Mary na mom’ao John, a ba maja nde o ekombo owe̱ni beno̱ ná ba langwea baboledi ba mawe̱ la Filipino myango ma bwam. O ponda diboa la COVID-19, Mary a tongwe̱le̱ o botea mokwa ma Bibe̱l seto̱ bukate̱ na bato ba maje̱ o ekombo a tano̱, nde a boli pe̱ nika na bato ba maje̱ o bekombo bepe̱pe̱. Ne̱ni e?

Mary a ta nde a baise̱ bato ba mokwe̱ Bibe̱l na mo̱ ná, “Mo̱ lo bi bato bape̱pe̱ be ná ba to̱ndo̱ jokwa Bibe̱l e?” Ba kwali te̱ ná e, na mo̱ a baise̱ ná, “Mo̱ le ná lo bola ná biso̱ na babo̱ di kwalisane̱ e?” Baise̱ la tet’a myuedi ka min di yo̱ki wana tombwane̱. Ońola nje e? Ońolana bato bena ba to̱ndi jokwa la Eyal’a Loba ba yo̱ki to̱ndo̱ langwea belongi ba mbia mabu na mako̱m nje beno̱ jokwa. Nje baise̱ la min myuedi di wanno̱ e?

Jasmine muto mō̱ nu mokwe̱ Bibe̱l na Mary a boli ná nun a boteye jokwa la Bibe̱l na bito bane̱i. Mō̱ ńabu, Kristine, a ta a to̱ndo̱ jokwa lao kańena a baise̱ Mary ná bokwe ngedi iba woki te̱. Ponda Mary a baise̱no̱ mo̱ nga a bi bito bape̱pe̱ bena ba mapule̱ jokwa Bibe̱l, Kristine alabe̱ nde ná: “E, na me̱nde̱ bola ná o bie mako̱m mam.” Ombusa woki to̱ ininga, Kristine a boli ná Mary a bie mako̱m mao mane̱i mena ma ta mapula jokwa Bibe̱l. Ombusa ponda, Kristine a boli ná Mary a bie mako̱m mao mape̱pe̱, mō̱ oteten abu pe̱ ma boli mo̱ mina ma bato bape̱pe̱ bena ba ta ba pula jokwa Bibe̱l.

Kristine a ta pe̱ a pula ná mbia mao mwe o Filipino pe̱ mokwe Bibe̱l. A kwalisane̱ so̱ Andrea mun’ao ńa muto. Andrea a se̱le̱ nde jo̱nge̱le̱ ná, ‘Mbo̱ṅ a Yehova ye nde ebasi ye pati po̱ te̱nge̱, ba si dube̱ Yesu, ba malanga pe̱ nde Male ma kwaṅ bukate̱.’ Nde ombusa jokwa diwo̱ bukate̱ a tuko mo̱nge̱le̱. Ponda te̱ a tano̱ okwa lambo la peńa, a makwala nde ná, “Etum te̱ Bibe̱l e makwalano̱ nika, nika ńangame̱n be̱ mbale̱!”

Ombusa ponda, Andrea a boli ná Mary a bie mako̱m mao maba na mwenj’ao ń’ebolo mō̱ bena ba botedi jokwa Bibe̱l. Angela ńango a Andrea nusadi ńe ndima, a ta a senga ke̱ ban ba mokwa, esibe̱ Mary bia nika. Nde buńa bō̱, Angela a baise̱ Andrea ná a bole ná Mary a bie mo̱, ná mo̱ pe̱ a be̱ne̱ jokwa la Bibe̱l la mo̱me̱ne̱. Angela a ta a to̱ndo̱ nje a tano̱ okwa. Ombusa mo̱di mō̱, a ta a kombe̱ bepasi ba Bibe̱l jita o mulopo a pula pe̱ ná bokwe  ngedi ine̱i woki te̱! Na jongwane̱ la Andrea, Angela a botedi o jukea o ndongame̱n tongwea na inte̱rne̱t.

Ponda Mary e̱nno̱ ná, Joshua, mom’a Kristine a si ta a po̱to̱ ke̱ mo̱ na Kristine be o jokwa, a baise̱ nde mo̱ nga a mapula jokwa mwemba na babo̱. Joshua a kwali nde ná: “Na mapula nde senga, o si baise̱ mba myuedi to̱ mō̱, o boli te̱ nika na mala nde.” Ombusa minuti matanu, a ta a mábaise̱ myuedi buka Kristine a pula pe̱ ná mo̱ pe̱ a mokwa Bibe̱l.

Tet’a myuedi Mary a baise̱no̱ mi wan jita la mokwa ma Bibe̱l. A boli ná Mbo̱ṅ a Yehova ipe̱pe̱ yalane̱ jokwa la jita labu oboso. O sukan, Mary a botedi tombise̱ 28 mokwa ma Bibe̱l o bekombo bene̱i be diwengisan.

Jasmin, mokwe̱ Bibe̱l ńaboso di kwaledino̱ o min myango, a dubisabe̱ o mo̱di ma Dibaba 2021. Kristine mo̱ a dubisabe̱ o mo̱di ma Emiase̱le̱ 2022 nde a timba pe̱ o Filipino o bwam ba be̱ na mbia mao. Bokwe̱ Bibe̱l baba bena Kristine a bolino̱ ná bokwe na Mary pe̱ ba dubisabe̱. Angela a dubisabe̱ ombusa myo̱di to̱ mi ninga e pe̱ paonia ńa ponda mususu tatan. Joshua mom’a Kristine, na mun’abu ńa muto, Andrea, name̱ne̱ pe̱ na bokwe̱ Bibe̱l bape̱pe̱ be o ńaka o mbad’a bwam.

O ebwea mbu yaboso, myango ma bwam mi ta mi lańa ná pe̱le̱pe̱le̱ oten a belongi ba mbia na mako̱m. (Yohane 1: 41, 42a; Bebolo 10:24, 27, 48; 16:25-33) We ná o baise̱ bokwe̱ Bibe̱l na ba o makwalisane̱no̱ na: “Mo̱ o bi moto nupe̱pe̱ ńena nu to̱ndo̱ o jokwa Bibe̱l e?” Nja nu bi mokwa ma Bibe̱l maninga moto eno̱ ná a botea tongwea na tet’a myuedi ka min e?