JOKWA 41

Nje Bibe̱l e makwalano̱ jombwea bolane̱ la belongi ba yadi e?

OKA

Bato jita ba mabwa iso̱n o kwalea ońola belongi ba yadi. Bibe̱l mo̱ e makwalea ońola belongi ba yadi ná bwē, nde na edube. Nje e makwalano̱ ye biso̱ muse̱ṅ, e te̱nge̱n pe̱. Omo̱ń a me̱se̱, Yehova nde e Muweked’asu, a bi so̱ nje ye bwam ońol’asu. A malangwea biso̱ nje jangame̱nno̱ bola ná di do̱lisane̱ mo̱, na nje e me̱nde̱ jongwane̱ biso̱ o be̱ne̱ longe̱ le bonam o bwindea.

1. Ne̱ni Yehova a me̱ne̱no̱ bolane̱ la belongi ba yadi e?

Belongi ba yadi be nde jabea Yehova a bolino̱ biso̱. A mapula ná be bwese̱ mome na muto bena ba bane̱ muńe̱nge̱. Di jabea di mabola babaedi epolo o be̱ne̱ bana, nde ba mabolane̱ pe̱ mo̱ o leane̱le̱ ndolo na eto̱nde̱ ba be̱nno̱ mō̱ te̱ ońola nune̱. Ońola nika nde Eyal’a Loba e makwalano̱ ná: “Bwane̱ munj’ango̱ muńe̱nge̱.” (Minia 5:18, 19) Yehova a mabaise̱ babaedi be kriste̱n ná ba be̱ mō̱ na nune̱ jemea ná ba si wite̱ musonje tomtom.—Langa Bonahebe̱r 13:4.

2. Ka ni titi ko̱nji ńe nde nje e?

Bibe̱l e malangwea biso̱ ná “bato ba titi ko̱nji . . . ba si me̱nde̱ sangwa janea la Loba.” (1 Korinto 6:9, 10) Batiledi ba Bibe̱l ba bolane̱ nde eyal’a Grikia porneïa o kwalea ońola ka ni titi ko̱nji. Y’eyala e bambe̱ (1) lata a la bato ba si bane̱, (2) lata la bome baba to̱ bito baba, na (3) lata la moto na ńama. Di bangi te̱ o “bola lambo di titi ko̱nji” di mado̱lisane̱ Yehova, nik’e wanea pe̱ biso̱ tombwane̱.—1 Tesalonika 4:3.

ALA O NJIBA

Okwa ne̱ni weno̱ ná o banga bola lambo di titi ko̱nji na nje o me̱nde̱no̱ tombwane̱ ke̱ o tiki be̱ bosangi o bedangwedi.

3. Ńa ka ni titi ko̱nji mīla

Mot’a jemea mō̱ nu ta nu belabe̱ ná Yose̱f an ewe̱nji ná a tike be̱ ko̱nji. Langa Bebotedi 39:1-12, nde lo kwaleye pe̱ ońola min myuedi:

Ońola nje Yose̱f a ńino̱ mīla e?—Ombwa mwemba 9.
O mo̱nge̱le̱ ná Yose̱f a no̱ngi bedomsedi ba bwam e? Ońola nje pe̱ e?

Ne̱ni beso̱mbe̱ beno̱ ná bembilane̱ Yose̱f, be ńa pe̱ ka ni titi ko̱nji mīla e? Ombwa SINIMA.

SINIMA: Ńa musonje mīla (5:06)

Yehova a mapula ná biso̱ be̱se̱ di ńe musonje mīla. Langa 1 Korinto 6:18, nde lo kwaleye pe̱ ońola min myuedi:

Njika bete̱medi be ná be tute̱le̱ moto o bola lambo di titi ko̱nji e?
Ne̱ni weno̱ ná o ńa musonje mīla e?

4. We ná wanane̱ makekisan

Nje ye ná e bola ná e be̱ ndutu o janane̱ makekisan ma bola lambo di titi ko̱nji e? Ombwa SINIMA, nde lo kwaleye pe̱ ońola myuedi mi mabupe̱.

SINIMA: Anane̱ makekisan tongwea na bolanga ba Bibe̱l (3:02)

Ponda nu munasango ńe o ni sinima a so̱ṅtane̱no̱ ná mo̱nge̱le̱ mao na bedangwedi bao be ná ba bola ná a si be̱ pe̱ munj’ao jemea, nje a bolino̱ e?

To̱ kriste̱n ya jemea i mana ponda iwo̱ o kombe̱ mo̱nge̱le̱ mabu bosangi. Nje weno̱ ná o bola ná mambo ma titi ko̱nji ma si ja wa o mo̱nge̱le̱ e? Langa Filipi 4:8, nde lo kwaleye pe̱ ońola min myuedi:

Njika pat’a mambo jangame̱nno̱ jo̱nge̱le̱ e?
Ne̱ni bolanga ba Bibe̱l na be̱ la mususu o ebol’a Yehova beno̱ ná bongwane̱ biso̱ o janane̱ makekisan ma bola bobe e?

5. Bete̱sedi ba Yehova be mawanea biso̱ tombwane̱

Yehova a bi nje e peti bwam ońol’asu. A malangwea biso̱ nje bola ná di tike be̱ bosangi o bedangwedi na njika tombwane̱ nik’e mawaneano̱ biso̱. Langa Minia 7:7-27 to̱ ombwa SINIMA, nde lo kwaleye pe̱ ońola myuedi mi mabupe̱.

SINIMA: Di si be̱ elemā (9:31)

Ne̱ni mu mpesa ma moto mu we̱le̱no̱ mo̱me̱ne̱ o bete̱medi ba bobe e?—Ombwa Minia 7:8, 9.
Bupisane̱ Minia 7:23, 26, ka ni titi ko̱nji ńe ná e wana betune bende̱ne̱. Njika mitakisan di masambano̱ yete̱na di tiki be̱ bosangi o bedangwedi e?
Ne̱ni be̱ la bosangi o bedangwedi leno̱ ná longwane̱ biso̱ o be̱ne̱ longe̱ le bonam o bwindea e?

Bato bō̱ ba mo̱nge̱le̱ ná nje Bibe̱l e makwalano̱ jombwea lata la bome baba to̱ bito baba e titi ndolo. Nde Yehova, Loba la ndolo, a mapula ná bato be̱se̱ ba be̱ne̱ longe̱ le bonam o bwindea. Nde ná di kuse di longe̱, jangame̱n bupe̱ bete̱sedi bao. Langa 1 Korinto 6:9-11, nde lo kwaleye pe̱ ońola min myuedi:

Mo̱ buka te̱ lata la bome baba to̱ bito baba nde Loba a me̱ne̱no̱ bobe e?

Ná di do̱lisane̱ Loba, biso̱ be̱se̱ jangame̱n po̱ngo̱ mawengisan. Mo̱ ye muse̱ṅ o bola nika e? Langa Myenge 19:9, 12, nde lo kwaleye pe̱ ońola min myuedi: