“Jangwa lo̱ngo̱ di sesabe̱.”
DAVID ńa Israel ńa kwaṅ nde a kwali ben byala o sesa muto nu po̱i dongame̱ne̱ mo̱. Dina lao di ta nde ná Abigail. Nje e tute̱le̱ David o sesa mo̱, na ne̱ni pe̱ eyembilan ao yeno̱ ná e be̱ biso̱ muse̱ṅ e?
David a dongame̱ne̱ nde nun muto nu babe̱ o ponda ńena a tano̱ a ńa Kiṅe̱ Saul mīla. Abigail a ta nde munj’a Nabal, m’bwaṅ ma moto nu ta nu dese̱ dibemba lao dinde̱ne̱ o midongo m’epas’a mikondo ma Yuda. David na bato bao ba ta nde “edima” ońola mabemba na batatedi ba Nabal. Ombusa ponda na David a loma bato ba mye̱ndi ombo’a Nabal o baise̱ mo̱ ná a bole babo̱ ‘to̱ nje ye mo̱ o dia’ ná ba kuse lambo la da. (1 Sam. 25:8, 15, 16) Njako a David e si ta bwambi kobisan na nje mo̱ na bato bao ba boledino̱ Nabal o tata mabemba mao.
Nde Nabal ńena beteledi ba dina lao be nde ná “Ńelemā” a ta nde a bola kaponda dina lao. Alabe̱ bato ba David bobe, a loa pe̱ babo̱. Na David a boṅsane̱ o ko̱kise̱ Nabal ońola byala ba bobe a to̱pino̱. Nabal na ndabo ao ba ta bangame̱n kwedi ońol’elemā ao.
Abigail a so̱ṅtane̱no̱ betune̱ be ta be pula ko̱ye̱ mbia mao dibokime̱ne̱ na mo̱ a te̱me̱ o po̱ngulane̱ mambo. A so̱so̱me̱ye̱ David o dina la Yehova. Na mo̱ a bola David ńena nu ta ńangame̱n be̱ kiṅe̱ da, náme̱ne̱ pe̱ na bato bao. David embi ná Yehova a bolane̱ Abigail o jeka mo̱ o koma maya. Na David a kwalane̱ Abigail ná: “Jangwa lo̱ngo̱ di sesabe̱; wame̱ne̱ pe̱ o sesabe̱, kana wekino̱ mba o koma maya na o kuna mbame̱ne̱ na dia lam bon ba we̱nge̱!”
Di si be̱ so̱ ka Nabal nu si ta nu bia timbise̱le̱ masoma ońola bwam ba boledino̱ mo̱. Omo̱ń a nika, je̱n te̱ ná bete̱medi ba bobe bō̱ be o lańa, di we̱ ná di bole me̱se̱ o sangilane̱ mambo. Je ná di timbise̱le̱ byala ba mulo̱nge̱ myenge nu kwalane̱ Loba ná: “Lee̱ mba so̱ṅtane̱ na dibie̱.”
Bane̱ ba me̱nde̱ je̱ne̱ ná beboledi basu be malee̱le̱ dibie̱ to̱ jangwa. E be̱ ná ba pase̱le̱ nika to̱ ke̱m, be ná ba kwala ka David ná: “Jangwa lo̱ngo̱ di sesabe̱.”
