KALANSEN 05
Bibulu ye Ala ka Kuma ye, a ye min lase adamadenw ma
Jehova ye nilifɛn nafamanba dɔ di an ma: o ye Bibulu lo ye. Kitabu 66 lo farala ɲɔgɔn kan ka kɛ Bibulu ye. Nka, n’a sɔrɔ i b’i yɛrɛ ɲininga ko: “Bibulu sɛbɛra cogo di? A sera an ma cogo di?” Walisa k’o ɲiningaliw jaabili lɔn, an k’a filɛ Ala y’a ka Kuma lase an ma cogo min na.
1. Ni adamadenw lo ye Bibulu sɛbɛ, mun na a fɔra ko Ala lo ye Bibulu Tigi ye?
Cɛɛ 40 ɲɔgɔn lo ye Bibulu sɛbɛ saan 1 600 ɲɔgɔn kɔnɔ. Bibulu ka kitabu fɔlɔ sɛbɛra a saan 3 500 ye nin ye. Ani, a kitabu laban sɛbɛra a saan 1 900 ye nin ye. A sɛbɛbagaw tun tɛ mɔgɔ sifa kelen ye: dɔw tun ye sagadɛndɛlaw ye, dɔw tun ye jɛgɛminɛlaw ye, dɔw tun ye masacɛw ye u cɛma. O bɛɛ n’a ta, u ye min sɛbɛ, o tɛ ɲɔgɔn sɔsɔ. O be se ka kɛ cogo di? O be se ka kɛ sabu Bibulu ye Ala ka Kuma lo ye (1 Tesalonikaw 2:13 kalan). Bibulu sɛbɛbagaw m’u yɛrɛ ka miiriyaw lo sɛbɛ a kɔnɔ. Nka u ye min sɛbɛ, “Nii Senuman yɛrɛ le y’a don u daa la u tora ka kuma Ala tɔgɔ la.” a (2 Piyɛri 1:21). Ala tɛmɛna a ka hakili senu fɛ k’o mɔgɔw lasun u y’ale ka miiriyaw sɛbɛ.—2 Timote 3:16.
2. Mɔgɔ bɛɛ be se ka nafa sɔrɔ Bibulu la wa?
Kibaro diiman min be sɔrɔ Bibulu kɔnɔ, “siyaw bɛɛ ni bɔnsɔnw bɛɛ ni kanw bɛɛ ani mɔgɔ sifaw bɛɛ” be se ka nafa sɔrɔ o la (Yirali 14:6 kalan, Bible senuma). Ala ye labɛn kɛ walisa Bibulu ka sɔrɔ kaan caaman na ka tɛmɛ gafe tɔɔw bɛɛ kan. Bi, mɔgɔw fanba be se ka Bibulu kalan wala k’a kalan lamɛn, u siyakan mana kɛ min o min ye wala u mana kɛ yɔrɔ o yɔrɔ.
3. Jehova ye Bibulu latanga faratiko jumanw lo ma?
Bibulu kɔrɔkɔrɔw sɛbɛra fɛɛn minw kan, u tɛ mɛɛn ka tiɲɛ. Nka Bibulu koo ka di mɔgɔ minw ye, olu y’a kopiw kɛ k’a sɛbɛ tigitigi n’u bolow ye. Hali ni mɔgɔ setigi dɔw y’a ɲini ka Bibulu halaki, mɔgɔ wɛrɛw sɔnna k’u niin bila farati la walisa ka Bibulu latanga. Jehova m’a to koo si wala mɔgɔ si k’a bali k’a ka Kuma lase an ma. Bibulu b’a fɔ ko: “An ka Ala ka kuma bena to seen kan kudayi.”—Ezayi 40:8.
A ƝINI KA DƆ LƆN TUGUN
Ala ye a ka hakili senu di cɛɛ dɔw ma cogo min na walisa u ka Bibulu sɛbɛ, a ye Bibulu latanga cogo min na, ani a ye min kɛ walisa mɔgɔw bɛɛ ka se k’a kalan, an k’a ɲini ka dɔ lɔn tugun o koo la.
4. Bibulu yɛrɛ b’a yira a bɔra mɔgɔ min yɔrɔ
A’ ye VIDEWO filɛ. O kɔ, a’ ye 2 Timote 3:16 kalan. Ani, a’ ye ɲiningali nunu kɛ ani ka baro kɛ u kan:
-
Ni adamadenw lo ye Bibulu sɛbɛ, mun na a be weele ko Ala ka Kuma?
-
A fɔra ko Ala y’a ka miiriyaw fɔ adamadenw ye walisa u k’o sɛbɛ. E be mun lo miiri o koo la?
Sekeretɛri be se ka lɛtɛrɛ dɔ sɛbɛ, nka o lɛtɛrɛ kɔnɔkow bɔra a ka patɔrɔn lo yɔrɔ. O cogo kelen na, adamadenw ye Bibulu sɛbɛ, nka a kɔnɔkow bɔra Ala lo yɔrɔ.
5. Bibulu kisira halakili ma
Ni Bibulu bɔra Ala yɔrɔ, Ala ka ɲi k’a latanga. Kabi sanga ni wagati bɛɛ, mɔgɔ setigi dɔw y’a ɲini ka Bibulu halaki. Ani, diinan kuntigi dɔw y’a ɲini ka mɔgɔw bali u ka Bibulu kalan. Nka mɔgɔ caaman y’u niin bila farati la walisa ka Bibulu latanga hali k’a sɔrɔ dɔw tun b’u kɛlɛ ani u tun b’a fɛ k’u faga o kosɔn. N’i b’a fɛ ka dɔ lɔn o ɲɔgɔnna mɔgɔ dɔ koo la, a’ ye VIDEWO filɛ. O kɔ, a’ ye ɲiningali nunu kɛ ani ka baro kɛ u kan:
-
An y’a ye ko mɔgɔ dɔw y’u niin bila farati la walisa ka Bibulu latanga. O t’a kalan nege don i la wa? Mun na i ko ten?
Zaburuw 119:97 kalan. O kɔ, a’ ye ɲiningali nin kɛ ani ka baro kɛ o kan:
-
Mun lo ye mɔgɔ caaman lasun u y’u niin bila farati la walisa ka Bibulu bayɛlɛma ani k’a jɛnsɛn?
6. Kitabu lo min labilanin lo bɛɛ ye
Gafe si ma bayɛlɛma ani ka jɛnsɛn ka se Bibulu ma. Kɛwaliw 10:34, 35 kalan. O kɔ, a’ ye ɲiningali nunu kɛ ani ka baro kɛ u kan:
-
Mun na Ala b’a fɛ a ka Kuma ka bayɛlɛma ani ka jɛnsɛn yɔrɔ bɛɛ o cogo la?
-
Mun lo b’i kabakoya Bibulu koo la?
Duniɲa kuru bɛɛ kɔnɔ, mɔgɔw
fanba
be se ka Bibulu kalan kaan dɔ la
u be min faamu
A be sɔrɔ kaan
3 000
ni kɔ la.
A kuturu bɛɛ wala a yɔrɔ dɔw
5 000 000 000
O hakɛ lo bɔra mansin na.
Gafe si ta ma se o ma.
NI MƆGƆ DƆ Y’A FƆ I YE KO: “Bibulu ye kitabu kɔrɔ dama lo ye adamadenw ye min sɛbɛ.”
-
E be mun lo miiri?
-
Mun lo b’a yira ka gwɛ ko Bibulu ye Ala ka Kuma ye?
MIIRIYA JƆNJƆN
Bibulu ye Ala ka Kuma ye. A ye labɛn kɛ walisa adamadenw bɛɛ ka se k’a kalan.
I ye mun lo faamu?
-
Ala y’a ka hakili senu di mɔgɔ dɔw ma walisa u ka Bibulu sɛbɛ. O kɔrɔ ko di?
-
Bibulu kisira faratikow ma cogo min na, u y’a bayɛlɛma ani k’a jɛnsɛn cogo min na, mun lo b’i kabakoya o la?
-
K’a lɔn ko Ala ye koow bɛɛ kɛ walisa k’a ka Kuma lase i ma, o be mun lo kɛ i la?
NUNU LAJƐ FANA
A ɲini k’a lɔn Bibulu sera an ma cogo min na: k’a ta kitabu kɔrɔkɔrɔw ma fɔɔ ka na se a bayɛlɛmanin kuraw ma.
“Comment la Bible nous est parvenue” (Saan 2007, novanburukalo ka Réveillez-vous !)
A ɲini k’a lɔn Bibulu kisira faratiba saba dɔw ma cogo min na.
“La Bible : histoire d’une rescapée” (Saan 2016 ka Kɔrɔsili Sangaso No 4nan)
A filɛ mɔgɔw y’u niin bila farati la cogo min na walisa ka se ka Bibulu bayɛlɛma.
U ye Bibulu kopiw sɛbɛ bolo la ani k’a bayɛlɛma siɲɛ caaman na. O la, mun lo b’a yira ko a kɔnɔkow ma yɛlɛma?
“Bibulu kɔnɔkow yɛlɛmana wala fili dɔw donna a kɔnɔ wa?” (A be sɔrɔ jw.org kan)
a I ko an ben’a ye Kalansen 7 na cogo min na, “Nii Senuman” wala hakili senu ye Ala ka baarakɛ fanga lo ye.
