MƆGƆ minw lara Ala tigiya saba kalan na, olu b’a fɔ ko Ala ye mɔgɔ saba ye: Faa, Dencɛ ani hakili senu. U b’a jati ko o mɔgɔ saba bɛɛ ka kan: dɔ man bon ni dɔ ye, u saba bɛɛ ye Sebagayabɛɛtigiw ye ani daminɛ tɛ u si la. Ka kɛɲɛ n’o kalan ye, Faa ye Ala ye, Dencɛ ye Ala ye, hakili senu ye Ala ye, nka u ye Ala kelenpe lo ye.

 Minw lara o kalan na, u caaman be sɔn a la ko u tɛ se k’o ɲɛfɔ. Nka, n’a sɔrɔ u b’a jati k’o kalan be Bibulu kɔnɔ. A ka ɲi i k’a lɔn ko “Ala tigiya saba” kumadenw tɛ sɔrɔ Bibulu yɔrɔ si kɔnɔ. Nka, yala o miiriya yɛrɛ be sɔrɔ Bibulu kɔnɔ wa? Walisa k’o ɲiningali jaabi, an ka bibulusen dɔ lajɛ Ala tigiya saba kalan kɛbagaw be basigi min kan.

Zan 1:1 b’a fɔ ko: “Fɔlɔfɔlɔ, sanni diɲɛ ka dan, Kuma tun be yen. O Kuma nin tun be ni Ala ye, o Kuma nin tun ye Ala ye.” N’an tagara ɲɛɛ fɛ o sapitiri kelen kɔnɔ, ciden Zan b’a yira ka gwɛ ko “o Kuma” nin ye Yezu ye (Zan 1:14). Nka, komi Kuma weelela ko Ala, mɔgɔ dɔw b’a jati ko Dencɛ ni Faa ka kan ka kɛ Ala kelen faan dɔ ye.

I k’a to i hakili la ko o Bibulu yɔrɔ nin tun kɔnna ka sɛbɛ gɛrɛkikan na. Kɔfɛ, u y’a bayɛlɛma kaan wɛrɛw la. Nka, dɔw m’a bayɛlɛma ka fɔ ko “Kuma nin tun ye Ala ye.” Mun na do? Olu ye o gɛrɛkikan faamu cogo min na, u y’a jati k’o kumaw ka kan ka bayɛlɛma cogoya wɛrɛ la. Cogo di do? Ɲɛyirali dɔw filɛ nin ye: “Kuma tun be Ala cogo la.” (La Sainte Bible [1908], L. Segond ani H. Oltramare fɛ). “Kuma tun ye ala dɔ ye. ” (Traduction du monde nouveau). Ka kɛɲɛ n’o Bibulu bayɛlɛmaniw ye, Kuma tɛ Ala yɛrɛ-yɛrɛ ye. * Nka, a ka lɔyɔrɔba kosɔn Jehova ka danfɛnw cɛma, Kuma weelela ko “ala dɔ.” Yan, o kumaden “ala” kɔrɔ ko “setigi.”

Bibulu sɛbɛra gɛrɛkikan min na, mɔgɔ caamanba t’o kaan lɔn. O la do, i be se ka ciden Zan ka kumaw kɔrɔ tigitigi lɔn cogo di? I ka ɲɛyirali nin lajɛ: Kalanfa dɔ be koo dɔ ɲɛfɔ a ka lakɔlidenw ye. Nka, u ma a ka ɲɛfɔli faamu cogo kelen na. U be se k’o koo ɲɛnabɔ cogo di? U be se ka kunnafoniw ɲini u ka kalanfa fɛ. Siga t’a la, o kunnafoni wɛrɛw be se k’u dɛmɛ ka faamuyali ɲuman sɔrɔ. O cogo kelen na, walisa ka Zan 1:1  kɔrɔ faamu, i be se ka kunnafoni wɛrɛw ɲini Yezu lɔyɔrɔ koo la Zan ka kibaro duman kɔnɔ. I kɛtɔ k’o koo sɛgɛsɛgɛ ka dunya, i bena faamuyali ɲuman sɔrɔ.

Ɲɛyirali fɛ, i k’a filɛ Zan ye min sɛbɛ tugun sapitiri fɔlɔ, vɛrise 18 kɔnɔ: “Mɔgɔ si ma deli ka [Sebagayabɛɛtigi] Ala ye abada.” Nka, adamadenw ɲɛɛ lara Dencɛ Yezu kan sabu Zan y’a fɔ ko: “O Kuma nin kɛra mɔgɔ ye, ka na sigi n’an ye. An y’a ka nɔɔrɔ ye.” (Zan 1:14). N’o lo, Dencɛ be se ka kɛ Sebagayabɛɛtigi Ala faan dɔ ye cogo di do? Zan y’a fɔ fana ko Kuma tun be “ni Ala ye.” Nka, i be se ka kɛ ni mɔgɔ dɔ ye ani ka tila ka kɛ o tigi yɛrɛ ye cogo di? Ka fara o kan, i ko a sɛbɛra Zan 17:3 (ABM ) kɔnɔ cogo min na, Yezu y’a yira ka gwɛ faranfasi min be yen ale n’a sankolola Faa cɛ. A y’a Faa weele ko “Ala sɛbɛ kelenpe.” Ani, a ka kibaro duman laban fan fɛ, Zan ye koow kuncɛ nin cogo la ko: “Nka nin kow sɛbɛnna walisa aw ka da a la ko Yesu ye Krisita ye, Ala Denkɛ.” (Zan 20:31, ABM ). I k’a kɔrɔsi, a ma fɔ ko Yezu ye Ala ye, nka a weelela ko Ala Dencɛ. Nin kunnafoni wɛrɛ min be sɔrɔ Zan ka kibaro duman kɔnɔ, o b’a yira Zan 1:1 ka kan ka faamu cogo min na. Kuma, walima Yezu ye “ala dɔ” ye. O kɔrɔ ko a lɔyɔrɔ ka bon. Nka, a ka lɔyɔrɔ tɛ kelen ye ni Sebagayabɛɛtigi Ala ta ye.

An ka segi kalanfa n’a ka lakɔlidenw koo kan tugun. I ka miiri k’a filɛ: Kalanfa ye kunnafoni wɛrɛ di, nka, lakɔliden dɔw be sigasiga hali bi. U be se ka mun lo kɛ do? U be se k’u ɲɛsin kalanfa wɛrɛ ma walisa ka faamuyali sɔrɔ o koo kelen kan. N’o kalanfa filanan ye fɔlɔ ka kumaw tiɲɛntigiya yira, lakɔliden caamanba ka sigasigali be se ka ban. O cogo kelen na, Bibulu sɛbɛbaga Zan ye min fɔ tigitigi Yezu ni Sebagayabɛɛtigi Ala ka jɛnɲɔgɔnya koo la, n’i ma la o la, i be se k’i ɲɛsin Bibulu sɛbɛbaga wɛrɛ ma. Ɲɛyirali fɛ, Matiyo ye min sɛbɛ, i k’o lajɛ. Yezu ye min fɔ duniɲa laban koo la, Matiyo y’o sɛbɛ ten ko: “Mɔgɔ si t’o loon n’o waati lɔn. Hali mɛlɛkɛw ni Ala Dencɛ t’a lɔn, fɔɔ Faa Ala kelenpe.”  (Matiyo 24:36). O kumaw be Zan ka fɔta tiɲɛntigiya yira cogo di ko Yezu tɛ Sebagayabɛɛtigi Ala ye?

Yezu y’a fɔ ko Faa be koo lɔn ka tɛmɛ Dencɛ kan. Ni Yezu tun ye Sebagayabɛɛtigi Ala faan dɔ ye, ale n’a Faa ka koo lɔnni tun bena kɛ kelen ye. O b’a yira ko Dencɛ ni Faa tɛ se ka kɛ kelen ye. Nka, dɔw bena a fɔ ko: ‘Yezu cogoya ye fila ye. A adamadenlaman lo be kumana yan.’ Nka hali n’o lo, hakili senu do? Ni ale fana ye Ala faan dɔ ye Faa cogo la, mun na Yezu m’a fɔ ko hakili senu ni Faa ka koo lɔnni ye kelen ye do?

N’i be i timinandiya i ka bibulukalan na, i bena vɛrise caaman wɛrɛw sɔrɔ minw ɲɛsinna o koo ma. U be tiɲɛn yira Faa, Dencɛ ni hakili senu koo la.—Zaburuw 90:2; Kɛwaliw 7:55; Kɔlɔsikaw 1:15.