A ma mɛɛn, Yezu ye ɲɛyirali dɔ ta k’a yira a ka kalandenw na u ka ɲi ka kɛ ni miiriya min ye. A ko ni mɔgɔ min ye denmisɛnw minɛ ka ɲɛ ale tɔgɔ kosɔn, o tigi y’ale yɛrɛ lo minɛ ka ɲɛ (Matiyo 18:5). Kalandenw ka ɲi k’u yɛrɛ jati i n’a fɔ denmisɛnw, o kɔrɔ k’u majigi ani k’a jati k’u tɛ foyi ye.

A ma mɛɛn cidenw tun be sɔsɔli kɛra k’a lɔn jɔn lo ye ɲɛmɔgɔ ye u cɛma. O kama, a be se ka kɛ ko u b’a miiri ko Yezu b’u jalakira le. Sisan, ciden Zan be koo dɔ lakali min kɛra kɔsa la. A ko: “Karamɔgɔ, an ye cɛɛ dɔ ye min be jinaw gwɛn ka bɔ mɔgɔw la n’i tɔgɔ ye. An tun b’a fɛ k’a bali, bari an dɔ tɛ.”—Luka 9:49.

Yala Zan b’a jati ko sira dira cidenw dɔrɔn lo ma ka mɔgɔw kɛnɛya ani ka jinaw gwɛn wa? N’o lo, mun na o Yahutucɛ fana be sera ka jinaw gwɛn ka bɔ mɔgɔw la? N’a sɔrɔ Zan b’a miiri k’o cɛɛ man ɲi ka kabakow kɛ sabu a tɛ tugura Yezu n’a ka cidenw kɔ.

Yezu y’a fɔ ko: “Aw kan’a bali, sabu, mɔgɔ si te se ka kabako kɛ ne tɔgɔ la ka tila ka ne tɔgɔjugu fɔ o yɔrɔnin bɛɛ. Mɔgɔ min te an jugu ye, o ye an ɲiin ye [o kɔrɔ, a be ni an ye]. Mɔgɔ o mɔgɔ mana filen ɲaa kelen jii minta d’aw ma bari aw ye ne ta ye, tiɲɛ na, ne b’a fɔ aw ye k’o tigi tena bɔnɔ o tɔnɔ na.” (Mariki 9:39-41). Yezu ka jaabili ye Zan kabakoya.

O wagati la, waajibi tun tɛ o cɛɛ ka tugu Yezu kɔ walisa k’a yira ko a be n’a ye. O tuma na, kerecɛn kafo tun ma sigi sen kan fɔlɔ. O kama, hali n’o cɛɛ tɛ tugura Yezu kɔ, o kɔrɔ tɛ ko a y’a kɛlɛbaga dɔ ye wala ko a be mɔgɔw kalanna ngalon diinan ka koow la. Siga t’a la, o cɛɛ limaniyanin lo Yezu la ani Yezu ye min fɔ, o b’a yira ko a bena a ka sara sɔrɔ.

Faan wɛrɛ fɛ, ni Yezu ka cidenw ka kumaw n’u ka kɛwalew y’o cɛɛ kunnatiɲɛ, o bena kɛ kojuguba ye u fɛ. Yezu y’a fɔ ko: “Denmisɛn minw ye lanaya sɔrɔ, ni mɔgɔ dɔ kɛra sababu ye k’olu dɔ kunna cɛn, yanni a tigi k’o kɛ, ni kabakuru belebeleba tun sirila a kaan na k’a fili kɔgɔji kɔnɔ, o tun ka fisa a ma.” (Mariki 9:42). O kɔ, Yezu y’a fɔ a ka kalandenw ye ko fɛɛn o fɛɛn be se k’u kunnatiɲɛ, u k’u mabɔ o la hali n’o fɛɛn koo ka gwɛlɛ u ma. A be se ka kɛ u bolo, u seen wala u ɲɛden ye. A ka fisa u ka bɔnɛ o fɛɛnw na ani ka don Ala ka Masaya la sanni ka nɔrɔ u la ani ka laban zeyɛni na (Hinom kɛnɛba). U be ɲamaɲamaw jɛni o kɛnɛba le la Zeruzalɛmu gɛrɛfɛ. N’a sɔrɔ cidenw b’o yɔrɔ lɔn. O kama, u b’a faamu ko zeyɛni ye tagamasiɲɛ lo ye min b’a yira ko mɔgɔ dɔ halakira pewu.

Yezu y’a ka cidenw lasɔmi fana ko: “Aw k’aw yɛrɛ kɔlɔsi, aw si kana denmisɛn nunu dɔ dɔgɔya, bari ne b’a fɔ aw ye k’olu ka mɛlɛkɛw be n Faa ɲakɔrɔ arijana na tuma bɛɛ.” O “denmisɛn nunu” ɲɔgɔn koo ka gwɛlɛ a Faa ma cogo di? Yezu kumana cɛɛ dɔ koo la min be ni saga  deen 100 ye, nka u kelen tununa. O cɛɛ ye saga 99 nunu bɛɛ to yen ka taga o saga deen kelen yɔrɔ ɲini. A y’a ye minkɛ, a ɲagalila kosɔbɛ ale kosɔn ka tɛmɛ saga 99 nunu kan. Yezu y’a fɔ tugun ko: “O cogo kelen la, aw Faa min be sankolo la, a t’a fɛ denmisɛn nunu dɔ ka tunu.”—Matiyo 18:10, 14.

Kalandenw ye sɔsɔliko min kɛ, n’a sɔrɔ o tun be Yezu hakili la tuma min na a y’u jija ko: ‘Aw ka kɔgɔ don aw yɛrɛ la, ka to hɛɛrɛ la aw ni ɲɔgɔn cɛ.’ (Mariki 9:50). Kɔgɔ be dɔ fara dumuni diya kan. O cogo kelen na, ni mɔgɔ ka kuma ka di i n’a fɔ kɔgɔ, mɔgɔw ka teli ka sɔn a tigi ka fɔta ma ani o be kɛ sababu ye bɛɛn be kɛ o tigi ni tɔɔw cɛ. Nka, sɔsɔli kumaw be na ni bɛnbaliya lo ye.—Kɔlɔsikaw 4:6.

Tuma dɔw la bɛnbaliya dɔ be se ka don an ni balima dɔ cɛ. Yezu y’a fɔ an be se k’o koo ɲɛnabɔ cogo min na. A ko: “Ni i balima ye i hakɛ ta, taa a fɔ a ye i kelen ni a kelen. Ni a ye i lamɛn, aw na kɛ ɲɔgɔn ka mɔgɔ ye tun.” Nka n’a banna k’i lamɛn do? Yezu y’a fɔ ko: “Mɔgɔ kelen wala fila wɛrɛ wele ka fara i kan, walisa kuma bɛɛ ka kɛ seere fila wala seere saba ɲɛ na.” Ni o koo bele ma ɲɛnabɔ, u ka ɲi k’o ɲɛfɔ “eglisi ye” o kɔrɔ, diinan mɔgɔkɔrɔw. Olu lo be se ka desizɔn ta. Nka, ni jurumukɛla ma sɔn olu ka fɔta ma fana do? “A jate i ko jurumutɔ wala faama wari minɛbaa dɔ.” Yahutuw tun tɛ jɛn n’o ɲɔgɔnnamɔgɔw ye.—Matiyo 18:15-17, ABM.

Kafo kɔrɔsibagaw ka ɲi ka Bibulu ka ladiliw sira tagama. N’u y’a ye ko mɔgɔ dɔ ye jurumu kɛ ani ko a mako be kololi la, u ka desizɔn “bena siri sankolo la.” Nka, n’u y’a ye ko mɔgɔ dɔ ye jalakibali ye, o “bena foni sankolo la.” Ni kerecɛn kafo nana sigi sen kan tuma min na, o cikanw bena kafodenw nafa. Ka ɲɛsin o kitikow ma, Yezu y’a fɔ ko: “Ni mɔgɔ fila walima mɔgɔ saba mana ɲɔgɔn lajɛn yɔrɔ o yɔrɔ ne tɔgɔ la, ne b’u cɛma.”—Matiyo 18:18-20.