KALANSEN 25

Ala sagonata ye mun lo ye an adamadenw koo la?

A LAMƐN KAAN NIN NA

I ko Bibulu y’a fɔ cogo min na, “adamaden sii man ca, a fana b’a kɛ sɛgɛn na.” (Zɔbu 14:1). Ala tun b’a fɛ an ka ɲɛnamaya kɛ o cogo la le wa? N’o tɛ, a sagonata ye mun lo ye an koo la? O bena dafa loon dɔ wa? Bibulu be min fɔ o koo la, o be mɔgɔ dusu saalo. An k’o lajɛ.

1. Jehova b’a fɛ an ka ɲɛnamaya ka kɛ cogo di?

Jehova b’a fɛ an ka ɲɛnamaya ka diya yɛrɛ le! Tuma min na a ye cɛɛ fɔlɔ Adama n’a muso Awa dan, a y’u bila nankɔ cɛɲumanba dɔ kɔnɔ, o min tun ye Edɛn nankɔtu ye. O kɔ, “Ala ye barika don u la k’a fɔ u ye ko: ‘Aw ka deenw wolo ka caya ka dugukolo fa k’a kolo.’” (Zɛnɛzi 1:28). Jehova tun b’a fɛ u ka deenw wolo, ka dugukolo bɛɛ kɛ alijɛnɛ ye, ani ka bɛgɛnw ni kongosogow ladon. A tun b’a fɛ bɛɛ ka ɲɛnamaya kɛ kɛnɛya dafanin na fɔɔ abada.

Hali ni koow ma kɛ o cogo la, a Ala sagonata ma yɛlɛma (Ezayi 46:10, 11). Adamaden minw be mɛnni kɛ a fɛ, a bele b’a fɛ olu ka ɲɛnamaya kɛ kɛnɛya dafanin na ani ka hɛɛrɛ diyabɔ fɔɔ abada.—Yirali 21:3, 4 kalan.

2. An be se ka kuun bɛrɛ sɔrɔ an ka ɲɛnamaya la cogo di?

Jehova Ala y’an dan ka Alako nege don an na. O lo y’a to an mako b’a la ka Ala lɔn ani k’a bato (Matiyo 5:3-6 kalan). A b’a fɛ an ka kɛ a teri sɔbɛw ye, “k’a ka siraw bɛɛ taama, . . . k’a koo diya” an ye, ani ‘ka baara kɛ a ye sɔbɛ la n’an dusu bɛɛ ye.’ (Deteronɔmu 10:12; Zaburuw 25:14). N’an be koow kɛ o cogo la, an bena hɛɛrɛ sɔbɛ sɔrɔ hali ni gwɛlɛyaw b’an kan. N’an be Jehova bato, an bena kuun sɔrɔ bɛrɛbɛrɛ an ka ɲɛnamaya la ani an bena wasa.

A ƝINI KA DƆ LƆN TUGUN

An k’a filɛ Jehova ye dugukolo labɛn ni kanuyaba ye cogo min na an kosɔn. An ka ɲɛnamaya kuun ye min ye, an k’a filɛ fana Ala ka Kuma be min fɔ o koo la.

3. Jehova sagonata ye min ye adamadenw koo la, o ka ɲi yɛrɛ le!

A’ ye VIDEWO filɛ. O kɔ, a’ ye ɲiningali nin kɛ ani ka baro kɛ o kan:

VIDEWO: Mun na Ala ye dugukolo dan?—A yɔrɔ dennin dɔ (1:41)

Mun na Ala ye dugukolo cɛɲumanba nin dan?

Waajulikɛla 3:11 kalan. O kɔ, a’ ye ɲiningali nin kɛ ani ka baro kɛ o kan:

O vɛrise be mun lo yira i la Jehova koo la?

4. Jehova sagonata ma yɛlɛma

Zaburuw 37:11, 29 ani Ezayi 55:11 kalan. O kɔ, a’ ye ɲiningali nin kɛ ani ka baro kɛ o kan:

An b’a lɔn cogo di ko Jehova sagonata ye min ye an adamadenw koo la, o ma yɛlɛma?

Ni boon dɔ tiɲɛna, a be se ka lalaga. O cogo kelen na, hali ni adamadenw fanba ma dugukolo ladon ka ɲɛ, Ala bena a lalaga k’a di a sagokɛlaw ma minw b’a kanu.

5. N’an be Jehova bato, an bena kuun sɔrɔ bɛrɛbɛrɛ an ka ɲɛnamaya la

N’an b’a lɔn ɲɛnamaya kuun ye min ye, o be se k’an dɛmɛ ka hɛɛrɛ sɔrɔ. A’ ye VIDEWO filɛ. O kɔ, a’ ye ɲiningali nin kɛ ani ka baro kɛ o kan:

VIDEWO: N’ y’a faamu ɲɛnamaya kuun ye min ye (5:03)

Terumi y’a faamu ɲɛnamaya kuun ye min ye, o y’a nafa cogo di?

Waajulikɛla 12:13 kalan. O kɔ, a’ ye ɲiningali nin kɛ ani ka baro kɛ o kan:

Jehova ye min bɛɛ kɛ an ye, n’an miirila o la, o b’an lasun ka mun lo kɛ?

NI MƆGƆ DƆ Y’I ƝININGA KO: “Ɲɛnamaya kuun ye mun lo ye?”

I ben’a tigi jaabi cogo di?

MIIRIYA JƆNJƆN

Jehova Ala b’a fɛ an ka ɲɛnamaya kɛ hɛɛrɛ dafanin na fɔɔ abada yan dugukolo kan. N’an be Ala bato n’an dusu bɛɛ ye, an bena kuun sɔrɔ bɛrɛbɛrɛ an ka ɲɛnamaya la kabini sisan yɛrɛ.