Yezu tun be Fariziɲɛcɛ Simɔn fɛ ani a kumana yafali koo la. Dɔɔni o kɔ, a ye waajuli kanpaɲi wɛrɛ daminɛ Galile mara la. A y’a ka cidenya baara daminɛ a saan filanan lo ye nin ye ani a t’a kelen a ka tagama na. A ka ciden 12 be n’a ye ani muso dɔw, a tun ye “jina gwɛn ka bɔ” minw na ani k’u kɛnɛya (Luka 8:2). Magadala Mariyamu ani Suzani y’o muso dɔw ye. Zaani fana b’u cɛma. Ale cɛɛ ye masacɛ Erɔdi Antipasi ka nafolo kɔrɔsibaga ye.

Komi mɔgɔ caaman ye Yezu koo mɛn, sɔsɔli kumaw tora ka caya a ka baaraw koo la. Loon dɔ, u nana ni jinatɔcɛ dɔ ye walisa Yezu k’a kɛnɛya. O cɛɛ ye fiyentɔ ni bobo ye fana. O n’a t’a bɛɛ, Yezu y’a kɛnɛya. Sisan, a be se ka kuma ani ka yeli kɛ. O koo ye jama kabakoya kosɔbɛ! U ko: “An be masacɛ Dawuda dencɛ min kɔnɔna, kɔni ale lo te nin ye?”—Matiyo 12:23.

Yezu be boon min kɔnɔ, jamaba lajɛnna k’o lamini. U ka ca fɔɔ Yezu n’a ka kalandenw tɛ se ka dumuni kɛ yɛrɛ. Nka, bɛɛ t’a miiri ko Yezu ye “masacɛ Dawuda dencɛ” ye, Ala ye layidu ta min koo la. Sariya karamɔgɔw ni Fariziɲɛ dɔw bɔra fɔɔ Zeruzalɛmu ka na Yezu fɛ. Nka, u ma na walisa k’a ka kalanw lamɛn wala k’a dɛmɛ dɛ. U b’a fɔra jama ye ko “Bɛlzebul b’a la” ani ko a be baara kɛra ni “jinɛw kuntigi” lo ye (Mariki 3:22, ABM). Yezu somɔgɔw y’o sɔsɔlikow mɛn minkɛ, u nana ko u b’a minɛ ka taga n’a ye. Mun na do?

O wagati la, Yezu dɔgɔcɛw yɛrɛ tun lanin t’a la ko a ye Ala Dencɛ ye (Zan 7:5). Olu fɛ, u kɔrɔbayara ni Yezu min ye Nazarɛti, ale kɔni lo tɛ nin sɔsɔliko ɲɔgɔn lawulila. O kama, u y’a miiri ko Yezu “kuun wilila.”—Mariki 3:21.

Nka, koow be mun lo yira? Yezu ye jinatɔcɛ dɔ kɛnɛya a ma mɛɛn. Sisan, o cɛɛ be se ka kuma  ani ka yeli kɛ. Mɔgɔ si tɛ se ka sɔsɔli kɛ o koo la. O kama, sariya karamɔgɔw ni Fariziɲɛw y’a ɲini ka Yezu tɔgɔ tiɲɛ. U ko: “Jinaw kuntigi Belezebuli le be see dir’a ma ka jinaw gwɛn ka bɔ mɔgɔw la.”—Matiyo 12:24.

Yezu be sariya karamɔgɔw ni Fariziɲɛw ka miiriya lɔn minkɛ, a y’a fɔ ko: “Ni jamana min mɔgɔw be ɲɔgɔn kɛlɛ, o jamana nin te se ka ɲa. Ni dugu, walima somɔgɔ minw be ɲɔgɔn kɛlɛ, o be ci. Ni Sutana b’a yɛrɛ ka mɔgɔw gwɛn, a b’a yɛrɛ kɛlɛ, a ka masaya bena taga ɲa cogo di?”—Matiyo 12:25, 26.

Yezu ka kumaw tilennin lo yɛrɛ le! Fariziɲɛw b’a lɔn ko Yahutu dɔw be jinaw gwɛn ka bɔ mɔgɔw la (Kɛwaliw 19:13). O kama, Yezu y’u ɲininga ko: “Ni ne be jinaw gwɛn Belezebuli barika la, o tuma na, aw ka kalandenw b’u gwɛn jɔn le barika la?” O kɔrɔ ko u ka jalaki kumaw ɲɛsinna olu fana ma. Yezu y’a fɔ tugun ko: “Nga ni ne be jinaw gwɛn Ala ka Nii [o kɔrɔ, hakili senu] barika la, o b’a yira ko Ala ka masaya sera aw ma.”—Matiyo 12:27, 28.

Ni Yezu be jinaw gwɛn, o b’a yira ko a ye see sɔrɔ Sutana kan. Yezu ye ɲɛyirali dɔ ta walisa k’o koo ɲɛfɔ. A ko: ‘Mɔgɔ be se ka don cɛɛ barikaman ka soo kɔnɔ k’a bololafɛnw cɛ cogo di n’a m’o cɛɛ minɛ k’a siri fɔlɔ? N’a y’a siri, o tuma na, a be se k’a ka sokɔnɔfɛnw bɛɛ cɛ. Mɔgɔ min te ni ne ye, o ye ne jugu le ye. Mɔgɔ min te ne dɛmɛ ka ɲani kɛ, o tigi be cɛnni le kɛ.’ (Matiyo 12:29, 30). Sariya karamɔgɔw ni Fariziɲɛw be Yezu kɛlɛ minkɛ, u b’a yira o sen fɛ k’u ye Sutana kɔmɔgɔw lo ye. U t’a fɛ mɔgɔw ka gwɛrɛ Ala Dencɛ la, k’a sɔrɔ ale be koow kɛ Jehova ka setigiya barika lo la.

Yezu y’o Sutana mɔgɔw lasɔmi ko: “Mɔgɔw ka hakɛ bɛɛ, n’u ka Ala tɔgɔcɛn kuma bɛɛ be se ka yafa, nga ni mɔgɔ o mɔgɔ ye Nii Senuman tɔgɔ cɛn, Ala tena yafa o tigi ma fewu. O tigi ye hakɛ yafabali kɛ.” (Mariki 3:28, 29). Kabako minw kɛra hakili senu barika la, olu ko u kɛra Sutana lo barika la. Miiri k’a filɛ o jurumu yafabali nɔfɛkow ye min ye u kun!