DUTEA TE̱ NÁ: We o pe̱pe̱le̱ epol’ekotedi ewo̱ owe̱ni ba kombe̱no̱ jita la mambo ma kwaṅ, k’eyembilan, njimbidi. Jita la yi njimbidi i ńam, yine̱ i tubedi, iwo̱ pe̱ i buedi. Nde na wa we̱ne̱ po̱ ńena ni si ńam to̱ son, mambo mao me̱se̱ me te̱ite̱i. Na wa o baise̱ mudied’ango̱ ná: “Mo̱ be nde wa o po̱ngo̱ mo̱ e?” Na mo̱ alabe̱ wa ná: “Ke̱m, e dun buka yine̱ ye̱se̱. Ba si po̱ngulane̱ pe̱ to̱ mo̱ to̱ buńa.” Na wa o baise̱ mo̱ ná: “Ba kombe̱ so̱ nde mo̱ tobotobo e? Nde alabe̱ wa ná: “Mo̱ nde e kusi mitakisan minde̱ne̱, ka ngo̱ na mbua. Bato jita ba keki na o ńamse̱ mo̱.” Nde o baise̱ wame̱ne̱ ná: “E po̱ngo̱be̱ so̱ nde ne̱ni e?”

Je ná di kobisane̱ Bibe̱l na ni njimbidi ńa tobotobo. Bibe̱l e dun buka jita la kalati. Ye mbale̱ ná kalati ya kwaṅ ipe̱pe̱ ye, nde ka nje te̱ yeno̱ na yi njimbidi ya kwaṅ i ńam, jita la yi kalati i timbi ńama na ponda. K’eyembilan, mambo ma tilabe̱ o yi kalati jombwea dibie̱ la nin wase ma timbi sabe̱ ponda mambo ma peńa ma so̱be̱no̱. Malea ma yi kalati jombwea eboled’a do̱kita ma yo̱ki nde wanea bato mbeu a ńolo, o mulopo ma jongwane̱ babo̱. Mongo mande̱ne̱ ma mapapa ma yi kalati ma pimbedi, to̱so̱ ma ńam ná bambam.

Bibe̱l mo̱ ńe diwengisan. E botedi o tilabe̱ ye we̱nge̱ buka lokoli la mbu lolalo na bebwea betanu, nde e dia te̱ nde te̱ite̱i. E takisabe̱ pond’a bwaba, k’eyembilan, e disabe̱, e bangabe̱ o bepolo bō̱, ba sai mo̱, nde to̱ na nika e si tuko. To̱ná mambo ma peńa ma so̱be̱no̱ o nje e mombweye̱ dibie̱ la wase, Bibe̱l mo̱ e si bo̱lo̱ne̱ te̱ nde ngiń’ao, o diwengisan, dibie̱ le oten di si be̱n elangisan.—Ombwa edinge̱le̱ “Bibe̱l e mátomba ponda nga e dia e be̱n epol’ao e?

We ná o baise̱ ná: ‘Mo̱ belēdi ba Bibe̱l be ná bongwane̱ biso̱ o nin we̱nge̱ e?’ Ná o we̱le̱ jalabe̱ mi myuedi, baise̱ wame̱ne̱ ná: ‘Njika mitakisan bato ba benama beno̱ lembe̱ o nin we̱nge̱ e? Njika mo̱ mi mabwesane̱ bo̱ngo̱ jita e? Yen ebe we ná o kwala ná: Bila, mbindo ni londi o ngo̱, ebwan, na mate̱ki. Jombweye bete̱sedi ba Bibe̱l bō̱. Niponda jeno̱ jombwea mo̱, baise̱ wame̱ne̱ ná: “Bato ba we̱le̱ te̱ ben bete̱sedi o ebolo, longe̱ di si wusa be̱ bwam buka nje leno̱ we̱nge̱ e?”

TO̱NDO̱ MUSANGO

“Bonam na ba ba makome̱ musango, ebanja ba mende̱ belabe̱ ná bana ba Loba.” (Mateo 5:9) “E we̱li te̱ be̱, bola to̱ nje lo dongame̱nno̱ bola o mańu mudi ná lo be̱ musango na bato be̱se̱.”—Roma 12:18.

LEE̱LE̱ LA NDEDI, NA LAKISE̱ LA BANE̱

“Bonam na bandedi, ebanja ba me̱nde̱ kusa ndedi.” (Mateo 5:7) “Nde bińo̱ leane̱ muyao mō̱ na nune̱. Lo be̱ ndedi, lo lakisane̱ mawuse̱ mō̱ na nune̱. Kana Loba pe̱ a lakise̱no̱ bińo̱ o Kristo.”—Efeso 4:32

JALATANE̱ OTETEN A BATO BA MATUMBA ME̱SE̱

Loba “a boli ná matumba ma bato me̱se̱, mena me nde maya mō̱ ma je o mundi ma wase mwe̱se̱.” (Bebolo 17:26) “Loba a titi ndando; nde o tumba te̱ nu nu mabwe̱ mo̱ bo̱ngo̱, a bola pe̱ te̱me̱ la sim, a makasabe̱ na mo̱.”—Bebolo 10:34, 35.

EDUBE OŃOLA WASE

“Na Yehova Loba a no̱ngo̱ moto, a jese̱ mo̱ o mōnda ma Eden o po̱ngo̱ mo̱ na tata mo̱.”(Bebotedi 2:15) Loba “a me̱nde̱ ńamse̱ ba ba mańamse̱ wase.”—Bebīsedi 11:18.

BOSINGA OŃOLA MUKUBO NA MUSONJE

“Langame̱ye̱ ońola ńai a mukubo ye̱se̱; ebanja longe̱ la moto di si tingam o bema bao, to̱ a bene̱ nde njoasoa.” (Lukas 12:15) “Ka ni titi ko̱nji na ńai a mbindo te̱ na mukubo ba si tubabe̱ to̱ dina oteten ańu, kana yangame̱nno̱ basangedi.”—Efeso 5:3.

BE̱ LA MBALE̱, NA NGIŃ’EBOLO

‘Di makeka o dangwa bwam o mambo me̱se̱.’ (Bonahebe̱r 13:18) “Nu nu mibe̱ a s’iba pe̱, nde a bole nde ebol’a bwam na mā mao.”—Efeso 4:28.

MWEŃA MA JONGWANE̱ BANE̱

“Embe̱ ba milema mi wo̱ledi, ongwane̱ babo̱bi, be̱ne̱ye̱ be̱se̱ we̱lisane̱.” (1 Tesalonika 5:14) “Pe̱pe̱le̱ bańue na mikusa o ndut’abu.”—Yakobo 1:27.

Bibe̱l e si mabola biso̱ bete̱sedi buka te̱. E malee̱ pe̱ biso̱ ne̱ni we̱le̱ be bete̱sedi o ebolo o longe̱ lasu la buńa te̱. E titi mbale̱ ná bato jita ba we̱le̱ te̱ bete̱sedi jeno̱ wa je̱ne̱ o ebolo, mitakisan jita mena bato ba benama ba be̱nno̱ nin we̱nge̱ mi si wusa be̱ e? Na mbale̱, bete̱sedi ba Bibe̱l be dia be be̱n epolo. Be pe̱ ná bongwane̱ biso̱ jita o nin we̱nge̱. Nde ne̱ni be bete̱sedi beno̱ ná bongwane̱ wa mo̱me̱ne̱ e?

Moto nu ta dibie̱ buka be̱se̱ o myango ma bato ba benama a kwali ná: “Dibie̱ di te̱se̱be̱ na sim na bebolo bao.” (Mateo 11:19) Nik’e titi mbale̱ e? Dibie̱ di me̱ne̱ne̱ nde o bebolo. We so̱ ná o dutea ná: ‘Bibe̱l ńe te̱ mweńa na mbale̱, nik’e s’angame̱n je̱ne̱ne̱ o longe̱ lam e?’ ‘Ne̱ni ńeno̱ ná ńo̱ngwane̱ mba o lembe̱ mitakisan na be̱nno̱ tatan e?’ Jombweye eyembilan ewo̱.

Delphine a ta a be̱ne̱ longe̱ la bwam, a ta pe̱ nde muto nu walame̱n jita. Nde buńa bō̱ a kusa mitakisan minde̱ne̱. Mun’ao ńa muto ńa ngoka a wedi. Diba lao di tabilane̱. To̱ bekusedi, a si ta pe̱ a be̱ne̱. Mo̱ ná: “Na si ta pe̱ ná so̱ṅtane̱ to̱ lambo; na si ta pe̱ na be̱ne̱ mun’am, mom’am, to̱ wum’a boja. Na ta na pimbea, na si ta pe̱ to̱ ná bia nja neno̱, longe̱ lam di si ta pe̱ di be̱ne̱ janda.”

Obiana Delphine a maso̱be̱ o be bete̱medi ba ndutu, a si ta a máso̱ṅtane̱ mweńa ma ben byala be makwale̱ ná: “Lo̱nge̱ lasu di minda nde musamba ma mbu, nde di buki te̱ nika, ke̱ di mabe̱ nde mulo̱mbi, nde ke̱ kumb’a longe̱ ńe̱se̱ ńe te̱ nde take.”—Myenge 90:10.

Bibe̱l nde ńongwane̱ Delphine o ni ponda ndutu. Di jongwane̱ di ta pe̱ mańaka jita. Ka nje te̱ milopo m’ekwali milalo mi mabupe̱ mi me̱nde̱no̱ lee̱, bato jita be̱n ná Bibe̱l ńo̱ngwane̱ babo̱ eyeka ponda ba we̱le̱no̱ malea mao o ebolo o nje e mombweye̱ mitakisan mabu. Tatan ba me̱ne̱ nde Bibe̱l ka ni njimbidi di kwaledino̱ o bebotedi ba nin kalati. Ńe diwengisan jita na yine̱ kalat’a kwaṅ ye̱se̱, bato ba si malangano̱ pe̱ to̱. Mo̱ nje e tilabe̱ oten buka te̱ nde e mawe̱le̱ mo̱ diwengisan na yine̱ kalati ye̱se̱ e? Mo̱nge̱le̱ ma Loba nde ma maso̱be̱ oten, nga ma bato ba benama e? 1 Tesalonika 2:13.

Yen ebe wa pe̱ o me̱ne̱ ná longe̱ le esungu, di londi pe̱ na mitakisan. Mitakisan mi nipula te̱ buka wa, o we̱ni o mawasano̱ lo̱ko̱mea, jongwane̱, na malea ma bwam e?

Jombweye mbadi ilalo Bibe̱l ńeno̱ ná ńo̱ngwane̱ wa o longe̱. Ńe ná ńo̱ngwane̱ wa o bia ne̱ni

1. samba mitakisan etum te̱ nika ńeno̱ ná e we̱le̱ bolane̱.

2. buka mitakisan ke̱ mi po̱i.

3. we̱lisane̱ bete̱medi o titino̱ ná o tukwa.

Milopo m’ekwali mi mabupe̱ mi me̱nde̱ kwalea yi mbadi ilalo.