Kalandenw ye gwɛlɛyaba sɔrɔ baji kan. U bɔnin kɔ kurun kɔnɔ, kabako wɛrɛ b’u kɔnɔna. Jinatɔcɛ fila bɔra kaburutu la ani u be bolila ka taga Yezu kunbɛn. U ka fari yɛrɛ le! U la kelen dɔrɔn lo ka koo lakalila Bibulu kɔnɔ. N’a sɔrɔ ale lo ka fari kojugu ani jinabana b’a la kabi wagatijan ka tɛmɛ tɔɔ kelen kan.

O cɛɛ makaritɔ fari lakolon lo. “A tun be kaburutu la ani kuluw kan suu ni tile ka to ka kule ani k’a yɛrɛ mandimi ni kabakuruw ye.” (Mariki 5:5). A tun ka fari haali fɔɔ mɔgɔw tun be siran ka tɛmɛ n’o sira ye. Dɔw y’a ɲini k’a siri, nka a tun be jɔlɔkɔw tigɛ ka bɔ a bolow n’a seenw na. Mɔgɔ si tun tɛ se a kɔrɔ.

O cɛɛ gwɛrɛla Yezu la ani a benna a seen kɔrɔ. O tuma na, jinaw y’a lasun ka kule ko: “Mun b’an cɛ, Fɛɛn bɛɛ kuntigi Ala Dencɛ Yezu? N b’i daali Ala kama, i kana n tɔɔrɔ.” Yezu ye kuma dɔ fɔ k’a yira ko a be se jinaw kɔrɔ. A ko: “Bɔ cɛɛ la.”—Mariki 5:7, 8.

Ka tiɲɛn fɔ, jina caaman lo tun b’o cɛɛ la. Yezu ye ɲiningali kɛ ko: “I tɔgɔ be di?” A y’a jaabi ko: “Jamaba, bari an ka ca.” (Mariki 5:9). Ɔrɔmukaw ka sɔrɔdasi jamaba tun ye mɔgɔ waa caaman lo ye. O b’a yira ko jina caaman lo tun donna cɛɛ la ani a tun ka di u ye k’a niin tɔɔrɔ. U ye Yezu deli ko a “kana u ci ka taa halaki dingɛ kɔnɔ.” A be komi u b’a lɔn koo min be olu n’u kuntigi Sutana kɔnɔna.—Luka 8:31, ABM.

Lɛkuluba dɔ tun be dumuni kɛra o yɔrɔ gɛrɛfɛ. U be lɛɛ deen 2000 bɔ. Sariya sira fɛ, o bɛgɛnw tun ye fɛɛn nɔgɔninw ye ani u yɛrɛ tun man kan ka kɛ Yahutuw fɛ. Jinaw y’a fɔ ko: “Sabali k’an bila ka taga don lɛɛ nunu na.” (Mariki 5:12). Yezu sɔnna min kɛ, lɛɛ 2000 nunu bɛɛ girinna ka jigi ka bɔ kulu kan ka taga ben baji la.

Lɛɛ kɔrɔsibagaw y’o koo ye minkɛ, u teliyara ka taga o lakali dugumɔgɔw ani dugu gɛrɛfɛmɔgɔw ye. Mɔgɔw bɔra ka taga a filɛ min kɛra. U sera tuma min na, u y’a ye ko jinaw tun  be cɛɛ min na, a kɛnɛyara ani a ɲɛmalɔnin lo sisan. Kabako, a yɛrɛ ye fani don ani a siginin be Yezu seen kɔrɔ!

Mɔgɔ minw y’o koo mɛn wala u ye cɛɛ ye, u siranna sabu u t’a lɔn min b’u kɔnɔna. U y’a gwan Yezu kun ko a ka bɔ u ka mara la. Tuma min na Yezu be donna kurun kɔnɔ ka taga, o cɛɛ ye Yezu deli a k’a to ale be tugu a kɔ. Nka Yezu y’a fɔ a ye ko: “Taga soo. Matigi Ala hinɛna i la ka koba min kɛ i ye, i ka taga o lakali i ka somɔgɔw ye.”—Mariki 5:19.

Yezu be mɔgɔ minw kɛnɛya, a b’a fɔ u ye ko u kana o fɔ mɔgɔ si ye. Mun na do? A t’a fɛ mɔgɔw ka basigi lakalita kabakomanw kan ka kɛ ni miiriya tilenbaliw ye ale koo la. Nka, jinatɔ nin kɛnɛyako ye dalilu barikaman ye dugumɔgɔw fɛ. O be Yezu ka setigiya yira u la. Yezu tɛna se ka u minw kunbɛn, o cɛɛ be se ka seereya kɛ u ye. A ka seereya bena kɛ sababu ye fana ka mɔgɔw dɛmɛ ka tiɲɛn lɔn lɛɛ nunu tunuko la. O kama, Yezu ye min kɛ cɛɛ ye, cɛɛ tagara ani a y’a daminɛ k’o lakali Dekapoli mara la.