O wase ńe̱se̱, manea ma jita la bekombo ma busise̱ mbenda ná bato ba pande mō̱ na nune̱ etum, meka pe̱ mako̱to̱ne̱ ma ntelele. Mboṅ a Yehova i mabupe̱ ma mambenda nde na benga pe̱ ko̱to̱me̱ o jowe̱ esibe̱ njo̱m to̱ po̱. Ná i bole nika, myemba mi botedi o bolane̱ belongisan ba video ka Zoom, o tombise̱ ndongame̱n.

 Ná ndongame̱n i we̱le̱ tomba ponda ye̱se̱ na o mbad’a bwam, Dibe̱le̱ di Madie̱le̱ di boli wonja ná myemba mi bolane̱ mabea ma wonja o jandea babo̱me̱ne̱ ko̱nt ńa Zoom. Be bedomsedi bongwane̱ jita ońola myemba mō̱ mena mi si ta mi be̱ne̱ ngudi o busise̱ 15-20 ma dollar (9 750 nate̱na 13 000 franki) to̱ buka nika o janda ko̱nt ńa Zoom. Mi myemba mi ta nde mi bolane̱ belongisan ba tete be si makase̱ muso̱ngi ma bato jita na be titi mbaki ndongo. Myemba me̱se̱ mena mi mabolane̱ ko̱nt ńa Zoom mi kusanno̱ bebokedi me o tombwane̱ jita ebanja e bo̱bi o bolane̱, e mako̱te̱le̱ pe̱ jita la bato ndongame̱n te̱. O nin we̱nge̱, buka 65 000 myemba o buka 170 bekombo me o bolane̱ Zoom mi kusanno̱ bebokedi.

 O Indonesia, mwemba ma Kairagi, o Manado, Sulawesi Pongo, mu nibolane̱ nde Zoom mu kusanno̱ bebokedi o tombise̱ ndongame̱n abu tongwea na video. Munasango Hadi Santoso mo̱ ná: “Nate̱na mo̱me̱ne̱ bonasango na bonańango bena ba si ko̱lo̱ngo̱ne̱ yi ńai a belongisan be o bwane̱ ndongame̱n muńe̱nge̱ tatan, tobotobo ońolana elongisan abu e si madima pe̱ son son te̱ obiana ndongame̱n e mapo̱ o su.”

 O Ekuador, o Guayakwil, Lester Jijón, Jr., mutudu mō̱ ńa mwemba ma Guayakanes Jedu, mo̱ ná: “Nika bonasango na bonańango jita ba si be̱nno̱ mo̱ni, e si wusa be̱ myemba mō̱ bu o janda dipapa la wonja la be̱ne̱ Zoom ni mongwane̱ ná mwemba mwe̱se̱ mu ko̱to̱me̱. Tatan, tongwea na ko̱nt ya Zoom yandabe̱ yena i mako̱te̱le̱ bato jita, je ná di we̱le̱ bele̱ bato bape̱pe̱ o jukea o ndongame̱n, esibe̱ bwa bo̱ngo̱ ba buka muso̱ngi ma bato.”

 O Zambia, o Lusaka, Johnson Mwanza, mutudu mō̱ ńa mwemba ma Ngwerere Pongo, a tili ná: “Bonasango na bonańango jita bā ná, ‘Zoom di kusanno̱ bebokedi e mongwane̱ biso̱ o be̱ batabata na bonasango na bonańango, buka nika di me̱ne̱ pe̱ ná Yehova a to̱ndi biso̱ a mombwea pe̱ biso̱.’”

 Yin ko̱nt ya bebokedi yandabe̱ nde na mo̱ni ma ekoted’a pond’a mbeu a ńolo. Mu mo̱ni mu mano̱ngo̱be̱ nde o mabea ma wonja ma mabolabe̱ ońola ebolo o wase ńe̱se̱. Mabea jita ka man ma mabolabe̱ nde o donate.isa4310.com. Di som jita ońola mabea mańu ma sanga la mulema, mena ma mongwane̱ pe̱ ońola mbeu a ńolo ipe̱pe̱ o wase ńe̱se̱.​—2 Korinto 8:14.