo di?

¹⁴ A filanan, i ye min kalan Evanzili kɔnɔ, o sira tagama (Zan 13:17). Evanzili ka maana dɔ lajɛnin kɔ koɲuman, i yɛrɛ ɲininga ko: “Yala n’ ye kalan dɔ sɔrɔ o maana na n’ be se ka min sira tagama wa? N’ be se ka tɛmɛ o maana fɛ cogo di ka mɔgɔ dɔ dɛmɛ?” Miiri mɔgɔ tigitigi dɔ koo la. Wagati bɛnnin na, a fɔ a tigi ye nɛmɛnɛmɛ ni kanuya ye i ye kalan min sɔrɔ o maana na.

¹⁵ An ye cogo fila minw lajɛ, an ka tɛmɛ maana dɔ fɛ k’a filɛ an be se k’o kɛ cogo min na. Yezu ye firiyamuso dɛsɛbagatɔ  min ye Alabatosoba kɔnɔ, an k’ale ka maana lajɛ.

16. Min fɔra Mariki 12:41 kɔnɔ, o lakali.

¹⁶ A kɛ komi i b’o maana kɛtuma na (Mariki 12:41 kalan). Miiri k’a filɛ min be kɛra. An be saan 33, Nisankalo tile 11nan loon na. Yanni tile damanin, u bena Yezu faga. O loon na, Yezu y’a ka wagati fanba kɛ Alabatosoba kɔnɔ ka to ka mɔgɔw kalan. Diinan kuntigiw tora k’a kɛlɛ. Dɔɔni ka kɔn o ɲɛ, u dɔw y’a ɲininga a be kabakow kɛ tigi min ka setigiya barika la. Dɔ wɛrɛw ye ɲiningali gwɛlɛw kɛ walisa a ka ben u ka jaan kɔnɔ (Mariki 11:27-33; 12:13-34). Sisan, Yezu tagara Alabatosoba faan wɛrɛ la. N’a sɔrɔ u b’o yɔrɔ lo weele ko Musow ka yɔrɔ. K’a to yen, a ɲɛɛ be wari kɛsuw la. A sigira ka to ka mɔgɔw filɛ u b’u ka niliw donna kɛsuw kɔnɔ. A ye nafolotigi caaman ye u be wari caaman donna. N’a sɔrɔ a yɔrɔ man jan o kɛsuw la ani a be wari benkan mɛnna u kɔnɔ.

17. Firiyamuso dɛsɛbagatɔ min kofɔra Mariki 12:42 kɔnɔ, ale ye mun lo kɛ?

¹⁷ Mariki 12:42 kalan. Dɔɔni o kɔ, Yezu ye muso dɔ kɔrɔsi. “Firiyamuso dɛsɛbagatɔ” dɔ tun lo (Luka 21:2). Koow tun man nɔgɔ a fɛ hali dɔɔni. N’a sɔrɔ a tun be bondori kɛ le walisa k’a makoɲɛfɛn jɔnjɔnw sɔrɔ. O bɛɛ n’a ta, a gwɛrɛla kɛsu dɔ la ani ka warimisɛn deen fila don a kɔnɔ nɛmɛnɛmɛ. N’a sɔrɔ u bentɔ kɛsu kɔnɔ, u yɛrɛ ma mankan kɛ. Yezu y’a lɔn k’o muso ye Lɛpta deen fila lo don. Lɛpta tun ye warimisɛnw bɛɛ la fitinin lo ye. Kɔnɔnin minw sɔngɔ tun ka di ni kɔnɔ tɔɔw bɛɛ ye, Lɛpta tun tɛ se k’o deen kelen yɛrɛ san.

18. Ka kɛɲɛ ni Mariki 12:43, 44 ye, Yezu ye mun lo fɔ firiyamuso ka nili koo la?

¹⁸ Mariki 12:43, 44 kalan. O muso ka koo ye Yezu kabakoya yɛrɛ le! O kama, a y’a ka kalandenw weele k’o muso yira u la ani k’a fɔ ko: “Firiyamuso dɛsɛbagatɔ nin ye wari min don kɛsu kɔnɔ, o ka ca ni mɔgɔ tɔw bɛɛ ta ye.” O kɔ, a y’a ɲɛfɔ ko: “Mɔgɔ tɔw [o kɔrɔ nafolotigiw] ye dɔɔni dɔrɔn bɔ u ka nafolo la k’a di, nga ale kɔni n’a ka fantanya bɛɛ, a y’a cɛɛn bɛɛ di. A ma foyi to a kun ka kɛ dumuni sɔngɔ ye k’a sɔrɔ dumunifɛn si t’a fɛ.” Warimisɛn damanin minw tun tora o firiyamuso kantigi fɛ, a y’o bɛɛ lo di. A y’a yira o fɛ ko a lanin b’a la ko Jehova bena a janto ale la.—Zab. 26:3.

19. Yezu ye min fɔ firiyamuso dɛsɛbagatɔ koo la, an be kalan barikaman juman lo sɔrɔ o la?

¹⁹ I ye min kalan o maana kɔnɔ, o sira tagama. I yɛrɛ ɲininga ko: “Yezu ye min fɔ firiyamuso dɛsɛbagatɔ koo la, n’ be kalan juman lo sɔrɔ o la?” Miiri o firiyamuso koo la. Siga t’a la, a tun bena diya a ye ka caaman di Jehova ma. Nka, a y’a seko lo kɛ. Min bɛɛ tun b’a fɛ, o y’o lo di Jehova ma. Yezu y’a lɔn k’o firiyamuso ye nili min kɛ, o nafa ka bon a Faa ɲɛɛ kɔrɔ. An be kalan barikaman nin sɔrɔ o koo la: N’an b’an seko bɛɛ kɛ Jehova ye, o kɔrɔ, n’an b’an dusu bɛɛ don a ka baara la, o ka di a ye yɛrɛ le! (Mat. 22:37; Kɔlɔs. 3:23). N’a fɔra ko an seko bɛɛ, o ɲɛsinna an be wagati hakɛ min kɛ Jehova batoli la ani an b’an fanga min don o la. Misali la, o batoli faan dɔw ye waajuli ani lajɛnw ye.

20. I ye kalan min sɔrɔ firiyamuso ka koo la, i be se k’o sira tagama cogo di? Misali dɔ fɔ.

²⁰ I ye kalan min sɔrɔ firiyamuso ka koo la, i be se k’o sira tagama cogo di? Miiri mɔgɔ dɔw koo la minw mako b’a la dɔ k’u  hakili sigi ko u be sera ka min kɛ Jehova ye, o ka di a ye. Misali la, n’a sɔrɔ i be balima musokɔrɔba dɔ lɔn min b’a yɛrɛ jalaki wala a b’a miiri ko nafa foyi t’ale la. A b’o miiri sabu kɛnɛyako kosɔn, a tɛ sera ka bɛrɛ kɛ waajuli la tugun. Wala miiri balimacɛ dɔ koo la, bana jugu dɔ be to ka min sɛgɛn. A fari fagara sabu a tɛ se ka taga kafo ka lajɛnw bɛɛ la. “Kumaɲuman, min be se k’a mɛnbagaw dɛmɛ,” o fɔ o balimaw ye (Efɛz. 4:29). I ye kalan min sɔrɔ firiyamuso dɛsɛbagatɔ ka koo la, o fɔ u ye walisa k’u jija. I ka jijali kumaw be se k’u hakili sigi ko n’an b’an seko bɛɛ kɛ Jehova ye, o ka di a ye (Talenw 15:23; 1 Tes. 5:11). Tɔɔw b’u seko min kɛ Jehova ka baara la, a mana dɔgɔya cogo o cogo, u tando o kosɔn. N’i b’o kɛ, i be tugura Yezu sennɔ kɔ koɲuman.

21. I cɛsirinin lo ka mun lo kɛ?

²¹ Evanziliw be kunnafoni jɔnjɔn caaman di an ma Yezu ka ɲɛnamaya koo la. O b’an dɛmɛ ka tugu a sennɔ kɔ koɲuman, o kɔrɔ, k’a ladegi. An be Jehova waleɲuman lɔn kosɔbɛ o kosɔn! N’a sɔrɔ i be se ka kelenna kalan wala gwa kɔnɔ batoli kɛ Evanziliw kan. An k’a to an hakili la ko walisa ka nafa sɔrɔ bɛrɛbɛrɛ o kalan na, an ka ɲi k’a kɛ i n’a fɔ koow be kɛra an ɲɛɛ na ani an ye kalan minw sɔrɔ, k’o sira tagama. Yezu ye min kɛ, an ka ɲi k’a ladegi o la. A ye min fɔ, an ka ɲi k’o lamɛn fana. A ye kuma laban minw fɔ ka sɔrɔ ka sa, barokun nata la, an bena a ye an be kalan minw sɔrɔ o la.