Loba e ka ni dongame̱n o je̱ne̱ mambo me̱se̱ na bola pe̱ to̱ nje e do̱lisan mo̱ o to̱ njika wuma. (Minia 15:3; Bonahebe̱r 4:13) Nde Bibe̱l e si mokwe̱le̱ ná Loba e wuma ye̱se̱ na o ponda ye̱se̱. O diwengisan, e mokwe̱le̱ nde ná Loba e nde moto, a be̱n pe̱ wuma a majano̱.

•   Ne̱ni Loba eno̱: Loba e nde mudī. (Yohane 4:24) Bato ba benama ba titi ná be̱ne̱ mo̱. (Yohane 1:18) Me̱ne̱ me̱se̱ me o Bibe̱l mena ma mato̱peye̱ ońola Loba ma malee̱ nde mo̱ ka moto nu be̱n wum’a boja; seto̱ ka mō̱ ńe wuma ye̱se̱.—Yesaya 6:1, 2; Bebīsedi 4:2, 3, 8.

•   ● Wum’a boja ya Loba: Loba a maja nde o mo̱ń ńe mudī, ńe diwengisan na mo̱ń ni me̱ne̱ne̱ na miso̱ m’eyobo. O ni mo̱ń nde Loba a be̱nno̱ “wum’a bejedi [bao], o mo̱ń.” (1 Kiṅe̱ 8:30) Bibe̱l e makwala ná “buńa bō̱ bana ba Loba ba ta ba po̱ oboso ba Yehova,” a nika e malee̱ nde ná Loba a be̱n wuma a majano̱.—Hiob 1:6.

Yete̱na Loba a titi wuma ye̱se̱, mo̱ e ná ombwea mba e?

 E. Loba a mombwea mot’a benama te̱. To̱ná a majano̱ nde o mo̱ń ńe mudī, Loba a me̱ne̱ ba bena, o nin wase, ba be̱n ńo̱ngi o bolea mo̱ na mbale̱, a mongwane̱ pe̱ babo̱. (1 Kiṅe̱ 8:39; 2 Myango 16:9) Jombweye te̱ ne̱ni Yehova a malee̱le̱no̱ ná a mombwea baboledi bao ba jemea:

•   O makane̱ te̱: Yehova a masenga muka mo̱ngo̱ o ni ponda me̱ne̱ weno̱ o kane̱.—2 Myango 18:31.

•   Ni ponda mulema mu yukino̱ wa: “Yehova a bakam na babe̱ne̱ milema mi ńo̱sedi, a mongwane̱ babe̱ne̱ mudī mu sibi.”—Myenge 34:19.

•   Ni ponda o be̱nno̱ ńo̱ng’a bediedi: Yehova a me̱nde̱ ‘lee̱ wa, a bīse̱ wa ngea wangame̱nno̱ dangwa.’—Myenge 32:8.

Nje bato bō̱ ba mo̱nge̱le̱no̱ jombwea be̱ la Loba wuma ye̱se̱

 Jo̱nge̱le̱ la mpenga: Byala ba Myenge 139:8 be makwale̱ ná: “Yete̱na nabo o mo̱ń, wa we oten; yete̱na nalo nanga o mundi ma bawedi, wa we oten,” be mabamse̱ nde ná Loba e wuma ye̱se̱.

 Mbale̱: Y’epas’a Bibe̱l e si mato̱pea ońola wuma bejedi ya Loba. E mokwe̱le̱ nde ná epolo to̱ ewo̱ e po̱ti owe̱ni Loba a titino̱ ná a po̱ jongwane̱ wa e titi.