O s’ombwa je̱ne̱ne̱ l’eboko
DON, munasango mō̱ ńe Mboṅ a Yehova o Kanada, a mawe̱ o kwalisane̱ bato bena ba maje̱ o mangea. Don, a kwali jombwea mō̱ ńa ban bato ba si be̱n milongi ná: “Na si ta na máje̱ne̱ muje̱ o ngea to̱ mō̱ ńe mbindo kana Petro. A ta bobe kańena, a si ta pe̱ to̱ emea ná moto a siseye mo̱ be̱be̱ to̱ lee̱le̱ mo̱ muyao.” Don, a keki ngedi jita buka 14 la mbu o lee̱le̱ nun moto muyao.
Buńa bō̱ na Petro a baise̱ Don ná: “Nje mo̱ o matakise̱no̱ ńolo ońol’am e? To̱ moto a si be̱n mańaka mam. Nde ońola nje o mombweano̱ mba e?” Don a bolane̱ bepasi ba Bibe̱l belalo ná a tape mulema ma Petro. A se̱le̱ nde baise̱ Petro nga a bi ná Loba a be̱n dina la timtim, na mo̱ a baise̱ mo̱ ná mo̱me̱ne̱ a lange mo̱ o Bibe̱l o Myenge 83:19. Denge̱, o lee̱le̱ mo̱ ońola nje a mombweano̱ mo̱, a malangise̱ Petro Roma 10:13, 14 ni matele̱ye̱ ná “ebanja to̱ nja nu mabele̱ dina la Sango a me̱nde̱ jongisabe̱.” O sukan Don a langa Mateo 9:36 na mo̱ a baise̱ Petro ná mo̱me̱ne̱ a lange mo̱. Y’epasi e makwala ná: “Niponda e̱nno̱ mamuti, na mo̱ a bwea mo̱ ndedi, ebanja ba ta ba takatakane̱, ba comea ka mido̱ngi mi si be̱n mutatedi.” Na Petro a baise̱ na miso̱di o miso̱ ná: “Ne nde mō̱ ńa min mido̱ngi e?”
Petro a botedi o tukwa. Oke̱le̱, a se̱nje̱ mase̱du mao, a bo̱to̱ mbo̱ti Don abedino̱ mo̱. Petro a we̱ ná a be̱ bosangi ponda ye̱se̱.
Petro a ta be̱ a tila o kalati mambo ma longe̱ lao. Mapapa mao maboso ma si wusa langabe̱, nde ma mabupe̱ ma ta diwengisan. A ta a tila o dipapa diwo̱ ná: “Noko dina la Loba we̱nge̱. Botea tatan Yehova nde na makane̱no̱. Nika ńe betańsedi o bia dina lao. Don mo̱ ná Yehova e ná a be̱ Diko̱m lam la batabata, moto nu masengane̱ mba ponda ye̱se̱, ne ná na langwea mo̱ me̱se̱, na o to̱ njika ponda.”
Byala ba Petro besukan be ta nde bombwea bonańango. A tili ná:
“Na titi o senga bwam we̱nge̱. Mimbu mi nidilea mba. Nde to̱ e be̱ nde ná bon ba we̱nge̱ nde bwe buńa bam bosukan, na bi ná na me̱nde̱ pe̱te̱ je̱ne̱ diko̱m lam [Don] o Paradisi. Nika weno̱ o langa, bia ná na titi pe̱. Nde we̱n te̱ moto o kwed’am nu titi o so̱ṅtane̱ nje ye o tombe̱, kwalisane̱ mo̱, son o langeye mo̱ nin kalati ńa muso̱no̱ ma blu [nika ńe nde kalat’a jokwa la Bibe̱l “La vérité qui conduit à la vie éternelle” ńena ni bolabe̱ mo̱ mimbu oboso ba ponda]. * E makwala ná na me̱nde̱ pe̱te̱ je̱ne̱ diko̱m lam o Paradisi. Na dube̱ nika na mulema mam mwe̱se̱. Munaso̱ngo̱ ńandolo Petro.”
Ombusa pulame̱ la Petro ndom’ao ńa muto Umi a tele̱ye̱ ná: “Lambo ka mbu miba we̱nge̱, Petro a wasi mba. Ka nged’a boso ombusa etum a mimbu, a ta muńe̱nge̱. A yo̱ na lo̱.” Umi mo̱ na Don ná: “Na me̱nde̱ langa ni kalati ebanja ná lambo di tape munańango am mulema, nika ná di ta tobotobo.” Umi emedi pe̱ o jokwa na Mboṅ a Yehova po̱ kalati nisukan o busisabe̱ Qu’enseigne réellement la Bible?
Biso̱ pe̱ je ná di lee̱le̱ ndolo, o mulopo ma jombwa je̱ne̱ne̱ l’eboko, di lee̱le̱ pat’a bato ye̱se̱ we̱lisane̱. (1 Tim. 2:3, 4) Di boli te̱ nika, di me̱nde̱ we̱le̱ jongwane̱ bato bena, kana Petro, ba si be̱n je̱ne̱ne̱ la bwam o eboko, nde bena ba be̱n mulema ma bwam. Je ná di be̱ mbaki ná Loba, nu ‘mombwe̱ mulema,’ a me̱nde̱ bola ná mbale̱ e ńake o mulema ma ba bena ba dongame̱n.
^ par. 7 Ni ta ni busisabe̱ na Mboṅ a Yehova, ni si mabusisabe̱ pe̱.
