ZANNOO 47
Ho Eɛ Siri Ka Ho De Suobu?
Saŋa na hoŋ piili zanna a Baabole na, ho wa zannɛɛ yɛlɛ yaga a kyaare Jehoova. Aminekaŋaŋ, yɛlɛ na hoŋ zanne na vɛŋɛɛŋ hoŋ leɛre yɛlɛ mine ho zemmo poɔŋ. Kyɛ, yɛlɛ mine bebeŋ a na toɔ̃ pigi bo sori ka ho de ho meŋɛ ko Jehoova a de suobu. A zannoo ŋa poɔŋ, te na zannɛɛ yɛlɛ na mine naŋ na toɔ̃ pigi ho suobu deebo sori, ane lɛ hoŋ na toɔ̃ e a zɔɔtoɔ̃ a yɛlɛ ŋa.
1. Wala aŋ seŋ ka ho baŋ yɛlɛ te seŋ sɛre kyɛ de suobu?
Aseŋ ka ho “baŋ a yelmeŋɛ” soŋ sɛre kyɛ de suobu. (1 Timoti 2:4) Kyɛ, lɛ ba wuli ka a seŋ ka ho baŋ a Baabole soorebie zaa nɔɛ iribo sɛre kyɛ de suobu. Haali Kristabiiri naŋ de suobu aŋ kɔɔre naŋ zannɛɛ a Baabole. (Kolosi 1:9, 10) Kyɛ, aseŋ ka ho baŋ a Baabole wuluu naŋ e nimizeere soŋ, a woŋ a muni meŋ. A lantaapuoruu nembɛrɛ na toɔ̃ soŋ boŋ ka ho wa nyɛ ka bammo na hoŋ taa na wuleeŋ ka ho na baŋ de la suobu, bee ka a na seŋ ka ho zanne yɛlɛ yaga poɔ.
2. Bo yɛlɛ mine aŋ seŋ ka ho e sɛre kyɛ toɔ̃ de suobu?
Sɛre hoŋ na de suobu na, aseŋ ka ho “leɛ [ho] eebo a leɛ gaa Naaŋmen zie.” (Kanne Toma 3:19.) Wala ka lɛ wuli? A wuleeŋ ka aseŋ ka ho e kaŋdabaŋkalɛ a kyaare yelfaare na zaa ho naŋ e saŋa kaŋa naŋ pare na. Aseŋ ka ho puore sɔre Jehoova ka o di suuri ko bo. Mɔɔ kyɛ tage ho meŋɛ yi yelzaa naŋ ba pɛlɛ Naaŋmen poɔ, a kyɛ e siri ka ho erɛ yɛlɛ naŋ pɛlɛ Naaŋmen poɔ. Kyɛ lɛ yoŋ naane, aseŋ ka ho piili gɛrɛ a lantaapuoruu lammore a kyɛ moɔlɔ a duorisoŋ meŋ aŋa naaŋ moɔlɔ naŋ ba de suobu.
3. Bonso aŋ ba seŋ ka ho vɛŋ ka dabeɛ̃ erɛ bo ka ho de suobu?
Dabeɛ̃ maŋ erɛɛ noba mine ka, ka ba naŋ de suobu ba koŋ toɔ̃ erɛ yɛlɛ na ba naŋ eŋ noɔre ko Jehoova ka ba na erɛŋ na. Yelmeŋɛ la, saŋa kaŋa ho na maŋ ŋmɛɛ gbɛɛ, haali noba na mine naŋ da puoro Jehoova yelmennoŋ poɔŋ baŋ sɛge ba yɛlɛ eŋ a Baabole poɔŋ na meŋ gba da maŋ ŋmɛɛ gbɛɛ. Jehoova baŋɛɛŋ ka te ba pɛgiyi, azuŋ, te na baŋ ŋmɛɛ gbɛɛ wagre mineŋ. (Kanne Yieme 103:13, 14.) Kyɛ, ka hooŋ mɔɔrɔ ho mɔɔbo zaa ka ho erɛ yɛlɛ naŋ pɛlɛ Jehoova poɔ, a maŋ vɛmeŋ ka Jehoova poɔ zaa pɛle! Jehoova na soŋ boŋ. Jehoova vɛŋɛɛŋ teŋ baŋ peɛlaaŋ ka, bonzaa “kontoɔ̃ wɛle te yi [o] nɔmmo” poɔŋ.—Kanne Urom 8:38, 39.
ZANNE YƐLƐ YAGA POƆ
A zannoo na soŋ boŋ ka ho nyɛ ka, ka hooŋ baŋ Jehoova soŋ, a tere sori ka Jehoova soŋ bo, lɛ yɛŋ ho na toɔ̃ zɔɔtoɔ̃ la yelzaa naŋ pigi ho suobu deebo sori.
4. Zanne Jehoova yɛlɛ a bamoo soŋ
Wala aŋ seŋ ka ho baŋ Jehoova ta sɛre kyɛ toɔ̃ de suobu? Aseŋ ka ho baŋ Jehoova soŋ, ka lɛ vɛŋ ka ho nɔmoo a kyɛ erɛ yɛlɛ meŋ naŋ pɛlɛ o poɔ. Ŋmɛ a VIDIO a nyɛ lɛ Baabole zannezanneba mine naŋ toɔ̃ e a zanne Jehoova yɛlɛ a wa bamoo soŋ, a kyɛ nɔmoo meŋ. Ka a vidioŋ wa baare, yɛ gyieli a soorebie naŋ tu na yɛlɛ.
-
Aŋa lɛ ho naŋ nyɛ yi a vidio poɔŋ na, boŋ toɔ̃ soŋ a Baabole zannezanneba ŋa baŋ nare ba menne a te de suobu?
Kanne Urom 12:2, a kyɛ gyieli a soorebie naŋ tu na yɛlɛ:
-
Ho sagedieŋ ka yɛlɛ na hoŋ zanna yire a Baabole poɔŋ, bee yɛlɛ na hoŋ zanna yire Jehoova Sieree Deme zieŋ na e la yelmeŋɛ bee?
-
Ka hooŋ ba sage lɛ di, wala aŋ seŋ ka ho e?
5. Lɛ hoŋ na toɔ̃ e zɔɔtoɔ̃ yelzaa naŋ pigre bo sori
Ka teneeŋ wa de te menne a ko Jehoova a de suobu, te zaa maŋ tuoree yelkpeɛne. Kaa a vidio ŋa a nyɛ yelkpeɛne na mine hoŋ na baŋ tuore. Ŋmɛ a VIDIO, a kyɛ gyieli a soorebie naŋ tu na yɛlɛ.
-
Aŋa lɛ ho naŋ nyɛ yi a vidio poɔŋ na, bo yelkpeɛne aŋ da seŋ ka Narangerel zɔɔtoɔ̃ sɛre kyɛ toɔ̃ puore Jehoova?
-
Sobuo ka nɔmmo na oŋ taa ko Jehoova na da somoo oŋ zɔɔtoɔ̃ a yelkpeɛne?
Kanne Yeng Yelibie 29:25 ane 2 Timoti 1:7, a kyɛ gyieli a soorebiri naŋ tu na yɛlɛ:
-
Boŋ maŋ ko te nyaa teŋ zɔɔtoɔ̃ te yelkpeɛne?
6. Dɛle Jehoova o na soŋ boŋ
Jehoova na soŋ boŋ ka ho erɛ yɛlɛ naŋ pɛlɛ o poɔ. Ŋmɛ a VIDIO, a kyɛ gyieli a soorebie naŋ tu na yɛlɛ.
-
Boŋ da vɛŋ ka dabeɛ̃ erɛ a Baabole zannezanna ka o de suobu?
-
Bo yɛlɛ oŋ da zanne aŋ somoo oŋ maaleŋ dɛle Jehoova yaga zaa?
Kanne Aizeeya 41:10, 13, a kyɛ gyieli a soorebiri ŋa yɛlɛ:
-
Bonso hoŋ na baŋ sagedi peɛlaaŋ ka ho na baŋ paalɛɛ noɔre na ho naŋ eŋ ko Jehoova ho meŋɛ deterebo saŋa na?
7. Wuli nimipa a ko nɔmmo na Jehoova naŋ wuli bo na
Ka hooŋ teɛre lɛ na Jehoova naŋ wuli bo nɔmmo a seŋ na, lɛ na vɛmeŋ ka ho taa nimipa a koo, a kyɛ lɛ boɔrɔ ka ho puoruu a gɛrɛ wagre naŋ ba taa baaraa. Kanne Yieme 40:5, a kyɛ gyieli a soorebiri naŋ tu na yɛlɛ:
-
Bo maaloo ka Jehoova ko bo ka ho niŋe paalaa yaga zaa?
Daŋyele Gyeremaiya da nɔŋɛɛ Jehoova yaga. O da nɔŋ la Jehoova yelbiri na meŋ. O da nyɛɛŋ ka a e la apoɔsori yaga ka Jehoova yuori dɔgle o zuŋ. O da yelko la Jehoova ka: “Ka ho yelihoŋ e N [popɛle] ane N sukyiri nyagiŋbo, bozuŋ ho yuori baŋ de boɔlɔ ma, oo Jehoova Naaŋmen.” (Jeremaiya 15:16) Iri a soorebie ŋa nɔɛ:
-
Ka hooŋ wa e Jehoova Sieree Deme kaŋa, bonso ka a yɛlɛ ŋa e apoɔsori naŋ e o yoŋ?
-
Ho boɔrɔŋ ka ho de suobu a wa e Jehoova Sieree Deme kaŋa?
-
Yelkaŋa pigre boŋ sori ka ho e lɛ bee?
-
Bo yɛlɛ hoŋ teɛre ka a seŋ ka ho e ka lɛ vɛŋ ka ho toɔ̃ de suobu?
NOBA MINE MAŊ YELEŊ KA: “Dabeɛ̃ erɛ maŋ ka N de suobu, bonso, N suobu deebo puoreŋ N na eɛ yɛlɛ naŋ na sãã Jehoova poɔ yaga zaa.”
-
Lɛ hoŋ meŋ teɛre bee?
A ZANNOO YELNIMIZEERE
Jehoova na toɔ̃ soŋ boŋ ka ho zɔɔtoɔ̃ yelzaa naŋ pigre bo sori ka ho de suobu.
Bo Hoŋ Zanne
-
Wala aŋ seŋ ka ho baŋ a Baabole poɔ yɛlɛ te seŋ sɛre kyɛ de suobu?
-
Bo yɛlɛ mine la aŋ seŋ ka ho leɛre ho zemmo poɔŋ sɛre kyɛ na baŋ de suobu?
-
Bonso aŋ ba seŋ ka ho vɛŋ ka dabeɛ̃ erɛ bo ka ho de suobu?
YƐLƐ MINE NAŊ LƐ BEBE
Bo yɛlɛ zuŋ aŋ seŋ ka ho de ho meŋɛ ko Jehoova a de suobu? Kanne a yɛlɛ ŋa a nyɛ a noɔre iribo.
Kanne a yɛlɛ ŋa a nyɛ lɛ hoŋ na toɔ̃ e a zɔɔtoɔ̃ yɛlɛ naŋ pigre ho suobu deebo sori.
Dɔɔ kaŋa da zɔɔtoɔ̃ la yelkpeɛne yaga sɛre kyɛ de suobu. Kaa a vidio ŋa a nyɛ yɛlɛ naŋ da toɔ̃ somoo.
A piilee saŋa na, dabeɛ̃ da erɛɛ dɔɔ kaŋa baŋ boɔlɔ Ataa ka o de suobu. Kaa a vidio ŋa a nyɛ bon naŋ da toɔ̃ somoo oŋ de a gbɛre ŋa naŋ e nimizeɛ yaga zaa na.
